قصة ولادتي يابكريات , واخيراً ولدت ولله الحمد 😍

السلام عليكم كيفكم ياحلوات ؟ :40:
أولاً وقبل كل شيء الحمدلله تمت ولادتي ع خير ولي الحين أربعه اسابيع من ولدت ،.
طبعاً راح أحكيكم عن قصة ولادتي بالتفصيل الممل جداً ، توقعتها مميتة و الحمدلله مستعده احمل مرا ثانيه بسم الله ماشاء الله علي ههههههه اذكروا الله ماودي افطس في الحملات الجاية هعع😂 ، يعني اللي ماهي رايقة كثرة اللق لق ، تتفضل خارجاً 😆 ..
حبيت أكتب بالتفصيل خصوصاً للبكريات ، لأني قبل كم أسبوع كنت بكرية و كنت حاسه ب إحساسهم الله يسهل على جميع الحوآمل 💓
من يوم تمت الملكه و أنا مدهره أقرا عن الحمل والولاده والاجهاض و الولاده القيصريه و الطبيعيه و الأمراض خلال الحمل و التغيرات و الخياطه والنفاس و التشوهات و الفتق و الألم و الإبر و البنج و كل شيء حتى تفرجت مقاطع ولاده أجنبيه عشان أتعلم منهم خخخ .. يعني مستعده أولّد حرمة حامل ماعندي مشكله من كثر ما تثقفت مابقيت موضوع هههههههههه ..
الزبده :- ولله الحمد طيلة فترة حملي ماكنت أحس ب أي ألم و أي شيء ، كان حمل جداً خفيف و مافيه مشاكل و لا تغير شكلي ولا تنفخ ولا سمرت ولاشيء .. بالعكس يقولون احلويتي شكل فيك ولد ^^"
وهالشيء خلّاني أشيل من بالي كل المبالغات اللي قريتها عن الم الولاده من بعض ردود الحريم ، لأن كنت أحسب الحمل كارثه و تعب و هذاني حملت ولا حسيت بشيء تبارك الله ، بس مو معناه إن الكل حملها خفيف ، ع حسب نوعية الجسم .. فكنت و اثقه تمام الثقه إن ولادتي بتكون سهله ! ليش مدري :/
لدرجة ما اجهدت نفسي بالدعاء و اطالة السجود ، ما اذكر إني دعيت ب تسهيل الولاده استغفر الله كنت مرآ ماني مستوعبة اني حامل اساساً ! و غير كذا واثقه إن ربي مقدّر قوة هالألم بحيث يتحملها العبد ، مايعطي عبده شيء يفوق عن قدرته و قوته ..
وماخذه الولاده ترللي ~ 😜
الزبده :- في يوم من الايام رحت المستشفى عشان موعدي الأخير ، و قالت لي الدكتوره انتي ف الاسبوع 38 يعني نهاية التاسع .. بنعطيك مهلة 15 يوم ع التنويم ( يعني يولدوني غصب ) وقالت اذا حسيتي ب أي ألم أو نزلت عليك مويآ كثيره أو شفتي دم تعالي بسرعه طوارئ .. ويلا روحي احجزي لك سرير ..
يوم قالت هالكلمه وانا اللي تصكني ام الركب و دي اقوم اخمها و اصصصيح و أقول لها تكفين مابي اقطعوا بطني ابي ارجع طبيعيه مابي نونو خلاص بطلت مابي ولاده 😂 حسيت إن الموضوع جد ولازم هاللي في بطني يطلع سواء أموت ولآ أعيش رضيت ولا انرضيت يطلع يعني يطلع ، بتنامين ع السرير و بيعطونك ابره و بيشقشقونك و بتشوفين دمك بتولدين يعني بتولدين ، يآ إني بغيت أنصرع .. بس يوم رجعت البيت نسيت الموضوع هههههههههه .. وجلست في هم ثاني 😢 وش تتوقعون ؟
بلاط بيتي !!! ما مسحته هههههههههه كل البيت رتبته باقي البلاط لازم ينمسح اخاف اولد ويجون الحريم و بيتي مو نظيف 🏃💔 مخي كان فيه خلل اعذروه ~

و سرت متكاسله انظفه كل يوم اقول بوكرآ أمسحه , ماعلينا : في يوم من الايام قال لي زوجي شرايك تطلعين تمشين ؟ قلت له برد ما اقدر ومافيني ، قال امي تقول خليها تمشي و لا تستعجل توديها التنويم اخاف يشقون بطنها الضعيّفه < حياتي شايله همي 😂💓 ..
قلت يلا مشينآ وجلست اوصي زوجي يجيب لي فطاير لوزين اخاف اجوع وقت الولاده ويغمى علي قلت له بآخذها معي في شنطه الولاده عشان اقدر ادفع البيبي < متخيله اني بولد في صحراء ناشفه ههههههههههههه .. ورجعت البيت و كملت حياتي عادي مفيش الام مفيش حاقه ، مجرد شعور بالثقل ..
طبعاً كنت تقريباً يومياً اكل تمر ولبن ، اساساً انا اعشق هالوجبه من قبل ما اتزوج مرآ أكيّف عليهآ .. اسوي لزوجي قهوه واجلس معه بكاستي اللبن هههههههههه ونآسه اشتهيته 🌚🏃 ..
ومنها كنت اكله عشان يساعدني ع تسهيل الولاده بإذن الله ..
و الناس كلها سارت شايله همي ! باقي أسبوع ع موعد تنويمي والكل يسأل ماولدتي !! وانا عادي ماني حاسه إنو أوه ماولدت للحين كيف كذا مصيبه !!
بالعكس عادي دام الجنين يتحرك و دامي بخير ليش الخوف ؟ مصيري بولد يعني حتى لو جاء موعد التنويم بروح بس ما بخليهم يولدوني قيصري الا اذا لزم الأمر .. هذا كان تفكيري ..
الزبده :- و زوحي لاحظت عليه انه شد علي خلال الاسبوعين الأخيره وقت الجماع ، مو زي قبل كان ع مهله ! حسيت ان فيه احد موصيه يشد عشان أولد بسرعه .. لأن الجماع معروف يسرع موعد الولاده في الشهر التاسع ..
وسرت أحس بألم في عظمه المنطقه و دايم طفشانه واقول لزوجي كله منك آلمتني حتى البلاط ماني قادره امسحه بسبتك < شغلها ذا البلاط الله يمتحنه خخخ '

و جآء يوم الجمعه بتاريخ 10 / 4 / 1436 هـ .. بحيث باقي ع موعد تنويمي خمس ايام ! يعني الاربعاء اروح المستشفى يولدوني 💔 ..
بس ماكنت خايفه ولاشيء ، جالسه اقول لزوجي شوف لا حسيت بنقطه ألم تراي ما رح أتحرك شبر لأني اعرف نفسي مستحيل اروح برجليني للمستشفى ! خير انا اولد ؟؟ خير والله مقدر سلامات < بديت أستوعب .. ههههههه .. وكان يقول لي لا عادي توكلي ع الله و كل الحريم يولدون لا تخافين ،.
قلت له شوف انا الحين ماني خايفه ابداً و بالعكس متحمسه لكن لاجاني الألم مدري وش بسوي ! يا أتحمله او اسوي زي بعض الحريم ينهبلون .. ع حسب قوة الألم ..
لأن كرشتي صغنونه متخيله ان الوضع كله راح يكون رقيق و بسيط ههههههههه .. مع ان ماله دخل الكبر والصغر 😆 ،.
الزبده :- ف يوم الجمعه العصر قال لي زوجي قومي نمشي .. وقلت يلا ، و البس عبايتي وانا نازله تدق علي امي .. و قلت لها بروح امشي بس بسألك انا لي يومين ماتبرزت لا يكون ذا امساك - ماقد جربته - ؟ قالت بنت لا يكون ولاده ؟ ترا الولاده زي الامساك تحسين شيء يضغط وماتقدرين تخرجينه ، قلت لا لا ،. بس ماتبرزت ابي اتبرز و ما اقدر و يختفي هالشعور طوال اليوم عادي يعني ! وسكرت السماعه .. و رحت مشيت تقريباً ساعه إلا ، و أحس يدي اليسار انتفخت فجأه ، والله ياهي قلبت خبزة جنوبيه .. و انا اللي اوسوس قلت لزوجي انا قريت اذا انتفخ شيء فيك فجأه معناه تسمم حمل ! و هو يضحك قال لي من المشي وضغط الدم ، و استغربت و بديت اوسوس صدق أتحسس بطني و اشوف جنيني حي ولا ميّت لأن حركته لها اسبوع تقريباً شبه مختفيه ، وهو كان يرفس ماشاء الله اللي جالس حولي يلاحظ حركته ويشوف بطني وهو يتحرك ، وكان تقريباً طول اليوم يرفس ماشاء الله ،، بس هالاسبوعين مافيه الا شيء بسسسسسيط خفت مرآ .. قلت لزوجي بوكرا نروح طوارئ فاهم لأني مو مرتاحه ، وقال نشوف ..
ورجعت البيت ع المغرب .. طبعاً كالعاده زوجي يطلع و يقول لي اذا حسيتي ب ألم ولاده دقي علي انا قريب من البيت .. ماكان يروح بعيد تحسباً لأي طارئ 👀 .. و انا كالعاده اقول له طيب و في الاخير اروح ارقد مافيني الا العافيه ،. و يتأكد انه شحن لي رصيد جوالي يخاف افطس مكاني ، لأن أمه خوفته قالت لو ولدت بنت الناس وانت مو حولها يمين يالذنب ذنبك .. < فجعته 😆😆

عاد ، ودخلت البيت واناظر البلاط الله يشغله بنفسه وقلت يلا بآكل لي ساندويتش و بقوم امسحه واتروش و انام ، وقمت أكلت و جلست اطقطق ع الجوال و ألهط و من تعاسة الحظ .. كان عندي رصيد و فعلت فيه النت لان وقتها النت منقطع عندنآ , قلت الله أكبر يعني بتجيني الولاده الحين يوم فعلت ، ياشيخه استانسي شوي مابتولدين لسا مطوله ..
و يوم خلص الرصيد وطفى النت 😐 وتدق ساعة الخرعة ..
توني وقفت ع رجولي بقوم أمسح البلاط ويجيني الم خفيـــف جداً جداً لا يذكر أسفل بطني نفس الم الدوره , و قلت ياهو ! حامل وألم دوره وش ذآ ؟ و أفتكر إنها علامه من علامات الولاده ! و أروح ع الحمام قلت خن أتعصر شوي يكون أتبرز مابي اولد وانا فيني امساك 😭😭😭 , ويوم فصخت و أشوف شيء ينزل مني مطاطي ثقيل ولونه بني فاتح وانتو بكرامة .. وانا اللي تجيني الرجفه قسمبيتلاه رجولي قلبت ثلجه من الخوف ،. و أهدي نفسي و اقول يابنت الحلال كل الحريم يولدون عادي انتي شجاعه وقوية .، واناظر نفسي بالمراية واقول شكلي بموت حاسه اني بفارق الحياه مستحيل جسمي الصغير هذا يقدر يولد 😖 و اجلس استغفر و اقول ياربي سامحني ع الصلوات اللي فوتها و اغفر ذنوبي و سامحني و ارحمني يا ارحم الراحمين و ادخلني جنة النعيم ،، < مودعه 😂 ..
و للحين الالم بسسسسيط جداً بس مع الخوف تعرفون كيف مع الخوف تبردون و بطنكم يعوركم زياده ؟ انا كذا حسيت ..
ومن الفضآوة جلست اشيل شعر سيقاني متفشله اروح المستشفى بهآ 😂😩 جالسه اشيلها ب ڤيت و بطني ممغوص 😫 ..
ع الساعه 9 الليل نفس اليوم , شلت هم كيف أقول لزوجي يرجع ؟! هو العاده يرجع الساعه وحده ثنتين نص الليل !! ياويلللللللي وش بيخليني انتظر ! ولا اقدر افتح الابواب كلها مقفله الرئيسي و الوسط و باب البيت .. ومفيش حد مالي الا الله ..
و جلست اسشور قصتي 😢😢 عرقانه رايحه فيها بعد المشي 😂 وكل ماجيت اقوم اروح اتروش كارهه نفسي ابي مويا دافيه تخفف الألم الا و انا متيبسه مكاني ماقدرت الالم بدآ يزيد ، وخايفه اولد بالحمام وانا متفسخه مينفعش .. ع الاقل لا مت اكون متستره 🌚 ..
وشوي سبحان الله احساس الأم ، تدق علي بغيت اطير بغيت انهبل شعر جسمي كله وقف ،، و اكلمها بشويش عشان ماتنفجع واقول ماما فيه الم يجيني ويروح بس مو قوي مرآ كلمي زوجي خليه يجي رصيدي خلص , و هي تقول عادي لا تخافين ان شاء الله تولدين بالسلامه ربي يسهل لك وكانت جداً هاديه < بس من جوا براكين و رعود و عواصف .. 😆
قلت طيب ، طبعاً الالم يجي و يخليك تجلسين ماتسوين شيء لمده يمكن 36 ثانيه بعدين يختفي يمكن دقيقتين .. انا كذا كنت أحس رغم اني ماحسبت الوقت من التوتر و الخوف مالي نفس اركز بشيء ،، و زوجي يدق ويقول انا قريب ،، و أتأخر علي يمكن نص ساعه ..
ويجيني داخل بكيس فطاير لوزين ويقول كلي كلي , و اصرخخ عليه وخخخخخخر عني انقلعععع , مو من جدك 😭😭😭😭😭😭 بس مابكيت الحمدلله لكن جلست أتنفس ( شمي ورده - طفي شمعه ههههه ) ب أقوى ما اعطاني ربي ،. كان زوجي يقول شوي شوي بتشفطيني انا والبيت 😂 .. و انا ماني رايقه له ابد .. ابي المستشفى وبس ! و المستشفى يحتاج ساعه إلا , بعيد عن بيتنا ومع زحمه الرياض و الوقت كان تقريباً 9 ونص الليل عز الله ولدت بالسياره ..
ماما نشرت الخبر ههه الدنيا عرفت اني بولد وسار الكل يدعي لي ،،
بالغصب نزلت الدرج كل ماجاني الالم جلست نص الدرجه و يوم يروح انطلق وهكذا هههههه وسبحان الله الطريق كان مفتوح وربي ولا زحمه قابلناها .. ساعتها انا بس امسك يد زوجي و اضغطها بقوة وقت يجي الالم و اتنفس ويوم يروح ادعي واقول لزوجي اذا بداية الالم كذا أجل كيف الألم القوي وش بسوي والله مقدر اولد وهو يهديني و يقول فكي يدي وترتيتي بصدم بسببك 😂 ماصرخت أبد أبد مالي داعي وانا اصرخ 😆 التنفس اريح بكثير .. صح اول ماتتتفسين صعب بس شوي تخف الطلقه وتروح ..
و صلنا المستشفى تقريباً عشره ونص و دخلت طوارئ و كشفت علي وحده حقيره ما تبغاني اضغط يدها .. انا كنت محتاجه ( يد ) فقط ههههه تريحني اليد 😆
الزبده كشفت علي ب اصبعين مايعور ولا حسيت بشيء اصلاً مع الطلق ودك يدخلون ملقاط وش كبره يسحبون البزر وتخلصين و كشفت قالت 8 سم يلا ياعيوني تنويم .. واطقها صياح جلست تقول نو ماما لا تبكين قلت ام هابي هابي 😂😂😂💔 > مبسوطه انه 8 !! يعني مافيه ذاك الالم القوي اللي جالسه انتظره ! يالله بس كذا ؟ ليتني دريت ان هذا اقوى الم كان ما خرّعت نفسي 😂 ..
و تطلعني فوق و يقيسون الطلق و يعطوني مغذيه و تعطيني ابره شرجيه عشان يخرج البراز و مايجي ع البيبي وقت الدفع ( عباره عن انبوب صغير تحطه ورا بالشرج ) مايعور ابداً بالعكس تحسين مويا بارده تدخل فيك .. ورحت الحمام طبعاً الباب مفتوح عشان تشوف لا اولد و خلصت و طلعت ..
و انسدحت و اصارع الطلق , اتنفس فقط .. و هي مستغربه تقول كيف عمرك 20 وهذا اول بيبي و مافيه صراخ .. ماشاء الله .. وانا اقول الحمدلله مافيه كويس صراخ < يوم تروح الطلقه اقلبها هروج 😆 ..
وبعدين جتني طلقتين قويه جداً وجت اعطتني ابره ب فخذي قالت عشان انتي تعبان مسكين ماما .. و تعطيني الاكسجين قلت وخخخريه انا بتنفس بنفسي 😡😡 معصبه يضايق الاكسجين مو وقته .. مع ان فيه نسبة مخدر تخفف الالم اذا استنشقتيه ..
و يبدأ الدفع , شيء يدفع يبغى يخرج .. وانا اقول بدفع بدفع 😩 وهي تقول لا لساا ماما .. غصب عني بدفع مو بكيفي بس مايعور بس تحسين دفع ..
واتذكر اني قريت مو زين الدفع الا اذا قالت القابلة يلا ادفعي عشان ما تتمزق المنطقه .. و اتنفس سريع ورا بعض ورا بعض شهيق زفير .. عشان اقاوم الدفعه .. وفجأه يدخلون يمكن اربعه دكتورات ،، و يقولون لي يلا ادفعي .. عند الدفع طلعت كل صرخه حبستها في قلبي .. 😂 مع انه مو كله الم وربي بس كذا الصرخه وقت الدفع اعطتني قوة و ذيك الكلبه تحط الشرشف في فمي تقول اسكتي ازعجتي المرضى , و انا اسمع صرختي و اقول ف نفسي يابنت اسكتي وش ذا كله ياهو هذا صوتي ؟ يا فشلتي ! تخيلوا افكر كذا وشوي اسمع تشق تشق < شقتني عشان يتوسع المكان 🌚 بس ماحسيت ابد ابد المنطقه مخدره من ربي ،. وعلى الساعه 12 و 22 دقيقه يوم السبت صباحاً ينزرط الراس بعد يمكن خمس دفعات .. و اسكت واطالع بين رجولي منصصصصدمة ماهذا الكآئن !!! 😨 وتقول لي القابله خذيه قلت لاااءءء ..وانا كنت محرصه اني اخذه بس ماقدرت شكله كذا ماستوعبته .. و جت سحبت المشيمه طبعاً عبالي انها تعور غمضت عيوني شوي الا هي سحبتها ماتنحس , و خيطوني ببنج داخلي وخارجي برضو ماحسيت بالخياطه ولله الحمد .. عاد جت القابله قالت لي مدام انتي اكلتي تمر ولا مشيتي ؟ قلت لو تدرين اني توي جايه من الممشى هههههه هذي فايدة التمر يابنات احرصوا عليه من بداية حملكم لا تخافون ما يأثر اهم شيء كلي تمرات بعدد فردي عشان تفيدك وماتقلب لسكريات ..
جد لا تخافون من الولاده الخوف يزيدك الم وتعسر للولادة خليها ع ربك توكلي ولا تسمعين للي يصعبون ولاداتهم ، مانقول يبالغون لأن فعلاً فيه ولادات تذبح بس كل وحده غير عن الثانيه .. انا يمكن ولادتي الثانيه راح تكون صعبه مو زي ذي الله اعلم مانعتمد ع تجربة أحد ، وترا يمكن يالبكرية ولادتك مع الطلق ماتاخذ 3 ساعات يعني مو شرط عشان بكرية تجلسين يومين ثلاث وانتي بطلقك .. كل ما احسنتي الظن بالله ووثقتي به كل ما اعطاك ربي ع قد نيتك وثقتك .. الله يسهل لكم ويتمم لكم ع خير .. 💓 :02:مابقول لكم اسفه ع الاطاله لأني نبهتكم ههههههه .. ;)