قصة ولادتي00

السلام عليكم ورحمة الله وبركاته

بقولكم قصة ولادتي اللي بجد شفت فيها الموت وعرفت صدق قدر أمي

بدأ عندي الطلق من فجر الخميس بتاريخ 24رمضان وكنت وقتها ماخذه من التاسع

بس 5أيام

لكن اللي يتذكروني من العضوات يعرفون ان حملي اصلا كله بالمثبتات

بس قالت لي دكتورتي اول ماتدخلين التاسع اتركيها لأن تأخير الولادة موب في صالحك

المهم انا بدا معاي افرازات زي المويه بس كانت خفيفه مرره واكثر شي مغص والم في الظهر

لكني قلت بتحمل اخاف اروح للمستشفى ويفطروني وفي الاخير ماتصير ولاده وتصبرت لما افطرت المغرب

يوم جت الساعه9 الليل والانفس الالم ونفس الافرازات وابدا اتسدح

وكل من اكلمه يقولي وش في صوتك شكلك تعبانه قلت خلاص مالي الا انسدح وانام

لاومن شين الحظ زوجي كان في الدوام ولاراح يطلع الا11ونص

المهم وتجي10 و10 ونص قلت خلاص ماصارت ماعاد اقدر اتحمل اكثر وادق عليه قلت انا تعبانه شوي تعال

وعلى ماجاء ولبست ورحنا وصلت المستشفى وعلى طول على غرفة العمليات والولادة

ويدخلوني غرفة الولادة وكانت الساعة وقتها12 الاربع الليل وتجي تكشف قالت لالسى بس منفتح1ونص سم

قلت وشو يعني اروح للبيت قالت لالامافيه روحه لازم نتابعك

وكل شوي يتابعون الى تقريبا الساعه4 الفجر وهو توه منفتح بس1ونص وقالوا لي احتمال تولدين الصباح

وجت7 الصبح وتكلمني دكتورتي قالت لازم تمشين في الغرفة عشان ماتجي 9 او10الصبح الا انتي والده

واقوم وامشي وامشي وانا اتألم ماني بقادره وتجي بعدها تكشف قالت لسى2سم

وتقريبا لما الظهر ماانفتح الا 4 سم وعطوني طلق صناعي بغيت اموت منه

اصيح صياح اقول خدروني ولدوني قيصريه سووا اللي تبون

المهم خلاص ماعاد اقدر حرام عليكم مافي قلوبكم رحمه والله ولاحياة لمن تنادي

عطوني مسكن وعطوني مخدر بس مااحس انه يخفف الالم الطلق مرره قووي

صرت احس بحراره تحت وماجاء على المغرب الا قالت لي انفتح6سم

ويوم جت 9 الليل قلت خلاص تعبت انا بروح دورة المياه تكرمون

وتقولي النيرس لامافيه روح انا فيه شوف شعر بيبي واقعد اصيح

واشوفها تجهز الاشياء والاغراض وماجت الدكتوره الا وهو منفتح8سم وسووا

توسعة وطبعا تخدير موضعي والحمدلله تمت الولادة الساعه10 ونص الليل يوم الجمعة 25رمضان ووصل الأستاذ عبدالرحمن

بعد معاناة22ساعة لكن الحمدلله

اللهم لك الحمد كما ينبغي لجلال وجهك وعظيم سلطانك

والله يرزق المسلمين الذرية الصالحه يارب