السلام عليكم
كيف حالكم يا حلويين ؟
ذيك السنه لمن كنت حامل ادخل يوميا قسم الولاده واقرا قصص الوالدات واقول يا ربي متى بيجي اليوم اللي اكتب فيه قصتي
وولدت الحمد لله بس للاسف بكمل السنه وانا ما كتبت القصه
واليوم حنيت للقسم ودخلت وقريت القصص ورجع لي ذاك الحماس وقررت اكتب لكم ...ما اطول عليكم..
وانا في الشهر التاسع كنت ادور مواضيع عن اشياء تسهل الولاده بعد الله سبحانه وتعالى
واقرا اشياء كثيييره بس ما اقتنعت الا بالزعفران مع الماء الفاتر والحلتيت طبعا مع التمر وهذا شي معروف
وكنت حاطه براسي اني لو تجيني اعراض الولاده ماني رايحه للمستشفى الا لمن اوصل حدي عشان ما يبهذلوني
وقبل اليوم اللي حددته الدكتوره لي ب اسبوع تقريبا.... في صباح يوم الاحد يجيني مغص خفيف مره ويروح ونمت وانا خايفه وكل شوي وانا نايمه يزيد الالم بس مو قوي اتحمله وجا الظهر صحيت اصلي واخذت لي حمام دافيء وبعدها كلمت زوجي وقلت له بالسالفه ورجعت انام وكل شوي يزيد وصرن اذا مغصني بطني اصحى اون واذا راح ارجع انام وجا العصر وصليت ورجعت انام وجا زوجي من الدوام وكنت حاسه اني بولد في نفس اليوم بس كنت خايفه واهرب من خوفي بالنوم ويزيد ويزيد لحد المغرب صار يروح ويرجع كل نص ساعه تقريبا واصحى اتالم وارجع واذن العشاء ولا قدرت اصلي وانا واقفه صلين وانا جالسه ورجعت ابي انسدح ما عاد قدرت يوم حسب زوجي صار الطلق يرجع كل عشر دقايق قال زوجي يلا المستشفى قلت له جب لي رطب ومويه فاتره حط فيها زعفران واكل واشرب وانا ما احس بطعم شي منهم كل ما جا الطلق امسك نفسي واكتم صوتي ولا عاد اقدر اتحرك بعدين رحت غيرت لبسي وتعطرت ولبست عباتي وطلعنا وانا في الطريق كنت اقرا الزلزله واشم الحلتيته وصلنا للمستشفى ورحت على طول للدكتوره وانا خلاص واصله حدي ما عاد اتحمل وتسالني اساله مدري شلون جاوبتها يوم كشفت علي قالت خلاص حبيبتي ولاااده
انا تمددت من الخوف قالت لزوجي خلص الاجراءات ساعتين ثلاث وان شاءالله تولد قالت الرحم مفتوح 6 سم ما شاء الله
وحطوني بعربيه وطلعوني لفوق وجتني ممرضتين يجننون وعطوني لبس وجت ممرضه ثالثه طوييله تخوف وعريضه سوتلي كشف كانت قاسيه علي الله يهديها ومعصبه وكل شوي تجي تكشف لانو الرحم فتح بس ما طلع مني دم ولا مويه واسمعها تقول للممرضات شوي وبرجع افتح كيس المويه ورجعت وفتحت الكيس وعطوني الحقنه وشوي ودوني للحمام بعدين كل شوي يزيد الالم وانا اصاااارخ خلاااااااص ما اتحمل جت الكتوره الله يسعدها وين ما كانت ويوفقها ولا يوريها مكروه تقرا علي وتمسح العرق وتحط مويه في منديل وتمسح وجهي وتذكرني بالادعيه وتمسك يدي وكل شوي تشوف من تحت وتشجعني تقول شوي بيجيلك بيبي جديد وتشوفيه وتحضنيه ومن هالكلام ...
وقالت اذا حسيتي بالم ادفعي بس لمن اقولك يلا ..وكل ما حسيت بالطلق تقول يلا ادفعي وانا اتعصر خلاااااص ما عاد فيني حيل وعلى هالحال من خمس لسبع دفعات وطلعت بنوتي الحلوه الله يحفضها يارب وما مداني ارفع راسي ابي اشوفها وهم يغسلونها الا اشوف وحده جت لم المغذي ولا دريت عن نفسي الا زوجي يدخل علي يووم استوعبت دريت انهم من ولدت خدروني ثلث ساعه او مدري نص عشان تخيطني لقيتهم خالصين وملبسيني الحمد لله والشكر يارب
خلوني ساعه بغرفة الولاده بعدين نقلوني للجناح ..
صحيح اني تعبت بالولاده بس الحمد لله على كل حال ..
احلى شي بالموضوع انهم وقت الخياطه يخدرونك ..وما تحسين بشي
ما قصيت لكم بالتفاصيل الممله عشان ما تطفشون حاولت اوضح لكم الصوره متكامله
وفي الختام الله يسهل على كل وحده حامل ويرزقها بالمولود المعافى ويجعله من عباده الصالحين
اهم شي انك تتكلين على الله وتدعين ربي وانتي متيقنه انه بيسهل عليك ...:)
( معلومات عن المستشفى )
المستشفى السعودي البريطاني ؛؛ الجناح الاميري (الاسعار مختلفه ومتفاوته ) ؛؛الاستشاريه الدكتوره فايزه المطري الله يوفقها
على فكره انا كنت بسوي لها استدعاء بس هي مسكتني وقالت انتي حره بس ترا كل الاخصائيات بنفس المستوى ولا انتي مجبره تستدعيني وترا الفلوس بتجيني بس انا بوضح لك انو احنا بنفس المستوى وهم كويسين وبكيفك انتي تشاوري انتي وزوجك ... وطلعت قلت لزوجي بدون تفكير ابي فايزه وسوينا استدعاء(1000) طبعا لانها استشاريه ومن فوق الساعه 9 مساء ينتهي دوامها وتضطرين تستدعين ..
اليشمك @alyshmk_2
عضوة فعالة
يلزم عليك تسجيل الدخول أولًا لكتابة تعليق.
الصفحة الأخيرة