قصة ولادتي الطبيعيه بعد القيصريه يااااارب لك الحمد

مساء الخير كروشات كيفكم الله يهون عليكن ويسسر لكن
قصة ولادتي مثل ماوعدتكن
انابولدي الاول ولدت قيصري وحملت ع طول وكلن يخوفني من الولاده الطبيعيه لاني قيصريه بالاول وع طول حملت يارب لك الحمد تيسرت وولدت طبيعي
سوت لي الدكتوره تحريض قبل الولاده بعشره ايام تقريبا بنص التاسع وقالت مفتوح ثلاث ونص والحين صار اربعه في نفس اليوم نزل مني دم وجاني طلق طول اليوم واليوم الثاني اختفى بس احس بثقل من تحت كان بطني بتطيح بعدها صار يجي آلاام خفيفه مثل الدوره تجي وتروح يوم الثلاثاء نمت مع زوجي وجاني طلق شديد من الفجر لين عشره الصبح والظهر اختفى وصار يجي العصر ع خفيف مره ويروح ويوم الاربعاء 2ابريل الصبح جا طلق قوي كل شوي يرجع توقعته زي امس وصار كل شوي يرجع حتى زوجي توقع زي امس لين طلع مني دم خلاص تأكدت انها ولاده وقعدت اجهز اغراض ولدي وارتب البيت والالم يزيد ويزيد حتى اني خفت اولد بالطريق لان المستشفى بعيد طول الطريق اقرا ادعية تسهيل الولاده واكلت سبع تمرات وصلت للمستشفى ماقدرت امشي استقبلونا احسن استقبال ورحت للكشف ماشاء الله كان فاتح 8سم وع طول ع غرفة الولاده حطوا لي التخطيط والمغذي وحطت لي مسكن خفف الالم لمدة ساعتين وربي نعمه المسكن ويوم فتح 9سم راح مفعول المسكن وشوي وطلع عشره والدكتوره تقول خلاص ولاده ولاده ساعديني وانا اقولها دكتوره الله يخليك اصبري علي ماابغى قيصري قالت انا بصبر بس البيبي دام النبض كويس الحمد لله وقالت اذا حسبتي بطلقه مع تبرز قولي لي وكل ماجات قالت دفي دفي واحاول واحاول واحاول والممرضات يضغطون ع بطني يساعدون ع انها تطلع تعبت من الدف لانها ماشاء الله كبيره اخر شي قلت لها طلعيها تعبت انا نفسي ضيق مااقدر اكتم مده طويله وطلعتها بالشفط حسيت روحي بتطلع لان البنوته ماشاء الله جبتها 4كيلو و100غم وماكنت عارفه بمخاطر الشفط ااحمدلله عدت ع خير بس في راس البنوته جرح من الملقط وبعد الولاده صار كله انتفاخ ع الفاضي كنها بلونه وتنسمت هههه المهم طلعت البنوته وطلعت المشيمه قبل اذان الظهر وخاطتني ويارب لك الحمد دقيت ع اهلي اطمنهم من الفرح اهلي قاموا يصيحون خايفين ع العمليه تنفك ودهم بطبيعي بس خوف من ان العمليه تنفتح وخايفين من الطبيعي والحمد لله تيسرت من رب العالمين
نسيت اقولكم زوجي حظر اكشن الولاده دخل معي لين جا وقت انفتح الرحم 10صكوا الستاره

وطول وقتي وانا اوصيه ع امي وولدي واوصيه يصوم عني 4ايام مابعد صمتها خايفه ان ربي ياخذ امانته وانا علي دين
الاشياء الي ساعدتني بعد فضل الله
اولا حسن ظني بالله وان ربي بيكرمني بولاده طبيعيه مع ان كثير حذروني عشان العمليه ودعاء امي ربي يخفظها لي
ثانيا طول فترة حملي وانا اكرف كرف لان معي طفل صغير وقايمه قاعده ومن بداية التاسع اخلي زوجي يسوي لي طلق طبيعي ههههه فهمتوني
ولادتي كانت بمستشفى المركز التخصصي الطبي بالعليا الدكتوره الي ولدتني اسمها رهام كانت عسل عسل ربي يسعدها والممرضات كلهم ذوق والحمدلله تمت ع حير
وصيتي لكل وحده ولدت قيصري المره الثانيه دام الجنين تحت والحوض زين لاتغامر تطلب قيصري الطبيعي رحمه من ربي وتتوكل ع ربي ولا تسمع لاحد الا اذا قدر الله فيه مشكله في المويا او النبض او وضع الجنين
واخيرا اتمنى من ربي يهون ع الجميع ويرزقكن ولاده سهله طبيعيه ميسره