قصة ولادتي ... ونقص المويه والأكسجين.عضة وعبرةلكن.

قصة ولادتي...... الحمد لله على قضائه وقدره و كل شي مكتوب.............
يوم كنت حامل ببنتي إنتهيت من التاسع وكان موعد الولاده بتاريخ 22|2|1429 رحت للدكتوره اللي أنا أتابع عندها
قالت إنتظري أسبوع ورحت لموعدي بتاريخ 1|3|1429قالت إنتظري الاسبوع هذا أخر إسبوع ورحت لها بتاريخ 7|3|1429قالت ماولدتي ولاجاتك طلوق قلت لا
وأخذت علي سونار قالت الجنين تعبان والمويه ناقصه عنه الحين تحويل لمستشفى الولاده عاد هي كاتبه بالتقرير
الجنين تعبان والمويه ناقصه عمليه قيصريه طارئه ولا قالتلي عمليه يمكن ماتبي تخوفني المهم
رحت للمستشفى يوم الاحد بالليل والاثنين والثلاثاء الظهر الساعه وحده أخذوا عليه إشاعه والساعه ثلاث إلا ربع جاني الدكتور قال أنتي عندنا من يوم الاحد ومافيه أعراض ولاده بنعطيك طلق صناعي أربع تحاميل كل ست ساعات
أول وحده الساعه ثلاث وحطت الدكتوره الثانيه الساعه ثمان ونصف قالت مفتوح الرحم ثمانيه ونصف وانابدأمعي
مفعول التحميله الاولى الساعه الخامسه عصرآ وكان المستشفى زحمه كل القرى تحول عليه خلال يومين المواليد
140ولد و43 بنت الدكتوره يوم حطت التحميله الثانيه قالت الحين بنوديك الكشك يوم جت الساعه العاشره ويختفي الطلق نهائي إلااللهم مغص خفيف وماودوني لغرفة الولاده إلا الساعه 12 ويحطون جهاز الطلق ما فيه إلاطلق خفيف
ويحطون المغذي الساعه 12 ونصف
قالوا خوذي نفس إذا جات الطلقه ويبدون يحاولون معي مافيه نتيجه وتحط الممرضه كوعها على كبدي
أنااحس أن كبدي ذابت .......لونه الطلق متحملته لكن الكوع خلاص ماأقدر أتحمل سوت الدكتوره توسيع لي من تحت
وتحاول مافيه فائده قالت خوذي نفس الجنين نبضاته ضعفت عاد أناحلقي جف ماأقدر أخذ نفس المهم شفطوا الجنين بعدين دخلت الدكتوره يدها وطلعتها كلها دم وتقعد تصيح على الممرضات
عمليه عمليه ....عاد أنايوم أدخل المستشفى خواتي يطمنني يقولن لي بيعطونك طلق وبسرعه تولدين وطبيعي إن شاء الله... وقبل ماأولد أمشي الأسياب وأشوف الحريم اللي مسو يات عمليه يمشن أشوي ومعهن مرافق
وأقول في نفسي وش قصة الحريم هاذولي مادريت أن فيه شي إسمه عمليه ......خبركم بكر يه وخواتي يطمنني
تولدين طبيعي ................ المهم أكمل القصه..............
و ركض بالأسياب ويوقعون بإيدي على العمليه
ويدخلوني غرفة العمليات الساعه 1إلاعشر و يجوني دكتور ين ويحاولون في طبيعي إلاالساعه 1ونصف بعدين خدروني
ويوم صحيت الساعه كانت قدامي 4 وربع وأتلفت حولي الممرضات وألمس بطني قالت الممرضه خلاص بيبي حضانه
قلت لا شوفي بطني كبير قالت لا لا بيبي حضانه عاد أنا يوم صحيت مااني مصدقه إني ولدت علشان
الممرضه إذبحتني بكوعها المهم طلعوني لغرفة الز ياره عاد من يوم طلعت من غرفة العمليات وأنا طول صوتي أحمد
ربي واشكره وأستغفر مع الاسياب....... يوم دخلت الغرفه مظلمه
تخيلوا الحريم نايمات الفجر وأناطول صوتي اتحمدربي على العافيه وعندي مره وأترجاها اقول تكفين عطيني جوالك أبتصل على أمي المهم عطتني جوالها وثلاث مرات ادق على أمي وألخبط بالرقم ماصحيت زين قالت الممرضه اللي جابتني من غرفة العمليات عطيني الجوال أنا أدق وتدق على أمي وأكلمها قلت يمه أنا ولدت ماأمداني أصك الجوال
إلاهي ياقلبي داخله علي
وهي كانت تتابع ولادتي مع مدير المستشفى
قال أن ولادتي تعسرت وحولناها عمليه والساعه 3 إلا عشر قال إنها جابت بنت لكنها تعبانه
رافقت عندي أمي وأصحى وأرجع بغيبوبه وصحيت زين من البنج الساعه11 صباح الاربعاء وفكيت القسطره
ورحت لدورة المياه وأنتم بكرامه عاد زيارة الحضانه بعد الظهر من الساعه الواحده إلى الثانيه قلت لامي أبروح أزور ها
حاولت تردني علشان ماأتعلق فيها قلت ماأني مرتاحه حتى أشوفها ....زرتها لكن كيف هي بنتي ..............
الحمد لله على قضائه وقدره
مثل قطعة القماش لاحراك نهائيآ ........وش فيها..............
نقص الاكسجين وماأدراك مانقص الكسجين
جعلها في غيبوبه تامه
عطل وظائف المخ تمامآ
يقول الدكتور لزوجي لو صارت على قيد الحياه
لاترى لاتتكلم لاتسمع لاتتحرك
أنا على أول مادخلت الحضانه كل الاطفال خدج لو نهم يميل للبنفسج الغامق مع سواد لكن
بنتي اللي تامه تسع شهور
يوم شفتها سميت عليها وقريت لأنها بياض وجمال وكثافة شعر أسود
بصراحه خفت عليها بينهم بغيت أخذها وأهرب
عاد على الجمال لوشفتوها
إيديها وإرجولها صاير لونها أخضر من الأبر وشفتها رافعينها وحاطين عليها لاصاق علشان التنفس الصناعي
وشفتها مع النصف تصب دم ودي أفتح عنها وامسح الدم بإيدي وشافطين رأسها فروة الرأس ممتده والشعرممتدورموشها طوال وكانت على ظهرها وقلبوها على جنبها علشان الجلد مايتآكل وحطوا قماش وراء ظهرها ...... ثم بدأت
أتردد عليها خمس أيام وأنا بالمستشفى وأجيها من أول ماتفتح الزياره إلى أن تنتهي وإذا جيتها أنا وأمي الدموع
ماتجف ....الدكتور قبل ماأطلع جاني قالي شوفي إذا حملتي مره ثانيه خلصت الشهر التاسع على طول
تجين نعطيك طلق صناعي لأن الجنين إذاخلص تسع شهور مافيه فائده يجلس بالبطن خلاص المشيمه
تبدأ تنفصل عن الجنين و ينقص الغذاء والأكسجين
المهم أخر زياره لها بس أناظر لها وأقول هاذي أخر مره أشوفها المهم طلعت من المستشفى وأنا بالسياره
أناظر من بعيد للمستشفى وأحس أني ظالمه بنيتي طلعت من المستشفى وخليتها فيه
المهم أخذت بالحضانه 14 يوم توفيت صباح الاربعاء بتاريخ 25|3|1429 أسئل الله العظيم أن يخلفني شبيهتها كأني
لم أفقدها ...................
أخبرتني أمي في الصباح الساعه 7والنصف بوفاتها لكني تمنيت أمنيه
وقد غبطت زوجي بأنه ضمها عند دفنها
أني قد ضممتها ضمه واحده فقط
لكن ماأقول إلا اللهم أجرني في مصيبتي واخلفني خيرآمنها
إنا لله وإنا إليه راجعون
ولاتنسوني أخواتي من دعواتكم أن يعوضني خيرآمنها فإني اكتب قصتي وأنا ابكي ليس اعتراضا على قدر الله ولكن عندما اتذكرها وأتذكر الأجر المترتب على شفاعتها لي أقول اللهم شفعها لي ولوالدها وارزقنا خيرا منها يارب .علما أن زوجي رفض أي شكوى تقام ضد المستشفى لأنه كان يردد هذا قضاء الله وقدره والمستشفى أخذ بالأسباب . ولاحول ولاقوة إلا بالله .
تنويه ( قالت لي الدكتورة اللي أجرت العملية أن سبب تعسر الولادة أن عنق الرحم ضيق وليس الحوض لأنه سبب اختناق الجنين ونقص الأكسجين وقالت كل ولاداتك قيصري)