قصة ولادتي بالمستشفى السعودي البريطاني 9 / 2 / 1433

بسم الله الرحمن الرحيم ..

مراحب حبوبات كيفكم ان شاءالله بخير ..ابشركم ولدت وصار لي 19 يوم ولله الحمد وجبت بنوتتي الثانيه الله يخليهم لي

مالكم بالطويله بخش ع طول بسالفة ولادتي .. انا طبعا عوشرت بحملي هذا طول فترة التاسع ماكنت احس

بأي طلوق تجي الالام خفيفه مررره شوي وتروح .. عاد انا كنت اراجع بمستشفى قوى الامن اخر موعد لي قالت

الدكتوره بيخلص شهرك ب 5 محرم وكتبو لي تنويم بتاريخ 14محرم خلال هالفتره لو ماولدت اتنوم والله يعين طلق صناعي

ومن حسن حظي وصلن لنا بطاقات التأمين بوقت حلوو مره وقلت يابنت دلعي نفسك واختاري لك مستشفى كويس اولدي

فيه احترت ورسيت ع المستشفى السعودي البريطاني بعد ماقريت تجارب البنات فيه رحت لموعدي بقوى الامن واخذت صور

من ملفي ورحت للبريطاني وعطيتهم الاوراق وفتحو لي ملف كان يوم سبت وعطوني موعد يوم الاثنين مع الدكتوره كورانا

رحت لموعدي ودخلت ع الدكتوره وشافت اوراقي قالت ولو المفروض راجعتي معي ع الاقل من بداية التاسع اسوي لك انا

التحاليل والاشعه قلت عاد الشكوى لله بس ترا يادكتوره موعد تنويمي بقوى الامن الجمعه وانا ابي اولد هنا لو تقدرين

تكتبين لي تنويم قالت تعالي بكرا الثلوث اسوي لك تحاليل واشعه ونتفق على الولاده قلت اوك قالت قومي للسرير اكشف

عليك ومير اطمر وتقعد تلمس بطني قالت راس البيبي مانزل للحوض مايل شوي جهة اليمين المهم قمت من عندها ع اساس

برجع لها بكرا الظهر للتحاليل والاشعه ركبت السيارره الا واحس باوجاع خفيفه ماستغربت قلت زي كل مره تجي وتختفي

الا والله طولت يابنت الاوجاع جلست يمكن ساعه الا ربع تجي وتروح وصلت للبيت تقريبا 12 الظهر انسدحت ومازالت الاوجاع

موجوده لين 1 الظهر قمت لدورة المياه والقى بكلوتي كرمتو شي بني زي دم اخر الدوره بس انه شوي مو كثير ماتصدقون

فرحتي خصوصا اني شايله من بالي اني بجرب طلق ربي حاطه ببالي تنويم وصناعي صبرت لين 2 ونص والالام اشتدت

على خفيف علمت امي واشتقت شوي اخذت جوالي وجلست اهارج اختي واعلمها قالت بس يابنت هذا الطلق جاك قومي بس امشي وسوي

قرفصاء عشان تسهل عليك ولادتك شوي قمت سويت قرفه وشربت كوب همن طلعت انا واخوي وبنتي نمشي بالحاره هههه

مشيت يمكن ثلث ساعه ورجعت وارجع للحمام والقى هالمره كتلة افراز لوونها بني وتطقني النفاضه وامي كل شوي تجيني

هاه يابنتي مازاد الطلق واقولها لا عادي الم محتمل زي الم الدوره واروح وانقع حلتيته بمويه حاره وجلست لين المغرب همن

حطيت مويتها بفوطه ولبستها قالت امي قوه للمستتشفى تراه بعيد والطريق زحمه قلت طيب رحنا انا وامي وبنتي مع اخوي

وصلت للمستشفى الساعه 6 دخلت الطوارى وانبطحت ع السرير وحطو لي جهاز النبض وقاست رحمي قالت مفتوح 2 سانتي

اخذت قطعة حلتيته جايبتها معي وجلست اشم فيها جلست تقريبا ساعه الا ربع الا واحس بمويه تنزل مني جت النيرس

وعلمتها ان فيه مويه نزلت مني قاست قالت 3 ونص خلص التخطيط وقومني جلست على الكرسي بياخذوني لغرفة الولاده

قلت لامي خوذو بنتي وروحو واذا ولدت علمتكم ودعتها واخذت بنتي وهي تبكي قطعت قلبي .. دخلت غرفة الولاده عطوني

اللبس ولبسته وانسدحت ع السرير وركبو الاجهزه والمغذي الخرابيط الثانيه جت النيرس قاست الرحم وابطت ويدها جوا

تعور مررره اااه وعلى وقت جية الطلق ياربيه قلت لها كم قالت 5 سانتي اخذت جوالي وجلست اعلم اختي اني بغرفة الولاده

واوصيها تدعي لي ههههه حطيت جوالي جنب وسادتي زاد الالم بس برضو مازلت متحملته قالت لي متحمله الالم ولا تبين

مسكن قلت لين الحين متحمله بس اذا بغيت قلت لك صبرت صبرت يوم صار الالم قريب من بعضه قلت لها ابي مسكن

عطتني ابره بالوريد حسيت بالمحلول وهو يمشي بعروقي وححار مرره يحررق لاشعوري وربي ثواني بس بديت اتخدر

ماني قادره افتح عيوني جلست اون لين غفيت اصحى على وقت الطلق الحامي لاجا واسمعها تقولي ادفعي ادفعي

وكانت مدخله يدها جوا تقولي يالله جالسسه اساعدك انا اددفعي وانا اخذ نفسس عمييق واددفع اددفع وينهد حيلي

من البنج اريح ثواني واذا جا الطلق اخذ نفس وادفع باقوى ماعندي وهم يشجعوني ايوه يالله يالله بعد اددفعي واتعب واوقف

همن يجي الطلق واددفع اددفع وفجاه حسسيت ببنتي وهي تطلع ااااااااه ياززين الراححه جلسست اتحمد الله وانا

دايخه حدي وهياا النووووووووووووومه فتحت وهم يصحوني يالله يالله يكفي نوم بتنزلين للغرفه كانت الساعه

10 ونص نظفوني وخيطوني وانا نايمه هههههههه صحيت والبنج مازال فيني داييخه مرره مدري كيف لبست عباتي مدري كيف حطو جوالي بشنطتي مدري كيف

جلست ع الكرسي مره مااتذكر دايخه نزلت للغرفه ودقيت على امي ببشرها ومازلت دايخه اول ماقلت الو

قالت الحمدالله ع السلامه يابنيتي ومبروك ماجبتي شلونتس الحين قلت شدراتس اني ولدت قالت دقينا وردت الدكتوره وقالت انك ولدتي بالسلامه

جابو لي عشاء وانا دايخه قالت السستر يلا لازم تاكلين قلت مقدر دايخه بنام وبعدين اكل

قالت لا لازم انتي في اكل اكلت العشاء وانا مدروخه وعلى طول ماكملت دقيقتين الا وانا مستفرغته كله كرمتو جت السستر

وشالت الاكل غفيت ساعه وصحيت راح البنج وصحصحت جلست اناظر بنتي بالشاشه جابوها لي شوي واخذوها وكملت نوم

يوم جا من بكرا الظهر اخذت شاور ودق تلفون الغرفه اثاريها الكوافيره قالت حابه اخذ لك موعد للاستشوار قلت ليه لا قالت خلاص

2 ونص بكون عندك وجتني بالموعد واستشورتني وبعدها بساعه جت حقت المساج وسوت لي مساج ياسلام سلم

يوم جا العصر جت امي وابوي ومعهم بنتي والشغاله يووه ولهانه ع بنتي قعدت ابوسسها ساعه راحو اهلي وخلو بنتي

والشغاله عندي لين 10 الليل كتبو لي خروج ودقيت ع اخوي وجا اخذني .. وبسس


تقييمي للمستشفى بصراحه ممتاز مرره مافي اي عيوب كل شوي يجوني مشرفة الممرضات ومشرفة النظافه ومدري

ايش يسالوني اذا فيه اي ملاحظه او شكوى وماكان فيه الا شي واحد اكتشفت ان ماعندهم مواعيد معينه للاكل

يعني مايجيبون لك الاكل الا لاطلبتي انتي مايجيبون من انفسهم الغدا والعشاء وهيك وانا جلست جوعانه احتريهم

يجيبون لي اكل لين قالت لي الممرضه لاجعتي وبغيتي اكل اي وقت دقي واطلبي ,,

وتوته توته خلصصت الحتوته


دعواتي لكل الكروششات بولاده سسهله يارب .. ادعو لي ربي يخلي لي بناتي وزوجي ويسخره لي ..