بسم الله الرحمن الرحيم
اول حاجه باقول لكم نصيحه حطوها حلق باوذونكم
انتبهوا انتبهوا من زيت الخروع والخلطات الثانيه مارح تاخذون منها الا التعب والله لايقدر شربتتسببون
في وفاة اجنتكم بايديكم
وهو ماراح ينزل الا اذاربي اراد وآمر بنزوله طرتي والا حليتي
وهذي انالولا لطف الله كان خسرت ولدي وتعب 9شهور بسبب زيت الخروع والان حبيبي معه ضيق في التنفس بسبته
والطبيب اكد لي ذلك ....
>>>>>>>>>>>>>>>>>>> طولتيها وهي قصيره >>>>>>>>>>>>>
قصة الولاده
بالبدايه من دخلت التاسع وانا هاتك ياتجارب
من كف مريم الى خلطة الحليب والعسل والقرفه وزيت السمسم
الى الحلتيته
واخيرا زيت الخروع اللي حرمت وحلفت يمين ماعاد انصح احد فيه لوكان عدوي
يابنات ماتتصورون حالتي وش عمل فيني يوم شربته قضى على مابقى فيني من قوه وطاقه ووليدي حياتي ضل يومين بليله
مايتحرك الا بسيييييييط ومره او مرتين باليوم بس وهذا اللي ذبحني اكثر وزاد همي لاربي يحاسبني اني تسببت فيه
وبثاني يوم رحت لمستوصف خاص وسويت اشعه تلفزيونيه قالت الحمد لله نبضه موجود لكنه مايتحرك وحاولة تحركه
وبدون فايده
المهم اعطتني ذيك المحاضره وخوفتني كثير من مشاكل زيت الخروع على الطفل وهوببطن امه اولها تبرزه قبل الولاده
واعطتني تحويل على المستشفى علشان اتنوم اربع وعشرين ساعه على الاقل يكون البيبي فيهاتحت الملاحظه
وقالت طوالي تروحين عالمستشفى
قلت يالله باروح للبيت اخذ حوايجي حق التنويم وارجع للمستشفى
وسبحان الله دعيت ربي بين الاذان والاقامه ان ربي مايضيع تعبي وتعب كل حامل ويفرحني بشوفة ولدي
وهو سالم ومعافى من كل سوء واخذت لي كاس عصير طازج وزودت السكر فيه وما اخذت عشر دقايق الا وهو يتحرك
مثل حركته السابقه غير انها اخف بشوي
الحمد لله حمدا كثيرا طيبا مباركا فيه
ربي لك الحمد كما ينبغي لجلال وجهك وعظيم سلطانك
ظليت بعدها 9 ايام وحسيت بالام الطلق بيوم الجمعه 2/8 قبل صلاة الظهر وادعي ربي ان الله يسهلها علي وعلى كل حامل واخذ لي قطعة حلتيته وانقعها بما واتوضى فيها
وظل الطلق يجيني مره قويه ومره خفيفه ومافيه وقت محدد بين الطلقه والثانيه يعني مره تجيني كل عشر دقايق ومرات اضل نص ساعه واكثر وظليت على هالحال الى يوم السبت العصر
اخذت لي ماء زمزم وحطيت معه زعفران وقريت فيه ادعية وايات تسهيل الولاده وشربت منه ومسحت على بطني
ودعيت ربي يسها علي واكثرالاستغفار وسبحان الله بدت الطلقات تشد حدتها اشد من اول بس نفس الشي ماهي بمنتظمه
اخذت شنطتي وقلت يالله عالمستشفى واخذت معي الماي المقري فيه واشرب منه كل شوي
ويوم جيت المستشفى وجاتني الطبيبه واكشفت قالت الحمدلله ولاده الرحم مفتوح 4سانتي يالله شدي حيلك
دخلوني قسم الولاده
وحطولي التخطيط للبيبي وركبو على المغذي واعطوني ابرة عضل مهدئه للالم
ساعه ونص ويضعف نبض البيبي وكل شوي لافيني على جنب والله لايوريكم حرارة الطلق وانتي على جنبك
اثاري الشيخ راسه مايل على جنب وهذا اللي عايقه لايطلع
وبس نمت على جنبي الاقال الوجع جاك الموت ياتارك الصلاة واصيح للطبيبه تكفين يرحم والدينك عطيني
ابرة ظهر والا سوي لي عمليه خلاص ماعاد اتحمل قالت لا يا اختي الطفل قلبه تعبان وماتصلح لك ابرة ظهر
وخلاص هانت الرحم مفتوح الان 6 سنتي انتي شدي حيلك بس وربك يفرجها
وبعد ماشافتني دايخه حدي عطتني الكمامه اللي فيها المخدر وصحيح والله انها تريح كثير وتوديك بعالم ثاني
واختكم بالله ماصدقت خبر قمت احسب لوقت الطلقه وقبل لاتبداء معي اكون ماخذه الكمامه وهاتك ياشفط
اثاري الصغير مسيكين صار مجهود الولاده عليه بروحه وصارت نبضات قلبه ضعيفه مره وما اشوف الا الجهاز يصيح
والممرضات كلهم على راسي والطبيبه سابقتهم
وعلى طول شالت مني الكمامه واحذفتها على جنب وركبتلي بدالها الاكسوجين وقالت يالله اشفطي فيها بكل قوتك
البيبي مختنق البيبي بيموت حرام عليك لا تذبحينه ببرودك ساعديه
والطلق عندي واصل حده
ولا اشوف الا حالة استنفار قدامي
الممرضات يجهزون الحاضنه ويجهزون عدة الولاده كلها ويالله ادفعي وانا على جنبي قمت اصيح ماني قادره واشلون
واستغيث بربي يامغيث اغثني يامغيث اغثني الا وسبحانه لا اله الاهو واحس براس البيبي يوم انه نزل وبدا يدفع
واتعدل وضعي الطبيبه ويالله هاتي ماعندك وحاولي تكتمين نفسك وماتقطعينه البيبي في خطر
دقات قلبه وقفت
يالله لاحظااااااااااااااااااااااات عصييييييييييييييييييييييبه بكل ماتحويه هذه الكلمه من معنى ربي مايحطكم فيها
دفعه دفعتين ثلاثه ويالله الا شرف الحبيب (عبدالرحمن ) في تمام الساعه وحده وربع ليلة السبت 4/8وسمعت صوته وانا احمد ربي واشكر فضله اللي نجاني ونجاه من الموت ولو يحصل لي بذيك االساعه اسجد سجود الشكر لله ماتونيت لحظه
اللهم لك الحمد اللهم لك الحمد اللهم لك الحمد على ما انعمت
والان لي عشرين يوم من ولدت
ربي مايحرمكم هاللحظات السعيده وييسر لكم ولادتكم ويرزقكم بالاطفال الاصحاء المعافين من كل سوء
والفوائد اللي استفدتها من تجربتي وانصحكم فيها
ابتعدوا ابتعاد كلي عن زيت الخروع واي زيوت بكل انواعها
ايضا كف مريم شربت فيه لين وصلت لخشمي ولا انفعت معي ولاسوت شي
اكثر شي استفدت منه بعد الله سبحانه الرطب مع الطحينيه والحلتيته ساعدت على فتح الرحم بسرعه
والاكثر فائده من هذي كلها ماء زمزم مع الزعفران تقراء فيه الايات والاذكارويشرب منه ويمسح منه على البطن على طول الى ان تحين الولاده وهذا اللي لاحظته بنفسي
دعاء الله باسمائه الحسنى ويامغيث اغثني وقراءة سورة الطارق والزلزله لها اثر كبير ايضا في تسهيل الولاده فلاتهملوها
والى هنا انتهت قصة ولادتي واتمنى من الله العزيز الكريم لكم جميعابالولاده السهله الميسره اللهم آآمين
ظبي البوااادي @thby_alboaaady
عضوة فعالة
يلزم عليك تسجيل الدخول أولًا لكتابة تعليق.
@ام جاسر@
•
الحمدلله على السلامه ياام عبد الرحمن يتربى في عزكم ان شاء الله
ماشاء الله مبرووووووك يالغلى وعسى ماجاك تكفير ذنوب
سبحان الله ماعمري خاطرت اخذ ذا الخربطه ابدددددد
بس مويه زمزم ولله الحمد وتمره وبس
اما باقي الاعشاب هذي احسها مافيها فايده وخطره بعد
سبحان الله ماعمري خاطرت اخذ ذا الخربطه ابدددددد
بس مويه زمزم ولله الحمد وتمره وبس
اما باقي الاعشاب هذي احسها مافيها فايده وخطره بعد
الصفحة الأخيرة