قصة ولادتي
مرحبا ياحلوات عدناوالعود أحمد .. رجعت لكم بعد شهر من ولادتي بأحلى توأم بنات الله يخليهم لي يارب ويرزقني برهم ..
نبتدي ياحلوات القصة .. طبعا كنت في الاسبوع 35 و4 ايام وكنت رايحه موعد السكر يوم الاثنين 13ا/4 الصباح ورجعت البيت الساعة10
وقلت خلني ارتاح لين صلاة الظهر ... ونمت وصحيت وأنا قايمه من السرير نزل علي ماي وسخ ملابسي ووسخ الارض عرفت السالفة رحت الحمام وانتو بكرامة وغسلت ولبست فوطه وطلعت وناديت أمي وقلت لها وأنا أصيح.. مع إني سبحان الله قبلها بكم يوم أقول لها خلاص ابغى اولد بداية التاسع لو يوم تعبت من الثقل .. بس لما جات ساعه الصج خفت وصيحت .. المهم كلمت زوجي الحمد لله ماكان في العمل وعلى طول جاني وبسرعه على الاسعاف وكلمت اختي وانا في الطريق وقلت لها السالفة طمنتني وقالت لي بستقبلك في الاسعاف .. طبعا اختي تشتغل هناك ..وصلت إسعاف الولادة والاطفال بسرعه وعن طريق الواسطات دخلت على طول وكشفت على الدكتورة وسوت لي مسحة عشان يعرفون نوعية الماي و قالت لي عنق الرحم مفتوح واحد سنتي عطتني ابره الرئة للبيبي وطلعتني فوق غرفة الولادة تحت الملاحظة 24 ساعة وكنت كلما اتحركت ينزل علي الماي طبعا هذا الكلام كان الساعة 2 الظهر .. المهم اتغير شفت الدكتورات وجا الشفت اللي بعده ولما شافوني قالوا لازم نفتح الربط قلت لهم انا الاستشارية اللي اتابع معاها قالت لي ولادة قيصيرية عشان البنوته الاولى مقعديه والثانية براسها قالوا نستنى شوي وبنفك الربط حتى لو قيصري عشان الالتهابات .. المهم انتظرت لين المغرب وسوت لي الدكتورة الترا ساوند وقالت اتعدل الوضع واول وحده براسها انا جاني خوف من فك الربط وقلت لها ابغى كمام الاوكسجين واتذكرت بنات التجمع وخوفنا من فك الربط ..
صحيح حسيت بشوي ألم بس الاوكسجين خفف الالم والدكتورة ماشاء الله يدها خفيفة ... بعد ماخلصت فك الربط كشفت قالت الرحم مفتوح 3 سم .. المهم نزل شوي دم وقالت لي شي طبيعي مع فك الربط .. وبدا يجيني مغص خفيف وهذا كله وانا اقول من فك الربط لين جات الساعه عشر في الليل ويجيني ألم في بطني مثل الامساك الله يكرمكم وكل شوي الحمام ومافي شي .. ويزيد الالم لما يحطون تخطيط قلب البيبي وكل مره تقول لي الممرضة مافي طلق وقضيتها رايحه وجايه الحمام وتعبت من الضغط .. قالت لي الممرضة الدكتورة تقول مافي طلق فودتني غر فة الملاحظة ونفس ألم الامساك .. واللي معاي في الغرفة نايمه ولاحست إن أحد معاها في الغرفة وأنا كل شوي رايحه وجايه عليها
المهم جات الساعة 6 الصباح وفيني النوم بس مو قادرة ناديت الممرضة قلت لها عطيني منوم ابغى انام قالت لا مااقدر اعطيك الحين لاني بعد شوي بسوي لك تخطيط ... طلعت امشي في الممر قلت يمكن يسهل علي وادخل الحمام غير اني يابنات كل ماجاني الالم اخذ نفس ويخف الالم لين جابت لي الممرضة تحميلة جلسرين وماعرفت احطها قلت لها ابغى شراب وجابته وقالت لي اشربي20 مل شربت 40 قلت يمكن يجي الفرج وكلمتني اختي تسال عني قلت لها إمساك قالت هذا مو إمساك هذا طلق .. وبالفعل شوي واروح الحمام وهنا المفاجاة ...
حاولت وضغطت ومافي فايدة لين حسيت بشي من قدام بيطلع وانا اغسل حسيت بشي مدور مثل الراس طلعت من الحمام وقلت للمرضة ونادت لي الدكتورة بسرعه وقاست لي الرحم لقته مفتوح عشرررررررررررررررررررررررره سم وطول الليل اللي كان معاي طلق ومحد حولي ... حمدت ربي اني مادريت انه طلق كنت بموت من الخوف قلت الحمد لله عدت علي انه امساك هههههههههههههههه
المهم تجمعوا حولي 3 دكتورات وكل وحده تقيس لي الرحم بس السالفة ان البنوته الاولى مقعديه نفس ماقالت دكتورتي الاستشارية.. وصارت حالة طؤارى وجابوا لي السرير ومايبغوني اقوم خايفين اولد عليهم وانا
اقول في داخلي وينهم عني من اول هههههه
وعلى طول غرفة الولادة والااشوف اختي على راسي وانبسطت انها بتكون معاي وجاني الالم ودفعت بقوه وطلعت البنوته الاولى بمقعدتها:04: والثانية براسها:04: بس ولادة مرتين ...
بس ا لحمد لله رب العالمين على أجر إن شاء الله
عمةالبدر @aamalbdr
محررة
يلزم عليك تسجيل الدخول أولًا لكتابة تعليق.
الصفحة الأخيرة
وحمدلله على سلامتك
والله يحفظهم لك ياارب