قصة ولادتي .. الرجاء عدم دخول اللي عمرها اقل من 18 هههههه

يوم الاثنين الماضي كان عندي موعد .. قالت لي الدكتورة الرحم مفتوح 3 سم والراس تحت .. ومويا البيبي مليانه في اي ممكن تنفجر

يعني ولادتك مره قريبه ..

وسوت لي تحريض .. ورجعت البيت ونمت ..

صحيت على الم خفيف .. يروح ويجي وقلت في نفسي كالعاده طلق كذاااب .. او نتيجة تحريض الدكتورة

وطنشت وسويت لي كم شغله ..

لكن انتبهت ان وقته منتظم مع انه بارد .. يعني كل ربع ساعه تقلص يستمر لثواني ..

كلمت زوجي وقال لو اشتد عليكي كلميني ..

مااشتد كثير لكن وقت الطلقه زاد .. يعني بدل الثواني صار دقيقه .. ولكنه لازال كل ربع ساعه ..

جهزت اغراضي وكلمته .. وقلت له شكلها ولاده ومافيني صبر ..

جاني واخذني على المستشفى تقريبا المغرب .. على الساعه 7 ..

دخلت وكشفو علي .. قالو ولاده الطلق منتظم .. والرحم مفتوح 4 سم ...

ودخلوني غرفة الولاده .. طلبت ابرة الظهر .. قالو اصبري لازم الالم يوصل لاخر حد عندك عشان على اساس الالم نعطيكي جرعة الابره ..

لاني عاده اخذ الابره قبل الولاده بساعه او اثنين .. فالمره هذه نويت من البدايه ..

المهم اعطوني كمامة الاكسجين .. ومع كل طلقه اشفط بقووووووة وادوووخ .. صحيح الم الم .. بس مو قووووي مره

قعدت على هالحال فتره طويله .. وكل ماتدخل وتكشف تلقا الرحم لسا ماانفتح عن 4 سم ..

تقول لازم الطلق يكون حامي عشان يفتح .. وعلى 1 الليل نزلت علي مويا خفيفه ..

كشفت لقته 5 سم .. وكانت بشاره خييير وفرحنا كلنا ..

المهم جلست الى 6 الصباح وانا اطلق طلق بارد لكنه مؤلم .. بس مو الم الطلق اللي كنه كهربا .. وانا اشفط واشفط في الكمامه ..

دخل يوم الثلاثاء وانا اطلق والرحم 5 سم ماتغير .... قالو خلاص نحط لك صناعي .. وافقت ودي اخلص تعبببببت

ومليييييييييت ..

حطو الصناعي .. وبدا الالم يشتد .. ويشتد .. وصرت اشفط في الكمامه بجنووون وابكي الالم .. وطلبت الابره قلت خلااااص ماعاد اتحمل وبس ابكي ..

قالو طيب .. لكن الدكتور اتأخر :44:

قعدت من وقت ماحطو لي الصناعي من الساعه 7 الصباح الى 11 وانا بموووت خلاص .. والله كل ماتجيني الطلقه اتشهد ..

جا دكتور التخدير وحط لي الابره .. بعدها ب ثلث ساعه تقريبا بدا جسمي من اسفل يخدر ورجولي تنمل ..

والطلق خفففف

الحمدلله بديت اخذ نفسي وتركت الكمامه ..

خف الالم نهائيا ..

لكن صارت مشكله ثانيه ..

على 12ونص تقريبا صار معايا غثيان شديد .. من الكمامه لاني جلست اشفطها فتره طوييييله ..

من 8 العشا يوم الاثنين تقريبا الى 11 ونص الضحا يوم الثلاثاء :44:

وصرت الله يكرمكم استفرغ واستفرغ .. استفراغ شديييييييد .. مع اني ماني اكله بس يطلع مني الله يكرمكم عصارة المعده وصرت احس معدتي تالمني مررررررره ..

المهم الى ان هديت نمت .. مع التخدير خلاص نمت ..

شويه اصحا وانا دااااايخه اشوف تجمهر حولي دكاتره وممرضات وزوجي وجهه اصفرررررررررررررر

حسيت فيه شي بس ماني قادره اتكلم من الارهاق والتعب والدووخه

وارجع انام

يجو يقلبوني كل شويه .. مره على اليمين ومره على اليسار .. احس فيهم واسمع اصواتهم بس خلاااص فقدت القدره على التركيز

زوجي يقول كنتي تصحي تبكي وترجعي تنامي .. قطعتي قلوب الممرضات والدكتورة ..

الكل اتعاطف معك .. لان فيه كم حرمه جت بعدك وولدت وانتي وضعك مازال على ماهو !!

صارت الساعه 7 المغرب يوم الثلاثاء .. صحيت وحسيت اني فقت شووويه .. وسألت زوجي .. ايش فيه ؟؟

حاسه بشي موطبيعي ..

قال ..

وانتي نايمه ..

نزل نبض الجنين الى 70 << وهو الطبيعي 140 تقريبا

انصدمنا وانفجعنا ..

الدكتورة امرت انهم يوقفو الطلق الصناعي .. ويوم وقفو الصناعي رجع النبض طبيعي الحمدلله

لكن الطلق خفففف مره رجع بارد زي اول ..

وانتظرنا فتره .. رجعت امرت الدكتورة انهم يرجعو الصناعي .. لان الرحم كان 7 سم .. من فتره ولا فتح

والمفروض لما يوصل 7 خلاص يفتح الى 10 بسرعه .. بس كان باقي طلقتين ثلاث يكونو حارررررررررين وينزل البيبي

لان راسه مره تحت نزل الحوض ..

لكن من برودة الطلق الرحم وقف ماصار يفتح عن 7

المهم رجعو الصناعي .. وصارت فيه مراقبه شديده على نبض الجنين عشان كذا كانو متجمهرين حولي ..

ورجع تعب الجنين وخف نبضه نزل كثيييير

ورجعو وقفو الصناعي ..

وعلى هالحال ..

وطبعا انا مت رعب وخووووف .. وعشت الموقف معاهم .. الجنين بدا يختنق .. لان السوائل حوله نزلت خلاص

وراسه علقت بالحوض ..

ولا فيه طلق شديد يفتح الرحم .. وكل مارجعو الصناعي تعب قلب الجنين ..

صبرنا وصبرنا .. وانا فيني خوف وقلق ورعب .. قلت خلاص شكله ولدي بيروح مني لانه طول كثييييييييييير ونبض قلبه شويه سريع شويه بطيئ ..

صرت اقرا وادعي وانفث على بطني .. وكنت اوقات ماعرف ايش قاعده اقرا .. لخبطت من ربكتي وخوفي ..

الى الساعه 9 ونص العشا ..

جت الدكتورة وقالت بفحصك للمره الاخيره لو مااتحرك الرحم عن 7 سم خلاص عمليه ...

انا اترعبببببت بس قلت بنفسي اي شي بس يطلع ولدي حي ..

وفحصتني وقالت لازال الرحم 7 خلاص .. عمليه .. ووقعتني على اوراق العمليه

وجهزو غرفة العمليات في دقايق بسيطه .. زوجي طلع لي وقال لا ماراح ادخل .. قلت الا بتدخل

قال ماقدر اشوف .. قلبي بيعورني عليكي .. قلت بسك رومانسيه مو وقته الحين بتدخل يعني بتدخل

حسيته مغمووووم مره ..

المهم دخل معايا الغرفه .. وجا دكتور تخدير غير الاول .. اجنبي .. كان مره طيب وكان كبير بالسن وحنووووون مره علي ..

بدا يعطيني جرعات زايده من ابرة الظهر عشان مااحس بشي نهائيا ..

لان في الطبيعي يعطوها على اساس الالم فقط .. لكن تحسي بتقلصات الرحم لكن الالم ماتحسي فيه ..

فزاد الجرعات عشان مااحس بشي .. حطو لي ستاره من عند الصدر .. وبدأو ..

وفعلا ماعدت احس بشي .. وبدت معايا نفاضه عجيييييييييبه .. جسمي صار يرجف بطريقه خوفت الممرضات وزوجي ودكتور التخدير ..

كنت خايفه مره .. بماانها اول عمليه .. واحساسي انهم قاعدين يشقو بطني وانا صاحيه كان مرعب ..

وكنت شايله هم الجنين مرررره سيطرت علي فكرة يطلعوه ميت استغفر الله العظيم ..

كنت احس بضغطهم وحركتهم ببطني بس مااحس بألم ..

فجأه .. قلت بستفرغ .. تخيلو دكتور التخدير بنفسه جاب لي زي الصحن وقعدت استفرغ لين قلت بس ..

ويمسح لي بمنديل ..

مره كان حنون ..

المهم ارتحت يوم استفرغت ووقفت نفاضتي ..

زوجي ودكتور التخدير فوق راسي كانو قاعدين .. وفجأه حسيت الدكتوره بتطلع شي وتسحبه من بطني ..

وطلعو الولد ..

وكان سريره على يساري بحيث اني اشوفه ..

لمحت لونه ازرق

صرت اصييييح .. الولد مات ؟؟؟؟؟؟

واللي خوفني مابكي على طول ..

صرت اسال بخوف حي ؟ حي ؟؟

الا اسمع صوت بكا خفيييييييف مره .. يحياااتي كان مخنووووق ولونه اززززرق ..

زوجي دمعت عينه من الفرح .. اتطمنا عليه .. وقعدت اردد اللهم لك الحمد والشكر .....

خلصت العمليه الحمدلله على خير ..

قعدت تقريبا 4 ايام بالمستشفى ..

بنتي عمرها 3 سنوات حست بالغيره شوي .. بس الحمدلله بدت تفك يوم رجعنا البيت .. وصارت تحبه .. بس صارت تزن شوي وتحب تلفت الانتباه لها بحركات معينه ..

لكن والله ماقللنا اهتمامنا فيها

خصوصا ان امي جت يوم الجمعه .. ودلعتها وطيرتها لسابع سما .. فرجعت ثقتها بنفسها ..

الحمدلله من قبل ومن بعد ..



ووالله مانسيت دعيت لتجمعنا ولكل حامل .. ربي يتمم لها على خير ويسهل ولادتها ..

ويارب يستجيب .........

هذه قصة ولادتي .. تعببت .. بس والله طلال يستاهل التعب .. يارب يأجرني ويعينني على تربيته ويرزقني بره ويبلغني فيه كل خير ياااارب ...