السلام عليكم حبيباتي
حبيت أفيدكم زي ماأستفدت منكم
قبل أسبوعين نزلت موضوع عن أي شي يفتح الرحم لأني من يوم دخلت التاسع فاتح معي 2سم وعطتني الدكتورة موعدبعد أسبوع علشان تعطيني طلق صناعي وانا قلت لها ماراح آخذطلق صناعي إلاإذا أخذت إبرة ظهر
لأني جربته ببنتي الأولى وبغيت أموت تعقدت من سرير الولاده بسببه
قلت يالله مدامني عندي مهله أسبوع بجرب كل الطرق علشان أولد طبيعي طبعآ بعد التوكل على الله أعمل بالأسباب
المهم سويت أغلب الأمور مشيت بس موكثير وجماع ببداية الأمر بس لما شفت انه يتعبني وقفت
واتسبح بموية حاره
وأشرب سواخن وكل شي
المهم انا رحت للدكتورة يوم السبت وعطتني موعد الأحد اللي بعد أسبوعالمهم جاء يوم الثلاثاء وقلت هذا آخر الحلول إذا ماولدت خلاص يسكت لين الموعد وأتوكل على الله
قلت لزوجي جيب لي زيت خروع رفض بالبداية وبعدين يوم قرأ بعض تجاربكم أقتنع يوم الثلاثاء بعد الظهر قومني من النوم وقالي جبت لك الزيت
ماكان لي خلق قمت من النوم وجهزت نفسي انا وبنتي وعالمغرب رحنا لأمي وأخذت الزيت معي جلسنا نتقهوى عندأمي وأستخرت وقلت بشرب الزيت واتوكل على الله قسمت العلبه على ثلاث جرعات شوي مع زنجبيل وشوي مع نعناع وعلى الساعه عشرة بالليل كملت باقي العلبة مع كمون ويوم خلصت الكاس دق زوجي وطلعت ورحت البيت انا بيتي بجنب أمي وطلعت وسبقت زوجي مشي
وأول مادخلت البيت حسيت أني أبي الحمام الله يكرمكم
طبعآ انا عندي أخت زوجي الله يسعدها ويفتح لهاوقفت معي أكثر من أختي طبعا انا أصغر خواتي وكل خواتي متزوجات وامي كبيره بالسن ماتقدر تخدمني انا وبنتي فأنا من بنتي الأأولى أجلس ببيتي وتجيني أمي الله يطول بعمرها طبعا جبت شغاله وجلست عندي ويوم دخلت التاسع سوت لي عرس تبي تسافر وجتها مشكله مع أهلها وتبي تروح فأنا أحتسبت الأجر وقلتبوديها تجنبآ للمشاكل وقلت ربي بيعيني إن شاء الله ماعندي شغل وعندي أخت زوجي ونهاية الأسبوع يجون خواتي وبتتدبر
المهم دخلت البيت وقلت لأخت زوجي دخلي بنتي معك انا أحس بدا مفعول الزيت ودخلت الحمام وعلى طول جاني إسهال فظيع كل ربع ساعه بالحمام بعد أقل من ساعه جاني مغص زي مغص الدورة يروح ويجي وانا أصلا تعودت عليه طول التاسع بس مايطول معي يعني بالكثير نص ساعه ويروح هالمرة بدى معي الساعه12 تقريبآ وجت الساعه 2 وماراح بس اللي صبرني انه مايزيد
نفس الألم وقلتلزوي شكلي بروح المستشفى بعدين هونت قلت لا بجلس للفجر وجابت لي أخت زوجي الله يسعدها كاس يانسون ودفت لي زيت زيتون مع حبة البركه ودهنت ظهري وبطني والألم مستمر أذن الفجر وانا على نفس الموال صليت وقومت زوجي يصلي وقلت له شكلي بروح المستشفى بس قبل بتسبح بموية حارة وبعدين أروح المهم جهزت وطلعت من البيت نزلت بنتي وعمتها عند أمي ورحت المستشفى طبعآ أنا أتابع بالسعودي البريطاني مع الدكتورة فايزة المطري
وصلت المستشفى وعلى طول عالطوارئ دخلوني وركبولي جهاز التخطيط والطلق قالت لي فية طلق بس خفيف والرحم لسه فاتح 2سم بس وعنق الرحم سميك عاد انا تحطمت كل هالألم ومافيه ولاده قلت لها بطلع وإذا زاد الألم برجع لكم قالت براحتك بس مو أكيد فيه ولادة اليوم
يمكن تجلسين يومين ولا يوم المهم طلعت من عندهم ورجعت البيت وانا بالطريق تندمت أحس الألم ماخف ومالي خلق أتحمل أكثر من كذا قلت لزوجي والله تندمت ياليتني لست وأخذت إبرة ظهر مع طلق صناعي وخلصت قال كيفك تبين نرجع قلت خلنا نروح نفطر وانوم بنتي وعلى بال ماتداوم دكتورتي الساعه وحده الظهر نرجع لها ونشوف وش تقول يوم جت الساعه 11 الظهر قدرت أغفي شوي ونمت لين الساعه وحده الظهر وقمت وصليت ورجعت للمستشفى دخلت على دكتورتي وقلت لها عالوضع وقالت لي خلاص روحي للطوارئ وهم يقررون وش يسون لك بس انا مشكلتي أن الألمأ ختفى وقلت للدكتورة المناوبه ان المغص أختفى قالت طيب بكشف وأشوف كانت الساعه 2 الظهر قالت لا ياماما أنتي ولاده فاتح 4سم قلت لها طيب أبي أبرة ظهر وجابت لي دكتور التخدير وقالي عن كل سلبياتها طبعا انا عندي غده بس خفيفه وهو قالي أن اللي فيهم غده ماتصلح لهم بالغالب لان إحتمال ينخفض الضغط ونضطر على القيصريه بس عموما الأبرة لازم قبل ماتاخذينها فيه تحاليل تسوينها وبعد خمس وأربعين دقيقه تطلع النتيجه ونقرر تاخذينها أو لأ
طبعا انامافيني ألم بس ذبحني الخوف خاصه من الطلق الصناعي وبعدين دخلوني غرفة الولادة وغيرت ملابسي وركبت لي جهاز التخطيط والطلق والمغذي وقالت أنتظري لين تطلع النتيجه لأن إذا صلحت لك لازم الحين تاخذينها قبل 6سم
وبدى الألم يجي بس على خفيف وبعد شوي جتني القابله وقالت لي ان التحاليل طلعت وان الابره ماتصلح لك لأن عندك نسبة التجلط بالدم عاليه ومانقدر نعطيك الأبره هنا عاد انا تحطمت وقلت لها خلاص أبي قيصريه وجلست تهاوشني قالت حرام انتي كل الامور عندك تمام ليش قيصريه قلت لها انا ماابي أولد طبيعي وماابي طلق صناعي قالت طلق صناعي إن شاء الله ماتحتاجين لأن الرحم قاعد يفتح طبيعي بس يمكن نعطيك تحمية خفيفه وانا أقولها لا طلق صناعي ماأبيانا أبي عملية
بعد شوي جت كشفت وقالت 5سم بنحاول نفتح موية الراس وحاولت ثلاث مرات ولا قدرت تقول باقي عنق الرحم بعيد شوي
بعدين جتني الإستشاريه كورانا وقالت لي انتي باقي على ولادتك كثير والجنين مرة صغير ومانقدر نعطيك طلق صناعي علشان البيبي راح يتعب وماراح يتحمل قلت يارب لك الحمد جاء الفرج قالت بس قبل هذا كله لازم نسوي إشاعه نتأكد من وزن الجنين إذا كيلوين ونص خلاص تولدين طبيعي بس إذا أقل لازم عمليه
وكل شوي تجي القابله تسألني تبين مسكن وانا أقولها لأ الألم محتمل قالت خلاص إذا تبين مسكن علميني قلت لها طيب
تقريبآ على الساعه 5 العصر عطتني المسكن وركبت الكمام وكشفت قالت 6سم وسبحان الله مفعول المسكن ينوم بس وقت الطلق تصحين وجابولي الإشاعه وانا كأني نايمة أسمع الدكتورة تقول خلاص مايحتاج عمليه وزن الجنين كيلوين وأربع مية جرام وانا أهاوش زوجي والممرضات وأقول لهم أبي قيصريه محد دافع من جيبه شي أبي قيصريه وكل شوي تجيني دكتورة ليش مستعجله على القيصريه الحين الرحم فاتح أكثر من 6سم إحتمال وحنا نفتح البطن يطلع البيبي من تحت خلاص أصبري هانت وانا أهجد الساعه سبع وربع تقريبآ جتني الدكتورة كورانا وقلت لها خلاص أنا أبي عمليه قالت خلاص الساعه ثمانيه ونص إذا ماولدتي بنسوي العمليه وتطلع برة وتقول لزوجي مستحيل عمليه خلاص هي على وشك تولدأثرها تهجدني
بعدخمس دقايق جتني القابه وكشفت قالت يالله الحين ولاده تسع ونص فتح بحط يدي إذا جت الطلقه أدفعي علشان أنا أوسع النص الباقي وفعلا زي ماقالت وسعت النص وقالت يالله الحين إذا جت الطلقه أدفعي وانا أقولها ماأقدر أولد مافيني حيل أشفطوها خلاص انا تعبت ومن هالكلام الله يكتب أجرنا يارب
قالت يالله أدفعي حنا نشوف شعر البيبي والله يابنات ولاا كنت أحلم بمثل هالولاده سهله يارب لك الحمد صح فيها ألم بس وين طلق ربي والطلق الصناعي وجتني الطلقه الثانيه وأدفع وانا والله مو مصدقه انها ولاده أقول شكلهم غلطانين كيف كذا الألم وهذي تقول ولاده انا توقعت أني باقي هذا ألم 6سم وتعطيني بنج وتوسع والطلقه الثالثه طلع الراس ياربي لك الحمد وكانت الساعه تقريبآ سبع ونص يعني الحمد لله ولاده سهله وسريعه وطلعت بنتي الثانيه بخير يارب لك الحمد شعور لايوصف أسأل الله أن يبلغه كل محروم وكل من ينتظر هاللحظه
وأحلى جاجه عندهم بعد ماطلعت المشيمه قالت لي هذا منوم علشان ماتحسين بالخياط وعطتني إبره ولا عاد دريت عن الدنيا قمت الساعه تسعه ونص لقيت الغرفه فاضيه مافيها إلا أنا ودخلت القابله تقولي الحمد لله على السلامه وبعدها دخل زوجي وقلت له كيف البنت قال طيبه في الحضانه روشوها ولبسوهاونايمه عندهم وقالت لي القابله وش فيك طولتي بالنومه قلت لها لاتلوميني مواصله قالت نوم العافيه بس والله من جد يابنات هذي أحلى حاجه عندهم ماتحسين إلا وهم مخلصين كل شي قالت لي يالله الحين بجيب لك عربيه وبنوديك غرفتك علشان تتعشين عندهم
وانا خلاص هلكانه من الجوع والتعب ورحت لغرفتي طبعا انا تبع التأمين ويشملني جناح الأميره والمستشفى مرة جنااااااااااااااااااااااااااااان من كل ناحيه الإهتمام والنفسيه والصبر والنظافه وموفرين لك كل شي تحتاجينه ونفسياتهم عسل
وأبشركم اليوم لي عشر أيام والحمد لله صار عندي أحلى وردتين داليا وديالا الله يحفظهم لي
واللي تبي أي أستفسار أنا حاضرة
والله يهون على الجميع وييسر أموركن ويرزقكن الذريه الصالحه
عذرآ طولت عليكم ومللتكم بس حبيت أفيدكم
فرحتي داليا @frhty_dalya
عضوة جديدة
يلزم عليك تسجيل الدخول أولًا لكتابة تعليق.
جوجيا :
لا يمكنك مشاهدة هذا التعليق لانتهاكه شروط الاستخدام.
الحمد لله على السلامة
جعلها الله من مواليد السعادة
ومن الصالحات البارات الحافظات لكتاب الله
جعلها الله من مواليد السعادة
ومن الصالحات البارات الحافظات لكتاب الله
الصفحة الأخيرة
وعقبالي يااااااااااااااارب