قصة ولادتي مع الدكتور أنس مرزوقي...

سلام....
انا ام لولد وبنت والحمد لله ولدت بالسلامة وجبت ولد تاني ،، وربي يهون ويسهل الولاده لكل الحوامل ان شاء الله،،،
في بداية حملي روحت اراجع عند دكتوره عشان صار لي حادث نتج عنه كسر في الحوض والظهر وكنت متخوفه انو يسببلي مشاكل في الحمل او الولاده بس الدكتوره طمنتني وقالتلي عادي واقدر اولد طبيعي،،،
ومرت الشهور في نهاية الثامن روحت لدكتور تاني عشان دكتورتي سافرت ،، ولما دخلت عندو وعشان اول زيارة ،، سألني كم عدد اطفالي وايش نوع ولاداتي ،، طبعا الحمد لله كلها كانت طبيعي ،، ولما قلتلو على الحادث ،، طالع فيا كدا 😳 وقلي وتبغي تولدي طبيعي ؟؟!!
قلي صعبه وفيها مخاطره ولازم اولد بعملية عشان لو ولدت طبيعي احتمال مع نزول البيبي يرجع ينكسر الحوض ،،
وحددلي موعد للعملية في نص التاسع ،،،
انا خرجت من عندو مكتئبه ومصدومه ،، ماكنت متخيله اني حأولد بعمليه قيصريه ،، كانت خايفه وشايله هم لما اسمع او اقرا عنها ،،
الكل نصحني استشير دكتور تاني ولو قلي نفس الكلام اتوكل على الله ،،،
وقعدت اقرأ في النت عن افضل دكتور في مستشفى الاطباء المتحدون ( لاني كنت مقرره اولد هناك ،، مرتاحه للمستشفى عشان ولدت فيها قبل كدا مرتين)
لقيت مواضيع كتيرة تمدح الدكتور انس مرزوقي،، وتوكلت على الله وحجزت موعد عندو،،،
للإسف هو قلي نفس الكلام وانو لازم اولد بعملية ومخاطره لو ولدت طبيعي،، بس سبحان الله من اول زياره ارتحت للدكتور واطمنت وبعد الاستخاره قلت لزوجي خلاص حأولد عندو بعملية،،،
وولدت بعملية عند الدكتور انس مرزوقي،، قبل العملية كنت خايفه وشويه أدعي وشويه ابكي ،،، عشان اول مره اولد بعملية قيصريه،،،
وبعد الولادة ومن اول يوم الحمد لله قدرت امشي وكان في الم بس خفيف ومحتمل ،، ومع الايام الحمد لله ،،
مااتخيلت العمليه القيصريه سهله زي كدا ،،
ودحين خلصت الاربعين ،، الخياطه نظيفه ومو واضحه لأنها تجميلية ،، ومافي ألم وعايشه حياتي طبيعي كأني ولدت طبيعي،،،
لدرجة اقول لزوجي بعد سنتين ابغى احمل واولد بعملية عند نفس الدكتور ،، مع انو بعد كل ولاداتي اللي راحت كنت اقول توبه احمل مع انها كانت طبيعي،، لما اشوف الموت من طلق الولاده ،،،
حبيت اكتب قصتي عشان اطمن اي حامل تكون حالتها مثل حالتي وخايفه من العملية القيصرية،، لو الدكتور شاطر حتكون العملية اسهل مما تتوقعي ،،
وفي النهايه اشكر الله اولاً ومن بعده الدكتور أنس مرزوقي ،، دكتور رائع ومريح وفاهم شغله ومخلص له ،،. كان يجاوب على كل أسئلتي ويحاول يطمني ،،
شكراً لك دكتور انس مرزوقي وجزاك الله كل خير يااارب ،،،🌹🌹🌹
وفي الختام اتمنى ربي يهون ويسهل ولادة كل حامل يارب،،،