السلام عليكم
كيفكم ياحلوين ان شاء الله تكونوا بألف خير ..
اناكنت قبل اسبوع اكتب مواضيع واقول الحقوني بدخل العاشر وكنت ادور اي طريقه واي وصفه عشان اولد قبل الموعد اللي اعطتني الدكتوره يوم الاثنين 26-4
وجربت كل شي بس سبحان الله مااراد اني اولد قبل مايجي الموعد ..
وتوكلت على الله وجهزت شنطتي ووصيت اختي الصغيره على بنوتي الحلوه وامي جهزت نفسها واصرت انها تتنوم معي ومشينا من البيت صباح الاثنين ووصلنا مستشفى دله عالساعه 10 ونص ووصلوني لغرفتي اللي بتنوم فيها وعطوني لبس اغير وركبو المغذيه واخذوا تحاليل دم وجابوا فطور وقالوا انتظري الطبيبه شوي وتجي ..
كانت لحظات خوف وقلق وترقب لا توصف رحت وانا مو عارفه وش راح يصير هل بأولد طبيبعي والا بأتعب وبتعذب واخرتها يقولوا قيصرية الف سؤال كان يدور براسي وامي ياحياتي جنبي وتحاول تخفف عني وجت الدكتوره المناوبه وقالت بنسوي تخطيط وبعدها بنكشف وبنعطيك تحميله وكشفت لقته مسكر :( مع ان لي اسبوعين من خلصت التاسع وعطتني التحميله كانت زي الجل وقالت انتظري ونامي على ظهرك ساعه ونص وبعدها قومي امشي كثير وبنرجع بعد سبع ساعات نشوف وش صار ...
وركبوا التخطيط وراحوا وانا جاني طلق والم من وقتها بس بالتخطيط طالع ضعيف مررره مافي طلق مع اني كنت اتألم من ظهري مره بس الظاهر لاني كنت نايمه على ظهري ..
ومرت السبع ساعات كأنها يوم كامل وانا امشي وادعي واستغفر وجت الدكتوره الساعه 6 وكشفت لقته فتح 1 سم :icon28: فرحت وفي نفس الوقت احس 1 سم قليله ولسى قدامي كثر وعطتني التحميله الثانيه ونفس الشي اسويه بس الشي الغريب انه بعد التحميه الثانيه نمت نومه جت رحمه من ربي وجت الدكتوره بعد ساعتين مصدوووومه لاني ناايمه وانا ماحسيت الا اسمعها وهي تتكلم مع امي وتقول اكيد مافي طلق بما انها نايمه وفعلا التحميله الثانيه احسها ماسوت شي وقمت مشيت اخر الليل بالأسياب واشوف النواني في الحضانه وادعي ربي يفرح قلبي بشوفة مولودي عاجلا غير اجل وتعبت من المشي ورجعت الغرفه وتروشت بمويه داافيه وحاولت انام ساعه قبل ماتجي الدكتوره تكشف :09: وجت الدكتوره الساعه 7 الصباح يوم الثلاثاء وكشفت قالت الرحم ماانفتح زي ماهو :( ماادري كيف اوصف شعوري هاللحظه حسيت اني يئست ودموعي على خدي وعطتني التحميله الثالثه واسلوبها هالدكتوره الاخيره كان زفت ويحطم مره وتقول بكل تعجب متأكده ان ولادتك الاولى طبيعية :( وانا اقول ايه طبيعيه وطلق طبيعي الحمدلله
وبدأت المعاناه بعد هالتحميله ويد الدكتوره كانت تعور مره الظاهر انها حاولت انها توسع بيدها لانها من طلعت نزلت علي افرازات بنيه كثيره وحسيت اني فرحت وان الرحم باذن الله راح يستجيب لهالتحميله وقمت مشيت ومشيت ومشيت وشربت كمون وشربت زنجبيل وشمر واكلت عسل وشربت حليب ورجعت ارتحت ساعتين وحاولت انام شوي وبعدها طلعت ومشيت كثير ودعيت واستغفرت وقريت الاذكار والام كان يشد ويرخي يشد ويرخي وكانت الفترات متقاربه كل اربع دقايق بس الالم مو شديد مره وكل ماسووا تخطيط اقولهم احس بألم قالوا في التخطيط الطلق جدا بسييييييييط :09: مع اني كنت اتألم بس مو مبين عندهم شي ..
وجا الظهر موعد الكشف وجت الدكتوره آيه اللي انا اتابع عندها ومسويتلها استدعاء وقت الولاده وكشفت قالت الحمدلله 1وتص سم راح اعطيك التحميله الرابعه وبعدها ان شاء الله راح يفتح 2 سم وبعدها بنقلك قسم الولاده وبنفك المويه عاد انا خقت مرررررررررره:eek: وطلعت امشي وامشي وامشي وادعي ربي يفرج علي ويهونها علي وامي ياحياتي تدعي وتصلي طول الوقت وتحاول تسويلي مساج لظهري وتخفف عني بس انا رحمتها تعبتها معاي قلتلها خلاص روحي البيت ارتاحي واذا صار شي جديد بدق عليك وراحت وجلست لوحدي اتألم وبدأ الجد وزوجي كان جاي في الطريق عشان يجي بدال امي طبعا جاي من سفر طوييييييييييل ومع ذلك اصر يجي عندي على طول ومارضي يروح يرتاح في بيت اهلي شوي ووصل عندي على المغرب وبصراحه ارتحت لان في احد جنبي كنت خايفه بعد ماراحت امي وجلست امشي وامشي واذا تعبت ارتاح وجت دكتورتي آيه على العشاء وقالت بكشف واشوف وكشفت لقته 2 :icon28: قالت خلاص الحمدلله كذا كويس ابيك تتعشي وترتاحي وتنامين والصباح بيعطونك فطور وبعد ساعه حقنه وبعدها راح ينقلوك قسم الولاده ..
حسيت بخوف وقلق ماادري كيف اوصفه لكم بس زوجي جنبي كان يحاول يغير جو علي ويسولف معاي وتعشينا وهو نام بس انا ماقدرت من التفكير والخوف والالم يروح ويجي وصرت انام نص ساعه واقوم من الالم وامشي شوي وارجع انام من الارهاق وصحيت الساعه 1 حسيت الالم زاد علي ورحت الحمام لقيت افرازان دم كثيره خفت مررره ماعرفت شسوي خفت اناديهم ويستعجلون علي وويودوني قسم الولاده وخفت اسكت ويصير شي مو زين وتوكلت على الله ورجعت نمت وصحيت الساعه 4 ونص صباح الاربعاء والالم زاد والدم زاااد وماعاد فيني اتحمل قمت صحيت زوجي وناديت الدكتوره وجت بسرعه وكشفت قالت الحمدلله 3 سم :icon28: وقالت خلاص شوي وبتجي الممرضع تعطيك حقنه وبعدها امشي ساعه وروحي الحمام والساعه 6 ان شاء الله قسم الولاده
كانت مشاعر مختلطه بين فرحه بفرج ربي وخوف من اللي راح يصير في قسم الولاده وجت الساعه 6 ودخلوني غرفة ولاده وزوجي معاي وانا كنت معارضه لهالشي بس قال بيدخل لحد ماتجي امي مارضي يطلع ويتركني لحالي وكانت القابله مرررررره حبوووووبه وركبت التخطيط والمغذي وشوي امي وصلت وطلعوا زوجي ودخلوا امي مكانه وجت الطبيبه المناوبه كانت سودانيه طيبه وحبوووبه مررره وقالت الحين بكضف وبفتح المويه وكشقت قالت 3ونص:icon28: وفتحت المويه وقالت الحين راح يدوك طلق صناعي في المغذي واطلبي ابرة مسكن من ورا (( زي مكان ابرة الاطفال )) وحطت الطلق وراحت وفعلا بدت الالام من جد وامي الله يحفظها ويخليها لي يارب والله يقدرني واقدر ارد لو ربع اللي سوته لي وكان يشد مررررررررررره وامي ياحياتي تقرا علي وتسوي مساج لظهري ويرخي وارتاح ثواني ويرجع يشد مرررررررررره ويرخي ثواني وهكذا شوي جت قالت تي الابره الحين والا شوي قلت الحين بس كم يقعد مقعولها قالت 5 ساعات (( خفت اني لسى بطول قلت خليها شوي ))
بس دقايق والالم زاد وماعاد فيني اتحمل قلتلها خلاص جيبيها وجابتها وقالت بتسوي دوخه وبتنومك يمكن عادي وفعلا ياحلوها دوختني بس مانمت وبصراحه انا مسكت نفسي خفت انام وتجي الولاده ومااقدر ادفع وفعلا الالم بدا يزيد بس مع الابره الحمدلله كان الالم يحتمل اكثر شي تعبني ان البيبي كان يدفع وانا ماثدرت اقاوم وقتلها احس بدقع قالت لاا لا لا لسى بدري من غير ماتكشف وتشوف وانا اقول مو قااااادره واصرخ وانا دااايخه اقولها قاعد يدقع وهي مو مصدقه قالت بشوف وشافت وتصارخ من الفرحه ماشاء الله ماشاء الله وتروح تركض تنادي دكتورتي آيه وجت بسسسرعه وقالت ماتوقعت ابدا ولاده الحين (ماشاء الله) كنت راح اروح البيت وارجع بعد ساعين وبسرعه لبست ولبست الممرضه وانا اصرخ من الخوف مو من الالم خايفه احسه بيطلع ومحد عندي باقي يلبسون وجت الدكتوره وضبطوا وضعي وانا فيني دوخه مره وقالت ادفعي يالله وانا مو مصدقه اني خلاص بولد وجلست اصرخ واقول الحمدلله ياربي وامي تشجعني وهي تقول ادفعي وكنت مرهقه مررره بس كنت احاول عشان ارتاح ودفعت مره ومرتين وثلاث وبالأخر طلع حمودي نور عيني وشوفته نستني كل التعب والألم ...
واخيرا الحمدلله الحمدلله الحمدلله ياااااااااربي انا عانيت وتألمت بس ربي رحيم بعباده رحمني وفرج علي ياربي لك الحمد والشكر وصدقوني مافي شي ممكن يخفف و يسهل عليكم ويفرج همومكم غير التقرب من الله عز وجل والدعاء والاستغفار ..
دعواتكم اني اطلع من نفاسي عروس والله يحفظ بنتي وولدي ويخليهم لي ويحفظ امي وزوجي ويخليهم لي يااااااااااارب
ahahah75 @ahahah75
عضوة فعالة
يلزم عليك تسجيل الدخول أولًا لكتابة تعليق.
(حـنـيـن)
•
الف الف مبروووووووك الله يجعله من الصالحين وينبته نباتا حسنا والف حمدالله على سلامتك
الف مليون مبرووووووووووك والحمدلله ع سلامتك
عجبتني هذي الابرة مشالله مو ظهر بس تخفف
عجبتني هذي الابرة مشالله مو ظهر بس تخفف
الصفحة الأخيرة