قصة ولادتي ...... بالتفصيل الممل

مرحبا خواتي
مثل ما وعدتكم اليوم جيت اخبركم عن اليوم الحافل الي ولدت فيه بكل تفاصيله .
بسم الله نبدأ

في البدايه بخبركم ان تاريخ الولاده الاولي الي عطوني اهو 17/ 6 بس بالالتراساوند عطوني 15/ 6

في يوم الثلاثاء14/6 كان عندي موعد مع الدكتوره الساعه 8:45 صباحا وفي هذا اليوم عملت لي فحص داخلي عشان تشوف الرحم فتح او لا ...... والله ان الفحص كان يذبح وقعدت اصرخ اكثر من الصريخ الي صرخته في الولاده والنتيجه كانت ان الرحم بعده صاك فقالت لي الدكتوره تعالي يوم السبت 18/6 وراح افتح ليك الرحم بيدي وبننطر الى يوم الاربعاء 22/6 واذا ما ولدتي راح احط لك طلق صناعي

اني مجرد سمعت هذا الكلام الا الدنيا تلف بي ..... شسوي مو عارفه الرحم صاك ومافيني أي آلام او طلق
طلعت من عندها واني ابكي احس انها مستعجله علي كثير يعني البعض يوصل 42 اسبوع واهي بس بتنطر 5 ايام وبعدين بتولدني غصب
ما اطول عليكم طلعت من عند الدكتوره حوالي الساعه عشره وما كان لي خلق اني اروح البيت فرحت السوبر ماركت اشتري اخر الاشياء الي كانت ناقصتني للمستشفى واني في السوبر ماركت الي يجني الم في بطني نفس المغيص ما حطيت بالي ولا اهتميت قلت يمكن عادي .طلعت من السوبرماركت واني في السياره الا يجيني الالم مره ثانيه . رحت بيت امي وقلت لها عن كلام الدكتوره قالت لي لا تحاتين ما تقدر تسوي لك شي اذا الله مو كاتب والبيبي بيجي في وقته وقالت لي اني ما اروح الموعد يوم السبت .

ظليت في بيت امي الين الساعه 2:30 الظهر مر علي زوجي ردته من الدوام وكان الالم مستمر وبديت احاتي واقول في نفسي معقوله يكون الم ولاده او مجرد طلق كاذب ؟؟ شسوي مو عارفه ما كنت حابه ان امي تعرف لانها بتقعد تحاتيني وانا كنت مقتنعه بكلام الدكتوره اني راح اطول فقلت هذا اكيد طلق كاذب ورديت شقتي والالم فيني .

زوجي اول ما شافني حس ان بيني شي فقلت له ان بيني الم اهو من فرحته قال اكيد بتولدين قومي نروح المستشفى................. مسكين ما صدق
بس اني رفضت طبعا وقلت له بريح بس وراح اكون بخير .... لكن الالم ضل مستمر وبعد ما كان كل نص ساعه صار كل 20 دقيقه وحوالي الساعه 5 المغرب صا ر كل 15 دقيقه

اهني قلت لا يا مره الضاهر ان في شي راح يصير قريب ...... اتصلت على امي وقلت لها اني بروح اشتري حلاوة الضيافه للمستشفى واريدها تجي معاي لان زوجي راقد اهي ما رضت في البدايه تقول باقي لك اسبوع ( على كلام الدكتوره) خليها لبعد كم يوم .. الجو حار يمكن تسيح بس اني اصريت عليها ورحنا
طول الطريق والالم يروح ويجي واني مو قادره حتى اني خليت امي اهي الي تسوق السياره ولما سالتني فيك شي قلت لها لا بس عندي اسهال( وانتوا بكرامه) وبطني يعورني منه
وبلطف الله امي ما شكت بشي بالمره حتى سالتها المغص قاعد يشتد ممكن تكون ريح ولاده قالت لا الولاده شي ثاني .

رديت البيت مع امي وتعشيت وبعد العشه رجعت شقتي على طول حتى امي تقول لي قعدي سهري معانه قلت لها ما اقدر بروح امشي شوي وبعدين بنام لاني رحت مشاوير وايد اليوم فاحس بالتعب .

رديت البيت حوالي الساعه 9 المسا والالم صار كل 10 دقايق وزوجي يقول ياالله اروح امشيكي قلت له ما اقدر لاني الضاهر بولد ............. اخيرا اقريت بالامر
وعلى طول نزلنا تحت لعمتي ام زوجي وسوت لي زعفران الا اللم يشتد اكثر واكثر وعلى الساعه 10 صار كل 5 دقايق ...... اهني قالت عمتي لازم انكم تروحون المستشفى واني ما رضيت كنت خايفه اني اطول بالمستشفى والمشكله اني كل الاشياء الي شريتها مثل ماء الدارسين والخروع وكف مريم كنت تاركتها عند امي ..... ومثل ما قلت ما كنت حابه ان امي تعرف اني بولد لانها راح تنهار وبتحملني ضغط نفسي اكثر من الي فيني .
توكلت على الله وقمت اخدت دش ساخن وشربت حليب ساخن وقريت ادعيه تسهيل الولاده الي بالمنتدى
الساعه 11:15 ما قدرت اتحمل اكثر وقلت لزوجي خلنا نروح المستشفى .
11:30 وصلنا وطوالي ودوني الغرفه الي كنت حاجزتها عشان الاقامه وحطو علي جهاز الطلق ونبض الجنين وعلى الساعه 12 يات الدكتوره وفحصتني ولقت الرحم فاتح بس 2 سم .
وقامت تسالني عن نوعية الالم والمده الي تفصل بين التقلصات وقالت لي اتوقع انك تولدين على الساعه 7 الصبح .
طبعا الالم يشتد واني اتابع على المونيتور و التقلصات توصل حدتها الي 100 او 120 واني احاول اطبق الي قريته من تمارين التنفس و الاسترخاء وطول الوقت اقرا سوره الزلزله و الادعيه الي حافضتها لتسهيل الولاده وزوجي الله يخليه معاي طول الوقت يقرا سورة الزلزله ويسوي لي مساج للضهر وكل ما ياني تقلص اخذت يده وضغط عليها بكل قوتي لاني ما ابي اصرخ واخسر طاقتي مثل ما يقولون

عالساعه 2 صار الالم لا يحتمل وطلبت اني اخد الاوكسجين واهم ما تاخرو على طول يابوه بس ما حسيته يفيدني بالعكس كل ما استنشقه احس راسي يدور .
الساعه 3 ما عدت قادره اتحمل صار الالم متواصل يات الدكتوره وفحصتني قالت الرحم فاتح 3 سم ... لما قالت جذي راسي دار 3 ساعات بس 1 سم يعني ما راح اولد الا بعد يوم لكن الدكتوره قالت تطمني خلاص من يفتح 3 سم يعني راح يفتح بسرعه . وقالت لي بنروح نجهز غرفت الولاده عشان ناخدك هناك .
الساعه 4 خدوني على غرفت الولاده وكان الرحم فاتح 5 سم وفتحت الدكتوره ماي الرحم ............... وبس بعدها ما ادري شلي صار ... الم متواصل وضغط ومع اني كنت متحمله اني ما اصارخ قمت اصارخ واقول لهم البيبي بينزل احس بيه وهم يقولون للحين باقي اشويه بعد
الساعه 5 ومن كثر الالم طلبت يعطوني ابرة الورك وعطوني اياها وكلها 10 دقايق وحسيت اني ابي انام حتى الدكتوره تقول لي دفعي خلاص البيبي بيطلع وانا اقول لها ابي انام .... حتى اني قلت لها خليها داخل ما يحتاج انها تطلع بس خلوني انام ...... بس الدكتوره قالت لي لا تقولين هذا الكلام ترى كل الي يقولونه يردون الى غرفة الولاده بعد 10 شهور وهي تضحك ( اسم الله علي) وقالت لي اعطيك الين 5:30 بالكثير وراح تولدين وصدقت الساعه 5: 27 دقيقه شرفت اميرتي الى الدنيا .
والله انه احساس عجيب مجرد ما ولدت حسيت براحه ونسيت كل الي مريت بيه يا سبحان الله وعلى طول عطوني بنوتي ونادو على زوجي عشان يشوفها .

آخر شي بقى هو اخراج المشيمه و الخياطه بصراحه الدكتوره كثير شاطره ما حسيت باي الم لحضتها اللهم اشوية نغزات على النهايه بس الحين متغربله كثير لان الخياطه وايد كانت والين الحين متعبتني .

هذي هي قصة ولادتي بكل تفاصيلها عارفه اني طولت كثير وذكرت اشياء ما ليها داعي بس حبيت اشاركم اهم لحظات عشتها بحياتي .