السلام عليكم
كان يامكاااااااان
لما كنت بالشهر الخامس رحت لعياده خاصه علشان اسوي التراساوند علشان اشوف جنس الجنين واتطمن واتاكد انه كل شي تمام التمام ولان عندي بكري ولد والله يحفظه ويصلحه يارب ويخليه لي كان ودي في بنوته والحمدلله الله حقق امنيتي وقالوو لي بالسونار اني حامل في بنت ولله الحمد بس عندي مشكله نزول المشيمه شوي من ناحيه اليسار على كثررر مافرحت بالبنت على قد ماتنغصت فرحتي بسالفة المشيمه رجعت البيت وانه مهمومه ودخلت عاالنت ادور عن نزول المشيمه ولقيت شكثر مواضيع وصور و علاجات ومن ضمنها ان اللي تنزل مشيمتها لازم ترتاح على ظهرها وترفع رجولها على مخده ولازم ماتحمل شي ثقيل ولا تتعب روحها بالحركه وشغل البيت وقللي من اللي خبري خبركم
سويت كل اللي قريته وتوكلت على الله لماكنت بالشهر الثامن قالت لي الدكتوررره بعد الفحص ان المشيمه ارتفعت وفرحت واااااااااااااااااااااايد
وصلت للشهر التاسع وقلت خل ابتدي امشي علشان تسهل الولاده وفعلا قمت امشي كل يوم نص ساعه ولمن قربت على نهاية التاسع زودت الوقت الى ساعه كامله وكان موعدي المفترض 6/6 جا موعدي وماولدت قلت حق زوجي ودني الممشى ومشيت ساعه ونص بعدها رجعت البيت وخذت دوش سااااااااااااخن وايد تمددت على السرير ونمت من التعب اللي صادني
على الساعه 11 الا ربع الظهر حسيت ان ماي ساخن ينزل مني فرحت وايد توقعت ماية الجنين انفكت وان ولادتي قربت وراح ارتاح من الثقل والتعب لكن لمن قمت من على السرير بشويش تفاجأت بان اللي نزل مني موب ماي اللي نزل مني دم صافي تخرعت وقمت اصيح مو عارفه شسوي وتحركت اشوي الا وينزل مني دم غزير لدرجة ان الارضيه تلعوزت وقام ولدي يصيح وياي يقول لي ماما يعور يطلع منج دم زدت صياح يوم شفت ولدي:arb: يصيح
المهم اتصلت في زوجي وقلت له بدون اي مقدمات صايدني نزيف تعال لي بسرعه قاللي انا في الشغل ماقدر اجي لإني ويا المدير وقال لي لحظه استاذن منه وأحاول اجي بعد فتره اتصل فيني قال المدير مارضى قمت من القهر اصيح وطلعت من شقتي رحت لعمتي ام زوجي وقلت لها وين حمايي الصغير قالت لي ليش قلت لها بسالفة النزيف ابي يوديني المستشفى ورجعت الشقه وآنه أقطر دم شافت عمتي الدم اخترعت وراحت قالت لحمايي قوم بسرعه ود زوجة اخوك المستفشى شكلها بتولد قام حمايي من النوم ودق على بنت اخته وركبت السياره وصلنا ولدي عند اختي ورحنا على المستشفى على طول وجاني الطلق وآنه في الطريق بس مسكت نفسي عن لا اصارخ لإن حمايي اللي موصلني وبنت حماتي احتاست معاي مو عارفه شتسوي غير انها اتقول حق خالها بسرعه شوي اشتد علي الطلق قريب بوصل المستشفى قمت اتوجع وقمت آخذ نفس عميق واطلعه احس شي يدف من تحت يبي يطلع ولمن شافوني جذي قام يمشي بسرعه وبس وصلنا المستشفى جابو لي كرسي متحرك وحطوني عليه وطيران طوائ الولاده
وصلنا المستشفى عالساعه 1وربع ومن دخلت سألتني الممرضه شفيج قلت لها السالفه وانه ميته خووووووووف قامت جابت لي ثياب المستشفى الخضر وقالت لي بدلي انه مابطالع بدلت وكل شي وانسدحت على السرير وجت تبي تجيكني وحطت لي كوتكس وراحت ورجعت بعد ربع ساعه ومعاها دكتوره وثلاث ممرضات وقامت تهذر عليهم وآنه ميته من الوجع وميته خوف وكل شوي اطالع الساعه واقول ياريت اولد بسرعه وأفتك مهلو شوي ورجعو وجايبه الدكتوره الالترا ساوند وطفواا النور وقامت تفحصني الا اسمعهم يهذرون بالانجليزي ومن ضمن اللي فهمته انه في مشكله عندي وأني إحتمال احتاج عمليه صرخت فيهم قلت لها لالالالالالالالالا مابي عمليه ابي اولد طبيعي شغلت النور واربعهم جاو على راسي يبون يهدأوني يفهموني خطورة وضعي قامت الدكتوره تقولي (( شوفي حبيبتي إنتي عندج مشكله والحل لها عمليه قيصريه )) قلت لها شنو المشكله انه رحت وقالو لي كل شي اوكي مافيني شي قالت لي (( شوفي حبوبه آنه ولدت ثلاث مرات بعمليه والعمليه ابدا ماتخوف ولا راح تحسين بشي مع البنج النصفي والادويه اللي راح نعطيج اياها))
قلت لها أنتي بس تبين تسويني عمليه وماقلتي لي شنهي المشكله
قالت لي (( المشكله في المشيمه نازله نزول كلي ومغطيه لج عنق الرحم كله فعلشان جذي نززل عليج هالدم كله وصار عندج تمزق في المشيمه والحمدلله انج جيتي من البدايه ولا كان انتي والبيبي في خبر كان ))
آنه تفاجات لدرجه اني قمت اصيح بصوت واتنهد وارتجف من قوه الصدمه وقلت لها لين سويت العمليه نطلع انه والبيبي بخير قالت اي ولا فيكم اي شي قلت خلاص الحين سوووني قالت زوجج وين قلت ليش قالت علشان يوقع عالعمليه قمت اصيح واقولها زوجي في الشغل والمدير مو راضي يخليه يجي وكنت يائسه ولاكملت كلمتي الا جت ممرضه تقول هازبند مال انته بره تبيه يجي قلت ايييه الحين الحين نادته ودخل علي والوانه متغيره قلت له وقع عالاوراق قال شوراقه قلت له ابي عمليه قامت الدكتوره قالت له السالفه وجابو الاوراق وقع هو وبعدها وقعت آنه
طلع هو وقامت الممرضه وحطت لي قسطرة البول وانتو بكرامه بعد ما ذبحتني وحطو على شعري غطا حقة العمليات وطوالي على جناح العمليات
قلت لهم ابي اسلم على زوجي قبل لا ادخل جا زوجي وسلمت عليه ودخلت غرفة العمليات ونقلوني عالسرير الثاني وجا دكتور البنج وخلوني اقعد مثل القرفصاء وعطاني ابرة البنج النصفي بغيت امووووووووووت منها
بعدها مددوني على السرير وغطو من بطني لفوق بستاره خظره علشان لاشوف شي بعدها حطولي الاكسجين والتخطيط وقال لي دكتور البنج تراهم بدو العمليه تحسين بشي يعورج قلت له لا بس احس فيهم يظغطون علي ويسحبون فيني يمين ويسار قال اوكي هذا طبيعي بس اهم شي عوار مافيه قلت له لا بعد فتره سمعت صوووت صياح البيبي قمت اصيح مو مصدقه اني ولدت والبيبي مافيه شي
قالت لي الدكتوره انتي شنو قالو لج فيج بنت ولا ولد قلت قالو لي بنت بس حتى لو جبت ولد الحمدلله اهم شي مافيه شي قالت لي لا جبتي بنوته وجابتها لي وورتني عضوها وبعدها ودتها الممرضه تسبحها وآنه وهم يخيطوني قعد اتحمد الله واشكر فضله على صحتي وصحة البيبي وبعد ماكملت خياط شالو عني الستاره وقالو لي الحمدلله عالسلامه وتتربى في عزكم وطلعوني من غرفة العمليات الا زوجي برا يوم شافني ابتسم لي وقال لي حمدلله على سلامتج قلت له الله يسلمك ونقلوني الجناح ورقدوني 4 ايام بعدهاا رحت اتنفس عند اهلي
وخلصت القصه
وه تعبت
:09:
jafalove @jafalove
عضوة فعالة
يلزم عليك تسجيل الدخول أولًا لكتابة تعليق.
أحلام ذهبية
•
الف الحمدلله على السلامة وتتربى بعزكم يارب
الحمد الله على سلامتك
وتتربى في عزك الا ماقلتي ايش سمتيها
وعلى فكره انا مثلك عندي ولد واتمنى اجيب بنوته
وتتربى في عزك الا ماقلتي ايش سمتيها
وعلى فكره انا مثلك عندي ولد واتمنى اجيب بنوته
الصفحة الأخيرة