قصة ولادتي زي ماوعدتكم

الحمدلله من قبل ومن بعد
هاذا انا رجعت أقول لكم قصة ولادتي
اللي وعدت بنات تجمعي الغالي مواليد فبراير 2014 اني احكيها...

المهم انا أتابع في مستشفى قوى الامن من بداية حملي وفي الشهر الأخير حددوا لي موعد تنويم يوم الخميس اللي فات 1435/5/5..يعني يوم مميييييز😍المهم علشان يعطوني طلق صناعي وكنت مررررة خايفه بس قلت باروح والشكوى ع الله لأني عديت التاسع طفشت مرررررة

يوم الأربعاء في الليل صَلَّيْتَ العشاء وبعدين صَلَّيْتَ صلاه استخارة وقلت يارب ان كان الطلق الصناعي خير لي ومابيتعبني تهيئه لي وان كان شر فتصرفه عني وجلست ادعي وادعي 😭
سبحان الله قمت رتبت البيت وجهزت ملابسي وملابس البيبي وجهزت ملابس عيالي لأنهم بيجلسون عند خالتهم لحد مايرجع أبوهم وياخذهم ..وشوي احس بمغص أسفل بطني قلت اكيد كالعادة وطنشت وشوي ويرجع الألم وسرت احسب الا وبين الطلقه والثانيه عشر دقائق بس الم محتمل جاء زوجي من الدوام قال هاه اوديك قلت لا بنتظر لحد مايشتد ..
المهم نمنا وصحينا الصباح الساعه 7وزوجي كان عندة عمل قال هاه اروح والا انتي تعبانه قلت لا روح وإذا زاد الألم بأدق عليك قال خلاص
راح زوجي من هنا واجلس ربع ساعه تقريبا الا والألم يزيد بشكل ما قدر اتحمله وانتظر الا وانه كل خمس دقائق وأدق ع زوجي قلت تعال ما اقدر أتحمل والله فعلا جاء وانا خلاص أصيح من الألم وطبعا المستشفى بعيد عن بيتنا تقريبا ساعه الا ربع ووصلت قوى الامن ودخلت الطوارئ وركبوا جهاز النبض الله ياكرهي فيه لمن تجي الطلقه ابغى أقوم الا وانا مربطة بذا الجهاز 😩😩
المهم جت دكتور بريطانيه قاست الرحم قالت 3سم انا هنا تحطمت 😥كل ذا الألم وبس ثلاثه وشوي تشرف دكتورة سعودية قالت انتي عندك ولادة وعندك اليوم موعد تنويم بس الحين مافية سرير ومدري متى تفضى الاسرة بنحولك ع مستشفى رعاية الرياض قلت عز الطلب انا كنت خايفة يحولوني ع اليمامة او الشميسي وقالت كل شئ ع حسابنا قلت خلاص خلصوا أوراقي واعطوني هيا وطلعت لزوجي ورحنا لرعايه الرياض دخلت الطوارئ استقبلتني ممرضة فلبينيه أعطتني علبه تحليل بول وسويت التحليل وركبت علي جهاز النبض وانتظرت يمكن ربع ساعه وشوي تجي دكتورة هندية وتقيس الرحم قالت خمسة سانتي يالله طلعوها غرفه الولادة وينادون زوجي علشان يكمل الأوراق وانا ع السرير ممددة ويطلعوني فوق اول ماوصلت قلت سستر ابغى حمام احس كان فيه شئ طالع مني من تحت وادخل الحمام وانا جالسة ع الفرنجي وأحس اني ادف بقوة وتطلعني السستر بسرعه وتجي تفصخ ملابسي وانا ادف بقوة وهيه تقول شوي مادام مافيه دف لانها لسى ماجهزت الكرسي تبع الولاده واطلع ع الكرسي وانا أصيح وأدف وأدف وهيه تنادي بصوتها كله دكتوره دكتورة بسرررررعه وتجي الدكتورة شكلها مصريه منتقبة ع طول وصلت وانا ادف بقوتي كلها ويشرف حبيب ماما واصرخ اللهم لك الحمد اللهم لك الحمد
زوجي مسكين قالوله باقي مطوله وراح الانتظار وأدق عليه قلت الحمدلله انا خلاص ولدت قال انتي تمزحين😁قلت والله خلاص ودخل الغرفة وجلس مع الممرضة وهيه تنظف الولد ويناظر فيني بس مايشوف الا راسي من عند بطني وتحت حاطين ستارة
ودقيت ع الغالية امي وبشترتها وياقلبي عليها بغت تطير من الفرحة تبكي وتدعي
جلست ساعتين في غرفة الولاده علشان ارتاح بعدين قالوا لزوجي اذا تبون غرفة مشتركة ماتدفعون شئ وإذا تبون غرفه خاصة
تدفعون200ريال قلنا غرفه خاصة احسن وطلعوني غرفتي الساعه 3 قبل العصر

بصراحة مستشفى رعاية الرياض رووووعه من نظافه وممرضات واهتمام وعناية
وحمدت ربي اني ولدت فيه وهذي قصتي لاحلى أخوات قضيت معاهم احلى ايام في التجمع 😘😘😘😘