قصة ولادتي بكامل تفاصيلها مع نصائح هامه للبكريات

الله يقومك بالسلامه ويخليلك بنتك والف مبروووووووك وعقبالي يارب

الحمدلله على السلامة ومبروك البنوتة تتربى بعزكم ان شاء الله

الحمد لله على سلامتك ياقمر ومبروك عالبنوتة

ادعيلي انا لي في التاسع تسع او عشر ايام تقريبا ونفسي اولد خلاص

يارب يسرلي بولادة طبيعية وطلق طبيعي

ايش سميتي البنوتة؟؟

قصة ولادتي بمستشفى الحبيب مع نصايح للبكريات:

على فكره انا كاتبه نفس موضوعي هذا بمنتدى ثاني بعضويه مختلفه

قصه ولادتي بمستشفى الحبيب باالريان
مع دكتورتي خالده العتيبي الله يوفقها


لازم الكل يعرف ان الدعاء هو سلاح المؤمن
وان ربي سبحانه بييسر لك ولادتك اذا توكلتي عليه واحسنتي الظن به ودعيتيه واذا كنتي
واثقه فيه فما راح يخيب ظنك.

بالنسبه لولادتي:
طبعا انا السونار لخبطني مره يزيد ومره ينقص باسابيع حملي
الظاهر انه على حسب وزن الجنين يحسبون عمر الحمل.
وهذا غلط لان فيه بعضهم يعطونهم اقل من عمرهم لان حجمهم صغير وهذا اللي حصل معي وبعضهم العكس يعطون الجنين عمر اكبر لان حجمه ماشاء الله كبير

المهم اضطرت دكتورتي تحسب لي حملي من وقت الدوره
تقول افضل لك واضبط
وخلينا من حساب السونار فيكون بداية شعبان بداية شهرك التاسع

انا كنت شاريه تقريبا نص اغراضي لي وللبيبي وباقي نص
وكل يوم احن على زوجي اقول له ودني يقول مشغول ومنتي طايره بدري عليك
ملحوق على السوق قلت له سبحان الله يمكن اولد باي يوم بالتاسع ماتدري
وهذا اللي حصل فعلا
سبحان الله ولدت وانا لي يومين او ثلاثه بالتاسع
وكنت احسب اني لسه مادخلت شهري وانا لسه ماخلصت اغراضي لكن الحمد لله الاغراض ملحوق عليها مدام ربي كتب لي الولاده
عاد نصيحتي لك لايجي شهرك الثامن او اخذتي نصه بالكثير
الا وانتي مخلصه كل اغراضك ومجهزه كل شي حتى شنطه المستشفى

المهم يوم السبت 1 / 8 قلت لزوجي ابي ابدا امشي
طلعت الصباح بعد الفجر مشيت تقريبا ثلث ساعه بس مابغيت اكثر مشي علشان مااتعب قلت ابي اتدرج بالمشي لحد ماامشي نص ساعه او ساعه يوميا

نفس اليوم جاني نوم ونعاس مو طبيعي نمت الصباح وقعدت الظهر ورجعت نمت الظهر وقعدت المغرب كله نوم نوم

ورجعت نمت الساعه 10 ونص بالليل زوجي كان طالع مشوار قلت ابي اخذ لي غفوه واقوم 12 انظف بيتي وارتبه

جا زوجي عالساعه وحده الا ربع بالليل وصحاني وهو يناظر لكرشتي
شكلها متغير كبر حجمها وصايره مشدوده حيل (وهذا من علامات الولاده)
حتى انه قال لي انتي حاطه شي على بطنك وش فيها يابسه ومنتفخه قلت له مدري .

جلست وحسيت بشي يصب من تحت بس على خفيف لكنه شي غريب ماهي افرازات

ولا ادري وشو قمت للحمام واناظر في ملابسي الداخليه واطالع كأن مصبوب فيها مويه مع خيوط دم خفيفه

انا خفت وقمت ابكي خخخخ واقول لزوجي شكلها ولاده
المهم قال يالله عالمستشفى حطيت فوطه ولبست عبايتي واخذت شنطتي ورحت للمستشفى
وصلنا المستشفى قسم الطواري والولاده قلنا لهم ولاده
وعلى طول ودوني غرفه الطوارئ والملاحظه وقعدوا يقيسون الضغط والحراره
وجتني دكتوره مناوبه باكستانيه مدري هنديه تكشف علي الله يقطع ابليسها عورتني دخلت يدها كلها وتصارخ تبيني ارخي جسمي بعد.
وشلون ارخي ويدك ثقيله علي ولا حطيتي لا جل ولا كريم قالت لي مفتوح 1 ونص سم

طبعا على حسب خفت يد الدكتوره انا فحصوني بعدها 3 دكتورات كلهم يدينهم خفيفه،
حسيت بشويه الم لكن مو زي هذي لاني طلبت منهم يحطون جل ويكشفون شوي شوي وماحسيت الا بالم بسيط محتمل

المهم انهم سووا لي سونار وقالوا لي ان مويه الجنين صارت قليله عليه
ومش متأكدين اذا انا دخلت التاسع ولالا

فعطوني احتياطا ابره لرئة الجنين عالساعه 3 بالليل والثانيه عالساعه 2 الظهر وبين هالفتره كانوا يقيسون نبض الجنين والحمد لله كان نبضه سليم

كانوا قايلين لي انه من بكره الظهر بنوديك غرفه الولاده علشان نعطيك طلق صناعي وتولدين ..
حسيت بفرح ممزوج بخوف وقلق وماقدرت انام ليلتها لكن الصباح افطرت ودعيت ربي يرزقني السكون والاطمئنان
ويهدي بالي ويأمن روعي واولد بكل يسر وسهوله
والحمد لله ربي استجاب لي لاني كنت واثقه فيه سبحانه وانا احاول امزح مع زوجي ونسولف وكأن الوضع عادي علشان اخفف التوتر

المهم لما جت الساعه 12 الظهر قاسوا نبض الجنين والطلق
وبعدها ودوني غرفه الولاده
وعطوني حقنه في فتحه الشرج وانتم بكرامه علشان تسهل كل اللي في البطن
وتكون فاضيه ولاتعملينها وانتي تولدين ولا تاكلين شي بعدها ولا قبلها بكم ساعه

فترتاحين وتتطمنين بان بطنك فاضيه

وممكن تشربين ماء وسوائل عادي بس اكل ممنوع الا بعد الولاده

المهم على الساعه 2 ونص الظهر حطوا لي ابره الطلق الصناعي زي المغذي مع مغذي

وحطوا جهاز على بطني لقياس نبض الجنين وقياس قوة الطلق

بالجهاز يجيك على يسار الشاشه رقم من فوق يسار هذا لقياس نبض الطفل ويكون كويس اذا كان فوق الميه يعني 130 او 140

واذا تحت الميه معناته النبض ضعف.. احيانا تحسبين النبض ضعف وهو ماضعف لكن الجنين تحرك او قلب

والرقم اللي يمين الشاشه فوق من صفر يبدا وهو لقياس الطلق كلما اشتد عندك الطلق زاد الرقم واذا وصل فوق التسعين الى ميه على طول يجتمعون عندك

لان الرحم فتح 9 او عشره سم خلاص ولاده
انا عطوني طلق صناعي الساعه 2 ونص الظهر ومابدا مفعوله الا عالاربعه ونص

كان كل ربع ساعه احس بألم ماسك ظهري الم محتمل يقعد دقيقه ويروح
وبعدها بدا يزيد الطلق ويتقارب على الساعه سته العصر
اكثر شي الم الظهر لكن كلما جاني الم مسكت بطني وقريت الزلزله والانشراح

واسوي تمارين التنفس اخذ الهوا من خشمي واطلعه من فمي وكان سبحان الله يخف الالم ويروح

وكنت اقرا سوره الزلزله والانشراح وايه (كأنهم يوم يرونها لم يلبثوا الا عشيه او ضحاها)

والطلق الصناعي موزي ماسمعت انه موت وانا مايعطيك نفس ثلاث ساعات ورى بعض
انا بفضل الله ماصار ورى بعض الا يمكن ساعه او اقل قبل الولاده
كان يروح ويجي كنت احاول اهدي نفسي واحسس نفسي ان الالم خفيف

وكلما يجي اقرا سوره الزلزله واللي احفظه من اذكار الولاده ويخف بفضل الله واحاول قد مااقدر مااصرخ ولا اتألم

وكنت كلما جاني طلق احط حيلي بالاكسجين اشمه واحسه يدوخ شوي ويهدي

وترى الخوف والتوتر والصراخ يزيد عليك الالم


عطوني ابره مسكن نصحتني فيها دكتورتي قالت خوذيها لانها ترخي عنق الرحم واخذتها بعدها احس انها دوختني

كنت ادعي اني اولد بسرعه ومايجي المغرب الا وانا والده
وكان فيه دكتوره مناوبه تروح وتجي علي قاستني العصر قالت مفتوح 4 سم انا فرحت

قالت لي ان شاء الله بعد العشا تكونين والده لكن انا قلت ان شاء الله قبلها اولد وكله تساهيل من الله
وسبحان الله ماجت سبعه ونص الا ولدت

احس ان الطلق تقارب وصرت اخذ نفس ومقدر اطلعه
اثاري الرحم فتح 9 سم خلاص ولاده وانا مادريت فجأه اشوفهن بسم الله اجتمعن حولي
يمكن اربعه مع دكتوره سوريه كشفت علي قالت لي انا لمست راس البيبي قد مافيكي ادفعي
انا قلت شلون ادفع ودكتورتي مهي عندي

انا كنت احس بشي غريب احس اني ابي اتبرز وانتم بكرامه
وفتحت الشرج احس انها تتمتد وكأنها يبي يطلع منها شي غصبن عني
وخفت اني اسوي شي قلت هذا مو وقته اسوي على حالي الحين يافشلتي
لكن نسيت اني مفضيه اللي ببطني وهالاحساس غريب ماكنت احس بدفع الجنين من عند بطني احس بس كأني ابي اتبرز وفيه حاجه تضغط على فتحه الشرج بقوه
لدرجه اني صكيت رجولي وصرت اضغط باصبعي على الفتحه علشان مايطلع شي
انا كنت ابي دكتورتي تجي
واصرخ نادوا عليها وين الدكتوره قالوا لي الحين تجي لحظات
راح زوجي ركض وجابها من غرفتها وجوا يركضون
على طول الدكتوره لبست البالطو والقفازات

وكشفت علي قالت يالله ولاده ادفعي الطفل هذا راسه لمسته بيدي ادفعي
يالله يالله

قلت لها كيف ادفع انا اخس بس بضغط على فتحه الشرج كأني ابي اعملها قالت لي ايووووووه هي هذي الولاده ادفعي كأنك بالحمام تتبرزين وانتم بكرامه
(ماعليش عالوصف لكن علشان تفهمون الولاده كيف)
يوم قالت لي كذا وانا اتعصر بقووووه وادفع وقمت اصارخ واصيح وادفع
قالت يالله شطوووره مابقى شي يالله خلاص يالله مره ثانيه
وانا اصارخ وادفع واقول يااااربي ارحمني

وفجأه وهي تسحب بنتي وتحطها على بطني علشان تقطع الحبل السري انا مالي خلق اطالعها بغيت اكفخها خخخخخخ بغيت اقول بدري مابغيتي تطلعين هههه
فديتها الله يخليها لي ولابوها
لكن اخذوها بسرعه وماركزت بشكلها لان الاكسجين دوخني مره عيوني مزغلله
بعدها بشوي قالت لي الدكتوره بقت المشيمه يالله كحي علشان تطلع وانا اكح مره مرتين ثلاثه مافيني حيل حاولت ماطلعت قالت اجل انتظري شوي لنما تنفصل من حالها وطلعت بدت تخيطني وكنت احس ببعض الغرز ابيها تخلص بسرعه ودي ارتاح قعدت يمكن ثلث ساعه تخيطني وانا شاده حيلي وارتفع فوق وهي تقول يابنتي رخي وانزلي شوي انا ابي اضبط خياطتك وانتي منتي معطيتني مجال قلت لها شسوي احس بالم خفيف
المهم خلصت خياط وجو نظفوني وانا ماني مستوعبه اني ولدت احس كأني بحلم من التعب ودي انام لكن مافيني نوم مدري شلون
بالنسبه لدكتورتي خالده عسى ربي يسعدها ويوفقها على سعة صدرها ونفسها الطيبه
والممرضات كانوا رائعات لكن احس وقت الولاده شديدات شوي يمكن علشان الجنين مايصير له شي لاني صرت اكتم انفاسي معد اقدر اتنفس احاول ماقدرت بس اخذ نفس ولا اقدر اطلعه
وهن يهاوشني خوذي نفس
لكنهم بشكل عام حبوبات وطيبات وعنايتهم حلوه
والنظافه توب

بعدها بنص او ساعه ودوني غرفه التنويم
ريحت هناك وجابوا لي بنيتي ياحياتي عليها لقمه صغيره حيل
شفتها واحس كني نسيت كل الالم سبحان الله
ومانسيتكم من الدعاء
وبالنسبه لاسمرار المنطقه الحساسه اللي شايل همها اثناء الولاده كل البكريات وكنت انا اولهم اقولهم ريحوا بالكم لانك ساعتها تبين تخلصين ولا تفكرين في اي شي وبعدين الدكتورات مقدرين وضع الحريم في هالحال وعارفين تصبغات الحمل لكن اهم شي اهتمي بحلاقه المنطقه كل يومين او ثلاثه اهم شي النظافه
وبس هذي قصة ولادتي أو رواية ولادتي خخخخخخ
حبيت تستفيدوا منها
ولاتنسون تدعون لي ان ربي يخلي لي زوجي وبنتي ويحفظنا من كل شر ويسعدنا بحياتنا ويكفينا شر الحساد
وادعوا لي اقوم بالسلامه وان ربي يسخر بنتي للرضاعه وترضع زين يارب

الف حمد الله على سلامتك ومبروك البنوته