كيفكوووو؟؟
المهم نبدأ بقصتي مع الولادة
موعدي كان للولادة اخر شي 6/2 وكان عليي مراجعة بالمستشفى رحت ومع العلم انا الضغط العالي كان مرافقني بالاشهر الاخيرة من الحمل لهيك رحت المستشفى وكان الضغط عالي ونيموني بالمستشفى
وما كان عندي طلف وتفتيح كان 1 ونص يعني ما في امل اولد بهاليوم
نمت وكل اليوم وهنن رايحين جايين يفحصو تاني يوم اجا دكتور توليد وحكالي من هون للمغرب
ازا كان في مكان بغرف الولادة فاضي بدنا ننزلك ونولدك رح نعطيكي طلق اصطناعي وبالون للتفتيح
ازا لء لبكرا الصبح يعني تاريخ 8/2
المهم انا خفت بس سمعت قصة الطلق الاصطناعي والبالون هادا
وطول الوقت ادعي ربي يهونها عليي ويسهلها واهلي يدعون الي وزوجي كمان
المهم صارت الساعة 6 ما اجو عليي حتى ينزلوني بعتت زوجي يسألهم اجا وقالي ما في مكان بغرف التوليد
كلها ملانة رح يستنو للصبح ويولدوكي
المهم خلصت الزيارة الساعة 8 مساء وروح زوجي واهلي ع البيت وانا بقيت لحالي
وكل شوي اتصل عليهن ادعولي ..
وانا نايمة سمعت صوت اذان الصبح صحيت وفيني وجع قوي قوي وجع بطن وظهر
وحسيت شي نزل مني رحت ركض ع الحمام اشوف ايش في والا هو دم انبسطت قلت هانت
مشيت لعند النارسات وقلتلهن موجوعة ونزل عليي دم حكولي روحي ع الغرفة وهلء منيجي
رحت غرفتي ونمت ع السرير والوجع ما زال وكل ماله يقوى عليي حطولي جهاز اللي ببين فيه ازا في طلق او لء
اسمو (مونيتور) المهم بين انه في طلق منتظم ع السريع اتصلو للدكتورة وانا اتصلت ع جوزي من قبل وحكتله رح اولد اسا انا هيك حاسة وصل جوزي للمستشفى والا هم بدهن ينزلوني لغرفة الولادة
نزلوني ونزل زوجي معي هو قعد يستنى برا لانه ممنوع يفوت وين انا فتت غير تآخد غرفة بسمحولي يفوت عندي
المهم وصلت قسم الولادة وبطلت اقدر اقف ع رجليي بقلهن مش قادرة اقف دخليكو جابولي كرسي قعدت وغرف الولادة ملانة
وعم يفحصو حد من اللي بغرف الولادة حالتها اسهل من حالتي حتى يطلعوها ويدخلوني محلها
وصرت اصيح من شاااااااااان الله مش قادرة اقعد ولا اقف ساعدوني اجو بسرعة اطلعو وحدة من غرفة الولادة
كان معها طلق بس بدون تفتيح
دخلوني ع السريع تقريباً الساعة 6ونص 7 الا ثلث هيك شي دخلت وانا اقول يا رب مالي غيرك واقرأ المعوذات وادعي ربي يسهلها عليي
المهم نيموني ع تخت الولادة وحطولي انفوزيا وفحصو التفتح طلع عندي 6 سم ما شاء الله
الداية انبسطت وانا اتوجع بدي زوووجي المهم دخلو زوجي عندي وقعد يهديني وانا اقله موجوووعة ماني قادرة
حكتلي الدكتورة بدك ابرة تخفف الوجع قلتلها اه ياااااااااااااااااا ريت
المهم راحت تجبلي ابرة منسميها عنا ابرة تشتوووش هاي غير ابرة الظهر
رجعت بقلها حاسة اشي بشد لتحت اتطلعت قامت رمت الابرة من ايدها وقالت وااااو يلا شدي كمان
خدي نفس الراس صار تحت ومبيين عليي شدي وجوزي يقرأ فوق راسي ويهديني ويقلي خدي نفس ولا تصرخي
وانا اشد واخد نفس واشد واصرخ واقول لجوزي بديش بطلت بدي قلهن بدي اروح ع البيت وهو يقلي
وين تروحي البنت صارت بدها تطلع اتحملي استهدي بالله وانا اقول لا اله الا الله وكل ما اشد اقول يااااااااااااا رب
مالي غيرك ياااااااااااااارب
المهم حسيت الغرفة تبرم فيي وفجأة غبت عن الوعي وهمي يصحو فيي
بعد شي 3 دقايق تصحيت وصرخت صوت وشديت بقوة واقول لجوزي قلهن بدي عملية بديش اولد هيك بدي عملية
والداية تقلي هانت حبيبتي بس انتي اسمعي منا ما بصير شي خدي نفس وشدي
واختكم بالله تاخد نفس وتشد المهم صرت ااصرخ ع جوزي اتصل ع امي خليها تيجي يا حرام هو اتصل وهو فوق راسي ع امي وصارت امي تبكي ع التلفون وتقول لجوزي قلها تستهدي بالله وترد ع الداي مشانها ومشان البنت
المهم شديييييييييييت بقوة والا صوت طفل زغير ببكي وااااء وااااء وبعدينت سكت
انا مغمضة عيوني ما بدي اتفرج جوزي بقلي رورو طلعت هياها بحضنك فتحت شوي شوي والا هي بنوتي الحلوة
نايمة ع حضني نسيت كل الوجع ونسيت الدنيا عطست البنت قلتلها يا روحي سلآمة قلبك
انبسطت كتير لما شفتها يعني الساعة 8:00 الصبح طلعت بنوتي :)
وما اتغلبت وما حسيت انه الاشي صعب يعني كان كتير سهل بالنسبة لغيري توجعت بنفس الوقت
وولدت بسرعة ما اخد معي اليوم بطوله
وما شاء الله ريتال خلقت وزنها 3 كيلو و 555 غرام :27:
ربي يسهلها ع كل حامل يا رب متل ما سهلها عليي
ويرزق كل مشتهي وما يحرم حدا من الضنا
وهاي صورة البنوتة اول ما خلقت لفلفوها بحرامات :) صلوا ع النبي اخواتي
وهاي الصورة بعد ما روحنا من المستشفى بكم يوم
والحمدالله ع سلامتك وتتربي بعزك