sint @sint
عضوة نشيطة
قصة ولادتي 2
صبحكم الله بالخير يا الغلا
والله وحشتوني يا قمامير
انا والد لي عشرين يوم و فتحت موضوع وقلت بحط فيه تجربة ولادتي لكن انشغلت
الحين البيبي نايم و انا امس نايمة بدري فقلت اكتب لكم على رواق
تجربة ولادتي
أولا أنا مقررة لي الولادة في 17 يناير
من بداية الثامن صرت انزل السوق وامشي كثير منها اتقضى للبيبي ومنها أحمي للتاسع
وبس دخلت التاسع صرت اروح للممشى بحيث أمشي مشي ( رياضي وسريع والخطوة كبيرة) طبعا كانت درجة الحرارة
منخفضة جدا جدا وانا لابسة شراريب اثنين وسروال متين و جاكيت وصايرة مع الدبة حركااااات والكل في الممشي
يسوي لي طريق خخخخخ
المهم استمريت على المشي تقريبا اسبوع يوم أي ويوم لا
وكان الطلق والالام تجيني بالثامن لكن من دخلت التاسع صارت ماتجيني آلام
بعد اسبوع من التاسع كنا جايين من الممشى حسيت بألم جا فجأة فكرتني بستحمل لكم ماقدرت صرت اصارخ وزوجي يقزلي شفيك اقوله مادري بس الم قال اوديك المستشفى قلت لا ما احسه طلق بس الم ما ادري شنهو..
المهم لزم علي نروح.. وحطو علي التخطيط والالم هدا وراح !!! وقاست الرحم قالت مفتوح 3
لكن مافي طلق قالت روحي البيت لو زاد الطلق او شفتي دم او موية ارجعي. . المهم رحنا البيت ونمت ولما جلست من النوم شفت دم ومعاه افرازات رحت شربت قرفة وصحت زوجي ورحنا المستشفى وحطو تخطيط وقاست قالت لسه مفتوح 3 سم ومافي طلق ورجعت البيت محبطة ومتكدر خاطري قلت لزوجي خلاص ما بنروح هالمرة الا متأكدين.
المهمبعدها بأسبوع كنت جيت من الممشى ودخلت البيت و جالسه اجيب فوطتي وملابسي بدخل آخذ دش قبل النوم كان الوقت
9 بالمسا ليلة 2 يناير, قبل لا أدخل كنت حاسة إني ابروح الحمام اتبول وانتم بكرامة وكنت ماسكة نفسي عشان اجمع ملابسي
وانا اطلع المشط من الدرج حسيت بماي دافي ينزل فكرتني تبولت على نفسي!!!!!!
حاولت احبسه بس مانفع.. سبحان الله ذكرت كلمة وحدة بالمنتدى قالت اذا نزل موية ماتقدرين تتحكمين فيها هذي موية الجنين.. الماي ينزل و بلل ملابسي ووصل للأرض وصرت اصارخ على زوجي لكن ما يسمعني كان معلي صوت التلفزيون. كنت خايفة امشي فكرت لو امشي ينزل البيبي خخخخ
فكنت اصارخ من مكاني وانا مسكرة رجولي واحاول احبس الموية ولاهي نافعة. وأخيرا سمعني زوجي وقلت له نزل علي ماي قال عادي اصبري شوي, لأن قبلها كان نازل علي دم خفيف قبل اسبوع ومفتوح 3 سم ولافي طلق وقالت الدكتورة عادي يمكن ماتولدين إلا بعد 3 اسابيع فهو بسلامته طالع فيها فاهم.. وانا اقوله لا .. هذا غير هذا ما يصبرون عليه وهو يقولي اسمعي كلامي واصبري احنا متفقين نصبر هالمرة وظلينا نتناقش قلت له بتوديني ولا اروح لحالي ليش ماتفهم اذا نزلت الموية لازم يروحون فوراً.
كل هذا النقاش والاقناع والماي ينزل مني زي الحنفية!!!
اخيرا اقتنع ورحت لبست لي كوكتكس وعبايتي و طبعا من هول المفاجأة ما اخذت معاي شي لا شنطتي ولا شربت دافي ولا اخذت دش.. حتى جوالي مو مشحون.
رحنا وانا ارتجف من الخوف وكل مفكرة ان البيبي بينزل..
المهم وصلنا المستشفى الساعة 10 مساء " مستشفى الحمادي"
على طول من الطواريء دخلوني غرفة الولادة. طبعا انا فكرت انها غرفة ماقبل الولادة لكنهم قالو لي هي نفسها غرفة الولادة واستغربت مافيها طاولة للبيبي ولا فيها اي استعداد ..
لكن هم حطوني ع السرير وحطو علي التخطيط وصارت الممرضات تروح وتجي هذي جايبة طاولة وهذي جايبة ادوات وانا اقولهم ترى مافيني طلق..
قلت لزوجي مافيني ولادة تراي مو والدة إلا بكرة. وكعادة زوجي عنيد جداً وراح شرب ريد بول عشان السهر, قلت له انت اول مرة تدخل غرفة ولادة تفكرها سهلة؟ أحمد ربك لو ولدت الفجر!..
المهم الممرضات رايحات وجايات وعطتني مسهل وقالت إذا حسيتي انك تبين الحمام قولي وبعد عشر دقايق ناديتها فكت التخطيط ورحت الحمام وانا اتحمد الله واتشكره واقول والله هبال يفكروني بولد ليش العجلة..
بعد مرور ساعة وانا انتظر دكتورتي " حنان" اعتذرت وقالت بتجيني بدالها " باريتما" قلت يلله الخير فيما اختاره الله.
وتذكرت بنات بالمنتدى يمدحونها >>>> دوووم ببالها بنات حواء
المهم جات دكتورة مناوبة وشافت التخطيط وقالت مافي طلق
وقاست لي قالت مفتوح 3 سم بسسسسسسس
انا هنا جنيت قلت لزوجي شفت شفت مافيني ولادة بيلعبون بي وكنت والله ارتجف خفت يسوون لي عملية.
طلعت كتاب الأذكار وجلست طول الوقت اقرى وادعي بعد مرور ساعتين يعني جت الساعة 2 بعد منتصف الليل جات وقاست لي قالت 3 ونص ... انا خلاص جنيت مافيني ألم وموية الجنين تنزل والرحم ماهو مفتوح وجلست استغفر وأدعي و أذكر الله والله ماوقفت من الدعاء والذكر و مر الوقت وصرت أحس بألم يروح ويجي ويزيد وصار زوجي يحسب الأوقات مابين الطلقات إلين جات الساعة 3 الفجر جات حطت لي مغذي و أكسجين وجات قاست الدكتورة قالت مفتوح 7 سم وحظرو كل شي قالت لي إذا صار الألم ما يحتمل قولي لي وفعلا صار الألم شديد وصرت أصارخ وارتجف والله ماقدرت اخلي ظهري على السرير من الألم قلت خلاص مااقدر وجت حطت لي ابرة و دخت لكن الألم حسيت فيه لكن راسي يدور واعرف كل شي يدور حولي شفتهم جايبين حاظنة للبيبي و لابسين قفازات وفصلو السرير ورفعوه فوق حسيتني ارفع كثير من الدكتورة وبدى الطلق يزيد واسمعها تقولي خذ نفس وآخذ و تجي الطلقة وتقولي ادفعي وأدفع ..
وزوجي يقرا على أذكار ويمسح على راسي أول مرة بحياتي احسه قلبه علي كذا
واخيرا بقولتها يلله ادفعي والممرضات بعد معاها وانا ادفع بكل قوتي وانهار.. وتجي طلقة ثانية وأدفع دفعة قوية جدا وطويييييلة وحسيته طلع وماصدقت والله انه طلع وجات حطته على بطني وانا من شفت حبيبي الصغير نسيت الألم وصرت أمسح عليه واقول بسم الله عليك ياقلبي يا حبيبي يا حبيبي
ولا حاسة انه لسه ما نظفوه ويديني جالسة تتوسخ وانا امسح عليه والسستر تمسح يديني بمناديل وارجع امسح عليه مو حااااسة وربي..
هنا آخر ما اذكرة ماعرف شصار انا نمت ولا اغمى علي زوجي يقول طلعو المشيمة وعطوني ابر كثيرة بالمنطقة
ماحسيت بشي حتى ان السستر جاتني بعدين تعطيني مرهم ومعقم وتقولي للخياطة قلت لها مافيني خياطة..
وجابتلي الدكتورة بارتيما وقالت لي سويت لك جراحة وخياطة وانا مو حاسيت لا بخيط ولا بمقص ولا أي شي ..
وهذي قصة ولادتي والله يتمم عليكم يارب ويكتب لكم ولادات ميسرة سهلة آميييييين
طبعا ولدت قبل موعد ولادتي باسبوعين
32
3K
يلزم عليك تسجيل الدخول أولًا لكتابة تعليق.
عسووولة
•
حبيبتي الف الحمدلله على السلامة ومبروك ماجاكم
ياااي ذكرتيني بالذي مضى
تجربه فيها خوف والم وترقب ووناسه شيئ غريب سبحان الله
والله يخليلك زوجك زين سويتي خليتيه يحضر الولادة عشان يحس بتعبك ومعاناتك
الله يخليه لك ويخلي لكم البيبي ويبلغكم فيه معرس
ياااي ذكرتيني بالذي مضى
تجربه فيها خوف والم وترقب ووناسه شيئ غريب سبحان الله
والله يخليلك زوجك زين سويتي خليتيه يحضر الولادة عشان يحس بتعبك ومعاناتك
الله يخليه لك ويخلي لكم البيبي ويبلغكم فيه معرس
مممممممممممبروك ماجاك والحمد لله على سلامتك والله عيوني دمعت يوم تذكرت ذيك اللحظات دعواتك بتسهيل الولادة
gloos
•
لحمدلله على سلامتك انتي والبيبي
وجعل الله كل مامريتي فيه اجر وطهور لكي
ويارب تبشرينا بكل خير عنك وعن طفلك
وجعل الله كل مامريتي فيه اجر وطهور لكي
ويارب تبشرينا بكل خير عنك وعن طفلك
الصفحة الأخيرة
يتربي في عزكم ويجعله الرحمن من مواليد البر والتقوي اللهم امين
حمدلله على سلامتك يا اختي