قصة ولادتي القيصرية الله لا يعيدها

السلام عليكم يا بنات
والله رح اكتب قصة ولادتي لانو صار فيني العجايب من يوم ما حملت <<<<<<<<خلص فلسفة


بسم الله نبدأ
من بعد ما تزوجت حملت على طول وما جتني ولا دورة وسقطت بعدها وربي ما كتب للجنين انه يعيش وكان عمره ببطني شهرين
طبعا سقطه طبيعي وكنت اخد حبوب موصية عليها من بلد تاني عشان التسقيط لاني ما كنت حابة اعمل عملية
والحمد لله نزل بعد معاناة كبيرة
وضليت خمس شهور وحملت مرة تانية وما كنت عارفة لان من بعد ما سقطت اتلخبطت دورتي وما صارت تجي منتظمة فعرفت حالي حامل وكان لي شهرين لكن يافرحة ما تمت صار ينزل علي دم بعد ماعرفت بيوم ورحت اسعاف على المستشفى والدكتورة الله يصلحها بدل ما تهديني خوفتني وقالت مو باين الجنين في بطنك ويمكن يكون حمل غير سليم واجهاض منذر ومن هاد الكلام.....لا وبعد كل هاد بتقلي تعي بعد اسبوع لنتأكد ولو ما نفع رح نسوي عملية وطبعا انا نفسيتي دماااار وبعد اسبوع رحت وقالت خلينا نجرب حبوب التثبيت ولقت نبض ولله الحمد بالسونار بس شافت معه متل تجلطات ونزيف داخلي واخدت يمكن 3او4 انوار حبوب غير الراحة التاااامة الي ما صرت قوم غير للحمام الله يكرمكن والحمد لله على الرابع صار كلشي تمام وصار الحمل عندي عادي الى السادس قالتلي الدكتورة انو نبض الطفل ضعيف وبعدين قالت انه تمام
الى التاسع الحمد لله كلشي تمام طبعا خلصت التاسع كله ودخل بالعاشر 3 ايام وطبعا بالتاسع مراجعتي كانت كل اسبوع وكل اسبوع بروح فيه بتقلي الدكتورة انو الجنين عالي والماي الي حوله كتيرة وما عم تسمحلو بالنزول بالحوض للولادة وممكن احتمال القيصري كبير والسبب التاني غير الحوض انو البيبي حجمه كبير ما شاء الله ومارح يجي طبيعي
عاد انا استسلمت للامر الواقع وامي ما وفتني مع انها مو مجربة القيصري بعمرها بس سبحان الله حاولت تخفف عني وانا من يوم ماعرفت قيصري خلص صار عادي عندي ورحت يوم الاحد 23_11 من 15 يوم للمستشفى وكانت عمليتي الصباح الساعة 10 طبعا نحن قبل بيوم رحنا ووقعنا على جميع الاوراق اللازمة وخبرتنا انو العملية الحد الاقصى الها حيكون ساعة واني بعد ساعتين او 3 من العملية رح كون بغرفتي ورح يكون البيبي معي وكلشي باذن الله تمام وانا عاد خلص ما عدت خايفة بس بدي اولد واخلص
رحنا باليوم التاني على الساعة 8 الصباح وطلبو مني اوراق واخدوني على غرفتي وطلبو مني غير الملابس واخد التوب تبع العملية انا هون بدأ فلم الرعب عندي وطبعا عطوني زي ابرة مهدئة او مخدرة ما بعرف المهم بعد ما ارتخيت اخدوني على العملية وكانت امي وحماتي الله يزيهن الخير جنبي طول الوقت وبعد ما دخلت العملية وصار الي صار لما صحيت لقيت الساعة 5 العصر!!!!!!!!انا استغربت لانو على اساس انو لو اتأخرت لازم اصحى الساعة 12 الضهر بس طبعا من الالم ما حكيت ولا كلمة ولقيت اهلي كلهم جنبي وانا مستغربة انن كلون عم يبوسوني ولا تتحركي ولا تتعبي نفسك ولما اسألهم عن السبب يقولو مافيكي اي شي
طبعا الدكتورة اجت عندي وسوت لي زيارة للتأكد من حالتي وهي موجودة معي بالغرفة قالتلي يلا الحمد لله على سلامتك والله كل اهل الغرفة صارو يدعولك بالعملية ومنيح انو صار معك قيصري انو حتى لو طبيعي احتجتي قيصري!!! انا خفت وكانت امي فوق راسي وشفتها لما كانت الدكتورة عم تحاكيني وتقلي هاد الكلام كانت امي عم ترفع بحواجبها وتتطلع على الدكتورة مشان ما تخبرني اجت قالتلها الدكتورة ليش ما قلتولها؟؟؟
انا صرت اطلب لحتى يقولولي ولما خبروني طلع انو وانا بالعملية بعد ما ولدوني وطالعو البنوته انتظرو المشيمة لتنزل مشان يشيلوها وتخلص قامت طلعت والتزقت بالرحم وصار في خطر على حياتي وصار معي نزيف ووصل خضاب الدم عندي الى 8 ونقولي كيسين دم واحد بالعملية وواحد بغرفة الانعاش وقالت انو في فقط 5%من الحالة الي متلي ما بيستأصلو الرحم عندها لكن ربي ستر وعداها على خير
عاد انا جنييت وكنت زيادة عم اتألم واتوجع من العملية وحمدت ربي على الي صارلي بس يوم شفت بنتي نسيت كل الالم وعنديي شوفتها بالدنيا.
هذي قصتي المحزنة بس اتمنى انو اي وحدة لما تدخل العملية ما تنسى الادعية والاسياء الي بتساعدها بالولادة طبيعي كانت او قيصري

يلا طولت عليكم
كل عام وانتو بخير وينعاد عليكم بالخير يارب