قصة ولادتي الطبيعية..بعد القيصرية

السلام عليكم حبيباتي

وانا في بداية الاسبوع الثالث من الشهر التاسع نزلت علي قطعة لونها بيج ثخينة و متماسكة عرفت انها سدادة الرحم و قلت يالله الفرج قريب لأني كنت حيل تعباااانه و ذبحني الثقل و الام الحوض..
و ثاني يوم الصبح نزلت علي خيوط مطاطية فيها دم و استمرت تنزل لمدة ثلاث ايام بس الصبح

و في اليوم الرابع حسيت بآلام مثل آلام الدورة بدت معاي من الظهر تقريبا و أبدا ما توقعت انها الام طلق .. كانت حيل خفيفة

المهم عالمغرب رحنا أنا وولدي (عمره سنتين) نزور بيت بابا..و ظلت الآلام تروح و تجي..
و عالساعة 8 بدت تنتظم و هم طنشتها لأني اصلا ما اعرف الطلق لأني في ولدي ولدت قيصري
و من السنع الزايد شفت أمي رايحة السوق و رحت معاهااا و أنا فيني طلق ههههههههههه
و تسوقنا و خلصنا و ردينا بيت بابا

عالساعة 10 أخذت و لدي و قلت برجع البيت و الآلام تزيد و صارت كل 10 دقايق
المهم حطيت ولدي في كرسي السيارة و شغلتها و مشيت

وبنص الطريق رجعت بيت بابا مرة ثانية و كلمت وحدة من خادمات ماما قلت لها تعالي معاي البيت نامي عندي أنا حاسة اني مؤ طبيعية.. أنا ما عندي هام أدمة

والله يا بنات اني كنت أسوق السيارة و تجيني الطلقة ادوس بريك او الفرامل معاها ههههههه
ووصلت البيت على خير و نومت ولدي و اخذت دوش حااااااار و لبست بجامتي و جا زوجي بعدي بساعة
ولبس بجامته يقول تعباااان واااايد يبي ينام مبكر عشان دوامه..حسيت بالالام تزززززيد و صار بين كل طلقة و الثانية 6 دقايق

وصار ينزل علي قطع مطاطية بنية مع كل طلقة و رحت المطبخ شربت حليب حار مع عسل و زعفران
قلت لزوجي شكلي بولد ودني المستشفى قال تعوذي من إبليس و نامي شكلج ما فيج شي
و عالساعة 2 ونص خلاااااص زاد الألم و حسيت فيه مثل الحزام يضرب في بطني و ظهري
قلت له ابوس ايددددددك ودني المستشفى

مسكين خااااااف و على طول المستشفى عالساعة 3 إحنا هناك دخلت الطوارئ و قلت لهم تعبانه معي الام وانا في الاسبوع ال39
على طول حطو لي تخطيط و ما كان بائن الطلق وفحصتني الدكتورة لقت رحمي مفتوح 3 سم
قلت بروح البيت و خفت يلعبون فيني قالت انتي ولااااادة لا تطلعين ج..قلت على مسؤوليتي و كلمت دكتوري قالت له اني ابي اطلع قال خليها بس نص ساعة واذا مافي شي خل تروح

قلت أوكي نص ساعة بس..و بعد نص ساعة فحصتني ولا مفتوح 4 ونص قالت خلااااص ولادة
جهزوني و رحت غرفة الولادة و الام تشتدددد و طلبت إبرة ظهر و جأت دكتورة عسل ايدها واااايد خفيفة والله ما حسيت بشي اللهم لك الحمد

و ابد ماااااا طولت ظل الرحم يفتح بسرعة و انتظااام ما جأت الساعة 7 الا أنا والدة
والحمد لله كانت ولادة سهلة ميسرة ماشاءالله ماشاءالله
و يبت بنوته حلوة سميتها ياسمينا
ادعوا لي الله يهدي عيالي و يصلحهم و يجعلهم هادئين مطيعين

دمتم بود حبيباتي