قصة ولادتي الحزينه والمأساويه .... لتكن لكم عبره ولأخذ الحذر

بسم الله الرحمن الرحيم
السلام عليكم جميعا عزيزاتي بنات عالم حواء ...
سوف اكتب لكم قصة ولادتي لتكون لكم عبره وحتى تاخذون حذركم خاصه لما تكون الوحده منكم حامل ..
تبدأ قصتي عندما كنت حامل في طفلي الاول وبالتحديد في بداية الشهر التاسع من حملي ... وبما اني في غربه ولا اعرف غير زوجي وبعض الصديقات تعرفت عليهم في بلاد الغربه يعني ليس لي خبره في الحمل وليس لديه شخص يفهم في هذه الامور مثل الأم او الحماة ( ام الزوج) وحسب علمي ان الحركه في الشهر التاسع جيده للحامل والجنين ... واختكم ما قصرت بالعمل في المنزل وتصنيع الاطعمه وكل ما يخطر ببالكم عن بذل المجهود وبقيت لمدة يومين على ذا الحال وغير ذلك حالتي النفسيه الزفت( وانتو بكرامه) طيلة فترة الحمل الى جانب معاناة الغربه
يومين عناء متواصل بدون اخذ راحه عانيت خلالها من تعب شديد لكن ما اهتميت قلت عادي هذي نهاية الالم وراح الكثير وضل القليل وثاني يوم صحيت من النوم اعاني من تعب وصداع والم بكل انحاء جسمي مثل السخونه وكان في نفس اليوم مراجعتي عند دكتورتي الي اراجعها طيلة فترة الحمل اخبرتها اني اليوم مو على بعضي وصحتي واحس بألام في انحاء جسمي قالت هذا شي عادي لما تدخل الحامل بالشهر الاخير تحس بهذي الاعراض ...... المهم رجعنا للبيت وبعدها ذهب زوجي للعمل وبقيت وحدي اعاني من الالام بكل انحاء جسمي وحست ان حركة البيبي في بطني صارت قليله حتى اثناء الصلاة لا استطيع الانحناء وخفض رأسي للسجود احس ان دماغي راح ينفجر وقلت عادي الدكتور قالت هذي اعراض الشهر الاخير واستمر الوضع وصار يزداد اكثر واكثر طيلة اول خمس ايام من التاسع وحتى زوجي قال خلي اخذك للمستشفى يشوفون حالتك لأنك مو طبيعيه انا قلت لا خلي ننتضر الدكتور قالت كلشي طبيعي وخلال هذي الفتره وخاصه رابع وخامس يوم من التاسع البيبي حركته صارت تختلف عن قبل كان يرفس قوي لكن الان صارت بطني كل شويه تنتفخ من جهة اليمين واحس انها تنفجر والالام تزداد ومره من جهة اليسار تنتفخ وحتى منضرها كان فضيع وطبعا مع صداع شديد واحمرار بالوجه وانتفاخ فيه وجميع اجزاء الجسم في هذا الوقت اتصلت ممرضة المختبر لأن في نفس يوم مراجعتي للطبيبه طلبت اعمل فحص دم بالمختبر وزوجي نصحني انه ياخذني المستشفى لأن حركة بطني مخيفه كانت فقط انتفاخات والالام من غير رفس ( حتى تنتبهون ياحوامل على حركة البيبي ولا تستهينون فيها ) اما في فترة النوم كنت مغمضه عين ومفتحه عين من شدة الالام والحالات الغريبه ...
اتصلوا علينا من العياده قالت الدكتور لازم تاخذين حبوب حديد 300 مليغرام Iron .....
اخذت الحبوب وازدادت حالتي للأسوأ ومانفعت مع ان صحتي كانت جيده جدا طيلة فترة الحمل وما شكيت من اي امراض وحتى صديقاتي في الشهر السابع والثامن كانو يتعجبون على حركة البيبي وكانو يقولون طفلك نشيط وحرك وكنت متفائله كثير ولا كنت اتوقع يصير الي صار بيه طبعا هذي الاحداث كلها صارت خلال الخمسة ايام الاولى من التاسع وبنفس اليوم رجع زوجي من العمل لقاني شبه مغمى عليا وقال حالا نروح للمستشفى .....
رحنا المستشفى ودخلوني الطواريء وسألونه بعض الاسئله مثل حركة البيبي وتاريخ مراجعة الدكتوره اخر مره و.... الخ
كشفوا على الجنين بأشعة الالترا ساوند وكلهم كانو مستغربين وقالو الجنين مخنوق ومافي تنفس ولا حركه فقط قلبه ينبض ببطيء شديد وقالو حالا لازم عمليه قيصريه حتى نلحق على البيبي لان في لحضاته الاخيره وانا من صدمتي ماعرف شسوي ابكي ولا انضر لهم واحد واحد وقعنا على العمليه وكنت يائسه الا من رحمة رب العالمين وكنت ادعي المهم الطفل مو انا .....
دخلت صالة العمليات حطولي القسطره وبعدها عطوني ابرة الضهر وطبعا زوجي دخل معايا صالة العمليات وبعدها ماحسيت بالنصف الاسفل من جسمي لانه تخدر وحسيت فقط ان شيء يخرج من بطني وتألمت بصراحه وماكنت شايفه الي يصير لانهم واضعين ستاره من بطني وتحت حتى زوجي ماشاف شي هو واقف عند راسي ماسك ايدي ولما طلعو الطفل الدكتوره قالت ولد لكنهم ما عطوني ابني اخذوه للانعاش وزوجي يدعي وانا ادعي وحتى زوجي نضرته كانت ماتطمن قلتله طمني وين الطفل قال اخذوه قلت قولولي الصراحه وين ابني قال زوجي الطفل مايتحرك واخذوه للانعاش وانا ماعرف ابكي ولا الطم بعدين طلعوني من غرفة العمليات رحت لغرفه ثانيه وصارت الممرضه تعصر بطني بشده مؤلمه ولحدالان ماشفت ابني رحت لغرفه ثانيه وزوجي متكئب ومايقول الصراحه ومن شدة الحاحي عليه بعدين قال ان الطفل ضل 3 ساعات من غير حركه والطبيب كان يحاول ينعش قلبه حتى يعيش وقالو همزين لحقتو على حالكم لو متأخرين دقايق كان الطفل مات ويمكن الام ايضا ولايزالو يحاولون قلتله روح اتأكد شوف الطفل وين اريده راح ورجع قال بعدهم وانا مثل النار ضلينا ننتضر خلو الطفل بالحضانه على قول زوجي اخذونه وانا بالسرير لغرفة الاطفال الي بالحاضنه وكانو حاطينه بالحاضنه ومسكته الممرضه وانا نايمه بالسرير وخلوني اشوفه من بعيد وهو يبكي وانا بكيت معاه وكلهم بكو معانا حتى ما حضنته ولا عطوني اياه رجعوني لغرفتي وثاني يوم رحت رضعته وصار عنده الصفار واحتاج للدم وحطوله المغذي براسه لان الدم ما يوصل حسب ماقالو وضليت 9 ايام بالمستشفى شفت الويل كل يوم اروح اشوف ابني بالحضانه وارضعه واغيرله وكل ما اروحله الاقي الممرضات اما يسحبون من ايده الدم المحصور من بسبب ابرة المغذي وهو يصرخ بشده حتى بالايام الباقيه صرت اروح الحضانه قبل ما اوصل اسمع صوت صراخ اقول لزوجي هذا صوت ابني وبعدين اشوفهم يسحبون منه دم ويتأكدون من سلامته وانا اجلس ابكي معاه والدكتوره تقول طلعوها للأم لان مانعرف نشتغل وصارت حالتي النفسيه دمار بعدها قالو لازم نبقي الطفل اطول فتره لان اكتشفو ان في بطنه جرثومه وبقيت على هذا الحل يوميا لمدة 9 ايام وكانت ايام سوده حزينه مؤلمه كلها الالام ومعاناة وماصدقت لما اخذت ابني من المستشفى مع اني كلشي ما اعرف من تربية الطفل والاهتمام فيه وحياة الغربه صعبه عالحامل وحتى النفاس والدم ما انقطع مني لمدة 72 يوم كلمن يسمع يتعجب حتى دمي نشف بس المهم ابني مو المهم انا ....

ومرت الان سنه وشهر على هذه القصه وتعالو شوفو ابني مشاكس ومحبوب وجماله يجنن يقل للقمر غيب وانه بمكانك ...بس متعبني كثير.

لكن الي متعبني اكثر ان الي ماكنت حاسبتله حساب حصل وهو اني حملت وكان عمر ابني سبع شهور ومع اني ولدت بقيصريه خايفه كثير من هالمره مع اني ماعندي مشاكل بالرحم وبصحتي كلشي طبيعي لكن مع ذلك اني خايفه حاليا انا في الشهر السادس من الحمل ادعولي يا بنات اولد هالمره طبيعي ادري اني طولت عليكم بس من خلال معايشتي لهذا المنتدى حبيت كل البنات الي بيه الحوامل وغير الحوامل وحسيتهم خواتي وكتبت قصتي حتى تكون عبره يابنات التاسع لاتجازفون براحتكم اهم شي الراحه وممارسة المشي فقط ماعليكي من الشغل والطبخ وغيره اهم شي انتي والبيبي والتعب ماراح يسبب الا التعب فهمتوني ؟؟؟
وجزاكم الله خيرا وانشالله كل حامل الله ييسر امرها وولادتها وماتشوف شر وكل من تنتضر الحمل انشا الله يرزقها ويرزق كل محرومه ااااااااامين