السلام عليكم جميعا
الحمد لله ولدت وجبت احلي بنوته الله يصلحها يارب
صارلي لحد الان اسبوعين من الولاده
حبيت اخبركم عن ولادتي في مستشفي الحبيب الريان مع اني كنت ناويه اولد في المشاري عند دكتورتي لبني بس الله سبحانه ما قسم رحت لدكتوره شاذيه مقصود في الحبيب باكستانيه وشفتها طيبه والابتسامه ماتفارقها ارتحت لها
انا من الاول ابي وحده بارده ما تستعجلني في الولاده
قالت لي تعالي بعد اسبوع وراح انسوي كشف ونشوف كم سانتي مفتوح الرحم قلت لها تم
جاء يوم الاثنين الي قبل العيد ورحت لها وطلع الرحم مفتوح ٣سانتي ونص قالت علي طول ولاده
رحت للبيت وجهزت اغراضي وامي اخذت الاولاد وراحت وجاء زوجي ودخلني للمستشفي
اكثر شي ما حبيته في الحبيب ان الولاده عندهم قسمين قسم تحت في الطوارئ تجلسين عندهم لحد مايلقون لك غرفت ولاده فاضيه
عاد انا مارضيت ادخل عندهم قلت لا ابي غرفة الولاده علي طول عاد هم سوها سالفه انه مايصير ومن هلكلام عاد زوجي عاند قال هي ماتبي خلاص وكانت الدكتوره كاتبه لي دخول من الاساس جلست في غرفه لابسه عباتي واستني غرفه الولاده تفضي جلس حوالي ساعتين وكان عندي الام خفيفه اقدر اتحملها
بعدين جت ممرضه واخذتني ورحنا لقسم الولاده واول ما دخلت قمت ابكي من البنات الي بالغرف جالسين يصارخون والله اترعبت وزوجي يضحك علي يقول من جدك طبعا مو حاسس فيني وبالخوف الي حسيته
عطتني الممرضه ملابس غيرت ملابسي وركبت علي الجهاز تبع النبض و نسبه الطلق الي يجي
جلست ساعه وجات وحده سودانيه وفتحت المويه تبع الراس
ومن وقتها بدا الجد الالم يقوي مره عن مره لحد ما وصلت لحد خلاص تعبت فيه قلت لها ابي ابرة البيثادين اظن اسمها كذا
المهم عطتني اياها في العضل ومن بعدها خف الالم علي مو زي اول وصرت احس اني ابي انام ومن بعدها جات الدكتوره شاذيه وقاست لقت الرحم مفتوح ٨ سم قالت خلاص ولاده بعد نص ساعه وصرت ارتجف كاني اول مره اولد
ومن بعد مرور نص ساعه بدا الجد وزوجي:arb: يقول ادفعي بقوه وهي قامت تدعي وتذكر الله والممرضات يرفعون راسي وزوجي ماسك ايدي ويشجعني ويضغط علي بطني علشان تنزل البنت
والحمد لله ولدت وارتحت :icon28:
حسيت نفسي طايره وابي انام وصرت اشوف البنت من بعيد وهي اتنظفها وبعدين :arb:زوجي اخذ البنت واذن باذنها
والدكتوره جالسه اتخيط وقالت لي تبين تجميلي قلت ايوي
بعدين جلست في نفس الغرفه مده ساعتين تحت الملاحظه وبعدين انقلوني للغرفه تبعي وكانت اكويسه ونظيفه
وقلت لهم ابي اخرم اذن البنت مره وحده ابي ارتاح
وجلست يومين وطلعت
والحمد لله علي الصحه والعافيه وعقبال كل حامل تولد بالسلامه
علي فكره
سميت بنتي شيخه
PINK0DAIMEN @pink0daimen
عضوة نشيطة
يلزم عليك تسجيل الدخول أولًا لكتابة تعليق.
الحمد الله على السلام ومبروك ماجاك وتتربى في عزكم انا محتاره وين اولدتنصحيني اولد في الحبيب
انتي في الرياض
انتي في الرياض
الصفحة الأخيرة
جعلها الله سلامه دايمه