قصة ولادتي المتاخرة

السلام عليكم يابنات حواء

بصراحة من كثر ما اقرأ في هالقسم وخاصة اللي تكتب قصة ولادتها تحمست اكتب قصة ولادتي

وهذي الولادة الثالثة الحمدلله من قبل وبع ومن بداية حملي كان صعب وثقيل واليوم يالله يمر علي ويوم وصلت الشهر الثامن ماصدقت انها هانت وما بقى الا شهر واخلص في هالشهر بدا الدكتور يحدد لي موعد للعملية علشان انا اللي قبل كله عمليات وسبحان الله والله كانه اول حمل انتظر متى اولد علشان اشوف ولدي واضمه عكس ولاداتي اللي قبل حتى اهلي يقولون مبطين نبي صغير متى تولدين امي وابوي واخواتي متحمسين متى اولد وفي هالفترة الحمدلله على كل حال ابوي مرض وجته جلطة في الراس وصار البيت حالته حاله لكن الحمدلله عدت على خير خذ وقت في المستشفى ثم رجع للبيت مر باقي الشهر على خير الحمدلله وجا الاسبوع المحدد وكنت مقررة اني ما اقول لامي لان امي خوافة مرة قلت لاختي الكبيرة بس ورحت للموعد على انه موعد عادي للمتابعة علشان ماتشك امي في شي واخذت معي شنطة صغيرة حطيت فيها الاشياء المهمة اللي ابيها ورحت لما قلت للدكتور ان هذا الاسبوع المقرر فيه عمليتي سوا لي سونار ثم قال خليها الاسبوع الجاي لسه في وقت قلت انتم محددين لي هذا اليوم قال خلاص الاسبوع الجاي بعدها رجعت استغربت اختي لانها تعرف قلت لها اللي صار قالت الحمدلله خيرة رحت تغديت لاني كنت صايمة من امس وريحت وتعب ولدي وفي الليل جاله تشنج بسبب الحرارة وجاني خوف مو طبيعي ورحت للاسعاف ونومومه والحمدلله لحقت عليه لان حرارته كانت عالية جدا واستدعوا له طبيب اطفال الله لايعيدها ويخليه لي ويشفيه ويقر عيني فيه ونمت معه في المستشفى وحالتي مايعلم بها الا الله مر كم يوم وحرارته تنزل شوي ثم ترتفع واقلقتني حرارته اخذ ثلاث ايام والرابع عجزت اتحمل قلت باطلع على مسؤوليتي وكانت حرارته مرتفعة لكن ما اقدر اتحمل حتى الدكتور رفض لكن قلت له راح اعطيه العلاج في وقته واهتم فيه في البيت وطلعت الحمدلله وارتفعت عليه الحرارة فصرت ادخله الحمام وانتم بكرامة واحممه وعلى هالحال علشان تتحسن صحته قبل عمليتي واكون متطمنة عليه والحمدلله جاء وقت العملية المحدد ورحت له قال لي الدكتور سوي تخطيط ثم تعالي لي رحت صلحت تخطيط وكان وقت اذان الظهر وهم يشتغلون بعد صلاة الظهر بساعة ونصف فقلت اروح للبيت واريح واطمن اكثر على ولدي ثم ارجع لهم فعلا رحت صليت وجلست معهم وامي كانت حاسة فيني يوم شافتني ارتاحت من داخلها بس مابيت مادرت اني بارجع يوم لبست عباتي باروح قالت ليه قلت لها باقي فحوصات وكان زحمه ولا دخلت ومن هالكلام علشان ماتشك واختي داريه عني اول مارحت للدكتور وشاف التخطيط قال روحي للدكتور الثاني رحت له قال مالي دخل روحي للدكتور الثالث انا بكرة اجازة ولا اقدر اخذ اوراقك لاني مجاز ولازم اكون متابع حالتك المهم تهت بينهم الين دخلت عند الثاني يوم شاف التخطيط واوراقي قام ينتفض والله اصابني بحالة رعب مو طبيعية قال انتي عندك طلق ليه ماتكلمتي قلت ماحسيت به قال انتي ماتدرين انك عمليتين قبل يمكن ينفجر الرحم لازم عمليه الحين واتصل على دكتور اللي في العمليات وقال له تصلح لها العملية الحين والا انا اصعد واصلح لها العملية وتجي مكاني المهم اطلعي فوق الحين وقال للممرضة جيبي كرسي وديها لامشي بسرعة قلت انا اروح برجلي ماله داعي وطلعت فوق وجلس تقريبا ربع ساعة وهو يفرفر في السونار وزاد خوفي من صمته ثم قام ونادى الممرضة قال خلصوا اوراقها تحت خلاص الحين تدخل غرفة العمليات وزاد الخوف وتجمعوا الممرضات اللي تحط جهاز التخطيط على بطني وقلبي واللي تحط الاسوارة في يدي واللي تغير ملابسي واللي تكمل بياناتي وتاخذ الوزن والنبض واللي تركب لي القسطرة والله جالي رعب مو طبيعي ابد كانه اول مرة ادخل غرفة عمليات ثم اذن العصر قالوا يصلي الدكتور ثم عمليات قلت باصلي قالو لا خلاص ماتقدرين وبعدها خلصت الصلاة ودخلوني كلها رجال وهذا اللي يضيق صدري قام دكتور التخدير يسالني اسالته المعتادة وابطا انا بس ابي يخدرني علشان ما اشوف شي بعدها ماحسيت بشي الا لما قالوا خلصت العملية يضربني على خدي يناديني باسمي جبتي ولد افيق ثم اغيب عن الوعي حتى جاتني حالة خوف اذا سمعت احد يصوت لي بعد العمليةوطلعوني للغرفة وكانت امي واختي واخوي ينتظروني وانا افيق اشوفهم ثم اغيب عن الوعي بعدها انتهت الزيارة راحت امي واختي وبديت اصحى شوي صرت احمد ربي والمس بطني ماصدقت خلصت حمل وانتظر بس اقدر اجلس علشان يعطوني ولدي يوم جاء الصبح وصحصت شوي جاتني ممرضة قالت لي كم رقم زوجك وانا احسبه اجراء عادي عطيتها الرقم بعد مدة قصيرة اتصل زوجي وقال لي وش فيه الولد قلت مادري قال انهم بيحولونه لمستشفى في الرياض ونحن نبعد عن الرياض تقريبا 180 كيلو رنيت الجرس على الممرضات وقلت ابي اشوف ولدي قالوا الدكتور عنده قلت ابي اشوفه وصرت كل شوي ارن عليهم الجرس الين جاء الدكتور ومعه ممرضتين يجرون سرير ولدي ووحدة ماسكه له الاكسجين قلت ابي اشوفه قال قومي وصار يجر يدي علشان اشوفهوعلشان الغرفة ضيقة كان بعيد ماشفته ولا اقدر اقوم وهو يقول بسرعة علشان انتهى الاكسجين ونقلوه للرياض وانا ماشفته بعدها ماعاد تسعني الارض كلها ضاقت علي ووش فيه ابوه يقول انا شايفة اول ماطلع من غرفة العمليات مافيه شي وش جاه والدكتور يقول مايتنفس وفي صدرة صوت ونقلوه لمستشفى اليمامة ولا استقبلوه ومن بعدها نقلوه لمستشفى الحرس الوطني ولا قبلوه الا بواسطة وصار قلبي معلق معه وانتظر بس متى اطلع من المستشفى