قصة ولادتي بـ*مستشفى القصيم الوطني*

السلام عليكم ورحمة الله وبركاااته

أخيرا قررت اكتب قصة ولادتي اللي لها 3شهور هههه
بس ابي افيد بنات القصيم بتجربتي بمستشفى القصيم الوطني


ماقبل الولادة:
كنت اتابع عند د/حنان بدار رامة وهالانسانة مهما قلت مااوفيها حقها مرررة ممتازة ومريحة ومو راعية صرف ادوية وخرابيط وهياط ع الفاضي وتحترم عقلية المريضة تشركني بكل شيء حتى السونار تشرح لي والنيرس اللي معها برضو محترمة ومالها الا بشغلها

في مراجعة نصف الثامن قالت لي الدكتورة ان المشيمة بدت تتكلس
وبصراحة خفت بس قالت راح نتابع الموية والوزن والنبض والحركة إذا تمام يكون التكلس ماوصل الشرايين الاساسية
وبكل مراجعة أحط يدي على قلبي
ومن اقوم الصباح ابدأ اعد بالحركات
وعشت قلق ماحصلش الحمدلله
مع انها طمنتني بس كنت مررة خايفة لان سبق عندي اجهاضات


ولما دخلت التاسع صرت اراجع بمستشفى القصيم الوطني
بالبداية عند الدكتورة سمية كانت مرررة مريحة وقالت لاتوسوسي اهم شيء انتبهي ع الحركة وبصراحة طمنتني
وصرت آخذ تخطيط كل اسبوع
وبيوم الاربعاء 7-11كان عندي مراجعة متابعة وطلع عندي التهاب شديد بالبول
اخذت المضاد بس لاحظت من يوم الجمعة 9-11ان الحركة صارت اقل
اكلت حلا وتسدحت وهزيت بطني كان يادووب رف خفيف وبصراحة قلقت وكان موعد التخطيط عند الوطني السبت
بيوم السبت رجعت الحركة ماشاء الله احسن بس رحت وكانت بالعيادة الدكتورة زهرة دكتورة راقية وحبوبة
قلت لها عن الحركة
ولما شافت بالسونار قالت المشيمة كلها متكلسة
وضعف الحركة من هالتكلس
ومايصير تطولين اكثر
خصوصا انه عندي سابقة توقف نبض
وكشفت كان كشفها خفيف قالت 1سم والراس نازل بالحوض
وامورك كويسة>>اغراء:icon28:
واقترحت علي اتنوم وآخذ طلق صناعي ومدحت لي د/عروب اللي كانت مناوبة ذاك اليوم

رحت للبيت صليت العشاء والاستخارة
وجهزت شنط اهلي وشيكت على شنطة المستشفى

بالطريق
اقترح زوجي نروح للولادة نشوف شيقولون
بس انا اكررره بالولادة طوول اجرائاتهم
يذبحون المريض بالانتظار
فقلت خلنا ع الوطني نجرب ونرتاح من هالقلق

دخلوني التنويم
ولاحظت ندرة بالموظفات والممرضات عندهم
يعني ممرضة الدكتورة تسوي اجرائات الدخول طيب والدكتورة من بيكون معاها بهالوقت!!
حتى استقبال النساء والولادة اكثر شيء اجي مااحصلها لازم ادور عليها..
>>وبنرجع لهالملاحظة
المهم
دخلت غرفتي الساعة 10م كانت مريحة وواسعة

مباشرة جابوا لي لبس المستشفى وحطولي ابرة المغذي واللي نزل معها دم بالأرض وعلى يدي ومن سعة وجه الممرضة عطتني مسحة طبية قالت امسحيه!!!!
طلعت زوجي وبنتي لان بنتي تأثرت من شكل الدم وصيته عليها وقلت خلك معها انا ادبر عمري
وعطوني وجبة خفيفة جاتوه وعصير وتوست وشريحة جبن

دخلت د/عروب الساعة 10وثلث وحطت اول تحميله وسوت معها تحريض لانها مرررة تعمقت :09:
حسيت بيدها عند حلقي ههههه
بعد نصف ساعة ركبو التخطيط وبان فيه طلق الحمد لله وفعلا بديت احس بالالم وحسبت بين الطلقة والطلقة 4-2د مررة متواصل من بدايته
بعد التخطيط بديت امتر الغرفة وكنت ساحبة ورد الولادة من النت وطلع نصه اخطاء فانصح انكم تشترون الكتاب ولا تعتمدون ع النت

ع الساعة 12 وربع دخلت د/عروب وقاست مع تحريض>>ملاحظة اللي يعورها الكشف معناه تسوي لها تحريض لان د/زهرة كشفت ماحسيت بينما عروب مررررة تتعمق وتعوور>>دفووشة
قالت حلو 2سم:)
وسوو تخطيط>>ياكرهه
بدا الطلق يشتد وانا مابين السرير والمشي بس كان محتمل
ع الساعة 2م قاست قالت لازال 2سم:44:
وقتها تحطمت لان الطلق كااان مرررة شديد
ع الساعة 3 تقريبا دخلت الممرضة بتسوي تخطيط قلت لها فيه تحملة ثانية قالت فيه 2 على 4 الفجر:icon33:
ياااربي رحمتك
بس هالمرة ماتحملت التخطيط
ظهري مع الطلقة يشد مررررة ودي امشي او حتى اجلس بس السدحة ع الظهر تزيد الالم وكاان مررة شديد>>بعدين عرفت انه يوصل لفوق ال90
ماصدقت راحت النصف ساعة وقمت افرفر بالغرفة>>كاني بهج عن الالم
كنت اذا جت الطلقة اوقف واركع بس مااقدر امشي ولا اجلس
واذا راحت تحركت وقدام عيوني 2سم 2تحميلة:icon33:
تذكرت اننا بآخر الليل وبديت ادعي ربي يفرجها علي وتهووون وصرت احوقل لاول مرة استشعرها
ياربي لاتحاميل ولاطلق مالي الا حولك وقوتك
وانتظرت 4 مااحد دخل صارت 4وربع 4وثلث وانا كل مامرت دقيقة افرح خايفة من هالتحميلتين
على 4و41أذن الفجر
توضيت وصليت الفجر وكنت اذا جت الطلقة اصنم واذا راحت اكمل صلاتي

ع الساعة5 جابو اشين جهاز بالعالم التخطيط وماجابوا التحميلة>>لان التخطيط الاول بين ان معي طلق شديد
وصار الطلق عندي يوصل 94
ومن يوصل ل80أبدأ أتاوه لانه بالظهر وانا مربطة على ظهري
بعد التخطيط جت الدكتورة واستأذنتني تكشف قلت لها يعور خليه بدون تحريض قالت يعورك لان الراس نازل بس عنق الرحم رفيع
المهم كشفت وكالعادة كان يعور قالت 4:icon28: الحمدلله

بهالوقت ودوني للكشك
وكنت عطشاااانة وشفايفي بيضاااااااء واطلب ماء ويقولون طيب ويسحبون علي>>الظاهر خايفين احتاج عملية

دخلت الغرفة الخضراء
واشوف الساعة 6الا ربع
جت الدكتورة بتفك الموية
قلت لها اصبري لحد 6سم>>اعرف الطلق بعد فك الموية يكون اشد
بس قالت خلينا نساعدك لنسرع الولادة
وركبو التخطيط خلاص لاتراجع مافيه مشي ولا نومة على جنب

وطبعا كنت أتأوه بصوت مسموع وعندي ممرضتين حسبي الله عليهم
تسأل وحدة الثانية كم قالت 4 ويجلسون يضحكون
طيب مو معناه 4 بسيط احد 4مايحس واحد 4 ويمووت من الالم ببنتي 4 كان الالم جدا محتمل
والقهر قدامهم الجهاز يشوفونه يوصل لل80و90
وضحك بالممر الناس بأشد حالات الالم وهذولي ههههههه
ووسيعة الوجه وحدة منهم تقلد صوتي حسبي الله عليها
المهم
اشوف التخطيط بالجهاز اقل من الغرفة بس الالم كان اشد سبحان الله
وتجي الدكتورة وتكشف قالت الحمد لله وصلنا 5
وبهالوقت رجولي كانت مررررة ترتعش :( غطوني ببطانيتن ومازالت ترتعش
قلت للدكتورة تعبت>>يعني وش بيدها
قالت هذي الولادة واصعب شيء راح الباقي بيكون سريع ان شاء الله
قلت لها ببكري ماكانت كذا قالت هذا لانه صناعي

طلعت الدكتورة كان عندها حالة بالطوارئ
صار نبض البيبي يضعف وتقولي الممرضة خذي نفس بس احس نفسي مكتومة واحاول بس مو بالشكل الكافي
طلبت كمام
وتروح كالعادة لهالممر وتضحك وتسحب علي
ولما جت الدكتورة طلبت منها مسكن
قالت بنعطيك الكمام
وتجي الممرضة وتجلس تربط بالكمام وتناديها الممرضة الثانية وتاخذ الكمام وتطلع اقولها جيبيه تقول فيه مريض تاني اقولها وين الدكتورة قالت بالطوارئ فيه حالة>>ماقلت لكم عندهم شح بالكوادر واصبروا بذكركم بعد وهالممرضتين ربي حسيبهم

واجلس اتألم وحالتي حالة لحد ماجت الدكتورة ومعها ممرضة عربية محترمة
كشفت صار 7
عطوني ابرة بانبوبة المغذي ونزل منها ع الارض لان الصمام مفتوح>>حاااالة:09:
وتجي الممرضة الحبوبة وتزينه
وياسلاااام على الابرة
اول شيء حسيت بدوخة بعدين استرخيت لاني اول جسمي مشدود وهالشيء زود الالم
غمضت عيوني و صرت كأني بحلم وتجي امي على بالي ياقلبي لامسكنات ولاشيء اللهم ارحمهما كما ربياني صغيرا
وقت الطلقة احس بس مو بوعي كامل
وركبولي الكمام>>اكسجين اعتقد
بديت احس بدف بس خفيف واقول للدكتورة قالت الحمد لله بدا ينزل
والساعة 8 وربع جاء الدف الحقيقي
واحااااول ادفع وماقدرت مباشرة وحدة منهم تسوي حركة ببطني غريبة تمرر روووس اصابها على البطن وعلى طول تجي الطلقة وادفع>>هالحركة ماسووها ببكري
واحس بالدكتورة تقص وتقول يالله النونو صار يضعف نبضه
وعلى رابع دفعة ولدت بفضل الله واروح بساااابع نومة>>احسن شيء
واقوم وهي تخيط-بس مااحس- اقولها نزلت المشيمة!! ذذ>>يعني بالله بتسكر عليها مثلا
وارجع انام
ع الساعة 9 وربع قومتني الممرضة ورحت للغرفة

تنومت يومين عندهم ومليييييييت وطلبت خروج>>الاقامة عندهم3ايام للام والطفل بالحضانة
الدكتورة مامرت علي بس لما طلبنا خروج ع اليوم الثاني جت د/رندا وشيكت علي وكتبت لي خروج
الغسول والكريم عطتني اياه الممرضة ماقالت كم مرة ولا شلون استخدمه بس قالت هذا غسول وكريم
قريت نشرتهم ومشيت عليها
واممم الجرس احيانا لازم اطلبه مرتين علشان يستجيبون

وبالاخير الوداع الجميل
طلبنا عربية
وبعد وقت سمعنا صوت عربية بالممر وقفت
طلع زوجي يشوف الا عربية لحالها!!
ونكمل الطرارة معهم طلبنا احد يدفني خصوصا ان معنا اغراض ونونو
ويقولون عندنا عملية قيصرية!!طيب باقي المستشفى يتعطل!!>>مو قلت لكم ندرة واااضحة بالكوادر
ولما قالهم زوجي ليش حنا دافعين فلوس !! جابوا ثنتين مبوزات وطلعنا بحمد الله

هذي تجربة ولادتي
والحمدلله من قبل ومن بعد