قصة ولادتي بالتفصيل بمستشفى المساعديه بجدة >> الله لايكتبها على أحد

بسم الله الرحمن الرحيم

مرحبا بنات كيفكن اشتئتلكن كتير
بداية قصتي اتفق معي زوجي ببداية الزواج انو نأجل الحمل لفترة حتى يكمل دراسته يعني سنتين أو تلات سنوات انا وافقت بس مو من قلبي لأني بحب وبموت بالأطفال وأهلي كمان عبيستوا حفيد بققرب فرصة لأنه أصغر أخت عنا بصف تاني متوسط يعني ماشالله كبرت دعيت ربي من قلبي انو يكتبلي الخير.
بعد كم شهر من زواجنا صار يجيني وهم كل ما حسيت بغثيان وكل ماحسيت بدوخة بسيطة بقله لزوجي شكلي حامل:) طفشته قام راح جبلي كروت كشف حمل بالدرزن :42: قلي كل ماشكيتي خدي وحللي صرت كل فترة أحلل بس مشان أتسلى وصرت كل ما أحلل أمزح مع زوجي وققله أنا حامل بس مشان أفجعه ولما يشوف الكرت بلاقيه خط واحد بس بعد فترة تعود على مزحي هادا :).
بعد سنه من زواجي حللت بالكرت وطلع خط واحد وطلعت كالعادة عبمزح مع زوجي وقلتله أنا حامل أخد الكرت قلي بسم الله تعي شوفي عن جد خطين انا فكرته عبيمزح بس طلع عن جد خط غامق والتاني أفتح منه بشوي بس واضح ومابنسى اللحظة اللي عرفت فيها اني حامل كيف طار عقلي وصرت أنط فوق السرير من فرحتي الحمدالله (الله يرزق كل محرومة).

مرت الشهور الأولى بحلاوتها ومرارتها طبعا حلاوتها اني فرحانه بالحمل ومرارتها الوحام والقرف والنفسيه الزفت كنت أتابع عند الدكتورة أسماء شحرور ببناية نورا وكانت عاجبتني الدكتورة لأنه ملتزمه وسمعت عن خبرتها الطويله بهالمجال.

بداية مشكلتي إني بدأت أتنفخ وأنا بالشهر الخامس تقريبا حللت دم وطلع كل شي طبيعي الحمدالله بس كان في إلتهاب بول بنسبة بسيطة عطتني الدكتورة مضاد حيوي لمدة أسبوع والحمدالله راح الإلتهاب بس التنفخ ماراح
وصار جسمي يتنفخ تدريجيا.
لما وصلت الشهر التامن تنفخ جسمي أكتر وأكتر وصار شكلي بخوف وصرت لما أضغط بأصباعي على مكان التنفخ أحس بألم وصرت أحس بصداع أحس راسي راح ينفجر فقررت أروح عند الدكتورة مشان أعرف السبب رحت تاني يوم وأنا على أعصابي دخلنا عند الدكتورة وعملتلي سونار وقالتلي الحمدالله كل شي طبيعي وأنا قايمة من على السرير مسكت الدكتورة رجلي وقالت لي رجليك كتير متنفخه خلينا نقيس ضغطك ونادت الممرضة وقاسولي ضغطي طلع ضغطي مرتفع طلع 150 على 98 صرخت الدكتورة وقالت بسرعة خليها تعمل تحليل بول وقامت الممرضة تجري وجابتلي كاسة مشان التحليل عملت التحليل وأخدته الممرضة للمختبر بالدور اللي فوق وأنا أرجف من الخوف وعلى أعصابي لمدة نص ساعة على بال ماأجا التحليل أخدت الدكتورة النتيجة وقالت لي عندك نسبة البروتين عالي طلع 2 وقالت لي لو كان 3 كان ولادة على طول.
عطتني دوا ضغط اسمه Aldomet وقالت لي ارتاحي ولاتتعبي حالك وأهم شي تكون نفسيتك مرتاحة وتعي لعندي بعد بكره.
رحت على البيت وأخدت الدوا بالموعد المحدد بس الصداع ماراح وصار يزيد أكتر وأكتر وماحسنت أنام بالليل كل خمس دقايق أفيق من كتر الصداع طلع الصبح وماحسنت أصبر ولادقيقة قمت من السرير على الحمام حسيت بدوخة شوي وبعد شوي وقعت على الأرض وصارت الدنيا تلف حولي وماحاسنه ققوم وصرت أنادي على زوجي وزوجي مو حاسس بسابع نومة :( صرت أنادي بصوت أعلى حتى صحي زوجي بالسلامة وحرام مات من الفجعة لما شافني حملني جيت بدي ألبس مخي ماصار يشتغل والله يابنات يعني لما بدي ألبس شرابي مابعرف كيف بدي ألبسه متل الولاد الصغار ماصار المخ يعطي أوامر للجسم وحتى لما بدي ألبس الجزمة مالي عرفانه كيف بدي أدخل رجلي يعني بدي أدخل رجلي بالجزمة بدل ماأحرك رجلي تتحرك إيدي كأنه مخي مو براسي بعد ماطلعت روحي انا وزوجي الحمدالله لبست وخلصت كلم زوجي بابا وبابا اتصل على صاحبه مدير مستشفى بمكة ونصحه انه أفضل شي تروح على مستشفى المساعدية لأنه الإمكانيات كبيرةوالدكاترة كلن استشاريين رحنا على المستشفى على قسم الطواريء وجابولي كرسي مشان أنزل من السيارة لأنه مابحسن أمشي ودخلنا وقعدنا نستنى ونستنى وأنا ركبي عبترجف من الخوف والله يابنات قمة البهدلة تخيلوا قسم طواريء والدخول بالدور :angry2: ومافي غير دكتورة وحده ويمكن 100 حالة ولادة تخيلوا كيف الدخول بالدور يعني لو وحده على وشك ولادة كانت ولدت بالممرات وأنا قاعدة أسمع أنين وآهات وصراخ من الحريم بقسم الطواريء صرت أدعي ربي من خوفي يارب أولد قيصري يارب أولد قيصري والله مت من الخوف
وماما تحاول بالموظفةانو اتدخلني لأني كتير تعبانه وماحدا راضي يسمع وصارت ماما تبكي وتروح من مكان لمكان وتحاول وأنا خلص راح أموت أحس جسمي كله حيطيح من فوق الكرسي ويقولولنا لسا ماأجا الدور والله يابنات يمكن دخلوني بعد تلات أرباع ساعة الله لا يذل مخلوق وأنا خلص مالي حسنانه أشوف إدامي أجا دوري أخيرا وجات ماما تدخل معي قالولها ممنوع تدخل بس بنتك وصارت ماما تخاصمن وتقلن حرام عليكن البنت ماراح تحسن تحكي وصارت الدكتورة (الله لا يسامحا والله بكل صلاة ادعي عليها)تصرخ على ماما وتقلها خدي بنتك وانقلعي لمستشفى تاني تخيلوا نفسيتي بهاللحظات انا تعبانه والناس حولي عبيتقاتلوا.
صارت تسألني الدكتورة بكل بروود إيش مشكلتك وليش جيتي وأنا راح يغمى علي بس مسكت نفسي وقلتلها انو ضغطي عالي والبروتين طلع عندي 2 والدكتورة تتصرف بكل برود ولا كأنه في وحد إدامها راح تموت.
وماما تصرخ من بره خليني أدخل البنت تعبانه صارت الدكتورة تصرخ وتقلي انت امك كانت معاك ليلة دخلتك :(والله قمة الوقاحة.
جات ممرضة تقلي أرفعي رجلك مشان أطلع على السرير وانا نص مغمى علي صارت تصرخ أقلك أرفعي رجلك ماتفهمي ولا ماتسمعي بسرعة ماني فاضيتلك :( الله ينتقم منها يارب ياحي ياقيوم :( طلعوني على السرير وأنا مخي مسكر مالي عرفانه كيف طلعوني الحمدالله على كل حال والله قمة الإستهتار تركوني يمكن عشر دقايق لحالي على السرير وراحوا عند وحده شكلها كانت بتولد جنبي وصراخها صرعني وبعد ماخلصو منها أجو عندي وقاسولي ضغطي طلع ضغطي فوق ال200 صار الدكتورة وجهها أزرق وصاروا الممرضات يركدوا من حولي وأنا حاسه حالي بدي أغيب عن الوعي أجو ركبولي قسطرة بول (الله لايكتبها على أحد)والله مت وعشت بس الحمدالله وجات فحصتني الدكتورة طلع الرحم مقفل كمان مت وعشت مابعرف كيف قالوا البنات انو الفحص مابوجع مابعرف المهم حولوني على العناية المركزة ونزلوا فيني تحاليل وإبر ووصلوا فيني يمكن 10 أجهزة واحد تبع تخطيط القلب وواحد تبع الأكسجين وأجهزة كتير مابعرفا ودكاترة داخلين ودكاترة طالعين وأنا بين الحياة والموت اللي سمعته انو حالتها كتير خطرة ومعاها تسمم حمل أنا سمعت هيك قلت خلص حموت وصرت أدعي ربي وققول يارب ترحمني
وتسامحني ياااارب ياااااارب وصارت دموعي تنزل أجا الدكتور قلي انتي كنت تتابعي عند مين في فترة حملك قلتله عند الدكتورة أسماء قلي لازم هي الدكتورة نرفع فيها شكوى المفروض اول ماشافت حالتك على طول تحولك على المستشفى مو تعطيكي دوا ضغط وقلي انو حنعملك عملية قيصرية قلت الحمدالله وارتحت كتير صار عندي عقدة من اللي شفته بالطواريء ودعيت للدكتورة اسماء بالهدايه كل واحد لازم يغلط.
بعد شوي حسيت حكة بعيوني كأنه في شعرة جوا عيني وحسيت جسمي صار زي البالون المنفوخ اتنفخت بشكل مو طبيعي بعد ساعة خلو ماما تجي تشوفني وهيه ماما شافتني كانت حتنهار من البكا شكلا ماعرفتني من كتر التنفيخ قلتلها لماما في شعرة جوا عيوني قالتلي يابنتي عيونك كتييييير منفخة أصلا ماني شايفه عيونك الله يأجرني بس ويكفرلي ذنوبي
المهم أجو بعد شوي دكتورتين وقالولي بدنا نشوف الرحم يمكن فتح مع ارتفاع الضغط مشان نشوف يمكن يكون في أمل تولدي طبيعي المهم فحصتني وآآآخ من الفحص طلع الرحم مسكر الحمدالله قعدت أستنى يمكن نص ساعة بعدين أخدوني على غرفة العمليات دخلت الغرفة يالطيف طاولة السكاكين والمشارط بتخلع القلب غمضت عيوني وبدي أنيم نفسي مابدي أشوف غرفة الرعب والله يابنات تركوني يمكن ساعة وانا عبستنى بغرفة العمليات كانوا عبيعملو عملية قيصرية لوحده بالغرفة اللي جنبي وماكان مونسني إلا صوت نبض بنتي كانوا حاطين جهاز تبع تخطيط قلب الجنين بعد مامضت الساعة وانا على أعصابي أجا دكتور التخدير وعطاني الكمامة ورحت بسابع نومة وصحيت بعد شوي كأنها خمس دقايق وآلام الدنيا كلها ببطني من تحت وكانوا عبيطالعوني من غرفة العمليات وانا عببكي من الألم وصرت أسمع أصوات أهلي واخواتي كانوا بره وصرت أسمع الكل عبيبكي زوجي قلي بعدين كان شكلك متل الكآئنات الفضائية :( من كتر التنفخ اللي بجسمي اتغيرت كل ملامحي وزوجي صور بنتي وحط الجوال قدام عيني مشان أشوفا بس انا كنت بعالم تاني الآلام ابدا مو محتملة وصرت أبكيييي وققول بدي بنج بدييييي بننننج أجت الدكتورة وضربتني ابرة بفخدي رحت بعالم تاني صحيت وانا بالعناية المركزة طبعا والأجهزة كلا مشبكة فيني.
وحولي ممرضتين ودكتور طول الوقت قاعدين إدامي وكلن زي العسل الحمدالله جلست 3 ايام بالعنايه وانا تحت رحمة ربي كانت المشكلة انو الضغط ماعبينزل باليوم الرابع أجو الممرضات وقالولي لازم تروحي على الحمام
وتمشي بالممر شوي مشان الجرح بجد هي أصعب شي بعد العملية أجو ساعدوني ونزلوني من فوق السرير وانا متكيه على إيديهن وآلام لاتوصف مكان العمليه فصرت أحس بدوخة فظيعه بعد يومين اتحسنت كتير وسبحان الله الواحد كل مايمشي بخف الألم وأصعب شي الكحة بتخلي الواحد يموت.
لما اتحسنت فكولي القسطرة وطلعوني من العناية انا طلبت جناح خاص أو غرفة خاصة بس للأسف كله مليان اخدوني على غرفة صغييرة كتير وكمان مشتركة بيني وبين وحده تانيه والله اول مادخلت حسيت بكتمة رهيبه بس هادا الموجود والنصيب قضيت اسبوع طلعت روحي بين تحاليل وفحوصات وضغطي ينزل ببطء شديد وانا خايفة لأنه الدكتورة قالتلي إذا ضغطك ماوصل للحد الطبيعي حنضطر نعطيكي دوا الضغط على طول والحمدالله بعد كم يوم صار ضغطي ينزل أسرع حتى وصل للحد الطبيعي طبعا بعد ماصارت النفسيه زفت والأعصاب تلفت من المستشفى وبس بدي أطلع لو بدي أموت نفسي أشوف الشمس وأشم الهوا نفسي أهرب ولا عاد أرجع للمستشفى مره تانيه بدي أهرب من أصوات بكا الأطفال وتأوهات المرضى كل شي بجيب الكآبه.
بعد اسبوع من المعاناة أجت الدكتورة وقالتلي خلص حنكتبلك خروج ابتسمت إلي الحياة مره تانيه صرت أعد الثواني لوقت ماأجا زوجي وعمل الإجراءات حسيت الساعة كأنها اسبوع.
كلفتنا العملية تقريبا سبعة آلاف ونص أجر العملية 4 آلاف والعناية 3 آلاف والإقامة 500

والحمدالله رجعت لبيتي وزوجي والله لا يكتبها علي مره تانيه ونصيحتي إلكن لا تستهينوا أبدا بالتحاليل كل شهر حللو
وبالشهور الأخير لو بتحسنوا كل اسبوع روحوا تابعوا لأنه كل شي بيجي فجأة وسلامتكن


لاتنسوني ولبنتي من دعواتكن
سميت بنتي لين وأجت وزنا 2كيلو و300 جرام