قصة ولادتي اللي تحولت من طبيعي لقيصري

السلام عليكم ورحمة الله وبركاته

كل عام وأتنم بخير ومبارك عيدكم

أول شي قبل ما ابدا أعلن توبتي عن كل اللي سويته من دخلت الشهر التاسع ومستحييييييييييييييييل أكرره مره ثانيه في أي حمل مهما كانت الأسباب

أنا من بداية حملي وأنا أحس بتعب وبثقل لدرجة إني كرهت الدنيا ومافيها حتى زوجي قمت أحس إني مب طايقتنه وابتعدت عنه في فترة الحمل.... هالشي خلاني أتمنى إني أولد من أدش التاسع على طول

ماخليت موضوع ماقريته وجربت أكثر من شي بدون فايده... كلت أناناس وشربت قرفه وخروع ومراميه وبابونج وزنجبيل وشمر ومادري إذا في شي ثاني بعد

النتيجه كانت إن الرحم انفتح عندي في الأسبوع 37 2 سانتي بدون طلق ومارضى يفتح أكثر وحتى الجماع ماياب نتيجه

ويوم دشيت الأسبوع 38 وكان باقيلي يومين وأدش الأسبوع 39 رحت المستشفى للمراجعة... سوتلي الدكتوره تخطيط وقالتي مافيني طلق ولاده... قلت الحمدلله خيره الله ماكتبلي لين الحين أولد وهالكلام كان بتاريخ 23\11\2009

وبعدين قالتلي خليني اسويلج صوره اتطمن على وضع الجنين... وهي تمرر الجهاز كانت ساكته طول الوقت وأنا قلبي بدا يدق حيل وخفت بصراحه... قالتلي الحبل السري ملتف على الجنين ولازم نولدج اليوم ولا ممكن يضغط عليه ويخنقه

استخرت وتوكلت على الله ودخلوني غرفة الولاده المغرب... الساعه 7.15 بطلولي ماي الجنين وقالتلي الدكتوره إذا ماياج طلق بنضطر نحطلج طلق صناعي بس وياه إبرة الظهر عشان ما أحس بالطلق وأتعب... بس الحمدلله بعدها بنص ساعه حمى عندي الطلق ولين الساعه 10.30 فتح عندي الرحم 6 سم

بس اللي صار إن الطلق كل مايحمى يزيد ضغط الحبل السري على الجنين وتضعف نبضات قلبه... وصار وضعه مايطمن ومع الوقت دقات قلبه تضعف زياده... وعلى طول حولوني غرفة العمليات على الساعه 12.30 بالليل

قبل مايسوولي العمليه ماكان فيه نبض للجنين أنا قلت خلاص ولدي راااااااااااااااااح ماكانت عارفه شو أسوي وكل اللي كنت أقوله يا رب يا رب يارب.... الحمدلله تمت العمليه على خير بس ما ارتحت إلا من سمعت صوت ولدي الحمدلله...

الحمدلله ولدي بخير وأنا بخير وصدق حسيت بمعاناة الحريم اللي يولدون بعمليه... صدق إن الولادة الطبيعيه نعمه من رب العالمين... تعب يوم واحد ولا تعب أيام... الحمدلله على كل شي الحمدلله

نصيحتي لكم ياخواتي لاتجازفون بعماركم ولا بعيالكم وكل وحده تتريا الطلق إييها من الله... بعد اللي شفته أقول بأعلى حسي تووووووووووووووووووووووووبه وأتمنى إن ربي يغفرلي لأني ماكنت صبوره ولارضيت بنصيبي