قصة ولادتي بحبيبي قصي مع اهداء صور تجهيزات النفاس

اخباركم مع الحمل وتعبه
زي منتو شايفين في الموضوع حابه ابشركم اخيرا بولادتي بحبيب مامتو قصي واقولكم على قصتي والاكشنات الي صارت لي وقتها
في البدايه كنت بتابع مع الدكتوره كيتي في بخش سمعت عنها من وحده قريبتي وكانت المستشفى دي اقرب شي لبيتي مع اني مقرره اولد في المتحدون بس قلت اتابع هنا واخر شهرين احول على المتحدون
سبحان الله اخر الشهر الثامن اخدت موعد في المتحدون عند الدكتور فاطمه النمري وطبعا بطلوع الروح بعد 3 اسابيع وقبل الموعد بيوم اتصلو بنا وقالو ان الدكتوره اخدت اجازه اضطراريه والغت كل المواعيد
انا هنا احبط مره كان نفسي تولدني قال زوجي خيره وخلاص كملي عندي كيتي انا ما ابغاكي تولدي عند أي وحده كيتي ادرى بحالتك ومن دا الكلام اتوكلت على الله وقلت سبحان الله يمكن خيره
المهم رحت لها اخر الثامن قالت لي الراس نزل في الحوض ماشالله وممكن تولدي باي وقت انا هنا انبسط وحطيت في بالي اني حولد بداية التاسع وهدا اكبر غلط سويتو قالت لي لتغطس بمويا حاره واشرب حليب بالقرفه والزنجبيل
واكثر من الي بالي بالكم طبعا انا ماخليت شي الا وسويتو ومافي أي بوادر للولاده رحت لها الاسبوع الي بعدو وقالت لي ابغى اكشف عليكي كشفت طبعا دي اول مره بغيت اموت من الالم قالت لي مفتوح واحد سم
استمريت على المحرضات وجربت كل شي حتى الحلتيت المعفن الي قالو عليه بس مافي امل في الاسبوع التالت من 9 كان عندي موعد قلت لها سوي لي تحريض انا طفشت الولد ماشالله تبارك الرحمن كل مالو وزنو بيزيد وانا اخاف اولد نهاية التاسع يكون وصل وزنه 4 كيلو


رحت يوم الثلاثاء سوت لي تحريض ومن داك اليوم بدئت تجيني الطلوق بس كانت متفاوته صباح الاربعاء قوي علي الطلق ورحت الطوارئ سو لي تخطيط وكشفت علي الدكتوره قالت 2 سم ولسا الطلوق بارده ورجعتني البيت وقالت روحي امشي
استغليت الوضع وقلت لزوجي وديني السوق امشي فيه رحت الاندلس مول لفيتو بالكامل والطلق كل مالو يقوا اكلت بيض بلدي مسلوق يقولو يقوي الطلق ومشيت ومشيت وصار الطلق اقوا رحت الخميس وكمان نفس الشي الرحم 2 سم والطلق بارد ومتفاوت مو منتظم
جلست امشي وامشي الين ماقلت بس ورحت لهم الجمعه (شويا وةيطردوني طفشتهم ) الساعه 10 ونص اول مادخلت الطوارئ اسمع صوت وحده تصرخ وتزعق صوتها مررره يخوف انا وزوجي انفجعنا جلست ابكي واقلو رجعني البيت خلاص ما ابغى اولد وهو مصدوم من صوتها قلي ايش رايك تسوي قيصري وتخلصي فكرت فيها بس بعدين قلت لا الناس تتمنى الطبيعي وانا اروح اسويها قيصري
اتوكلنا على الله ودخلنا دي المره دخلوني قسم الولاده على طول سو لي تخطيط وكشفو لقوها 3 سم ودا تاني غلط سويتو اني قبلت ادخل المستشفى بدري
طبعا جلست في غرفة التخطيط وماخلو زوجي يدخل معايا لانو غرفة التخطيط مشتركه وفيها كذا وحده
دخلت معايا حماتي الله يسعدها ويخليها ليا بدئت الطلوق تحمى وانا صرت ابكي بس ماسكه نفسي مايطلع لي صوت وادعي واستغفر واقرا الورد وحماتي تقرا علي وكل مالو الالم يزيد جات الدكتوره كشفت لقتو 4 وكان على الفجر
قالت خلاص ولاده ودخلوني الكشك طبعا في الكشك كنت في غرفه لحالي دخلو معايا حماتي وزوجي مساكين تعبو كل واحد اخد لو غفوه وانا مازلت اتالم غير ظهري الي وجعني لاني نايمه على وضعيه وحده من امس
جات الدكتوره المناوبه الساعه 9 ونص وكشفت ولقيت الرحم لساتو 4 بس قالت لي عنق الرحم رقيق ماشالله وممكن ينفتح بسرعه في أي وقت وفتحت المويا والطلق بدا يحمى اكثر عالساعه 10 ونص جات كيتي وكشفت بس كان كشفها غير دخلت ايدها وقالت لي ادف وصارت تضغط على بطني انا تجننت الم موطبيعي صرت اضربها وادفها خخخخخخ صرت اقولها وخري عني لا تمسكي بطني وانهرت صرت اقلهم ابغى مسكن ابغى ابرة ظهر ابغى عمليه
الم قوي مره والطلق صار ورا بعض حطولي كمامه بس كانت تخليني استفرغ وصرت كل ما يحطولي هيا ارميها
مع انها كانت تهلوس وتخليني اضحك مدري على ايش
حطولي مسكن في المغذي وادوني ابره في العضل بعدها انا صرت في عالم ثاني اخر شي سمعته انو الرحم كان مفتوح 7 سم فتحت عيني لقيتهم مجهزيني للولاده ورافعين رجولي بس كنت في عالم تاني ما اقدر اتكلم اسمع الي حولي بس موقادراقول شي
غبت عن الوعي شويا وفتحت عيني لقيت زوجي عند راسي وحماتي في الجهه التانيه والدكاتره والسسترات حولي
صارو يقولو لي دفي وانا مبلمه بس اطل فيهم وارجع اغمض عيني وانام اسمع الدكتوره تخاصم حسبي الله عليها
تقول انتي مش عاوزه تساعدي نفسك براحتك انتي عاوزه تضيعي الوقت وانا افتح عيني واوزع ابتسامات وارجع اغفو اسمعهم يقولو دفي كانك تعملي براز (الله يكرمكم ) واحاول ادف بس ماكان فيا حيل وعلى دا لحال السسترات صارو يضحكو عليا يقولو اوووه شي سليب اول ما يقولو كدا افتح عيني وافرصع لهم هيا وارجع انام تاني طفشتهم اخر شي طبوو اتنين فوق بطني وصارو يضغطو بان الراس ومو باقي غير دفه قويه مني ويطلع وانا على حالي نايمه صارو كلهم يصرخو ويقولو دفي شوفي الراس باين يالله مابقي شي قلت في نفسي يابنت هي دفه ادفها وانام
وادف باقوا ما عندي والاتنين لساتهم طابين فوق بطني والا افتح عيني واشوفهم حاطينو في حضني حبيبي مسكين كان مزرق شالو وزادوجرعة البنج وبدئت الكتوره تطلع المشيمه وبعدها خيطت وكل دا وانا ماشالله تبارك ارحمن موحاسه بشي غايبه عن الوعي بس اسمع كل شي زي التصوير البطئ في الافلام عليهم اصوات تضحك
والحمدلله كانت والولاده حلوووووووه مررره ماحسيت فيها اللهم الام الطلق
وفي يوم السبت 19/5/1432 جا حبيب امو قصي وكان اسعد واحلى يوم في حياتي
وعقبالكم يارب تفرحو قريب بشوفة البيبي ومعليش طفشتكم بقرقرتي الكثيره بس معليش استحملوني من كتر ما انا فرحانه ومو مصدقه اني ولدت
نصيحه اخيره يابنات خصوصا البكريات الي زيي لا تحطو في بالكم انكم حتولدو بدري عشان لا توصولو لحالة الطفش الي كنت فيها الولد حينزل حينزل في اليوم الي ربي كاتبه وكمان لا تروحو للمستشفى بدري ترا مرره بهدله

اخر شي حبيت اشارككم بتجهيزاتي لنفاسي يمكن تستفيدو وتاخدو افكار وتدوني رأيكم فيها
طبعا اول صوره لباب المستشفى والي بعدها في الببت واخر شي الضيافه والهدايا الي وزعتها الكب كيك للكبار والتايغر والحلويات الي في العلبه الشفافه للصغار