قصة ولادتي بمدينة الملك فهد الطبيه ..

السلام عليكم ..

حبيت اطمن الجميع اني وولدي الحمد لله بخير وعافيه .. وبكتب لكم قصة ولادتي مثل مالبعض عارف اني كنت كاتبه موضوع عن التنويم والطلق الصناعي .. سويت قبل موعد التنويم كل شي ممكن يجيب لك طلق طبيعي بس سبحان الله ماجاني اي طلق .. المهم العشاء رحت لبيت اهلي عشان ولدي مخليته عندهم من 5 ايام عشان ارتاح قبل الولاده واتهيأ نفسيا وانا ببيت اهلي بس اضم ولدي ودموووع احس اني ماراح ارجع له وامي تشوفني وتبكي خافت يوم شافتني اضم ولدي وابكي.. المهم مثلكم عارف اللي تستنى موعد لايمكن يغمض لها جفن مانمت من يوم الجمعه والسبت تاريخ 12 / 1 صحى زوجي للدوام ولبس وشال شنطتي وطلعنا راح للمدرسه عشان يوقع ونتوجه للمستشفى بعدها قال لازم تاكلين شي لاني ماكلت يوم كامل قال خلينا نفطر وبعدها نروح للمستشفى قلت خلاص .. ورحنا لوودن بيكري وخذينا فطاير وانا مالي نفس بس عشان على قولته اقدر ادفع البيبي وقت الولاده ووقفنا بمواقف المستشفى وافطرنا وبعدها دخلنا المستشفى واخذوني لغرفة فيها 4 اسره للطلق الصناعي هالكلام الساعه 9 سووا لي فحص لقوا الرحم مفتوح 2 سم المهم عطوني ابره بالمغذي وتحميله طلق صناعي الساعه 10الصباح وكان موعد الزياره من 6-9 المساء وكلمت زوجي قال بجيك وقت الزياره قلت خلاص واطلع امشي بالممر وكل ماللالم يزيد ووقت ماكنت بالغرفه فيه 2 معي يصارخون بشكل لدرجة اتغطيت بالشرشف وقعدت ابكي من الخوف .. وعالساعه 3 بدأ الالم معي بشكل كبير المهم عالساعه 6 دقيت على زوجي قال لسى شوي وجايك .. بهالكم ساعه كشفوا علي كم مره بغيت اموووت من الالم ولما زاد الطلق معي تعرفون كل شوي لازم الحمام رحت للحمام اتبول وانتم بكرامه نزل معي دم مو طبيعي ارتعت وقعدت ابكي طلعت للممرضه وقلت لها قالت عادي معناها توسع الرحم قلت صاحيه انتي اقولك دم كثير نزيف قالت لا اكيد طبيعي قلت خلاص لما ادخل الحمام مره ثانيه اوريك كيف ولما دخلت الحمام ماسحبت السيفون وناديتها لما شافته ارتاعت وراحت اتصلت عالدكتوره قالت لها عن المشكله وان المريضه تبغى تكلمك قالت انا مشغوله قالت انها اتصلت على زوجها وزوجها بالطريق وسكرت منها الدكتوره من غير ماتكلمني وادق على زوجي ابكي قلت له حرام تاركيني انزف ماحد عطاني وجه قال انا قريب منك شوي وجت الدكتوره معصبه قالت انتم تحسبونا نلعب انا كنت مشغوله وانا ابكي قلت عارفه انك مشغوله بس ماتتركوني كذا قالت يالله بكشف قلت حرام عليكم ذبحتوني بالكشف سووا لي عمليه اذا وانا ادفع بول انزف بهالكمية كيف اذا ادفع طفل بموووت قالت مو انتي اللي تقررين ودخل زوجي قال يابنت الحلال هم بيعرفون الموضوع وقعدت ابكي وسلمت امري لله فجأه طلعت حديده غريبه قلت وش هذا قالت هذي بمثابة عيني بدخلها فيك واشوف لما دخلت الحديده قالت مفتوح 6 سم يالله عالولاده واقعد ابكي من الخوف ومن الالم ومن كل شي التفت الدكتوره على زوجي قالت تبغى تدخل معاها قال ماعندي اي مشكله ادخل معاها وطلعوني وزوجي مرتاع اول مره يدخل ويشوفني بالوضع هذا اني ابكي وخايفه .. المهم نزلوني للولاده والالم خلاص ماعاد اقدر اتحمله واقعد اصيح واترجى القابله تنادي دكتورتي ودخلت الدكتوره وكشفت وفتحت الكيس وقلت لها انتي وعدتيني يادكتوره انك تعطيني مسكن قالت اوكي وعلى ماعطوني الابره بالفخذ الالم ذابحني وزوجي يقول لاتصارخين تنفسي كوس واذكري ربك واقوم واطرده من الغرفه مسيكين ومافيه احد خليته بحاله الدكتوره صرخت عليها قلت لها لاتحاكيني لانها كانت تسالني سؤال وانا مو فاضيه ارد عليها والقابله ضربتها بيدي واسحبها بملابسها وحطت لي الكمامه وماحسيت باي تخفيف للالم قمت ورميت الكمامه عليها وقلت لها تلعبين علي ماتشتغل قالت الا تشتغل بس لآنك طلق صناعي ماتحسين باي راحه والله يابنات اني ادووخ ومااحس بعمري اذا راحت الطلقه لثواني كأنه مغمى علي وفجأه اقعد اصارخ للي خلقني ولما انفتح الرحم عندي خلاص جتني دكتوره غير دكتورتي وقالوا خلاص ادفعي وانا احاول ادفع رجلي اليمين ماعاد احس فيها كأنها نملت واقعد ابكي ويقومون يحركونها لي ويضربون الفخذ من وراء عشان يرجع الدم لها ..كذا مره خدرت رجلي شوي وشرف الولد بالسلامه ولما جت الدكتوره تخيطني بدون اي بنج خلاص كل ماغزت الابره احسها بقلبي وراسي ألمها .. وبعد ماانتهى كل شي خلوني 3 ساعات بغرفة الولاده عشان الملاحظه قالت القابله لازم تروحين للحمام تبولين قبل تروحين للغرفه وساعدتني لما نزلت من السرير نزفت بشكل وانا واقفه ارتعت وهي ارتاعت قالت ليش كذا قلت ماادري حتى بولدي الاول كنت كذا .. ولما رقيت لغرفتي قعدت معاي شوي وبرضو قالت يالله الحمام لما نزلت من السرير والله يابنات كأنك فاتحه حنفيه لدرجة ان طبعة رجليني على بلاط الغرفه دم لحد باب الحمام وانتم بكرامه ولما جيت بطلع من الحمام جتني دوخه ودخلت علي الممرضه وجلستني ووجهي الله لايوريكم اصفر يرووووع تحلفون ان مافيني نقطة دم .. وفجأه قمت اعرق واحس بإغماء نادت وحده معاها وشالوني وحطوني بالسرير واعطوني مغذي وطلعت بعد يومين .. والحمد لله رب العالمين على سلامتي لأاني فعلا شفت الموت بعيوني .. تعبت بشكل مو طبيعي لا من الكشف حسبي الله عليهم 7 مرات سواا لي فحص داخلي ولامن الولاده والطلق الصناعي .. الله يهون على كل حامل وويسر ولادتها ..
دعواتكم لعيالي بالصلاح والهدايه ..