قصة ولدتي - كما وعدتكم

تذكرت الحلتيت رحت نقعته بشوي مويه وحطيت على فوطة ولبستها وشميت منه شوي , بس ماقدرت اتحمل قرفت منه وحسيت ان وادتي قربت قلت خليني استعد رحت تروشت وحلقت المنطقه اللي تحت وتنظفت ولبست بجامتي وحاولت انام ابدا ماقدرت , تذكرت اني ماكتبت مسج تبليغ الولاده واروح افتح جوالي واكتبه واحطه في المسودات , وجلست اقرا قرآن شوي ومتردده ابي اصحي زوجي يوديني المستشفى وكل مارحت شفته نااايم وشكله مرهق احزن عليه واقول لا خليني اتحمل شوي الين يجي موعدي مع الدكتوره لان زي ماقلت لكم كان 11ونص , لما جت الساعه 9ونص قام زوجي لقاني جالسه بالغرفه الثانيه قال هاه نروح قلت لسه الدكتوره ناديه تجي الساعه 10 خلينا ننتظر شوي قال طيب ننتظر ونام عالكنبه مسكين من التعب انا وقتها خلاص بدا الالم يشد معي وصرت اوووون كل ماجاتني الطلقه قام زوجي قال يابنت الحلال هذا طلق قومي بس البسي عباتك خليني اوديك ومن الربكه كلم السواق يبي يقوله شغل السياره قاله اطلع فوق والسواق مستغرب يقول اطلع فوق ؟؟ وزوجي يقوله ايه اطلع ... بعدين راح يلبس ثوبه واستوعب ورجع كلم السواق قاله شغل السياره وانا كنت لاهيه مع الالم والا كان ودي اضحك عليه ... رحنا على الطوارىء طبعا له تبعد عن بيتي خمس دقايق عشان كذا ماكنت مهتمه اني اطلع بدري لانها قريبه , كشفت علي دكتوره مروه المووده بطوارىء النساء قالت مفتوح الرحم 2 سم ولازم تنويم وطلبت من زوجي يسوي اجراءات التنويم بس انا قلت له لا اصبر وش اللي 2 سم وتنويم خلينا نروح البيت وبعدين نرجع , كان وقتها الساعه 11 ونص قال طيب روحي لدكتوره ناديه شوفي وش تقول لان موعدك الحين لو قالت اطلعي طلعتك ورحت لها كانت موموجوده طاله تسوي جوله على المريضات فوق بالغرف .. جلست انتظرها الين نزلت ودخلت عليها قالت حبيبتي انتي ولاده مافي طلعه شوفي كيف ماسكه بطنك وتعبانه لازم تنامي هنا قالها زوجي ماهو بدري توها 2سم قالت بس من وحده لوحده تختلف ممكن بعد ساعتين يفتح رحمها 8 سم وممكن بعد يوم على حسب عشان كذا لازم تكون عندنا قال خلاص بروح اسوي اجراءات الغرفه وجت ياحبي لها وحضنتني وضمتني وقالت انا باخذها بنفسي وطلعت معي الين الطوارىء وسلمتني للنيرس وقالت لي اشوفك حبيبتي فوق بغرفة الولاده وراحت لعيادتها , خلص زوجي الاجراءات وجو طلعوني للغرفه الخاصه حقتي والالم كل ماله يزيد توقعت مايجي العصر الا انا والده , دقت علي امي وقالت لي انا الحين جايتك بالطريق , وصلت امي وابوي , وانا كل ماجتني طلقه اووون من الألم وامسك في الحديد حق السرير بكل قوتي , وشوي جت دكتوره مصريه كشفت علي قالت 3 سم كان وقتها الساعه 3 الظهر وانا اقول ياربي كل هالالم و3سم الله يصبرني ويهون علي , بعد ماكشفت علي دخلت الله يكرمكم الحمام نزلت علي سدادة الرحم ونزل دم زي المخاط وصارت المنطقه تألمني بشكل فضيع ونغزاااات رجعت سريري والالم يزيد صار كل عشر دقايق , وجتني الممرضه حطت لي الحقنة الشرجيه وبعدها حطولي التخطيط وعطتني شي بيدي فيه زر قالت كل ماتحرك البيبي اضغطي , ومع قوة الالم ماحسيت بأي حركه للجنين لاني ماعاد اميز بين الحركه والالم كل شي يعورني وكل ماجتني الممرضه تتابع نبضات الجنين اقولها يليه تعبني لاني مع الالم ماصرت اتحمل شي وصار جهاز التخطيط اللي حاطينه على بطني يضايقني قالت الممرضه ليش ماتضغط لما يتحرك قلت ما احس بحركه قالت لا لوماتحرك مررره مشكله لازم فيه حركه .. جت امي وصارت تمسح على بطني وتقا عليها وصار يتحرك واسمع نبضات قلبه حبيبي سررررريعه كأنه خايف , بعدها جت الممرضه شالت التخطيط وصار الالم يجيني كل 8 دقايق يادوب اتنفس ويرجع لي ماعاد اقدر امشي واحس ظهري بينكسر راح زوجي يهاوش الممرضات يقول يعني تاركينها بس بالغرفه قالو غرفة الولاده مليانه شوي بس تفضى غرفه وننزلها تحت , بعدها نص ساعه جوني اعطوني روب العمليات وقالو البسيه وشيلي ملابسك والساعه 8 تقريبا نزلوني غرفة الولادة ماكنت قادره اجلس عالكرسي المتحرك من الالم وجلست ابكي لما دخلت غرفة الولادة جت الممرضة حطت لي المغذي واعطتني اوكسجين قالت كل ماجاك ألم شميه بقوه وجلست اشمم فيه ومافي فايده الالم صار متواصل واحس اني بمووووت , جت دكتوره كشفت علي قالت 6 سم قلت الحمدلله يعني قربنا , وقتها يابنات والله ما اقدر اوصف لكم كيف كان الالم والله كان موووووووووووووووت شي موطبيعي ولاينوصف كنت احس ان روحي تطلع وقت الطلقه وترجع مايمديني ارتاح الا وجتني الطلقه الثانيه كنت احبس ألمي ما احاول اصرخ واحاول اطبق تمارين التنفس اللي قريت عنها بالنت بس مافي شي يخفف الألم جلست اترجى زوجي يخليهم يحطولي ابرة الظهر وهو رافض اقوله الله يسامحك انت ماتحس انا بموووت انا ماعاد اقدر اتحمل وامي صارت حالتها حاله مسكينه داخت وكل شوي تروح الله يكرمكم تستفرغ , وانا احس كأني بغيبوبه مدري وش اقول جتني الدكتوره المصريه سألتني كم سؤال وانا أشر لها بيدي موقادره اتكلم وكمان الكمامه اللي اعطوني اياها شكلها فيها شي خلاني اهلوس , زوجي يكلمني احسب اني احلم مدري ماكنت احس الا بالألم وادعي ربي واقول يااارب ارحمني واتلوى في السرير وامي تمسح على وجهي بمويه بارده وتقرا علي , صارت الساعه 10 وجت الدكتوره قاست قالت مازال 6 سم انا خلااااص انهرت من التعب صرت اقول لزوجي وامي انا حموت خلاص ماعاد اقدر اتحمل هالألم وشوي اصرخ وشوي ابكي مدري وش اسوي بقطع نفسي جت الممرضه حطت لي مسكن ابره في العضل ولافي فايده وجت بعدها بنص ساعه حطت لي ابره في المغذي تقول انها توسع الرحم وصرت احس الله يكرمكم اني بروح لدورة المياه كأن فيني براز .. قلت امي بروح الحمام قالت لاااااااااا هذا راس البيبي خليكي مكانك وراحت نادت الممرضه جت قاست لي قالت 7 سم وجت الدكتوره ناديه ياحبي لها بوجهها البشوش وابتسامتها تناظرني وتقول لزوجي شوف ما احلاها حتى وهي تولد , قلت لها وينك يادكتوره قالت انا متابعه وضعك حبيبتي كل شوي اسأل عنك لاتخافي وجت قاست قالت 8 سم بس راس البيبي مرررره فوق مرتفعه لسه مافي ولاده وقالت لي انقلبي على جنبك وراحت تولد وحده بالغرفه اللي جنبي , وقتها تمنيت لو يسوون لي قيصري وارتاح من الالم والعذاب اللي انا فيه ..

, لما نمت على جنبي حسيت بفقراتي تتكسر وألم فضيع جلست اصرخ منه واحس اني بدفع وصرت ادفع بدون شعور وامي تنادي الممرضه والممرضه مطنشه تقول لا لسه صارت امي حبيبتي تطالع وتقولي لا لسه مافي راس وانا ادفع واصررررررخ من قوة الألم يمكن 4 او 5 مرات وانا ادفع بعدين جت الدكتوره ناديه والممرضه وقالت لي ادفعي بكل قوووووتك ودفعت مع الطلقه وانا اصرررخ وامي تقولي نزلي راسك لتحت وانتي تدفعي وسويت زي ماقالت وشوي حسيت بالمقص وهي توسع لي وصررررررررررخت من الألم ألم المقص والراس كأنه نار سبحان الله الا وولدي حبيبي نزل وحطته لي على بطني ودقايق ونزلت المشيمه بس استغربت انه مابكي وجت الممرضه شالته من فوق بطني وانا اتابعه بعيوني لقيت راسه كأنها اسطوانيه قلت للدكتوره وش فيه راس ولدي قالت لا مافيه شي يومين ويروح كل شي بس هذا مع الدفع وقت الولاده ونطفت له الممرضه عيوونه وخشمه وبكي شوي وجت امي شالته ونادت زوجي يشوفه لانه كان بره ماقدر يجلس وقت الولاده والدكتوره ناديه اعطتني ابره مخدره مكان الجرح وقالت بروح وارجع لك بعد ربع ساعه تكوني تخدرتي عشان اخيطك وقلت لامي تغطيني بشرشف من تحت عشان زوجي مايشوف مني شي , دخل زوجي شاف الولد من عند الباب وطلع ورجعت دكتوره ناديه جت بتخيطني قلت لها لالالالا ابي ابره ثانيه حاسه اني لسه ماتخدرت , قالت ابشري رغم اني ما اعطي ابرتين بس ابشري عشانك خايفه واعطتني الابره الثانيه وبدت تبي تخيط وبهذلتها اشد نفسي وهي تقولي لا حبيبتي خليكي مرتخيه مره وانا ارفع نفسي من السرير وهي متحملتني ياحبي لها لما بدت تخيط وماحسيت الا بوخز خفيف ارتخيت وارتحت وخيطت جوه بعدين بره قلت لها يادكتوره شقيتيني كثير قالت لا كلها خمس غرز بس من بره , اصلا ولدي كان راسه صغيرر وحجمه صغير عشان كذا ماكان فيه قوه وتعبني في الولاده كان وزنه 2800 ياحبي له ربي يحفظه

بعد ماخلصت خياطه قالت بشيك لك يمكن اكون نسيت شاش والا شي جوه ودخلت يدها ولالقت شي الحمدلله قالت اشوفك بكره الصباح ان شاء الله والحمدلله على سلامتك وراحت

جت بعدها دكتوره ضغطت على بطني تقول اشوف اذا فيه نزيف او شي بس لقت كل شي تمام الحمدلله

وجابولي ولدي حضنته وبعدين شالوه عشان يتروش ويطلع الحضانه

وجتني ممرضه لبستني فوطه واندروير وغيرت لي الروب اللي كله دم ونظفت يدي لاني نزفت محل المغذي وقت الولاده ومسحت الدم اللي بفخوذي وجهزوني عشان يطلعوني غرفتي

خلوني بغرفة الولادة ساعه تحت الملاحظه وبعدين طلعوني غرفتي

وجتني دكتوره ناديه مرتين يوم الاربعاء ويوم الخميس الصباح

وكانو يجيبولي البيبي ثلاث مرات باليوم الساعه 6 الصباح والساعه 6 المغرب والساعه 12 الظهر يخلوه عندي ساعتين ويرجعوا ياخذوه
وسويناله الختان يوم الخميس الصباح قبل ما اطلع من المستشفى وطلعت الساعه 3

ومرت علي ثاني يوم بعد ولادتي دكتوره مصريه حبووووبه قالت لي انها اخصائية رضاعه وجت تعلمني كيف ارضع البيبي وسألتني اذا كان عندي اي استفسار او ابغى اي مساعده وجلست اسولف معها والله عسوله مره

بالنسبه للممرضات اللي بالنهار حبوبين اما اللي بالليل مره خدمتهم سيئه تدقي الين تنفجري محد يجيك

اعطتني الدكتوره عشان الخياطه شامبو و كريم ميبو قالت لاتستخدمي غيرهم والخياطه تطيح من 10 الى 20 يوم حسب الجسم وسوت لي موعد معها بعد 18 يوم من ولادتي وكانو يعطوني بالمستشفى مسكن وحبوب حديد ومضاد وفيتامين وصرفوها لي لما طلعت

واعطوني قبل ما اطلع كرت التطعيمات حق البيبي وموعد مراجعه له مع استشاري اطفال بعد اسبوع ومراجعه للختان بعد اسبوع برضو
واعطوني له حليب وبامبرز

بالنسبه للخياطه استمر معي ألمها لمدة 10 ايام بعدين الحمدلله خف كثير

سرة البيبي طاحت بعد اسبوع الحمدلله والختان يحطون له حلقة شفافه وطاحت بعد 9 ايام الحمدلله

تعذبت مع ولدي في موضوع الرضاعه ماكان يبي صدري ابدااااااااااااا ولا يبي يرضع يبي بس الحليب الصناعي اللي كانو يعطونه له بالمستشفى وكل ماجيت ارضعه من صدري يبكي ويتقرف وانا ابكي معه وجتني سخونه ونفاضه لان الحليب اتجمع بصدري وصار كأنه حجر يألمني وجتني حالة اكتئاب ألم الولاده اللي ماينسي وألم الخياطه اللي كان معذبني والولد موراضي يرضع وحالتي حاله كل يوم كنت ابكي ولا ابي آكل ولا شي بس اكتشفت ان الموضوع يبيله بس صبر لانه الان اتعلم يرضع مني شوي شوي الحمدلله وارتاحت نفسيتي كثير الحمدلله بس الى الان ما اشتهي الاكل

اسفه طولت عليكم

الحمدلله على السلامه

الف الف مبروك
والحمد لله على السلامة
ويارب يجعل ولدك ولد صالح يارب
ادعيلي اقوم بالسلامة بكرية
تحياتي

اووووووووووووووووووووووووووووووووووووووف يااااااااااااااااااااااااابنت الرررررياااض والله انك شااطره بالووصف ماشاء الله عليك ذكررتيني بولادتي احس قصة نفس قصة ولادتي بالضببببط في كل شي الفررق الووحيد اني من الالمم ضربت الممرضات ضرب سنه بيووم من قووة الالم ونفسك كانتع معي امي وكانت برمضان


اجر وعافيه يييييييييييييييياارب والله ينولك برها

دعواتي لك