قصة ولادتي . - بكر -

صباح الخير ، السلام عليكم كيف حالكم ؟ ..


اليوم بقولكم قصة ولادتي


اول مادخلت التاسعه بديت امل بشكل مو طبيعي والاخلاق .. ماودي احد يكلمني المهم واقراء بالنت طرق تخليني اولد بسرعه جربت كل شيء ما عدا الجماع لان مالي نفس ولا لي خلق ابد ، مشيت شربت زنجبيل اكلت تمر وعسل قريت كثير ان القرفه تجيب الطلق بس قريت انه ماتفتح الرحم .. يعني بس تتألمين ع الفاضي ف عشان كذا استبعدتها


المهم وقلت يالله مالي الا الجماع الشكوى لله .. ب الاسبوع الثاني من التاسع جربت من الملل المهم من ثالث مره وتنزل السدادة

والله من الفرحه يوم شفتها فتحت باب دوراة المياه اعزكم الله وقلت لزوجي نزل دم ..

المهم هذا الكلام الساعه 12 الظهر ومارحت المستشفى الا 4 العصر لان بيتي بعيد مررره عنهم وشقتي درج

المهم واروح لهم وقالو توك 2سم وجت سودانيه سوت لي تحريض

وصار 4سم وقالت يلا دخلوها غرفة الولاده المهم ودخلت غرفة الولادة ومعي ابو شنب قايله له ابيك تقعد معي لين اولد عشان يشوف الالم ويقدر الولاده

المهم ويبداء الطلق ويعطوني طلق صناعي عن طريق الوريد وبما اني بكر ماعرف شيء .. حسبي الله عليهم للحين حاقده

المهم تعرفون انتم الطلق الصناعي المه غير محتمل ابد الله يرحمنا برحمته يازين طلق ربي بس .. المهم من قوة طلق الصناعي قمت ارجع اللي ببطني الله يكرمكم واتهاوش معهم اقولهم شيلو جهاز قياس الطلق
من حر ما اوجس قمت اتهاوش معهم وزوجي منصدم طبعا من اللي قاعد يصير قدامه ويحاول يهديني ويقولهم عطوها مسكن تعبانه هي

المهم وعطوني ابرة مسكن دوختني رحت عالم ثاني .. نمت نومه اجمل نومه بحياتي هذا الكلام الساعه 6 المغرب .. المهم على 10 يمكن صرت اقوم بين طلقه وطلقه وارجع انام لا شعوري تعبانه ويقومني الالم والتفت على النيرس قلت ابي مسكن ثاني ورفضت

المهم وانام واقوم وعلى هالحاله وشوي كذا حسيت اني ادفع غصب عني ماقدر امسك نفسي حسيت البيبي بيطلع !

المهم والتفت محد عندي لا زوجي ولا النيرس .. واصارخ بكل م اتاني الله من قوة ١٠ ثواني بس واجتمعوا حول ٨ حولي اللي تركب واللي تشيل ويلا ادفعي وبرافو ومدري ايش وولدت وجبت احلى بنوته بالدنيا .. الحمدلله ياربي وادق وابشر امي وزوجي وطلع موجود بالمستشفى بس تحت يقول ماقدرت اتحمل المنظر

المهم وجتني امي بعد روحي جايبه لي مصابيب وحليب بحلبه وافطرت ونمت ماقمت الا ٨ الصبح ..


لكل بكر زيي لا تخافين من الولادة لان كل وحده تجربتها غير ، الله يعون على الحوامل يارب ويرزق كل محرومه .