الحمد لله ولدت بالسلامه يوم العيد اكمل عشرين يوم من ولادتي ولدت بعد 4 ايام من كملت التاسع
اما قصة ولادتي استمرت يوم كامل
رحت الكورنيش مثل كل ليله اتمشى اني وزوجي وكانت ليلة السبت وكل ما مشيت حسيت بمغص شديد مثل الطلق الكاذب ولكن اشد زوجي اصر نروح المستشفى رحنا وقالوا لي مفتوح 1 سم يمكن بعد يوم او يومين تولدي رجعت البيت وبعد ما صليت صلاة الصبح رفعت ايدي للدعاء بتسهيل الولاده لي ولجميع الحوامل ويرزق المحرومين ولما رحت انام حسيت بالالام مثل الالام الدوره ولكن اشد وكنت اطالع في الساعه كانت تجيني كل 10 دقايق قلت لزوجي اتوقع اليوم الولاده استمرت الاوجاع الى الساعه 9 الصبح رحت الى نفس المستشفى وصدمتني تقول مو مفتوح ولا سانتي بس انتي خلاص طوفتي موعد ولادتك لازم نعطيك طلق صناعي قلت لا مستحيل اخذ طلق صناعي وانا يجيني طلق طبيعي طلعت على مسؤوليتي ورجعت البيت وجلست الى الساعه 3 العصر والاوجاع مستمره رحنا مستشفى ثاني وحملت معاي دلة دارسين ودلة كف مريم وتمر ولما كشفوا علي قالوا مفتوح 2 سم خلاص ولاده بعد صلات المغرب والعشاء تعشيت وقمت اتمشى وبديت من الساعه 7 الى الساعه 12 ونصف الفجر وانا اتمشى شوي واستريح شوي وكنت اكل واشرب من الي جبته معاي وكانت تتمشى معاي بنت والله كان ليها دور في تشجيعي كل ما توقفت كانت تقول خلنا نتمشىى ونشوف من فينا تولد قبل بعد هالمشي كان يجيني الطلق كل 5 دقايق وكنت اقول الى حصه الي كانت تتمشى معاي اتوقع انو انفتح الحين 6او 7 سم لما كشفوا علي صفعتني صفعه ما انساها لما قالت لي انفتح 3 سم
جلست اطالع فيها مدهوشه معقوله بعد كل هالمشي والالام انفتح لي بس اسم جلست ابكي وادعي يارب خلاص مااقدر اتحمل اني اعيش يوم ثاني بهالالام يارب خلصني بسرعه وسهل ولادتي جت حصه ورفعت معنوياتي وقمنا تمشينا بعدها دخلت دورة المياه وشفت دم مزوج بماده لزجه قلت اكيد هذي سدادة الرحم بلغت الممرضه وجت الدكتوره وكشفت قالت لي 4سم خلاص الحين نوديك غرفة تحضير الولاده وسالتها عن الحقنه الشرجيه قالت مو متوفره عندنا طبعا انا خفت وقلت ليها انا متعشيه وماخرجت اخاف في الولاده من الضغط والدفع فطمنتني وقالت مافي مشكله المهم اعطوني بعدين ابره وحطوا علي التخطيط الابره دورها تخليك تنامي وقت الي يروح عنك الطلق و تفيقي وقت الطلق وكانت معاي في الغرفه ممرضتين وبكذا تاخذي فرصه للراحه وفي نفس الوقت يعرفوا بالضبط كم من الوقت يجيك الطلق بعد الصراع المرير معا الطلق وكانت الساعه 5 ونصف الصبح انفتح 10 ودوني غرفة الولاده وكان الطلق يجيني كل دقيقه فجأه توقفت الالام وقالت لي الدكتوره يالله ادفعي وكنت ادفع قالت لي لا ادفعي وقت الطلق قلت لها بس ما احس بالطلق قالت استني شوي ممكن الحين تجيك استنينا اشوي ولا جاني شيء بعدين الدكتوره شكلها زهقت وقالت مالي الا اني اضحك عليها قالت لي فيك براز طلعيه قبل ما يطلع البيبي انا من قالت لي كذا ادفع بقوه وكنت اصارخ كل ما دفعت كنت ابغى اطلع البراز قل ما اولد لان سمعت ممكن يكون خطر على البيبي وكان كل همي اني اطلعه بس حسيت انا ما فيني شيء المهم وانا ادفع بكل قوتي الا وبنتي بين ايدين الدكتوره وانا مستغربه معقوله ولدت وما صدقت الا لما سمعت صوت بنتي اخذوها ونظفوها وانا كنت اصرخ عليهم جيبوها ابي اشوفها جابوها وحطوها علي ولمستها وايدي ترجف وكنت اضحك وابكي والله راحت الاوجاع والالام لما شفتها ولما اخذوها مني رجعت الالام
ولدت يوم الاحد الصباح الساعه 6
اقول لكل بنت بكريه لاتخافي من الولاده الولاده مثل التبرز ههههههههههه لكن بامساك شديد
واذا تمشيتي لا توقفي المشي وقت الطلق امشي كل ما اشتد عليك الطلق
خذي معاك مرافقه ترفع معنوياتك وكل ما جاك الطلق اذكري انا قرب موعد اللقاء بينك وبين مولودك الي عاش داخلك 9 اشهر
حاولي في الشهر التاسع تنامي في اي فرصه ممكنه عشان لما يجي يوم الولاده تكون عندك طاقه ولما يجيك الطلق تغذي وتعشي كويس
وقبل ماتدعي بتسهيل الولاده ادعي دعاء اني نسيت ادعيه وهو تهوين الطلق
وخلي في ايدك مسبحه استغفري ربك وصلي على محمد وادعي بلي في خاطرك وخاصة وقت الطلق لان انتي في حالة استجابة الدعاء ولا تنسوا المتاخرات في الحمل
واتمنى الله يهون الطلق عليكم ويسهل ولادتكم
انسيت اقولكم سميت بنتي جود
عقبالكم ياكروشات
المتوسله @almtoslh
محررة
يلزم عليك تسجيل الدخول أولًا لكتابة تعليق.
ماشاء الله تبارك الله
الحمدلله على السلامه
وعقبالي يارب الله يفرحني مثل مافرحك
والجميع
بس اختي ماقلتي اي مستشفى ولدتي؟
الحمدلله على السلامه
وعقبالي يارب الله يفرحني مثل مافرحك
والجميع
بس اختي ماقلتي اي مستشفى ولدتي؟
ماشاء الله الحمد لله على سلامتك والله يوم قريت قصتك أحس بطني عورني تذكرت معاناتي مع الطلق أسبوع كامل
الصفحة الأخيرة
الله يجعلها من البارين يارب