قصة ولادتي الغريبة العجيبة في الشهر السابع تفضلوا..........

سلام بنات كيفكم شو أخباركم أنا انقطعت عنكم لفترة ليست بالوجيزة وهدا الشي كان لظروف خارجة عن ارادتي .
أنا الحمدلله من شهرين ونص ولدت وجبت ابني رامي الله يخليلي اياه يا رب ويرزق كل مشتهي وقصة ولادتي كانت متل افلام السينما أنا كنت في الشهر السابع في الأخص بالأسبوع 31 وكان عندي موعد عند دكتورتي النسائية حتى اني أعمل فحص ملون لأني كنت ملهوفة اني أعرف شكل الجنين طبعا الحمدلله أنا فترة حملي مرت في سلام ما اتغلبت فيها اللي شي بسيط الوحم العادي اللي ممكن ييجي لأي وحدة .طبعا رحت على موعدي وبلش الدكترو يفحص فيي على الجهاز وحاول انه يركز على وجه الجنين بس ما زبط معها وحكالي روحي تمشي شوي برة علشان ابنك يغير وضعيته ونقدر نشوف وجهه بعد نص ساعة ارجعت وحاول انه يركز على وجهه في أثناء ذلك سألته اذا كان حجم بطني طبيعي والا لأ لأنه كنت أشوفه أصغر من الشهر السابع والناس كانت تفكرني بالخامس مع العلم اني كنت كل أسبوعين أكشف على الجنين وكل شي تمام لكن في هدي المرة اتأخرت أربع أسابيع شوفوا القدر, بعد ما سألته حكالي أنا ملاحظ انه بطنك صغير عن 31أسبوع والطامة الكبرى كانت انه ابني كمان أصغر من حجمه الطبيعي في أربع أسابيع يعني زي كأنه في الأسبوع 26 مو 31 والمشيمة كمان كانت صغيرة وعدا عن ذلك كله مية الراس كانت ناقصة عشان هيك ابني ما كان عارف يتحرك منيح وحكالي اني لازم أدخل فورا على المستشفى اتصلت على زوجي وخبرته ورحنا على المستشفى وهناك فحصني دكتور متخصص في جهاز الالترساوند للتأكد وطلع فعلا انه حجم البيبي صغير ومية الراس قليلة .
طبعا كتبولي على دخول للمستشفى وكانوا يفحصوا دقات قلب البيبي وكانت للأسف ضعيفة وذلك بحكم انه مو عارف يتنفس لأنه مية الراس عنده مو كفاية.
منعوني من الحركة أعطوني مغنيسيوم حتى لا يصير عندي طلق وكانوا أول بأول يفحصوا الجنين بعد يومين حطولي مية زي مية الراس في بطني على أمل انه ينتعش البيبي وما يحتاج انهم يطلعوه لأنه باقي وقت كبير على موعد الولادة واللي هو في 14.يناير .2005 بعد ساعة ردوا فحصوا دقات قلب الجنين وللأسف ما كان في أي تغيربعدين أجت الدكتورة اتكلمت معي وحكتلي انهم لازم ينقلوني على مستشفى تاني فيه قسم خاص لحضانة الأطفال في الخداج لأنه البيبي لازم يطلع من بطني لأنه مو عارف ياخد نفس مزبوط ولما رحت على المستشفى التاني فحصوني مرة تانية وكانت نفس النتيجة والقرار اللي أتفق عليه الجميع اني لازم أعمل فورا عملية قيصرية قبل ما يصير شي للبيبي لا سمح الله اتخذوا الاجراءات بشكل سريع ودخلوني غرفة العمليات وعملت العملية وخلفت ابني حبيبي في وزن كان( كيلو وخمسين )غرام كان صغير كتير لدرجة اني كنت أخاف المسه بعدين نحف وصار وزنه أقل من( كيلو) وقعد في الخداج أو الحضانة لمدة شهر لكن قعد في المستشفى لمدة شهرين وطلع بعد موعد الولادة المقرر في أسبوع وهلأ الحمدلله هو عندي في البيت ووزنه الحمدلله منيح ماشاء الله تبارك الله .
يعني مرينا في ظروف لا يعلمها الا الله والأصعب من هدا انه نحنا في بلاد الغربة يعني لا أهل ولا حدا كان معنا غير ربنا.
معلش طولت عليكم بس حكيت لازم احكي لخواتي قصة ولادتي لأنهم أكيد راح يفرحولي مرة تانية أسفة على الاطالة .