السلام عليكم ورحمة الله وبركاته
طبعا ولدت بتاريخ 27/11/1431 يوم الخميس الظهر وجبت احلى بنت ((سمور)) الحمد الله يارب
عانيت كثير قبل احمل وانا اعالج ولمن حملت تعبت كثير بالحمل ومن دخلت السابع والدكتوره تقول لي احتمال ولاده مبكره لأني مره كنت تعبانه وطبعا كنت اراجع بمستوصف اللولو بالجبيل ولمن وصلت الثامن بديت مع بروكير عند الدكتوره رنا المستشفى رائع بمعنى الكلمه والدكاتره وكل شي فيه تعامل راقي جدا ...
المهم/لمن كملت 37 اسبوع كشفت الدكتوره علي وقالت الرحم مقفل والراس مانزل الحوض ومره ضاق صدري وصرت امشي الين تورمت رجولي واحبي مثل الأطفال ولا فادني شي واصلا بطني كان صغير واقولهم
احس بطني ماعاد يتحمل بينفجر والبيبي احسه يدوب يتحرك من قوة صغر بطني بس كانوا يقولون عادي انا الي كنت تعبانه بس وبالأسبوع 39 صرت اشرب ماء مغلي مع ماء ورد وزعفران وعسل كوب الصباح وكوب
المساء وباليوم الرابع من شربي للخلطه حسيت بألم الطلق وقلت لا يمكن مثل اول كاذب لأن الطلق بدى يجيني من السابع وبعدها بدت افرازات دم بني واختفى الطلق قلت خلاص بسكت الين يجي الطلق مره ثاني
واقوم اتروش والبس وامسك خط الخبر لأنه كان الأربعاء وجمعت اهلي وخوالي واروح السوق اكمل اللي ناقصني وانا تعبانه ويجي الطلق ويروح وبعدها احضر الجمعه واضحك واسولف عشان محد يحس فيني وكنت
اتعذب من جوا ولمن يشد مره اروح دورة المياه وابكي واغسل وجهي واطلع وبعدها رحت نمت عند اهلي ولا قلت لأحد شي الين الفجر زاد الطلق مره وقلت خلاص قربت الولاده واقوم اجهز شنطتي وانتظر الشمس
تشرق عشان اصحي اختي اعلمها واروح المستشفى ويوم جات الساعه 7 الصباح وقفت بروح لأختي الا وتنفتح المويه علي واغرق وانا واقفه ماقدرت اتحرك وادق على اختي جوال وتجي وكان تتخرع من البركه اللي
تحتي وانا اصرخ لاتعلمين امي لاتعلمينها وابدل ويجي بو الشباب يوديني وعلى طول استقبلوني بقسم الولاده وكانت الغرف مليانه وجلسوني بالغرفه حقت الكشف اللي بالبدايه لمدة ربع ساعه وبعدها دخلوني غرفة
الولاده وكشفت علي دكتوره باكستانيه او هنديه مدري اسمها سلام وقلت 4 ونص وحضروني للولاده وركبو علي التخطيط وعطوني الحقنه الشرجيه وبدى الطلق يحمى ويحمى وطبعا كان معي وحده قابله مشتغله
بالمانع 20 سنه انا عرفتها ولمن سألتها قالت ايوه فاضيه صح ههههه ولمن جات الساعه 9 اختفى الطلق ويضيق صدري وادق على زوجي ابيه يدخل ورفض خواااااف واكلم اختي واقولها تجي قالت لازم اعلم امي ولا
كيف اطلع وتعلم امي وتجيني طبعا اختي مابعد تتزوج سويت لها عقده ههههه وترسل معها امي ماء مع زعفران وقرفه وماء ورد واشربه وتكلمني وهي تصيح وبعد ماشربته بنص ساعه يرجع الطلق ويحمى اكثر من
اول ورى بعض واحس نفسي محشوره واقولهم ابي اروح الحمام وانتو بكرامه وتقول لا في خطر عليك واصارخ ابي اروح ابي اروح واختي تقول خلاص فضحتينا وهم يهدون فيني بس لا مافي فايده وترجع الدكتوره وتقول
بكشف اذا مانفتح اكثر من 5 بخليك تروحين وتكشف وتقول لا 6 بركب قسطره وانا رافضه شوي الا واحس نفسي ادفع واقولها بولد تقول لا انتظري وابكي كيف انتظر غصب عني تقول باقي ماانفتح واقولها الا وترجع
الدكتوره وترفع البطانيه تبي تكشف الا خلاص ولاده وتوهقو وصارويركضون بسرعه بسرعه وانا اصارخ بولد خلاص مااقدر انتظر بولد والممرضه تقول استني شوي خذي نفس وانا مو قادره وبعدها جات الدكتوره وقالت يله
ادفعي وادفع ولا فيه فايده وبعدها دفعت بكل قوتي وحسيت وهي تدخل يدينها تحاول تمسكها عشان تسحبها ومااسكر عليها وتختنق وطلعت احلى بنوته وحطوها على صدري بس مافرحت فيها لأنها اختنقت
وماتنفست اول ماطلعت ولا صاحت وشالوها يركضون وانا عيوني معاهم الين طلعوها برا واصرخ على اختي الحقيهم الحقيهم وش في بنتي وش فيها واقول للدكتوره ابي اروح اشوف بنتي وهي تهدي فيني وتنظفني
وانا اصيح شوي الا جابوها لي وهي تبكي فديتها وبعده خيطتني وخلوني بالملاحظه عندهم وطلعوني بعدها غرفتي صحيح بنتي صار لها دم بالبياض حق العين بس طمنوني وقالوا عشان تعسرت بالولاده وكل شي
يروح بعد فتره والحمد الله الحين كل شي تمام وحتى خياطتي مره حلوه وكويسه الحمد الله والدكتوره تمر علي الصباح ويسئلوني شنو احب اكل كل يوم ومره مهتمين فيني من جميع النواحي حتى الغرف مره حلوه وهاديه..
المستشفى رائع واحلى شي بغرفة الولاده ماتسمعين الي برى كلش وفيها تلفزيون بلازما والحضانه مره روووعه..
وانتهت قصة عذابي من حملت الين ولدت وبدى شقى السهر والتربيه الله يكون بالعون ويحفظها لي ويصلحها يارب واشوفها عروس ..
واي سؤال عن المستشفى انا جاهزه..
يلزم عليك تسجيل الدخول أولًا لكتابة تعليق.
ام محمد نور
•
الف الف مبروك وتتربى بعزك والله يجعلها من الصالحات يارب
الف الف مبروك على البنوتة الحلوة الله يجعلها من الصالحين البارين هي وبناتي اللهم امين ...
يلا ابقى اجي اخطبها لولدي جهزو و القهوة........هههههههههههههههههههههه اكيد مو افقين ؟؟؟؟
يلا ابقى اجي اخطبها لولدي جهزو و القهوة........هههههههههههههههههههههه اكيد مو افقين ؟؟؟؟
الصفحة الأخيرة