قصة ولادتي الاولى..مع بعض الاستفسارات:(

السلام عليكم بطبوطات منتدانا الحلوات
بغيت اشاركم بقصة ولادتي بولدي الاول عبدالرحمن الله يحفظه لي
ومنها بغيت استفسركم عن بعض الامور اللي للحين اجهلها واخاف تتكرر معاي بولادتي الجايه

المهم..
كان موعد الولاده بالصورة 15-8...
بالاسبوع 34 او 35 من حملي على ماتذكر
يوم الجمعه 9-7 كان اخر مره يقربني زوجي قبل الولاده
ويوم السبت ماسويت اي مجهود <----كنت بطه منفوخه ماقدر اتحرك
خاصة ان رجولي قبلها باسبوع ورمت بشكل غريب بس الدكتورة قالت مافيني شي
بس بالليل يوم السبت نفسه رحت مشيت نص ساعه والجو ياسلام...رطوووبه وقرف يبس قلت عشان تتسهل الولادة ابدى من الثامن امشي

زوجي عنده مناوبه هذاك اليوم ومابيرد الا الاحد الظهر..
وانا مرتاحه رديت من المشي سبحت وعلى طول على السرير وقبل لانام كلمت صديقتي ساعه...وانا بخير ولافيني الا العافيه والنكتة الاكبر اني رتبت ليلتها شنطة المستشفى !!وركبت منز البيبي!!!!

الساعه ست الصبح
صحيت الا والفراش ياسلام مبلل:eek: ...عاد اول شي ببالي سلسل بول الله يعزكم
شو هالفضيحه ياربي زين زوجي محد:hahaha:
بس الماى لاريحه ولا شي؟؟؟ وينزل كل اشوي دفعه
قبل اوصل الحمام
زوجي محد...امي وام ريلي سافرن وبيردن قبل موعد ولادتي باسبوعين... بمنو استنجد
ارسل رساله لحرمة عمي وهي بالدوام.... ((ينزل مني ماي لاريحه ولا لون؟؟؟ شو هذا سلسل بول؟؟؟)):hahaha: هالمسج كان نكتة الموسم اتقولون فزورة
الا المسكينة تتصل وتسألني كمن سؤال...الا وتضحك واتقول مبرووك ولاده!!!!!! عاد اصيح ساعتها اي ولاده شو اتقولين؟؟؟؟
صكيت منها واتصل على زوجي اللي عنده عقدة التلفون الصامت ...اتصل ومايرد ارسل مسجات انا بولد الحق علي...لاحياة لمن ينادي
ردت تتصل علي ويوم خبرتها ان زوجي محد المسكينة تتصل بابوي بدوامه ويمر ياخذها عسب يسعفوني ....
عاد ابو ريلي شيبه بالبيت استحيت اخبره بروحه سكري وتعبان المسكين من درى عطاني من هذاك العسل الاصلي خذت منه ملعقتين على ريقي..مامداني اكل شي من الزيغه...
ويايه بكشخ بلبس حمل من هالزين..واتشوفني عمتي واتقول غيري والبسي شي بسيط مايتعب لاحقه عالكشخه,,,,,وبدلت

وانا بالطريج عالساعه 9 للمستشفى بدى الالم بشويش...وانا فرحانه اقول هذا بس الطلق اللي يقولون عنه بسيطه..والماى بدى يخف يمكن لاني كنت يالسه
ومن ادش المستشفى اترد الحنفيه تشتغل...وادخل للدكتورة والرحم اذكر 2 وشي مبطل..ولاده بس يمكن بالليل السالفة مطوله...قلت احسن
لحقنا زوجي عقب مارد البيت وكشخ واتعطر:30: يتحسب ولدت وخلصت
ومن وصل خليته يمشي معاي بالممر..لين اشتد الالم ومارمت امشي يعني الطلق الحلو بدى يوصل..رديت الحجرة ومتحمله الالم..لاكن عقب 11 الضحى خلاص خاطري اصرخ من الالم بس مستحيه:hahaha: ايود المخده واغط ويهي فيها ...
والطلق ورا بعض قام يحمى القابلة استغربت معناته ولاده وانا قلت خلوني بغرفة عاديه لين اتيني الولاده <----- اتحسب السالفه مطوله
غرف الولاده مشغوله<-----ماشاءالله
12ونص خلاص..قلتلها الحقيني بولد بالغرفة الراس احسبه يدفع تحت...والغريبه نطقت بهالكلمه وانا بكرية اشدراني بالراس والخربطان هذا سبحان الله
المصيبة يابولي كرسي ماقدرت اقعد انوقز على الكرسي الولد حسيته بين رجولي:(
بسرعه تركض بي على غرفة الولاده
والله بغيت اقعد على الارض اقولهم بيطلع خلاص راسه احسبه بيطلع..
المصيبه لازم افسخ ثيابي والبس الزفت مالهم...صدقوني اتفشل كل ماتذكر منظري وانا مثل الياهل يلبسوني..بس ساعتها لاتسؤلوني عن شي
من قعدت على السرير ...دفعه ...دفعتين...ثلاث ...ماشاءالله الدب طلع.... كيلوين ونص فديته
رغم هذا تشققت عدل يمين يسار حسيته ماخلت مكان ماخاطته..
بس القرف اني تعبت بالخياطه لانهم من الزحمه اتاخروا علي ساعه كاملة عقب الولاده( دخل ريلي وكلمت فيها الاهل وباركولي وسمينا الولد)...يعني الالم خف...فيوم يت اتخيط ياكثر ماحطت مخدر موضعي ومانفع الم فضيع..بس الحمدلله على كل حال
اللي تعبني انه ياه صفار لمدة 15 يوم ومارضع طبيعي غير بعد خمس ايام...وكل مايصيح لازم اتعذب واسير الحضانه واحاول ساعه معاه وانا بروحي تعبانه..واذا مارضع شفطوا مني حليب:(

المهم هذه قصتي طويله ودمها ثجيل...بس ياليتكم تفيدوني شو سبب ولادتي بسرعه؟؟؟
الدكتورة قالت عادي طبيعي!!!
يعني المفروض اولد 15-8......... وولدت 11-7؟؟؟؟؟؟ معقولة عادي؟؟؟
هل المشي السبب؟؟؟؟
او المتن الزايد لاني كنت 84 وطولي 156؟؟؟؟؟؟
او اي شي يمكن غاب عن بالي...ياليت اتفيدوني لاني صج خايفه

اسفه عالاطاله:26: