مرحبااااااااااااا صبايا
الحمد لله ولدت بالسلامه ورزقت بـ :arb:
بفضل الله ثم فضل الدكتور
عبدالعزيز الشهراني جزاه الله عنا خير الجزاء...
ماراح اكتب عن حملي لاني كتبت عنه قبل كذا في مشاركاتي السابقه...
ولا راح اكتب عن الدكتور عبدالعزيز لان صفحات المنتدى ماراح تكفي وماراح الاقي الكلام
اللي يصف الدكتور ويوفيه حقه وسبق تكلمت عن تجربتي في العلاج عنده...
هنا مثل ماوعدتكم راح اكتب قصة ولادتي بالتفصيل الممل للاستفاده من بعض الاحداث
خاصه للي يسألون عن الولاده في المركز التخصصي الطبي..
طبعا انتو عارفين اني كنت اتابع حملي عندالدكتور عبدالعزيز بمركز ذريه
والولاده قررت تكون في المركزالتخصصي الطبي
في الشهر التاسع وضعي الصحي الحمدلله كان تمام بس المويه حول الجنين كانت قليله شوي ..
دكتوري سافر الحج وقال لورجعت وانتي ماولدتي يمكن نولدك طبيعي اوقيصري حسب الحاله
وجاء العيد وبدت الالام تزيد والضغط اسفل البطن
المهم يوم الجمعه بالليل بدا عندي مغص شديد شكيت انه طلق
لكن استغربت عدم وجود اي افرازات اودم لكن الالم كل ماله يزيد وبشكل منتظم
كل 10دقايق تقريبا فعرفت انه طلق..
كنت عنداهلي وزوجي معزوم اتصلت عليه وقلت تعال بسرعه شكلي بولد
كان عشا اهلي جاهز بس انا خلااااااااااااص مالي نفس بشي ومره خايفه
جا زوجي وقلت لهم بروح امشي ماابي يحسون بشي..
وصلنا المستشفى الساعه 11 مساء دخلت الطوارئ
وانهى زوجي بعض الاجرائات ودخلت غرفة الكشف ..
جتني دكتوره سودانيه كشفت علي قالت الرحم مفتوح 2 سم
قلت لها اناابي ابرةالظهر وكان الالم فضييييييييييييع وكل ماله يزيد
راحت وبعد فترة رجعت قالت معليش الولاده مايستقبلونك الان لسى بدري عليك روحي وتعالي بعدين..
خيييييييييييييييييييييييييييير وش اللي ارجع بعدين انا لازم آخذ ابرةالظهر لوطلعت يمكن ارجع والرحم يكون انفتح اكثر من اللازم وبعدين تقولون ماينفع نعطيك الابرة
قالت معليش اللي في الولاده مو راضين يستقبلونك لسى بدري عليك..
ظلمت الدنيا في عيوني واحترت اناوزوجي وش نسوي وانا قاعده اصرخ في داخلي وابكي من شدة الالم..
قال زوجي خلينا نكلم الدكتور عبدالعزيزونشوف يمكن رجع
قلت لا ..بلاش نزعجه الوقت متأخرويمكن تو راجع من السفر
( رغم انه ماقصر قال اتصلوا لوصار اي شي وفي اي وقت)
بس كل همي وقتها اني آخذ الابرة ..قلت لزوجي ناد لي الدكتورة وانا بتصرف اذا مانفع نتصل على الدكتور..
جت وحده سودانيه غير الاولى وقلت لها وانا ابكي من شده الالم ماراح اطلع من هنا حملي غالي وجا بعد سنوات وووو...سكت بعدها ماعاد قدرت اتكلم ...
قالت والله ...ماكنت عارفه هالشي..على ان ملفي عندهم فيه تجارب سابقه لي..
المهم قالت خلاص دام كذا استني راح اكلمهم راحت ورجعت بعد فتره
قالت مافي حل الا انك تتنومي الين تقرب ولادتك ..قلت مومشكله اتنوم بس
واضح ان الرحم قاعد ينفتح بسرعه لان الطلق صار سريع وقوي ..
شوفي الحين كم صار.((صرت اعلمهم شغلهم))...المهم كشفت قالت مفتوح 3 ونص
قلت شفتي خلاص لازم انزل الولاده عشان الابرة
قالت اوكي راح تنزلي الان ...
نزلت غرفة الولاده الساعه 2 ..واستقبلتني الممرضه ...ياحبي لها معاملتها روعه وكل
اللي شفتهم في الولاده كانو روعه ...وكانوا مرة مهتمين فيني
جتني الدكتوره نهاد (مصريه )سألتني بعض الأسئله وقالت لي انها حتولدني
ارتحت لها حبوبه ..جا بعدها دكتور التخدير وحط لي الابره تقريبا الساعه 3الفجر
بعدها الحمدلله ماحسيت بشي ابدا الى الساعه 8 الصبح.
بس كل مايرجع الالم يجي دكتور التخدير( خالد) يزيد الجرعه
كان زوجي موجود طول الوقت الا وقت ابرةالظهر طلبو منه الانتظار خارج الغرفه.
الساعه 8 بديت احس بالطلق من جديد طلبت دكتور التخدير عشان يزيد الجرعه بس
الدكتوره رفضت قالت لازم تحسي بشوية الم عشان تقدري تدفعي
لان الرحم صار مفتوح 10 سم والاخ متربع موراضي يطلع ...كان الالم معقول ممكن
اتحمله ...وجت ساعه الحسم :time: وتجمع الطاقم الطبي حولي وبدا فلم الرعب ..
قالت الدكتورة لازم تدفعي زين لانه اذا ماطلع خلاص بنحولها قيصري ماراح نخاطر دام حملك غالي ...
كلامها خوفني بجد ..خفت تتحول قيصري بعد هالتعب..
لكن الحمد لله طلع ابو الشباب اخيرااااااا :icon28:
:icon33:بعدها انا انهرت بكيت بحرارة والم واول مرة ابكي قدام احد مو مصدقه تذكرت السنين اللي
راحت بكل مافيها من الم وحزن وتعب وانتظار..وزوجي والطاقم الطبي يهدون فيني ..
بالنسبه للخياطه واللي تهمكم اكثر شي في الولاده كويسه لحدالان
لكن مااقدر احكم عليها صح لانها اول ولاده لي وماعندي خبره في هالامور.ويبدو انها
داخليه وخارجيه لانها طولت وهي تخيط والخارجيه اللي اشوفها غرزتين بس ...بصراحه
مااهتميت كثير ولا سألت عنها .:27:
المهم جتني الدكتوره منال الخرباش بعدالولاده وانالسى بالغرفة
كشفت علي قالت كل شي تمام
سألتني وش حتسمي ولدك ..قلت ان شااااااااااء الله عبدالعزيزعلى الدكتور
..املا مني انه يطلع دكتور رائع وناجح مثله ..
بعدها طلع زوجي يختار غرفه مناسبه وحجزنا اقرب سويت للحضانه بالدور السادس...
حلو تكوني قريب من الحضانه متى مابغيتي البيبي يجيك بسرعه
ومتى ما طفشتي منه يجون ياخذونه..
طبعا التنويم يومين ضمن قيمة الولاده واللي هي 7000 ريال +1500 ابرة الظهر
وزدنا يوم عشان اريح اكثر كلفنا 3000 ريال مع الحضانه
وعندنا تخفيض بسيط 20% ......من زمان وانا اراجع بالتخصصي
بس ماكنت عارفه انوفيه تخفيض للي يدفعوا كاش عرفت قبل الولاده من الدكتوره ...
لكل قطاع تخفيض ..طبعا لازم عن طريق
المدير عشان يتسجل التخفيض في الملف...
بالنسبة لإبرة الظهر روعه عند الولاده لكن من اعراضها صداااااااع فضيع ماتنفع
معه المسكنات يستمر اسبوع تقريبا وحله الوحيد الاستلقاء على الظهر بالعربي يعني
تنسدحي اكتشفت هالشي من نفسي محد قالي :)
لما انسدح يروح الصداع تماما ولما اقوم يرجع على طووول ..
في الختام
بقول شي للمتأخرات في الحمل ...وانا كنت وحده منكم
عيشوا حياتكم مثل ماهي واستمتعوا فيها سافروا وانبسطو واشغلوا اوقاتكم..
وفكرو دائما بالجوانب السيئه في
الانجاب ...هم وتعب وخوف ومسؤليه ...
اجعلوا شعاركم
(الحياه حلوه بوجود الأطفال ..وبدونهم الحياه أحلى )
لاني بعد الولاده اكتشفت اني
كنت في نعمه كبيره اللي هي راحة الباااااااااااااااال
ماعندي احد اهتم او اخاف واقلق عليه ..
ماعندي احد يصحيني كل ساعتين وينكد علي نومتي :(
والحمد لله على كل حال ..
اعذروني ( شكل عندي اكتئاب النفاس) :)
عذرا على الاطاله واللي حابه تستفسر عن اي شي انا حاضره
ولي عوده..
أم عبدالعزيز