السلام عليكم ورحمة الله
كما تدري الشله ان في نهاية الثامن جاني طلق كاذب وتنومت بالمشفى وقالوا الرحم منفتح 1 سم بس.....بعد يومين ملاحظه اطلقوا سراحي:42:.....عدت ايام الشهر التاسع لحد ما وصلت الاسبوع 39 ...كنت في الصباح ووقت الظهر احس بتعب بس مش طلق وكنت طبيعيه مره.... دخلت النت وكلمت شلة البنات لحد 4 العصر كان كل شي طبيعي وعند الساعه خمسة العصر وبينما انا منهمكه في اكل طبق الارز خخخ هاجمتني الالالم ويشوفني ابو الشباب ساجده دقيقه او دقيقتين راح الالم .........بعدها بساعه او اكثر رجعت الآلام.....الله يهدي اخوه جاه قاله ابغي اروح كارفور تجي معي وما راح نطول نصف ساعه.........بس هذي الساعه كانت الساعه الفاصله قام الطلق يحمي ويجي كل نصف او ثلث ساعه ورحت امشي حولين البيت واردد ادعية الولاده وبعدها تعبت وصل زوجي قرب عشره او 11 وتهاوشت معه ومسكين هو ما يعرف شو يصير ولا بعد جايب معاه عشا.......اختكم تعشت شوي عشان انسى الالم وبعدها قلت له ابغي امشي ومشينا في اقل من نصف ساعه بس كان لما يجي الطلق اتوقف بالدرب وبعدها اواصل............رجعنا عشان ننام جبت الجوال وقمت احسب الطلق يجي كل عشر دقايق واستمر على هالحاله وانا وزوجي سهرانين نشوف التلفون ونحسب لحد 2:22: (يعني تخيلوا الم قوي بعدها لما يروح احس روحي طبيعيه بس شوي تعب !)....قلت له قم نروح المشفى على بالي سهله...ولما وصلنا حصلت الممرضه وخبرتها شافت علي تقولي انت متاكده انها ولاده ؟ (كيف يعني لازم اجي وانا اموت عشان اولد يا خي ربي سهلها) كشفت علي وحطت لي جهاز النبض وقالت لي صحيح ان الطلق يجي بعد 10 دقايق بس الرحم مسكر لساه يا دوب نقدر نقول 1 سم وعشان كذا روحي البيت ....وهمست باذني بكلام مثل امشي ونامي جنب زوجك..................وصلنا اذن الفجر وصلينا تصدقوا اصلي ودموعي دموع والالم قام يجي كل خمس دقايق.وصار اقوى ويحسب بمقياس رختر لزلازل.....بعدها زوجي قالي يالله المستشفى بالاول ما رضيت بس هو اصر وقال اذا ما راح يعملوا حاجه بروح مشفى ثاني...............وصلت عندها وانا في السياره ابكي بصوت خلاص الالم قاعد يزيد والخوف ذابحني (وهذي هي الغلطه الخوف والنفسيه المنهاره عمرها ما تساعد) المهم وصلنا حصلنا الممرضه وهالمره شافت حالتي تقولي خلاص حبيبتي لا تبكي وجلست تهدي فيني وشافت الطلق يحمى والرحم سعادته مسكر الا 1 سم اللي ما تغير...... طلبت انهم ينقلوني الى عنبر انتظار الولاده وزوجي معاي جات الدكتوره وحصلتني ابكي مثل الاطفال وخلت الممرضه تعطيني حقنه واتوقع انها حقنة البتدين وقالت لزوجي نعطيها ابرة ظهر بس ما وافقنا خفنا...قالت كلمه رفعت ضغطي: اللي مثل زوجتك ما يستحمل ولاده اذا طلق ومسويه كذا...طنشتها بس تمنيت اذبحها...............المهم جاتني ممرضه صغيره وكل شوي تشوفني اموت من الالم تشوف الرحم تخيلوا لحد 8 الصباح وهو بس 2 سم تعبت هذا متى ينفتح راح يذبحني ...........نقلوني غرفة الولاده وتجمعوا الممرضات مره يعطوني جهاز الأوكسجين ومره يشوفوا الرحم وانا هنا بدات عندي مفعول الابره ثمل على الاصول وغثيان وتعب عام يعني ما احس بجسمي الا الالم سبحان الله .....وتخيلوا الرحم مسكر لساه دشت ساعه 10 وانا اموت ..........عاد انا عند الساعه11 خارت قواي وقمت تجيني فترات يغمى علي او انام ما ادري بس اسمع الاصوات واحس بزوجي جنبي واسمع الممرضات وكانهم متلخبطين وبعدها طلبوا من زوجي انه يخرج وما ادري حسيت انهم يعملوا شي عشان يفتحوا الرحم او يفجروا ماي الجنين بس الالم كان يذبح وانا اصرخ باعلى صوتي لحد ما انهرت واخر شي اسمعت زوجي يكلمهم معصب بس اللي سمعته من الحوار (I want an explain…… ) وكلام ثاني ما سمعته ورحت لعالم ثااااااااااااااااااااااااااااااااااااااااااني ...بعدها وعيت وعلى راسي ابو الشباب ودموعه شوي وتنزل والدكتوره على يساري تحط لي مغذي واسمعها تقول لزوجي شكلك ما يساعد اما تخرج او تخليها تشوفك اقوى لان الحالة صعبه وهذي ولاده كل زفره تزفرها تنفتح لها باب القبر (قالت قبر وانا قلبي توقف ).........المهم حصلت نفسي بعدني بكروشتي وجسمي منهد وشكله الاوكسجين مخدرني مره احس نفسي اتبسم مثل الخبلان وزوجي متروع ..........طبعاا لساني احس بالطلق والالم واسمع الممرضات والدكتوره يقولوا لزوجي ساعدها عطيها الاوكسجين وزوجي ما صدق يا بوك الالم دقائق و يروح وهو مسكر علي ......للمرة الاخيره غبت عن العالم يمكن نمت او ما ادري بس كل اللي اتذكره اني كنت اسمع اصوات تقولي يريدوا يذبحوك وشفت منظر الشمس وهي تغرب وراء الجبل وما ادري حسيت ساعتها ان هذي ساعتي....قمت اصرخ باعلى صوتي واحس ان ما احد يسمعني (كثير نحلم احلام نكون نصرخ او نريد نصرخ وما حد يسمعنا ...كذا كانت حالتي) بعدها فتحت عيوني اتاريني خرقت طبول اذانهم وانا انا انادي باسم زوجي واردد لا لا .................حصلت معي طاقم طبي يتكون من ثلاث او اربع ممرضات ودكتورتين ودكتوره تجي تشرف وتروح...وبدوا يربطون رجلي بالسرير واسمع كلمة 7 سم قربت الولاده ......الا بعدها اسمعهم يقولون بوش بوش (على ايش بوش يا ناس انا ما حاسه غير بالالم وعضلاتي ما قادره اتحكم فيها) حاولت لكن مثل ما قلت احس اني انفخ في قربه مخروقه واصرخ من الالم ...بدا نبض النونو يقل وحاولت بعدها استسلمت ما احس بشي انهرت طفلي يموت وهم يصرخون نبض البيبي انخفض ويشوفون الجهاز بسرعه جابو الة الشفط (وهنا تسجلت في سجل بنتي ولادة طبيعيه بالمساعده :()قالوا ادفعي وراح نساعدك وخرجت بنتي تصرخ قرب الساعه 2 ظهر(الحمد لله رب العالمين) ورموها بحضني ونسيت التعب لما شفتها اسمعهم يقولوا شيلوا البنت الام يغمى عليها بس استمريت وانا واعيه(عناد فيهم ) لحد ما شالوا المشيمه وسمعت الدكتوره تقول لزوجي روح بسرعه نادي أي دكتوره هناك نزيف بعنق الرحم وهنا انا غبت عن العالم وقمت بعدها الساعه اربع.والحمد لله مرت ولادتي وربي رزقني من فضله والله يرزق كل محرومه يارب
وهناك بقيه لاشياء يمكن تفيدكم من تجربتي

عقد_الياسمين @aakd_alyasmyn_1
محررة فضية
يلزم عليك تسجيل الدخول أولًا لكتابة تعليق.


الحمد على سلامتك ومبروك عليك بنتك الله يجعلها بارة فيك وفي ابوها
قصتك مرعبة ذكرتني بالمغامرات اللي سويتها في غرف الولادة
قصتك مرعبة ذكرتني بالمغامرات اللي سويتها في غرف الولادة


الصفحة الأخيرة
شحن نفسك ثقه ولا تتخوفي وتكوني مرعوبه ابد ما يساعد هذا الشي.
لا تتوقعي اللي صار لغيرك يعني لازم يصير لك .....قريبتي في اول بيبي ما شاء الله ما شاء الله خرجت تمشي بعد الولاده
فيه ناس تخوفك بنزول الماء .....اولا هو ما شرط ينزل ...ثانيا لو نزل مش كثير منا تتوقع تدفق مثل الشلالات بس هو يبدا شوي شوي وحالات قليله اللي تدفقت عندهم
اذا رحتي تولدي اقرأي الاذكار وقران.....واياك تسوي نفسك قويه مثلي لما طلبت من زوجي انه لا يخبر احد واني اكون بروحي في الولاده......... (خصوصا البكريات) اولا تكوني مرعوبه ......ما عندك خبره ....تتمني احد جنبك يقرا قران .......ويشجعك وحتى تمسكي بيد امك او اختك او زوجك ريحك هالشي .....وبعد راح تكسبي ان مستحيل احد يتعرض عليك بكلمه تجرح اذا صرختي او يفعل شي بدون ما يخبرك شو يعملوا(وهذا حق من حقوقنا احنا العرب نسلم نفسنا واحيانا لا نسال)...مو شرط يبقوا وقت الدفع اهم شي عند دخولك يونسوك
برايي الشخصي ...كثير اهلنا يقولوا لا تروحي مباشرة للمشفى لما تحسي بالولاده ....بس انا اقول اذا حسيتي بالطلق امشي اعملي أي شي لحد ما تشوفي ان الطلق انتظم وصار كل خمس دقايق او عشره....احسبي طريقك للمشفى....حطي ببالك يمكن يصير طارئ بالدرب......تخيلي توصلي تصرخ الدكتوره 10 سم راح يرتبك الكل واولهم انتي وخصوصا البكر راح تحسي نفسك ضايعه ..........بس في حاله قالوا الرحم منفتح شوي بامكانك تصري انك تمشي ولا تهتمي باللي تقوله الممرضه هذا من حقك.
بالنسبه لاغراض النونو :
اخبركم ايش اللي فادني وايش ندمت اني اشتريته:
طبعا غلطتي كثرت من ملابس حديثي الولاده يعني فوق 6 او 7 لبسات ...كم وحده لبست بنتي؟ ولا وحده ايوه ولا وحده وراحت فلوسي بالهواء وخصوصا اني خلاص غسلتهم حتى الممرضه بالمشفى ما رضت تلبس بنتي واحد منهم قلت لها اختاري واخذت اغراض من 0-3..(والمصيبه الشله نصحتني ان ما اشتري بس شو اسوي طبع معاند).............
اشتريت من بيبي شوب ماركة جونيور من 0-3 اشهر والصراحه ما اقدر اقول انهم مش كويسين قماشهم ما عجبني بس اكثر ناسبوا بنتي لانهم يجوا بقاسات صغيره اكثر من مذركير اللي اشتريت من عندهم وقماشهم حلو مره ومع انهم من 0-3 بنتي لبستهم بدخولها الثاني وكانوا كبار كثير يعني اتوقع لو البسها لحد خمس اشهر يكونوا على مقاسها (اولاد الانجليز ما شاء الله تبارك الرحمن)
ملابس الاوفراول ....اشتريت من بيبي شوب ومذركير ....اللي من بيبي شوب لبستهم بنتي بس ايام الاربعين يمكن مره او مرتين كانوا كبار.....ومذركير لبستهم لما اروح السوق او اطلع مكان اتوقع يكون بارد ....ما فادوني كثير لان بالليل البنت مقمطه واحنا في الخليج نار....اقول احسن تشتري ثلاثه ومن مذركير لانهم انعم واريح
طبعا الاثاث اشتريته بمشورة اختي جوري من مذركير والحمد لله قوي وارتحت له كثير وبقماش المفارش ارتحت.
اذا حبيتي تشتري الالعاب اللي تعلق في سرير النونو اشتريها من المحلات الصغيره كتوفير ....لان حسيت نفسها بس سمعة المحل رافعه السعر...
بالنسبه لي احسن شفاطة حليب هي اللي تكون على شكن حقنه وحصلتها من نوع ميدلا
واخيرا غلطتي الكبيره:
اهتميت اشتري لبنتي ملابس واغراض ونسيت اثقف نفسي عن البيبي كثير ...والنتيجه اني خرجت من المستشفى عشان انصدم اني ما طلبت من الدكتوره او الممرضه تعلمني الرضاعة الطبيعيه لحد ما بنتي فطمت نفسها ولا فاد دكتور ولا هم يحزنون .................كانت وضعية الرضاعه خطا والحلمات متقرحات وحمى نفاس ذبحني .............وبعد اشياء كثير مهمه ما اشتريتها واضطر زوجي يروح يشتريها بروحه....
اذا اردتي نصيحه فلا تسالي امرأه خلصت الولاده من زمان وحاولي تسالي اللي توه ولدها صغير لان معظم التفاصيل ما نستها.
واخيرا شكرا شكرا لشلة اطفال شهر مايو ويونيو (جواري ووردة الامارات ووردة جوري وجمورة الاموره وفتوونه وام علاوي وام رياان وام ابيها )