om_abadi @om_abadi

عضوة فعالة

،،،،،،،،، قصة ولادتي بالأميره شهد

بالأول اخبركم اني بكريه، وكان موعد ولادتي 25/6 ميلادي، مر علي هاليوم بلا طلق ولا حتى ريحة ولاده، طبعا أحبطت مره، ومر اليوم اللي بعده واللي بعده لغاية ماجا اليوم الموعود والحمدلله، كان يوم ثلاثاء صحيت من النوم قبل الساعة 5 الفجر والقى ثيابي مبلوله :35: تكرمون قلت لنفسي يمكن التهابات ولا شي لانه ماكانت افرازات وايده، غسلت وقلت يالله هجوم على النومه، بس على الساعه 5 بدت عندي آلام غريبه، تكررت كل عشر دقايق، جلست أقرا سورة مريم والزلزله والحمدلله هدأت نفسي بس الآلام بدت تزيد، ياربي وش هذا :06:

واجي ركض للمنتدى كتبت موضوع استفسر فيه عن هالالام والافرازات وظليت اتمشى بالغرفه وزوجي صحى للدوام يسألني شفيج قلت له الام عاديه مابي اخوفه لاني ماكنت متاكده ان كانت الام ولاده ولا لا، ورغم اني ودي انه يترخص من الدوام ويجلس معاي بس رجعت أقول لنفسي - انا لو ابطل كلام مع نفسي وايد أحسن :freak6: - لا شكله طلق كاذب كالعاده ومابي اتعب زوجي معاي وانا من دخلت التاسع وانا بهالهواجيس كل يوم يضطر يترخص علشاني وبعدين مايطلع طلق.

المهم فطرنا وودعت زوجي ورجعت بنام بس وين يجيني النوم والالم يشتد كل خمس دقايق، رجعت المنتدى وشفت كم رد اكدوا لي البنات - مشكورات - بانها بوادر ولاده واني لازم اروح المستشفى هنا تطمنت وحمدت ربي اتصلت بزوجي وقال بجيني، وتوكلت على الله وشربت منقوع كف مريم ومنقوع زعفران وقرفه ( دارسين ) واكلت تمر بالزبده كنت مجهزتهم من فتره..

وصرت اتمشى بالشقه وأقرا سورة مريم والزلزله وادعي ربي بهون الطلق ان شاءالله، رجع زوجي وكان بوديني المستشفى بس قلت له بدري خل نتمشى شوي ولغاية ماجت الساعه 9:30 والالم نار تلسع بطني وظهري ورجليني باقل من خمس دقايق، يارب لطفك..

وامشي للمستشفى دخلوني غرفة الانتظار وفحصتني الممرضه وكان الرحم فاتح 4 سم حطت علي جهاز تخطيط الطلق والمحروسه ترافس داخل بطني وانا أعيييييييط :06: على قولة عادل إمام :D صج فاضيه مو وقتي :crap:

بعدها على الساعه 1 تقريبا لقوا لي سرير بغرفة الولاده بعد مانشفوا ريقي وظليت اصارع الالام بصمت وماكنت اصارخ كثير قد ماظليت اتنفس بالطريقه اللي قرأت عندها بالمنتدى والحمدلله خفت علي الالام شويه، وزوجي الله يحفظه لي كان ينتظر برا ويقرأ سورة مريم وكل شوي يغافل الممرضه يبوق روحه ويجيني، كنت مع كل ألم ورغم نفاذ صبري الا اني كنت اذكر الله وأهون على نفسي وأذكرها بانه كله بأجره وتكفير ذنوب ان شاءالله وحطوا لي قسطره (سحب الإدرار تكرمون) كنت ادري انه بألمني لكن بالتنفس السريع وتجاهل الألم كله يهون...

طلبت ابرة الورك خففت علي شوي ونمت شوي لكن وقت الألم أصحى واحاول أهدأ نفسي بس الألم فظيييييييع وحضرتهم حاطين الساعه قبال عيني كنت اتحطم لما اشوف الدقايق تمشي بطيئه :(

والقابله كل ساعتين اول ثلاث تفحص التوسع يادوب سم ولا ثنين.. يارب رحمتك.. ولما شافت الراس هنا بدت حالة الطوارئ، الم فظيييييييييييييييييييييييع ورغم محاولتي التنفس السريع لكن مع الدفع ماقدرت ما اصارخ ظليت ادفع ليما طلعت روحي وماوعيت الا بقمورتي حبيبتي حطوها على صدري كانت الساعة 8:43 بالليل وبتاريخ 28/6..

ياااااااااااااااه يابنات
ماقدر اوصف لكم شعوري وقتها بكيت من الفرح والله ونفسي احضنها بسرعه والحمدلله الله حقق مناي بشهد حبيبتي الله لايحرمني منها ولا من ابوها
ويرزق كل المحرومات ويسهل على الحوامل ان شاءالله

وقبل مانسى، كنت متفقه مع زوجي انه مايخبر اهلي ولا اهله اني بالمستشفى بالولاده، مابيهم يحاتوني وبالمره كنت أبيها لهم مفاجأه خصوصا انها اول حفيده بعيلة زوجي، سنتين و8 شهور عمر زواجي وهم ينتظرون هاللحظه.. ولما أرسل لهم زوجي رسايل بالموبايل بخبر ولادتي كانت فرحتهم مضاعفة بس اخذنا منهم علقه ساخنه لانها ماخبرناهم من البدايه :024:

بس الحمدلله يوم من عمري ما أنساه،، معاناة 16 ساعه طلق نسيتها بشوفة بنتي حبيبتي الله لايحرمني منها ان شاءالله..

ونصيحتي لكل الحوامل المقبلات على الولاده:

~ ~ ~ ~ ~ ~

- ان تأخرتي عن موعد ولادتك لا تكتئبي يمكن تكوني حملتي قبل موعد دورتك الثانيه بشويه، ولكن ان تاخرتي اكثر من اسبوع روحي للمستشفى افضل قبل ماتشيخ المشيمه ويوسخ الجنين ببطنك بعيد الشر..

- تمشي قد ماتقدري لاتهملي هالشي، انا باخر يومين من ولادتي مشيت ساعتين متواصلتين ولمسافه طوييييييله والحمدلله الله يسر لي..

- لاتشربون محفزات الطلق من قرفه وخروع وباقي القائمة قبل مايجيكم الطلق الحقيقي، لانكم بتتألمون بدون مايكون فيه توسعه يعني تعب وألم على الفاضي..

- اتبعوا طريقة التنفس وقت الطلق بالشهيق العمييق لانه يقلل احساسك بالالم ويوفر لك الاكسجين اللازم لعملية الولاده..

- اطلبي ابرة الورك هدأتني، مو كثير بس افضل من لاشيئ.

- حاولي ماتصرخي قد ماتقدري حتى توفري جهدك للتوسعة الاخيره، وبدل الصراخ ارفعي صوتك بذكر الله ( اللهم ياخافض ياقابض، اللهم اسئلك هون الطلق ، يارب لطفك ، يارب رحمتك، يارب ....) والله يهون عليكم ان شاءالله..

- بعد الخياطة استخدمي سافلون افضل من الديتول لتطهير الجرح، واستخدمي زيت زيتون لانه يلين الخيط ( السيم ) ويطيح بسرعه...

~ ~ ~ ~ ~ ~

ادري طولت عليكم،،،، اسمحوا لي بس حبيت كونوا معي في احلى لحظة من حياتي برغم كل الالام،،، يارب الله يزرقكم ويهون على كل حامل ويرزق كل المحرومات ان شاءالله.. وتراي دعيت لكم كلكم،، الله يفرح قلوبكم ان شاءالله ويرزقكم ماتتمنوا..

سلامي
:26:

يلزم عليك تسجيل الدخول أولًا لكتابة تعليق.

تسجيل دخول

^انسانه لااكثر^ • 19 سنة

:icon28: :icon28: :icon28: :icon28: :icon28:
:icon28: :icon28: :icon28: :icon28:
:icon28: :icon28: :icon28:
:icon28: :icon28:
:icon28:

الـــــــــــــــف الــــــــــــــف مبروك العروسة (((( شهووووودده ))))
وحمد للـــــــــه على سلامتك ياعسل
ويارب يرزقك من البنين والبنات عدد ماتتمني
والــــــــــف شكر على نصائحك الثمينة وإن شاء الله يكتب لنا نمر بكل مامرتي به
:icon28:

nonoh99 • 19 سنة

الف الف الف مبروك على البنوتة الحلوة والحمد لله على السلامة تتربى بعزكم وتشوفينها

عروس بحول الله وقوته....

عقبالي وكل حامل الله يهون علينا ويبلغنا ذريتنا ويرزق كل محرومه قادر ياكريم

فرحات • 19 سنة

ألف ألف ألف ألف ألف مبروك عليج العروسه الحلوه.. والحمدالله على السلامه..
:icon28: :icon28: :icon28: :icon28: :icon28: :icon28:

Roro • 19 سنة

الـــــــــــــــف الــــــــــــــف مبروك العروسة (((( شهووووودده ))))
وحمد للـــــــــه على سلامتك ياعسل
ويارب يرزقك من البنين والبنات عدد ماتتمني
والــــــــــف شكر على نصائحك الثمينة وإن شاء الله يكتب لنا نمر بكل مامرتي به

mahfoudah • 19 سنة

الـــــــــــــــف الــــــــــــــف مبروك العروسة (((( شهووووودده ))))
وحمد للـــــــــه على سلامتك ياعسل
ويارب يرزقك من البنين والبنات عدد ماتتمني