قصة ولادتي .. ادعو لي ولابني رجاء

هيني جيت ومعاي قصة ولادتي
المهم انه انا بكرية .. واخر دورة كانت عندي في 15\8\2006 يعني لسا ما خلصت شهري .. والحمد لله على كل شي .. وجبت براء الله يحفظه ويحميه...
يوم الاربعا المسا اللي هوي 9\5 في الليل قلت بدي اعمل شي لانه لا معي طلق ولا توسع وانا مستعجلة بدي اولد لانه اول بيبي ..
حرقت ميريمية وقعدت فوقها وتبخرت بدخانها... عملت هالعملة تلات مرات تقريبا وزوجي متضاي قمن الريحة لانه الدنيا في الليل وكل شي مقفول يعني الريحة مللت الشقة كلها وانا ولا على بالي هههههه
الخميس كان موعدي عند الدكتور.. الصبح لما صحيت بعد الفجر لقيت دم زهري.. قلت هلت البشاير.. وبعد بشوي صار الدم اقوى.. اخدت شور سخن.. وفي اخره حسيت بوجع قوي في بطني ولقيت كتل دم نزلت عليي .. رحنا بسرعة للدكتور على الموعد.. عمل لي تخطيط وقال لي كل شي تمام .. ولما قلت له رجعت الصبح.. عمل لي فحوصات زلال وتسمم حمل بسرعة وطلع كل شي تمام.. وقال لي معك من 1 يوم ل 7 ايام وبتولدي والبيبي في الحوض ما بيقعد اكتر من اسبوع الا وهوي مولود لانه تحت كتير..
قلنا الحمد لله.. وروحنا بدون فحص داخلي طبعا لاني ما رضيت لاني بيوجعني ...
الجمعة استمر الدم وما انقطع... فرحنا الصبح على المسشتفى.. والدكتور عمل لي فحص داخلي وقال لي فقط 1 سم. ولسا ما معك وجع .. بس الدم مشكلة.. لازم تنامي تحت المراقبة... انا رفضت لاه الممرضة المناوبة كانت لئيمة كتير ... وزوجي كمان ما ارتاح لها..
روحنا وما نمت عندهم.. والمسا زوجي رجعني ليعمل تشيك ليتاكد انه كل شي منيح لانه الدكتور كان خاليف من انفصال المشيمة لانه الدم ما توقف .. وما كالن فيه اي تغير .. نفس الشي 1 سم.. والوجع بسيط كتير...
رحنا عند حماتي لانه بيتها قريب من المستشفى وكان زوجي بدو ننام عندها لحتى لو صار شي نصل بسرعة المسشتفى وحماتي كان هيك رايها.. بس انا ما قبلت كنت متاكدة انه 1 سم ولا يمكن تكون ولادة...
المهم حماتي رجعت عملت لي تبخيرة الميرمية لما صار عندي وجع في بيتها وقالت لي لو حقيقي بيقوى وبتولدي.. والا خلاص بيروح.. وفعلا راح .. وروحنا على بيتنا الساعة 10 المسا تقريبا... ونمنا الساعة 12 ونص ومافيه اي شي.. الساعة 2 الا 10 دقايق تقريبا صحيت على شي بينزل مني قمت بجري على الحمام الا والماي نزلت .. ما خبرت زوجي ورجعت نمت .. الساعة 2 ونص صحيت على وجع كبير رحت الحمام.. ولقيت الدم لسته بينزل... وصرت اكل تمر وامشي في البيت شوي .. وصار الوجع يزيد ويتكرر كل 40 دقيقية بالضبط... لحتى صارت الساعة 4 و 45 دقيقة صحيت زوجي يصلي الفجر .. وخبرته انه معي وجع وانه يروح ينام لو صار متقارب بصحيه.. ويادوب لحق يصل الغرفة الا وانا اصرخ من الوجع.. اجتني الطلقة في ظهري .. ومن وقتها عرفت شو الطلق اللي في البطن وشو الطلق اللي في الظهر...وضليت اتلوى وابكي ومش عارفة شو اعمل ولا زوجي عارف شو يعمل لحتى راحت الطلقة بعد دقايق... لبس زوجي بسرعة وانا بقيت باواعيي حتى بالبابوج رحت المسشتفى.. وكنا اصلا حاطين الشنطة في الشسيارة من الجمعة .. ورحنا بسرعة وفي الطريق راح كل الوجع... صرت بدي ارجع البيت .. ما بدي اروح للمستشفى.. وزوجي ما رضي.. ووقفنا في اشارع حوالي 20 دقيقة وهوي يقل لي خلينا فقط نستنا ...
المهم شوي واجاني الوجع الرهيب فبسرعة دخل فيني المستشفى.. ورحنا للدكتور وكان الدكتور مبلغ الممرضات لو جيت يحولوني فحص مباشرة ... المهم اجت الممرضة بدهل تفحصني داخلي وكانت اول مرة باعرف انهم ممكن يعملوا هيك.. دخلت ايدها من هون ونزلت عليي مية بالبلا من هون.. طلعت لسا ما كانت مية الراس نازلة.. وهيي اللي نزلتها... فنادت الدكتور بسرعة.. وانا بدا معي الوجع .. اجا فحصني وقال لي لساتك 1 سم.. وحولوني تخطيط ... قعدت ساعة بالضبط والوجع يزيد كل شوي .. وهيي تقل لي فقط اتنفسي اياكي تدفعي ولا في اي حال ... قلت لها اوكي..
الساعة 7 تقريبا تغيرت الشيفتات للاطباء والممرضات.. واجوني ممرضات متل العسل.. خلتني الممرضة اروح الحمام وارتاح.. وقالت لي امشي ... طلعت امشي الا وفيه وحدة حامل داخله مع امها.. لسا دخت غرفة الولادة اللي جنبي الا هيي مية الرايس بتنزل عندها.. وصرخت صرخة واجتها المررضة متل الصاروخ وقالت لها اطلعي السرير وتصرخ فيها وحملتها غصب عنها على السرير الا والبيبي بينزل !!! انا قلت يا الله ما ساهل الولادة .. صرخة وولادة ...
شوي الا والممرضة بتصرخ في امها وبتقل لها كان البيبي رح ينزل على الارض وبنتك تموت ليش لهلا بتستنوا وهي البطن الخامس هدا يعني عارفة شو الطق والولادة.. المهم المخلوقة هاي صار معها نزيف حاد .. وبعدين الحمد لله كل شي صار تمام...
انا صرت اتمشى والوجع لما يجيني في الظهر اقول روحي طلعت وما اقدر اتحرك واصير ابكي واسكر تمي بايديي والا اصرخ ...
دخلوني الغرفة مرة تانية الساعة 7 وشوي الصبح.. وخلوني اروح الحمام كمان مرة .. وفحصتني الممرضة الجديدة وحطت لي ابرة جلوكوز .. واعطتني فيها ابرة وقالت لي هاي لتسريع الطلق .. لانه نزلت مية الراس وبنخاف على البيبي وانتي بعدك ما صار عندك توسع ولا طلق.. والدكتور منعني اكل اي شي .. قال لزوجي ممكن تتحول قيصري لو ما صار معها توسع من هون للعصر لانه مية الراس خلاص نزلت ... منعوني حتى من المية .. وقالوا لزوجي روح على شغلك لسا ما بتولد قبل العصر .. وراح زوجي جاب ماما وحماتي .. وراح ...
انا الوجع صار معي رهيب .. طول ما هوي في البطن اتنفس واقدر اني ما اصرخ كتير شوي يعني .. ولما تيجي الطلقة في الظهر اصير بدي اهرب من السرير واصرخ وهم يجوا يجروا يمسكوني ويقولوا لي الابرة هلا بتؤذي نفسك.. وحماتي وماما قاعدات بيحكوا عن مغامراتهم في الطلق وهديك ما كانت تصوت وهديك كانت تصوت وما باعرف شو وانا كنت معصبة وصرت اصرخ فيهم التنتين وقلت لهم ما بدي اسمع صوتكن اذا بتحكوا اطلعوا برا .. وزوجي صار يصيح ما حد يحكي لها شي وما تحكوا معها بتنرفز وما حد يزعلها ..
وانا في الطلق كنت اترجى زوجي ياخد البيبي يومين .. قلت له انا حملت قريب ال 9 شهور احمله انت يومين ما رضي !!!! قال لي ما دخلني باحمله لما ينولد ههههههههههه
المهم .. انا كل شوي الوجع يزيد اصير اصرخ ويصيحوا عليي ويقولوا لي هيك بتتعبي نفسك فقط تنفسي ولا تدفعي .. بيصير معك تمزق في عنق الرحم .. وانا اتنفس .. كانوا يقولوا لي نفس بطيء لا تتنفسي بسرعة بتنهكي قواكي ..
بقيت من بعد الساعة 7 وكل شوي ما باعرف كل كام بتيجيني طلقات متسارعة .. ومؤلمة.. اجتني الممرضة فحصتني الساعة تقريبا 7 ونص قالت لسا 1 سم .. فاعطتني ابرة تانية للتسريع .. ومتت من الوجع .. وصارت كل شوي تيجي على التخطيط تتطلع وتتركني وانا بتالم واترجاهم يعطوني شي يخفف .. وهم يقولوا لي لسا بدري ... اجتني قريب الساعة 8 ونص فحصت الا انا 4 سم مفتوحة.. قالت لي بطلة هههههههههه واعطتني ابرة جديدة بتحطها في المحلول وانا بيزيد معي الوجع.. وصارت كل نص ساعة تعطيني اشي جديد وتفحص.. اجت الساعة 9 ونص تقريبا الا انا مفتوحة 7 سم .. فاعطتني ابرة تانية في الفخذ من ورا .. وقالت لي هلا بنعطيكي مسكن واعطاناكي قبل هيك ابرتين ... وصارت تعطيني ابر شي للتسريع وشي مسكن ويطلعوا على التخطيط ويجي الدكتور ويقول لي ممتاز .. انتي ممتازة استمري في التنفس عم تفتحي الرحم بشكل منيح وسريع .. وانا اقرا قران واتوجع.. بس شو هلكت ... لاني مش ماكلة ولا شاربة وكله طلع متواصل من الساعة 7 .. اجت الساعة 10 الا 10 الا وهم بيحكوا خلاص 9 سم ولادة... وفكوا عني الجهاز وقالت لي بدي تتخلصي من كل البول .. ودخلت معي الحمام ورفصت تتركني لحالي خافت ادفع هههههههههه وتقل لي اتنفسي.. وما قدرت اتخلص من البول .. ففتحت لي الحنفية وقالت لي اطلعي على الحنفية بس وحاولي بدون دفع ههههههههه وبعدين رجعتني السرير وانا بتوجع بموت من الوجع...
وخلوني استعد للولادة .. وجابوا اشياء وخلوني ارفع رجليي .. واعطوني ابرة وانا اصلا كان من لما كنت 8 سم صرت بدي اختنق وحطوا لي الاكسجين .. فصرت مدروخة مش صاحية لشي .. مرة باصرخ ومرة بنام .. وتعبااااااااااانة.. شوي وصاروا يقولوا لي ادفعي .. وصحيت لقيت فيه 3 ممرضات ودكتور .. وطبعا انا ما فيني قوة .. ضليت من الساعة 10 الا 5 دقايق للساعة 10 و 25 دقيقة تقريبا وانا ادفع والراس يطلع شوي ويرجع يدخل .. والدكتور مش عاجبه ويحكي لي ادفعي للاخير .. بس لما تروح الطلقة كانوا يقولوا لي لا تدفعي اتنفسي فقط..
كان الوجع يجي رهيب بس ما يستمر غير دقايق فما الحق ادفع .. وقوة دفعي تيجي ضعيفة كتير.. فما اقدر اكمل.. صارت الممرضة والدكتور يحكي لي هيك هلكتي البيبي وصاروا يجروا يطلعوا على التخطيط يحكوا لا قلبه منيح.. ادفعي ادفعي...
هلكت وصرت اصرخ في الدكتور واقل له اشفطه ما بدي ادفع .. مش قادرة.. واذا ما بدك تشفطه حولني قيصري رح موت مش قادرة اكتر..
انا من الاكسجين كنت اسطل هههههه يعني ابطل عارفة شو بصير حوليي واصحى فقط على الوجع واصير ابكي وادفع ... ومش قادرة اصلا ادفع
بقيت نص ساعة ادفع يطلع راس البيبي وبعدين يرجع لانه دفعتي ضعيفة .. وبعدين صرت ادفع اكتر وقالوا لي كلها شوي وخلاص بتولدي ادفع بشكل متواصل ولا توقفي الدفع لما تجيكي الطلقة .. وطبعا انا كنت رح موت واحس نفسي رح ينقطع ومش قادرة بالمرة ..
في الاخير قعدت ساعة تماما في دفع البيبي و 3 ساعات في الطلق الصناعي ..!!!
كانوا متوقعين اني اضل اخد طلق صناعي للعصر .. بس انا استمر معي 3 ساعات وصرت جاهزة للولادة.. لهيك تشجعوا هم وانا هلكت لاني ما كنت ماكلة شي لانهم منعوني على اعتبار انه ممكن في اي لحظة اتحول قيصري .. وما كنت نايمة الليل من الطلق .. وكمان الاهم 3 ساعات طلق سريع وقوي ورا بعض ما بقي فيني اي قوة لادفع..
في الاخير شقوني ! وما باعر كم غرزة عندي لاني سالت الممرضة قالت لي مش كتير بس على تلات طبقات .. طبعا انا مش عارفة كيف وما سالت !
البواسير كانت معي قبل الولادة بس مع الولادة بطلت اقدر امشي او اقعد منها.. اكيد ساعة وانا ادفع !!!
جابوا لي ابني حطوه على صدري وقالوا لي حاولي ترضعيه انا ما قدرت وما كنت بدي حتى احضنه ولو ما شفته في هديك اللحظة ما كانت كتير فارقة!! كنت مش متخيلة شكله ولا شي وشفته من بعيد واكتفيت لاني تعبانة كتير وهلكانة .. ولاني طولت البنج الموضعي تحت كان راح وبالتالي شعرت بكل غرزة وهي تنشك فيني يعني تصوروا الوجع!!
اجت ماما وحماتي بعد ولادتي .. وبعدهن بشوي اجا زوجي.. زوجي حضر معي كتير من فترات الطق القوي .. بس بعدين راح لشغله .. وخلال ساعة الدفع فقط ما كان موجود.. واجا خلال 5 دقايق من ولادتي .. كان رح يطير من الفرحة لما شاف البيبي مع انه راسه طلع بشكل مستطيل ههههههههه وقالوا لي البكرية هيك بيطلع راس ابنها الاول .. الحمد لله هلا راسه طبيعي .. يعني رجع عادي...
المهم..
هاي هيي قصة ولادتي .. اكيد مليتوا
بس المهم لا تعملوا متلي
انا ما كان الرحم مفتوح وانا مستعجلة .. عملت تبخير ميرمية ففتح الرحم وقعدت يومين ينزل عليي دم وخافوا من انفصال المشيمة .. فقط كان معي طلق عادي مش قوي ولما يقوى ما يكون منتظم يعني مش طلق ولادة ونزلت مية الراس ولساته الرحم مفتوح 1 سم.. لهيك حضروا غرفة العمليات للقيصرية وبدوا معي محاولات الطق الصناعي والحمد لله نجحت ..
هلا انا خايفة انه كل ولاداتي طلق صناعي .. سمعت ناس بيحكوا هيك.. والدهى انه خايفة انه يكون قيصري لاني سمعت الممرضة بتحكي للدكتور اللي استغرب انه راس البيبي صغير كتير ومع هيك قعدت ساعة اطلع فيه .. قالت له عندها الفتحة ضيقة يعني المرات الجاية يمكن اصلا اتحول قيصري لانه صعب يطلع البيبي منها ..
نصحية تانية
رضعوا البيبي بمجرد خروجه للوجود ولا تعملوا متلي بعد ب 5 ساعات لحاولت ارضعه وطبعا ما عرفت ارضعه واعطوه صناعي في الليل ليسكت لانه ضل يبكي لانه جوعان.. وصار معاه صفار لانه ما رضع طبيعي ولهلا معاه صفار
وخلال يومين كان وزنه نازل 250 غم.. والله يحميه ويحفظه ويشفيه
ادعو لي كتير لانه الغرز دبحوني وما باقدر اتحرك متل العالم وما تنفست وكله شغل وهلكان !!
وكمان براء الله يحفظه لساته معاه صفار .. وخايفة عليه كتير