قصة ولادتي في الغربه بمدينة هيوستن الامريكيه....

صباح الخيرات
أبشركم ولدت بالسلامة يوم الأحد الفجر الساعه 4إلا ربع
قبل موعد ولادتي ب13يوم
طبعا من دخلت التاسع و انا أراجع كل أسبوع و قالت لي اول أسبوع بالتاسع الرحم مفتوح واحد سانتي و الأسبوع الثاني قالت لي مفتوح 2سانتي
و كانت مراجعتي عندها يوم الجمعه و لما سوت الكشف عملة تهيج لرحم
و طول يوم الجمعه أحس بالألم بسيطه تجئ و تروح
و أجهز باقي أغراضي و أنام و يوم السبت صحية الظهر و صليت و رجعت تمددت عالارض و جالسه اراسل خواتيمها بالقروب على الواتس
و الساعه 4 العصر كنت اسأل زوجي متى راح نطلع قال بعد ساعه
و توي بقوم اصحي عيالي لأنهم باقي نائمين إلا و تنفتح المويه علي
و أنادي زوجي و ادخل للحمام أبدل ملابسي و البس فوطه من تحت علشان ما تتسرب المويه
و اصحى عيالي و أبدل لهم ملابسهم
و أرتب غرفتهم و أرتب غرفتي
و أجهز لهم ساندويتشات يفطرونها
و نطلع للمشفى كان الميثادوست اشهر مستشفى في هيوستن
و الله وادخل كان الوقت الساعه 5العصر
و رحمة ربي الدكتورة اللي أتابع معها كانت هذاك الأسبوع مناوبتها في قسم الولاده
و طبعا كنت صائمة و بعد ما وصلت المشفى شربت مويه لان ريقي نشف من الخرعه
و ادخل الغرفه طبعا الغرفه اللي بنام فيها هي نفسها اللي بولد فيها
مجهزه بالكامل و نظيفه و مرتبه ...
و عيالي معي و زوجي
و أبدل ملابسي و تكشف على النيرس قالت الرحم مفتوح 3سانتي
و تركب جهاز متابعة الطلق و جهاز متابعة نبضات البيبي
و قالت ما فيك طلق أبد
و انتظر من 5الين 7المغرب
و بدها ركبوا لي طلق صناعي بالمغذي
و بعدها ركبوا لي أبرة الظهر
و الحمد لله كل شيء تمام ....و لما صارت الساعه وحده بالليل انتهى مفعول إبرة الظهر
و يجيبني الدكتور و يزد الجرعه كم مرة
ما عاد نفع ..قال شكلها فسدت ممكن أركبها مرة ثانيه
انا هنا خفت من تكرار الإبرة و تسبب لي أعاقه قلت لا خلاص
بتحمل
و اجلس الين الساعه3الفجر و الطلق يجئ و يروح و صار متقارب
و بعدها جات الدكتورة إلا الرحم مفتوح 10 سانتي
بس ألمشكله البنت لافه وجهها وراء حتى و ادفع ماراح تطلع أبد
و يستدعون استشاري و يدخل حديده ويش كبرها عبارة عن ملقط علشان يساعدهم في لف البنت علشان تطلع
و تخيلوا كل هذا و انا بدون إبرة ظهر و بدون بنج
و صائمة و ما نمت زين
و من كثر الإرهاق ما عاد قدرت اساعدهم
و ساعه إلا ربع في محاولة توليدي و بالآخر
شرفت الأموره بد ما طلعت روحي..
و بعدها نظفوني و سوت لي خياطه من جوا و من برا لانها سوت توسيع
و أعطوني مسكن بالمغذي
و بعدها ريحت ما عاد حسيت بأي شيء
و بعدها بساعه دخلت معي النيرس للحمام الله يكرمكم و ساعدتني و علمتني كيف أعقم الخياطه بعد كل مرة ادخل للحمام
و أعطتني سبريه معقم و مخدر أرضه على المنطقة الحساسه و بعدها أحط رغوة زي المضاد و البس الكلوت .. و كان تعاملهم جداً جداً راقي و حنونين و عندهم اهتمام فوق الممتاز
و هذا كله و عيالي و زوجي كانوا معي في الغرفه الين الساعه 3 الفجر وقت الولاده
و طلعوا عيالي بالانتظار و زوجي جلس معي
مع العلم ان عندي ولد عمره 8سنوات
و تؤام ولد و بنت عمرهم6 سنوات
و بعد ما تطمئن زوجي عيالي و شافوني عيالي و شافوا أختهم
راحوا للبيت
و انا قعدت بالمشفى و كنت بطلع يوم الاثنين الظهر بس الأموره طلع معها شوي صفار
قالوا انتظري الى يوم الثلاثاء و تكون أحسن
و هذا انا اكتب لكم قصة ولادتي و انا لازلت بالمشفى .. طبعا أعجبني عندهم رعايتهم للبيبي يأخذونه عندهم و يخلون الأم تريح و تنام ..و كمان معاملة النيرس فوووووق الممتاز ..
و خدمتهم سريعه يعني ما تطلبين شيء إلا يجيك بالحال
و طبعا بما انا في رمضان
يجيبني زوجي و عيالي بعد الفطور بالمغرب
و يجلسون عندي الين الفجر
و الحمد لله كذا أكون متطمنه على عيالي ..
و هذي قصة ولادتي في هيوستن
بتاريخ
4 / 8 / 2013
الموافق
الأحد الساعه 3 : 39 دقيقه
27 / 9 / 1434
...........................
و أي استفسار انا جاهزه
و ما أبي منكم إلا الدعاء لي أني اطلع بالسلامة انا و بنتي
و تهدي لي أولادي و زوجي و تسخر لي زوجي