قصة ولادتي بولدي الاول

الحمل والإنجاب

السلام عليكم
حبيت اشاركم بقصتي بما اني قريت قصص عضوات بالمنتدى واستمتهت واستفدت منها

المهم مالكم بالطويله

انا حملت وانا كنت ادرس بالسنه الاخيره لي بالكليه وكنت زعلانه ومتضايقه كثيييييييير اني حملت بدري لكن بعدها حمدت الله وشكرته على هالنعمة خاصه ان زوجي سمح لي اكمل السنه الاخيره عند اهلي بالرياض وهو كان يشتغل بتبوك يعني سنستقر بعد تخرجي بتبوك عدت الايام والدكتوره اللي كنت اراجع عندها حددتلي موعد الولاده في 27/6/1429ورتبت نفسي على كذا وزوجي اخذ اجازه فبل الموعد بيومين فقط
المهم خاصت اختباراتي في يوم السبت10/6/1429والحمد لله ورتبت لي جدول يبدا من الاحد وهو ترتيب الشنطه وشراء الاغراض الناقصه والاستعداد لمقابله زوجي وللولاده
وفي صباح يوم الاحد بديت اول اعمالي جهزت الشنطه وحطيت اغراضي واغراض النونو طبعا ماكنت ادري وش جنس الجنين مع اني كنت اراجع بخاص بس الدكتوره تقول الحجم صغير والبيبي مسكر رجوله وانا ماكنت حاطه ببالي غير اني اقوم بالسلامه واعدي الولاده على خير صحيت مع اخواتي وكانو هم باقي يختبرون فطرنا وراحو مدارسهم واشغالهم ورجعت نمت جنب امي مدري ليه حسيت اني ودي انام عندها وبعد الظهر صحيت ورجعوا اخواني واخواتي من المدارس ورجع ابوي من شغله وحطت امي الغدا بس ماتغديت حسيت مالي نفس ابد وكلمت زوجي وقلتله بيومها وانا استهبل عليه حاسه اني اليوم باولد مع اني ماكنت احس بشي بس قلتها عباطه وبعد ماسكرت منه رحت ورتبت دولابي وحطيت الكتب والملازم على جنب ورميت الاوراق والدفاتر اللي مابيها وجلست مع خواتي نسولف بعدها حسيت بنومه حلوه جتني قلت بروح اريح شوي انسدحت عالسرير غفيت غفوه وبعدها صحيت وبطني يالمني شوي اول ماخطر ببالي انه امساك قلت لنفسي تستاهلين مين قالك ماتتغدين وجلست اتقلب يمكن ربع ساعه والمغص يزيد بعدها اخذت لحافي ومخدتي ورحت ونمت مكان امي وهي تقولي تعالي تقهوي معنا وانا ااشر لها بيدي لا وبعدها رحت بنومه ويمكن ساعه الاشوي واصحى على نفس الالم قلت لازم اروح الحمام الامساك ماراح يريحني بالنوم ورحت الحمام وحاولت بس ولاشي وحسيت ان الالم راح توضيت ورحت اصلي العصر وبعدها المغرب وانا في الصلاة جاني الالم وبقوة ومن شدته جلست وكملت الصلاة جالسه وبعدها رحت لامي وانا ابكي وتقولي وش فيك قلتلها فيه الم ببطني يروح ويجي قوي مررره قالتلي توك تحسين فيه قلتلها من اول بس اللحين مقدر اتحمله قالت اجل يالا المستشفى يمكن يكون عندك ولاده قلتلها باقي بدري عالموعد قالت نروح ونطمن احسن وانا في نفسي مابغى اروح وخاااااااايفه ولما شافتني اختي قالتلي انا متاكده انك راح ترجعين اكيد مو ولاده بس روحي اتاكدي اخذت شنطتي واغراضي وودانا اخوي وبالطريق مرينا عالمستوصف عشان اخذ ملفي وبعدها توجهنا للمستشفى والالم يجي بقوه ويعصر بطني عصر وبعدها يختفي ولاكاني فيني شي واخوي مسرع بالسياره وانا ماسكه يذ اخوي الثاني واصارخ واضغط عليها واعضها وامي قدام تدعي يارب سهل عليها وانا اترجاهم يسكتون مابي اسمع اي صوت واقول لخوي لاتسرع وهو قطع كل الاشارات اللي مرينا فيها ووصلنا للمستشفى(الامير سلمان بالرياض)تقريبا بعد اذان العشا اذن واحنا بالطريق ويجيب اخوي كرسي واجلس عليه وتدفني امي وللطوارئ على طول قالت الدكتوره ايش فيه امي قالت يمكن ولاده طلعت امي وقالت بكشف عليك كانت باكستانيه او هنديه انا وقتها مدري وش الكشف على بالي بجهاز او سماعه او شي بس ماكنت ادري انه كذا واول مادخلت يدها واصرخ ذيك الصرخه دخلت امي قالت وش فيه قالتلها يالا فوق خلاص ولاده والممرضه تقيس الضغط واخوي راح يكمل الاوراق وانا ابكي تقولي الممرضه وهي سعوديه انا اقيس الضغط ليش تبكين قلتلها انا ابكي من الالم مو من قياسك ويوم اكتملت الاوراق قالت الممرضه لامي يالا انتم اللحين مع السلامه واذا ولدت احنا بنبلغكم قالت امي ماقدر اخليها بروح معها قالت كذا النظام مو بيدي قالت طيب ننتظرها قالت يمكن تطولين مافيه اي فايده لوجودكم قالتلها امي هي بكريه وزوجها مو موجود وماتعرف تتصرف لوحدها قالتلها اسفة والله لو بيدي عادي بس ممنوع ودعن امي واخواني وانا طلعتني الممرضه فوق عالكرسي ودخلنا قسم الولاده واستقبلتنا ممرضه فلبينيه اعطتني كيس قالتلي حطي العبايه وملابسك الداخليه هنا وادخلي الحمام وبعدها اخذوني على غرفه وسدحوني على سرير وحطو جهاز النبض بعدها جتني دكتوره سعوديه الله يسعدها وقالتلي انا اللي راح اولدك استغفري واقري الاذكار ولاتتوترين وقربت من عندي وقالتلي الرحم مفتوح7سم تعرفين وش معناها يعني اللحين راح تولدين وطلعت وجت ممرضه سعوديه تركب لي السواره بيدي لحظة الالم القوي وقالت لي اللحين تبكين وفري البكي ساعة الولاده خفت من كلامها وجلست اقرا الاذكار وشوي ماشوف الا ذاك الدكتور الطويل الاسمر داخل عندي ويضحك سلم علي كانت لهجته متكسرة وجلس يقلب في ملفي وسالني عن اخر دوره وجلس بنهاية السرير لحظتها ارتعبت وخفت ياربيه وش بيسوي واشوف الممرضه تعطيه شي ابيض طويل ويوم شفته بيدخله فيني صارخت وقلت لا يادكتور الله يخليك وبكيت زي الاطفال ودخله واحس زي قربه مويه طلعت مني بعدها قام وضحك وقال ولاده قريب وسهل ان شاء الله وراح وانا الالم يزيد علي ويرجع يخف وعلى هالحاله لما جتني الدكتوره السعوديه قالت اذا حسيتي بشي قوليلي انا عالكرسي اللي برى وراحت مره ثانيه وانا اتالم واراقب الساعه قدامي ومرت نص ساعه وبعدها احس اني باتبرز وبقوه ناديت دكتوره ابي الحمام بسرعه على طول قامت وقالت لا على غرفة الولاده قلتلها لا انا عارفه نفسي ابي الحمام قالت هذا راس الجنين انتي بتولدين قومي عالكرسي والاحسن انك تمشين جلست عالكرسي وودتني لغرفة الولاده يوم شفت سرير الولاده خفت لا والانوار اللي فوقي انسدحت على سرير الولاده ورفعو رجولي فوق وانا اشوف وش بتسوي طلعت ابرة كبيره وانا اقولها لاتحطينها مابي ابر وحطتها داخل الفخذ وشوي زاد الالم واخذت مشرط وتقولي ساعدي نفسك خذي نفس وادفعي وامسكي بحدايد السرير سويت مثل ماقالت وماصار شي حسيت بشق التوسعه بعدها دفعه ودفعتين والثالثه قالتلي اشوف راسه يالا ساعديني وادفعه بقوه واحس شي طلع مني وتحطه على صدري وهو مبلل ولد ولد وحمدت الله كثير وماصدقت اني ولدت اخذته الممرضه وسالتني مدام انتي ايش جيب قلتلها ولد وبصمتني وراحت فيه شوي والدكتوره تضغط على بطني وانا اللي اشيل يدها وادفها بقوة وجعتني بقوه قالت لازم عشان المشيمه تنزل لوحدها والرحم مايتاثر ساعديني وتمسك مره ثانيه وتسحبها صراحه المتني كثير بعدين ضحكت وقالت اللحين خلصنا الكثير وماباقي الا شوي وهي جالسه تنظف تدخل بهالقطن وتطلع قلتلها وشو قالت الخياطه قلتلها انا مابي خياطه خلاص طلعوني قالت مو بكيفك قلت طيب خلوني ارتاح بعدين خيطو قالت مايصير بيتلوث الجرح وتجي دكتوره باكستانيه عصبيه تخاصم وتقول مافيه كلام مافيه بكي انتي اللحي كبيره وام انا ابغى اخيط كويس مافيه صوت وبدت تخيط واحس الخياطه اصعب من الولاده واحرك رجولي وتضربها وترجعها مكانها ونادت الدكتور عشان يجي اذا ماهديت هو اللي يخيط بعدها سكت ولاعد نطقت بكلمه وخلصت الخياطه وحمدت الله وشكرت الدكتوره وجابو سرير وودوني عالتنويم ودقيت على امي وبشرتها وفرحت كثير وماصدقت اني ولدت بهالسرعه ماشاء الله تبارك الله وقلتلها تدق على زوجي لان جوالي ماخذته معي ودقت عليه وماكان مصدق وحجز انتظار وجاني ثاني يوم ورحت البيت بعد يومين لان النونو كان تعبان شوي وسميناه وحبيته اكثر من عيوني وكل ماتذكر لحظه زعلي يوم حملت فيه اتندم واستغفر الله كثير وخلصت الاربعين على خير ونقلت تبوك وعشنا انا واسرتي الصغيره بسعاده واستقرار والحمد لله واللحين ولدي بيكمل 3سنوات بشهر 6 الجاي وانا اللحين حامل بالثاني في شهري نهاية السادس وقالتلي الدكتوره بنت ادعولي اني اجيب تالا اللي ياما حلمت فيها مع اخوها سعود وان الله يسهل لي ولادتي وجميع الحوامل يارب


اتمنى اني ماطولت عليكم والسموحه على الاخطاء
33
7K

يلزم عليك تسجيل الدخول أولًا لكتابة تعليق.

تسجيل دخول

بنوته كيوت1211
بنوته كيوت1211
الله يخليلك ولدك ويتمم حملك على خير وعقبال ماتكتبين قصة ولادتك بثاني يااااارب
غلاوي22
غلاوي22
الحمدلله على سلامتك وعقبال مانبارك لك بسلامتك بتالا ان شالله
مس آتيكيت
مس آتيكيت
ماشاء الله تبارك الله

الله يحفظه لك يارب

ويفرحك بشوفه تالا ويسسهلك امرك


بس خوفتيني يوم قلتي قربه !!

يعني تحسينها تنفقع بإلم !! < بكريه وخاايفه
ام غرووومه
ام غرووومه
الله يصلحه ويرزقك بره وتقومين بالسلامه ويسهل ولادتك
ضحكة الخاطر
ضحكة الخاطر
مبرووووك
والله يهينيكم ويسعدكم
ويرزقك باللي تتمنيمنه