السلام عليكم
ابقص عليكم قصة ولادتي الباكية والمضحكة في نفس الوقت
انا دورتي غير منتظمة الدكتورة عطتني موعد للولادة وتغير الموعد بعد السونار وقالت انك احتمال تولدي في 20/12/1430وكان زوجي عنده انتداب لمكه في الحج وكنت كل يوم ادعي إني اولد قبل مايسافر زوجي وماولدت وسافر يوم الجمعة 25/11وانا رحت عند اهلي ,يوم السبت بعد المغرب رحت انا وامي السوق وانا ماشيه احس برطوبه في ملابسي الداخلية وكانت ذيك الليله بداية فصل الشتاء ونحس ببرودة وحنا نمشي المهم رجعنا للبيت الساعة 10وحسيت بان شوي مويه تنزل وقلت اكيد هذي ولادة واستنيت للساعة 12 وقلت لامي وقالت هذي بوادر ولادة ع المستشفى بسرعة ودانا اخوي الساعة1ونصف وصلنا مستشفى قوى الامن الساعة 2تقريبا ,دخات الطوارىء وكشفت علي الممرضة وقالت مفتوح 4سم وحطت على بطني جهاز قياس نبض الجنين وراحت شوي وجت وسوت لي اشعة وقعدت ساعة تحوس على بطني وراحت وجتني مرة ثانية ومعاها ممرضه سعودية نفسها خايسه وكشفت من جديد وسوت اشعة وبعدين راحت وكانت امي برا في الانتظار وجلست ربع ساعة بعدين جتني الممرضة وقالت خلاص ماما قوم البس عباية ولبستها وطلعت من الغرفة ولقيت الممرضه السعودية وقالت اجلسي ودخلت امي علينا , بعدين قالت الحقيقة فية مشكلة والله اني كنت في موقف لاأحسد عليه توقف قلبي قالت امي فيه شي؟
قالت انتي لسى في الشهر الثامن يعني الجنين يبغاله حضانه واحنا ماعندنا حضانه وانا في ولادتي الاولى قبل 4سنوات ونصف حصل لي نفس الشي وقالوا ماعندنا حضانه وحولوني على المدينة الطبيه وولدت هناك( معقولة مستشفى كبير مافيه حضانه) المهم وقالت ان الجنين جالس على مقعدته مستحيل تولدي طبيعي واحنا ندق على المواساة عشان نحولكي عليهم بس ماردوا قالت امي مانبغى المواساة هي اسم على مسمى حولينا على اي مستشفى ثاني قالت اليمامه ولا الشميسي قالت امي اليمامة طالعت في امي وغمزت عينها وسكت اخذت امي الورقة وطلعنا حوالي الساعة 3وربع وقالت امي لاخوي ودنا للمدينه الطبيه ورحنا لها والحمدلله انها قربيه من قوى الامن ودخلنا الطوارىء ولقينا في الاستقبال شاب الله يسعده وقف معانا وقفه ماننساها الله يوفقه وعطيناه الورقه ودخل البيانات وقال ان ملفي مغلق مافعلتيه بعد ماولدتي على العموم ادخلي ودخلت وكشفوا علي وجت ممرضه سعوديه الله يسعد قلبها وقالت بندق على قسم الولاده ونشوف في إمكانية يستقبلونك ولا لا , راحت وبعدين جت فالت خلاص *****الله راح تولدين هنا وسوت اشعة وكتبوا الاوراق وشوي ودق الهاتف وكلمتهم وسكرته وجتني وقالت الحقيقة مافيه إلاحضانه وحده لو جت وحده تابعه للمستشفى هي اولى منك على العموم حنا ارسلنا اوراقك للمستشفيات الخاصة وطبعا بتكون تكاليف ولادتك على حساب الدولة الله يعزها واول مستشفي يرد علينا راح نرسلك عليه وجلسنا انا وامي في الانتظار واذن المؤذن لصلاة الفجر واخوي ياقلبي عليه برا في السياره نايم ويقول ذبحني البرد, صلينا وجلسنا شوي وجت الممرضة وقالت تعالي ماما ورحنا معاها ولقينا الشاب الي في الاستقبال وقال لنا جاء رد من مستشفى احمد ابانمي وراح نوديكم على سيارة إسعاف مع ممرضة تشرح حالتك للدكتور هناك قالت امي خلاص الله يجزاك الخير ودقت امي على اخوي وقالت خلاص رح للبيت وجت سيارة الاسعاف وركبت انا وامي والممرضه وكانت الساعة 6إلا ربع وانا جلست على السرير اللي داخل السياره وانطلقنا كالصاروخ والاه يابنات ماشفت سرعة مثل سرعة هالسواق وهو مولع السفتي والسيارات تبعد تحسب فيه حاله خطيرة ومن سرعته امي والممرضه كل شوي يصقعون ببعض وامي متمسكه فيها المهم وصلنا بعد10دقايق من السرعة ولقينا برا دكتور وممرضات يستقبلوني ومجهزين كرسي وكأني من vipونزلوني من السيارة وجلسوني على الكرسي ودخلوني غرفة الكشف وعملوا لي اشعة بعدين دخلوني غرفة التنويم وحطوا جهاز النبض على بطني وقالوا الدكتور بيجي الساعه 9ونصف وبيسوي العملية لك وكانت الساعة 7وشوي جلست انا وامي ننتظر لين جاء الدكتور واخذوني على غرفة العمليات ولما دخات استقبلني دكتور باكستاني وقال انا فلان ماادري وش اسمه من الحياء اللي فيني استشاري التخدير هنا في المستشفى وضربني بابرة التخدير النصفي في اسفل الظهر والغرفة يابنات كلها رجال فيه واحد فوق راسي كلامه عراقي يراقب نبضات القلب ماشاءالله وجهه حلو والتفت يمين إلا ذاك السعودي ماادري وش يسوي وتمنيت ساعتها إني طالبه تخدير كامل عشان مااشوفهم فشيله والله إني مغمضه عيني عشان ماشوفهم وتمنيت إني لابسه نقاب على الاقل ونسيت الولادة وادعيتها وقمت ادعي (اللهم استرني فوق الارض وتحت الارض ويوم العرض )واكررها
واول ماخدرني حسين ان شي يضغط على رجلي وبطني مثل الاسفنج إلا واسمع صوت البيبي واحسبه وحده ثانيه جنبي إلا وهم يركضون بالبيبي ويقول اللي فوق راسي الحمدلله على السلامه وسألته بنت ولا ولد قال معقوله في احد مايدري ايش اللي في بطنه قال على العموم بنت (انا من النوع اللي مااحب اعرف الجنس فيني برودة) وجلس الدكتور يخيط ساعة كامله و بعد الخياطه خلوني شوي عشان يروح البنج وذبحني البرد والله إني ارتجف وكان جنبي ممرضة فلبينيه وممرض اردني وجاب لي أله لها انبوب طويل مثل المكنسه ودخل الانبوب داخل البطانيه وشغلها وقامت تطلع هواء دافي يهبل وبغيت انام وهو يسأل عندك طفل قبل قلت إيوه وانا ماحب اتكلم مع رجال مااعرفه وبعدين قال انتوا مثلنا في الاردن نفرح بالولد اكثر من البنت يحسب إني زعلانه إني جبت بنت بس انا كنت متضايقه من الرجال ومنه هو بعد ومستحيه , جت الساعة 12إلا ربع الظهر دخلت غرفة التنويم ونمت شوي بس إلا ذيك الاتصالات يباركون اخر شي قالت امي نامي وانا برد عليهم . بس والله عنايتهم حلوه مره وريحة ملابس الممرضات والدكاتره تهبل غبيه ماسألتهم وش يحطون على ملابسهم وجلست في المستشفى اسبوع بعدين طلعت انا والحلوه بنتي وهذي قصة ولادتي
تعبت وانا اكتب وانكسر ظهري
بس حبيت اكتبها لعيونكم يابنات حواء
حروف والووف @hrof_oaloof
عضوة نشيطة
يلزم عليك تسجيل الدخول أولًا لكتابة تعليق.
الصفحة الأخيرة
عقبالنا ياااااااااااارب