بسم الله الرحمن الرحيم
الشهيد يضحي بحياته في سبيل الله , وأنا قررت أضحي بسمعتي عشان اخدم ديني و اخدم المساكين اللي طاحوا في مصيدة المخدرات والله يوفقني وأياكم لعمل الخير..
البداية
كانت بدايتي من المسجد إلى البيت صحيح كان عندي أبو شديد بس كنت من المسجد إلى البيت , صحيح كنت انظر إلى أبوي انه إنسان معقد ولكن من المسجد إلى البيت , كنت مشترك مع مكتبة المسجد شباب طيبين من احسن ما يكون ما عندهم أي مشاكل, وكان فيه رحلات ومخيمات شي يحبه قلبك . و بدا يظهر عندي سلوك مثل شباب كثير نشوفهم قاعدين في النص لا مع هذا ولا مع هذا ضيع مشيته ومشية الحمامة وفي وقتها أنا كنت كذا . وكان فيه مقولة يرددونها الشباب ويمكن إلى الآن مازالوا ( ساعة لربي وساعة لقلبي ) وهذي هي اللي وهقني هي اللي دمرتني . اللي د مرني أني صرت مثل الببغاء وش ما يقولون أقول وش ما يلبسون البس ولا أفكر هل هو يصلح لي أو ما يصلح لي .
فاللي حصل أنى كنت جالس في المجلس مع أبوي فلاحظ فيني المشكلة هذي وقال اسمع السنة هذي لازم تنجح إذا ما نجحت راح اعلْقك . تدرون وش معنى بعلقك (يعني بأشتغل عليك بالعقال , خلك رجال و انجح ) . و أبوي إذا قال يسويها . فطلعت من المجلس أدور حل وشو الحل , وأنا كان عندي مشكلة و هذي مشكلة كثير من الشباب (الحلول السريعة) , الشباب يبغون حل سريع , يبغى يغمض و يفتتح كل شي عنده . رحت حق الشباب بعد صلاة المغرب , كانوا قاعدين في المكتبة . فقلت لهم إذا ما نجحت أبوي بعلّقني وش هو الحل؟؟ قالوا توكل على الله وصل ركعتين وادعي الله يوفقك . قلت في قلبي هذي يبغالها شغل (عفوا على هذا التعبير بس أنا قاعد اوريكم شخصيتي الحقيقة ) . قلت هذي يبغالها شغل على ما اتوضاء و على ما اصلي ركعتين وادعي خلّص الامتحان وأنا أبغي حل سريع قلت عندكم قلوا لا . قلت يا جماعة في حاجة يسمونها براشيم علموني عليها, قالوا من غشنا فليس منا .قلت يا عمي ما عندكم سالفة .تركتهم و أعلنت عليهم الحرب , هذول ناس معقدين .
كان في المدرسة نوعين من الشباب , شباب ملتزم و طيب وهادي و ناجح و فاهم , و كان فيه شباب رجّة مرجوجين (عرا بجة, حونشية) , رحت للشباب الطيب ما أعجبني حلهم , قلت ليش ما أروح حق العرابجة . رحت المدرسة و أنا معزّم أنى أروح حق الرجّة . والمرجوجين دائما يقعدون في الفسحة عند السور , لأنهم يحاولون يغطون على عيوبهم ما يبغون الناس يشوفونهم . صارت الفسحة ورحت ادورهم نطيت السور وإذا في واحد منهم قاعد اسمه عبد الله قلت له عبود ( كان هو يدخّن وأنا ما ادخّن ) أنا عندي مشكلة , قال اها عندك مشكلة اجلس اجلس وشهي مشكلتك؟ قلت أبوي , قال قصدك الشاكوش (شباب قبل يسمون آباءهم الشاكوش ) قلت إيه الشاكوش راح يعلقني إذا ما نجحت . جلس ينفخ دخان وقال أبوك معقد! سحبت بلوك وجلسة جنبه وقام أعطاني زقاره . أول مرة في حياتي المس فيها زقارة ! حتى يوم أعطاني إياها ما عرفت امسكها . أول ما حطيتها في فمي تخيلت صورة أبوي ماسك مشعاب . قلت له ابغى أتعلم براشيم , قال و لا يهمك أنت تبي تنجح ؟ قلت إيه و الله , قال مالك إلا اللي يطيب خاطرك . أنا مشكلتي أني غبي يعني لو كان عنده حل كان نفع نفسه و نجح , ولكن كنت ابي حل سريع (وأنا أحذر من الحلول السريعة ) .
طق الجرس دخلنا المدرسة طبعا عنده طقوس لازم يسويها قبل ما يدخل الفصل , عشان يروح نص الحصة , وأنا كنت مجبور أسوى مثله عشان عنده حل لي .
جلست طول الدوام أفكر و ش الحل اللي راح يعطيني إياه . انتهى الدوام , طلع قدامي لحقته مو هو اللي لحقني , أنا اللي عطيته فرصة يدخل حياتي وترى إحنا اللي نعطيهم الأذن يدخلون حيتنا هم ما يدخلون منا و الطريق .
الحبة الأولى
كان في نهاية الدوام واحد اسمه ناصر ويسمونه نصّور . هذا نصور مفصول من المدرسة وعنده وانيت دتسن , يجي نهاية الدوام يفزع ( إذا في مضاربة إذا في شي) ياخذ دورتين يفحط ثم يسب المدرسين ويلعنهم . وكان له قيمة نصور , يعني اللي يركب مع نصور في الدتسن بطل محّد قده . فقال لي عبود تعال نركب معه , قلت يلى نركب . عاد وش مسوي بالدتسن ؟! ساحب سست و مغبره , ومن داخل مسويه غرفة نوم .
أنا في الحقيقة أول مرة اركب مع الأشكال هذي , وبديت أحس بقشعريرة خاصة يوم حطوني في النص وقام يفحط و الشباب يصفقون له وحاط بشير شنان . وشي الحياة هذي؟؟! بس أنا أقول أكيد عندهم حل لي , فقال عبود حق نصور ترى الشكش حق يوسف بيعلقه إذا ما نجح , قال نصور يووووه أبوك معقد , قلت ادري لكن وش الحل؟ قال الحل عندي . بعدين قام يفحط شوي , فدخلوني بغيبوبة , كنت في مجال ما هو مجالي . هذاك الوقت كان عندي مجال أني أتراجع ولكن معظم المعاصي تعطيك لذة في بدايتها ما تخلّيك ترجع , وكنت أقول خلني أشوف وش نهايتها .
أنا ماظنيت نهايتها 20 سنة إدمان ؟ و لا ظنيت اني راح انسجن 8 مرات ؟ ولا اني ادخل المستشفى 19 مرة ؟! ولا أن يطلقوني المرة ؟ ولا أن أبوي يطردني من البيت, وكنت أظن الشغلة يوم واحد بس.
فدخّل نصور يده في جيبه وطللع منديل ابيض . والله والله ما أنسى هذا المنديل لانه هو اللي غيّر حياتي كلها . ويوم رفع المنديل طاح من يده وإذا فيه 4 حبّات , قلت له وش هذا يا نصور ؟؟!! قال أنت تبي تنجح أو لا ؟ قلت أكيد ابي انجح , قال أنا خويك ما بضرك أنا أعزك . كلهم في البداية يشغّلون نفس الاسطوانة أنا ما ابغى أضرك وهو وده يذبحك.
(- يا ويلتى ليتني لم أتخذ فلانا خليلا لقد أضلني عن الذكر بعد إذ جاءني وكان الشيطان للإنسان خذولا)* قال لي هذي حبة وحدة تخّّليك تحفظ الرياضيات صم وتصوره تصوير , (أنا الحين توهقت ما ادري وش أسوى بس قلت مادام اني خذيت الزقاره من عبود ليش ما اخذ الحبة ) وفعلا أخذتها , أول ما أخذت الحبة حسيت انه في باب فتح قدامي وفيه ضباب وفيه شي اسود داخل , دخلت حياة جديدة , و لكن حياة وشهي ما ادري . طبعا المروج دائما يعلمك كيف تستخدم الحبة , أنا ما اقدر اذكر الطريقة لان فيه ناس مو من حقي اذكرها عندهم , ولكن وصفها لي أنها جنتي , وراح ترتاح وراح تكيف . خللاني اشتاق لها , المهم أخذت الحبة وبعد ربع ساعة قلت لهم ودوني البيت ابي أروح أصور الكتب! .
آنا ما عشت مرحلة شباب طبيعية عشان كذا اوجه رسالة لهم وهي أن كل أب وأم لهم أحلام في ولدهم , فأول ما تقول الأم للأب أنا حامل , يبداء يفكر في الولد , ابغاه يصير طيار ابغاه يصير ضابط وابغى وابغى يقعد يحلم المسكين , و الام كذالك .
ولكن أنا حرقت أحلامهم . أول ما دخلت البيت لقيت والديني قاعدين في الصالة , قعدت أطالعهم بعيوني أقول بقلبي سامحوني حرقت حلمكم . أبوي كان يتمنى أصير ظابط لكني صرت خريج سجون . وأنا السبب لاني كنت افتكر التعاطي حرية شخصية وهذا شي خاص فيني , ولا حد له شغل فيني . لاياخواني لا , إحنا يوم كنا شباب ماكنا نأخذ في الاعتبار أحلام أهلنا وهدمنا كل شي في لحظة . دخلت البيت وامي المسكينة حسّت اني مو طبيعي , قالت وشفيك يا ولدي؟, قلت ما فيني شي , قالت روح فوق بسرعة لا يشوفك أبوك . فصرت أقول هذا منكم انتو ما تحسون فيني ما تحسسوني اني رجال ولا فيه ثقة فيني , طبعا من حقهم ما فيه ثقة العالم بره وحوش . فرحت سهرت ذاك اليوم على أساس اني اقراء ولاقدرت اقراء , بكره الامتحان فقلت يمكن بعد صلاة الفجر تشتغل الحبة عشان اقدر احفظ . جا الفجر ولا صوّر ولا هم يحزنون صرت مثل القرد بس اناقز رحت المدرسة مواصل دخلت الامتحان ابي أطالع الورقة مو قادر , المراد ما حلّيت شي . كان ورأي عبود , قلت له عبود ما اشوف ؟؟ قال فكّت , قلت له طيب وش الحل ؟, قال خذ هذي وحدة ثانية دفّها من تحت الكرسي أخذتها وحطيتها في فمي .
بداية الإدمان
فكت اشتغلت صرنا مواتر ( مصطلحات ) وأنا ابغى كل أبو يعرف المصطلحات هذي , لانه يمكن يسمعا من ولده (أعطوه خير الخير بوجهك ) يعني يبي حشيش . دخلت في عالم الإدمان طلع عندهم لغة غريبة . المشكلة يا إخواني اني نجحت في التعاطي ورسبت في الامتحان . وبديت اخذ حبة ورا حبة , جا الصيف عطلت وسقطت , وجب التعليق وعلقوني . ابغى أنسى لكن المصطلحات كانت تجي في بالي , وكنت احب النوم لكن الحبوب تسهرني و تعور مخي , فرحت حق واحد من اللي اشتري منهم حبوب . قلت له الحبوب أزعجتني ابي أنام قال لي البش مهندس ترى ما يفك الحبوب إلا الخمر قلت يعني شلون؟ قال اشتر لك خمر وراح تنام . قلت خمر! ! حبوب و مو خالصين هالمرة خمر ؟ قال روح مالك حل عندي غير الخمر كان تبي تفككها.
رحت شريت خمر و عطبتها ذاك اليوم . دخلت البيت أمي شافتني أعلنت حالت الطوارئ , المهم أبوي ما يشوفني . رجعت للبياع قلت له الخمر فيه ريحة واحنا عائلة محافظة , قال مالك إلا الحشيش ترى مافيه ريحة . لاحظتم التسحيب من الزقاره إلى الحبوب إلى الخمر إلى الحشيش .
مرحلة المخدرات والإدمان
وصلت إلى مرحلة ما في ادرك خلاص أي شي يعطوني اخذ مثل ما يقولن راحت علي
(- 21 - يا أيها الذين آمنوا لا تتبعوا خطوات الشيطان ومن يتبع خطوات الشيطان فإنه يأمر بالفحشاء والمنكر)*
عشان كذا أقول للشباب انتبهوا من الدخول , لانك إذا استسلمت لهم راح تغرق معهم , ترى هي بسيطة إذا جت على المخدرات بس , الأمور وصلت إلى شرف وعرض, لانه شي يجر شي .
كنت قاعد مع مروج فدخل واحد معاه طفل عمره سنتين وكان ناقصه 10 ريا لات , قال له المروج كمّل فلوسك , قال البيت بعيد والمبلغ صغير , قال رح كمل فلوسك , قال أنا تعبان , قال اجل روح جيب ضمان , قال يضمني يوسف , قلت لا والله أنا ما اضمن أحد شايفني مجنون , قال له المروج اجل خل الولد عندي إلى أن تجيب الفلوس. والله ترك الولد عندنا وراح جاب ال 10 ريال !! والله يا إخواني ترك ولده عندنا , وتم الولد عندنا يبكي فأخذ الولد وحطه في غرفة ثانية , والولد يصيح بابا بابا . من فيكم يحب الحياة هذي ؟؟؟ لذة نص ساعة!!
دور الأم
قعدت أتعاطى حشيش 5 سنوات , وأثنائها لاحظت أمي . والأمهات مساكين , وهذي رسالة للأمهات , الشي اللي ما تعرفونه لا تفتون فيه . فقالت يا ولدي أنت متغير.
قلت ايه والله أنا متغير , جابت الحل على طول المسكينة , قالت أنت مسحور!! .
وما خلت شيخ في الشرقية ولا في الإمارات إلا راحت له يقراء علي . ومرة ودتني عند شيخ في الخبر قال لها الولد محشش, قالت لا ؟؟!! ولدي مسحور .على وشو يا حسرة يسحروني ؟! ولكن الام مو راضية تعترف بغلطة ولدها . وقعدت اسحّب فيها والعب عليها , وهي خايفة أبوي يدري . يوم درت اني أتعاطى مخدرات , قالت شوف اثنين لا يدرون أبوك وجارتنا أم احمد , أم احمد أهم مني؟؟ قلت لها خلاص ما تبين أم احمد تدري ولا أبوي اجل بخّي . وقامت تعطيني 500 ورا 500, وهي لا حول لها ولا قوة مسكينة ما تدري أنها قاعدة تساعدني على التعاطي, وطبعا إذا ما أعطتني فظحتها . رحت في مرة من المرات إلى مجلس فيه شباب يتعاطون شي غريب , فقلت لهم أنا جاي ابي حشيش , قاموا يضحكون علي قالوا والله أنت قديم وين أنت عايش العالم الحين مايكل جاكسون وبوب مارلي , قلت لهم شلون؟ قالوا الحين العالم هيروين , قلت لهم هيروين هيروين جيبوا بس . فقعدت أعطيها هيروين 15 سنة . وكنت مثل القنبلة ما ادري متى انفجر ؟؟
وأمي المسكينة مازالت صابرة علي . بعض المرات اجيها صامخها حشيش و اقعد أتفلسف عليها , وبعض المرات اجيها ماخذ هيروين ويغمى علي وألقاها فوق رأسي تقراء علي تبي تطلع الجني اللي فيني . إلى أن ملّت منّي فحولت المعاملة إلى أختي.
دور الأخوان
جتني أختي الغرفة وإلا أنا ما ادري عن نفسي , قالت لها أمي يوسف يتعاطى مخدرات قالت يووووه لا أحد يدري بعدين ما أحد يخطبني . آخ كل واحد خايف على نفسه!! , واقعد مع أمي وأختي واشتغل لهم هاتوا فلوس ترى ما أحد يخطب بنتكم أفضحكم!! . أنا ما أنكر إن أهلي كانوا يساعدوني على التعاطي بس ما كنوا يدرون , عشان كذا أنا أقول حق كل أب و أم , إذا في يوم مجرد شكيت في ولدك الفاصل تحليل روح تأكد إذا يهمك حياته ترى والله راح يندمر البيت كله وإذا شفته يطلب فلوس بشكل غير طبيعي لا تمنع عنه الفلوس حتى تعرف السبب يمكن إذا منعته يسوي جريمة عشان يحصل على غرضه لان عبد المخدر والعياذ بالله مخلص له ومستعد يسوي أي شي يخطر عل بالكم عشان حبة .
أختي ملت وحولت المعاملة إلى اخوي , اخوي قال اووووه أهل زوجتي لا يدرون , أنا كيفت واحد ثالث طاح في المصيدة . قال وش تبي قالت ابي سيارة , وصاروا يعطوني اكثر قمت أتعاطى اكثر .
دور الأب
وصلت المعاملة عند أبوي , هم كانوا يتوقعون إذا عرف أبوي راح يذبحني . ولما راحوا يعلمون أبوي أنا كنت واقف فوق عشان إذا صار شي يمديني انحاش , فلما قالوا له قال يوووووه أهم شي أبو فهد لا يدري , قلت بل حتى أبوي معهم . كان الخجل الاجتماعي ذابحنا وهو اللي ساعدني أتعاطى اكثر . هذي رسالة إلى الأهل لا تحاولون تصيرون دكاترة , لا تساعدون ولدكم على الإدمان وانتو ما تدرون ,الحل تحليل .
حقوق المدمن؟!
وفي يوم من الأيام طلعت بفكره جديدة , قلت هنا في ديرتي ما يحترمون المدمن ليش ما أروح دولة ثانية أهاجر عشان يحترموني كمدمن (ابغى حقوق المدن ) , وين الدولة هذي تايلاند . رحت حق اخوي قلت له بهاجر , اخوي فرح وقال هذي 25 ألف بس رح اذلف عن وجهي و لا ترجع خلاص, صرت وصمة عار . فرحت تايلاند وبعد أربع أيام صادوني بتهمة الترويج , و طقوني طق , الى أن صرت ما اقدر امشي من الطق . من كثر الطق صرت أبول على نفسي . وحكموني 9 شهور سجن و حطوني في غرفة يمكن 10× 5 وكان فيها 100 سجين , 50 ينامون و50 يقعدون . ايش اللي جابرني؟؟! حريتي الشخصية أنا حر !!
قرار الزواج
ورجعت للسعودية ويوم رجعت أبوي وامي شافوا لي حل . و هذا الحل من حلول الخسرانين دائما . قالوا زوجوه يكن يعقل , المهم قاموا يخطبون لي .الحين الأهل يحسبون الناس ما تدري عني , عل فكرة أنا قعدة 20 سنة أقول ما أحد يدري ما أحد يدري , وفي الأخير لقيت العالم كله يدري و أنا الوحيد اللي ما يدري . والحين بعد ما تبت والحمد لله لما اقعد في مجلس مع جيرانّا وجماعتنا يذكروني بل الأيام الخوالي , فمرات كانوا يلقوني نايم عند باب البيت فطبعا أبوي يرقّع لهم يقول لهم ولدي فيه صرع , طبعا ما يقدر يقول اني سكران , و أحيانا أطيح عليهم في المجلس وقت الأكل فيسألون وشفيه, فيقول أبوي تراه مواصل ما نام البارحة .
فهم بفعلهم هذا كانوا يساعدوني عل التعاطي لان هم كانوا يرقعون لي , المهم قالوا زوجوه , فصار الزواج بالنسبة لي اصعب من التدوير على وظيفة , شايفين لما يقولون لك خل ملفك واحنا نتصل فيك . كلما دخلنا بيت قالوا والنعم فيكم ورحوا واحنا نكلمكم بعدين بالتلفون, وبعدين يصرفونا والله البنت تبي تدرس والشغلات هذي . فقلت لامي وجهك نحس علينا لا تروحين معنا مرة ثانية ( يعنى مو أنا الغلطان) . على العموم رحنا لقرية بعيدة بعد الرياض وخطبنا من هناك , كانوا الناس هناك على نيّاتهم , عمي سألني سؤال واحد بس !؟ ( أوريكم بساطتهم) . قال يا ولدي تشرب تتن؟ قالت لا يا عمي , قال زوجناك. مسكين ما يدري اني لاهف المخدرات كلها !, واسمع أبوي يقوله من البيت للعمل للمسجد , وامي تقول هذا احسن ولد عندي! .
زوجني يبغوني اعقل وما عقلت , إلا زاد الطين بله , الحين صار في مفتاح وغرفة بروحي وزوجتي عندي , فقمت أتعاطى قدامها قالت وش هذا قلت لها نسيت أقول لك عندي مرض مزمن وهذا علاجي . وحده قروية ما تعرف هالشغلات , ومشي الحال. قلت لها بيعي الذهب عشان أتعالج , وتقوم المسكينة تبيع الذهب و أخذت الفلوس ورحت الهند واستغلّيت المسكينة روحي كذا و روحي كذا وهي المسكينة ما تدري وش السالفة .
وقعدت في الهند في عشّة حتى الهندي الفقير ينام في مكان احسن مني , كنت أدق الإبرة مستخدمة 100 مرة والذبّان متكوم علي شي يقرف لكن كنت احسب إن هذي هي الحرية الشخصية!!؟؟ امحق حرية شخصية. مرة من المرات في الهند خلصت فلوسي وكان معي مبلغ بسيط وكنت جوعان مرة موصل حدي من الجوع والمبلغ اللي معي يدوب يكفي عشان مخدر فالمخدر طبعا أهم بالنسبة لي من الدنيا وما فيها , المهم وأنا في هذي الحالة كان في هندي بيده سندويش أكل منه لقمه وتركه في الأرض جيت طايرابي أخذه ويجي الله يعزكم ذاك الكلب المسرع وخطف السندويش قبلي . من فيكم يرضى لنفسه أو أحد من أهله هذي العيشة ؟؟!! يوم ابطيت في الهند أرسل أهلي واحد من الجماعة يدورني . كنت قاعد في شارع اسمه تاج محل شارع مشهور كل مرتاديه من الخليج وكان شكلي مقرف شعري طويل ووسخ .
المهم لقاني الرجال هناك فأخذني وداني الفندق عشان اتنظف ثم ارجع السعودية , شافني السكرتي اللي عند الباب قال لقريبي هذا ما يدخل الفندق كل الناس تدخل إلا هذا , قال ليش هذا اخوي , قال الحارس كلهم يقولون هذا اخوي الأشكال هذي تدخل الفندق يسرقون ثم يهربون . دخّلني قريبي بالقوة دخلت ارتحت شوي ثم حطّيت حبة للرجال و يوم نام سرقت فلوسه وهربت . ورجعت السعودية بعدين ,الحرمة مللت مني قالت أنت وش سالفتك؟ , قلت لها هذي مخدرات أخلصي انتهى الموضوع . فقعدت زوجتي وامي وأبوي يبون يشوفون حل , فقال أبوي حق زوجتي جيبي له ولد عشان يحس بالمسؤولية ويعقل. وهذا برضو حل من حلول الخسرانين دائما. شفت المشكلة شلون صارت!! فحملت زوجتي , وهي بالشهر الثامن كنت أتعاطى عند واحد يشتغل في وظيفة مرموقة وكنت أنا مثل العبد عنده , روح تعال جيب ود , وكله عشان أتعاطى . كبسة علينا الحكومة وكان معنا كمية كبيرة والأخ مرموق من أسرة محترمة , وأنا طبعا بالنسبة له مو محترم بس هو المحترم , وحنا في السوبر راحين إدارة المخدرات , قال لي تقفى وأنا أخوك شيلها عني جماعتي لو دروا بيذبوحني . وأنا جماعتي لو دروا وش راح يسون لي راح يصفقون لي ؟!
راح يذبحوني مثلك , قال افا أثرك منت رجال , ما ينشد فيك الظهر , عاد أنا من النوع اللي احب التحدي حرش تبلش , قلت ابشر اشيلها وأنا اضحك .
دخلت القسم وقاموا يطقوني طق احتفلوا فيني ذاك اليوم من الطق, وقال لي الظابط ترى والله أنها مو بلك قالت معصي لي , قال حرام عليك راح تروح فيها , قلت أقول لك لي اخلص , ودوني للشيخ فقال لي ترى والله مو لك , قلت يا شيخ تبيني اظلم غيري تراها لي , ( أنا شلتها عنه عشان لما اطلع من السجن يقولون عني رجال) شوفوا رجولة أخر زمن . دخلت السجن وفي يوم وقت الغدا قالوا لي تعال وقع ورقتك , 7 سنوات سجن من عمري ا هديتها حق واحد نذل , وطقطقتها يوم ورا يوم ولله ما شفت وجهه طول هذي المدة . وأنا في السجن بعد شهر من دخولي جاني اخوي وقال جاك ولد وش تبي تسميه قلت سمّه صالح , واشتغل قلبي على ولدي , ابي أشوفه , وقمت أقول حق نفسي لو اني ما طحت في ذي البلوى كان أنا عند ولدي . كان يمر علينا العيد ورمضان وكل مناسبة تشفونا نبكي مثل الأطفال , وبعد 7 سنوات و5 أيام طلعت , والمفروض أروح اشوف ولدي طبعا عمره صار 7 سنوات وقالوا له أبوك راح أمريكا يجيب لك شهادة , أول ما طلعت من باب السجن جاني الشيطان على طول قال تروح بيتكم وأنت صاحي !؟ ميصير روح حق الرجال اللي شلتها عنه يمكن يعطيك شي يمشي حالك . ومن باب السجن إلى بيت الرجال طقيت الباب طلع ولده قلت له وين أبوك قول له يوسف ينتظرك عند الباب , جاني بعد شوي قال أبوي نايم قلت افا روح قول له يوسف الصالح ينتظرك شلون نايم ميصير , ما طلع الرجال فسويت إزعاج عند الباب إلى أن طلع الرجال , قال أنت ما تستحي على وجهك طق الباب علي , أنت الحين شبهه أنت من أرباب السوابق , لا عاد اشوف وجهك عند بيتي .
وهذا نموذج من رفقت السؤ اللي كنا في يوم من الأيام نحترمهم اكثر من أهلنا ونعزهم اكثر من والدينا . وبعد ما طردني الرجال قلت ابروح اشوف ولدي , فرحت لاحد البقالات واتصلت على اخوي وقلت طلعت من السجن تعال خذني أنا في المكان الفلاني , وجاني ركبت معه ويوم وصلت البيت لقيت أطفال واجد عند الباب , يغنّون يقولون عمي جا عمي جا , كان صالح ولدي معهم لكن ما كنت اعرفه , وكنت خجلان من نفسي لاني ما اعرف ولدي , نزلت من السيارة و ما كان ودي انزل , كان ودي اسـأل اخوي منهو صالح, لكن اخوي حس قبل ما اسأله فوقف جنب صالح واشر لي عليه , ويوم جيت حظنته قال لي شلونك عمي قلت أنا مو عمك أنا بابا , قال بابا أنت وينك لا تروح عني بعيد مرة ثانية .
ولا تبت , هذا لكلام العصر بالليل أنا معطيها ! لان ما كان فيه نية صادقة . وهمت على وجهي وبعد 6 شهور دخلت السجن مرة ثانية لمدة سنة ونص , وصارت حياتي كلها جريات ومشاكل و قظيتها بين السجن والمستشفى , انعدم عندي الإحساس , والله يا إخواني إذا تبون تدعون على أحد ادعوا على تجار المخدرات , ما تتخيلون وش تسوي المخدرات في الإنسان والله ينقلب إلى حيوان على طول يصير مثل اللعبة بيد المروجين يضحي بأي شي عشان حبة, الدين يروح العرض والشرف يروح السمعة تروح ما يبقى لك شي ابد,عشان كذا لازم تدعون عليهم إذا تحبون عيالكم . دخلنا على مروج في يوم من الأيام فتحنا الباب لقينا واحد ساجد كنه قاعد يصلي , فقلت له يا عم سيد وشفيه فلان قال طفى مات وبكل برود يقولها , وجلسنا أنا واللي جاي معي ولا كأنه في شي , قال البياع أنا كم مرة قلت له لاتزود بس ما سمع كلامي ومات شفتوا شلون , وبكل بلاهة وبكل تبلد قلت للبياع عندك شي قال ما عندي إلا حق هذا , يقصد حق الميت , قلنا والله ما في غير ذا قال والله , قلنا جيبه( يعني بالعقل واحد استخدمه ومات لو مجنون تعرضه عليه ما خذه) . ويقعد المجنون عندنا إلى بكره الظهر , ولا فيه أي إحساس بغير المخدر .
وأنا عندي اللي يتنازل عن دينه يتنازل عن كل شي , تنازلت عن أشياء كثيرة بلا حد وفي أشياء ما اقدر اذكرها لكم , صار عندنا قانون جديد كل شي يهون في سبيل المخدر .
طبعا إذا ما كنت صاحب سوابق وكنت مجرم المروجين ما راح يدخلونك معهم , يعني لازم تكون مسوي لك بلوى عشان تدخل معهم , والله المخدرات مثل السحر والمروجين مثل الشياطين يدخلونك عالم رهيب تنسى فيه الأخلاق والكرامة حتى تنسى انك إنسان .
في مرة مروج طق باب بيتنا فطلع له أبوي وطرده , فقام المروج وكلمني بالتليفون , قال أبوك طردني من بيتكم , رحت حق أبوي زعلان قلت له ليش تطرد صديقي , قال يا ولدي هذا راح يدمرك قال هذا مو برجال قلت أنت اللي مو برجال!! , وقام يبكي , عشا ن ايش عشان مروج في يوم من الأيام رماني في السجن , عالم غريب؟؟ يمكن في بعض الشباب اللي يسمعوني يقولن والله يا ولد الصالح أنا غير , وأنا ما وداني في داهية إلا كلمة أنا غير , طيب يعني شلون أنت غير قال ؟! قال أنا ما أتعاطى إلا في المناسبات أنا أذكى منك أنا أتعاطى بمزاج , أقول له ترى هذي حفرة اللي يوقف على حافتها لابد يطيح فيها يوم من الأيام وبدايتها مزاج إلى أن تصير عبد عندها, بكرة يصير كل يوم عندك مناسبة , أنا قعدت 20 سنة ابي أسيطر على المخدرات ما قدرت. كنت مرة احشش عند واحد فجاني تلفون قالوا زوجتك قاعدة تولد الولد الثاني في مستشفى سلمان في الرياض , رحت المستشفى وإلا في واحد شايب قاعد فقعدت جنبه , ابغى اعرف زوجتي وش جابت فقمت أروح و اجي قدام الشايب والظاهر اني أذيته , فمسكني من ثوبي , قال يا ابن الحلال اركد وش فيك قلت له زوجتي بتولد و ابي اعرف ولد أو بنت , ( قال إذا انت مرضي والديك بيرضيك ولد أو بنت ) . انتهى الموضوع , شفتوا الرسالة !! بكلمته هذي فككها من رأسي , فقلت أنت وش تقول يا عمي ؟ قال أنت مرضي والديك , قلت آووه ما يحتاج حججتهم على ظهري , قال خلاص يبي يرضيك . و ساءت حياتي اكثر و اكثر , وكلما جيت ابي اطلع من المشكلة هذي ألقى نفسي يا في مستشفى أو سجن , ليش؟؟ بسبب حبة صغيرة !!حبة سوت فيني كل هذا .
في رمضان الناس يفطرون على تمر وأنا افطر هيروين , أعطيتها في يوم زيادة فأغمي علي , الشباب اللي معي يحسبوني مت , فقالوا مات فلا ن ( طبعا المدمنين كل واحد فيهم له كنية , مستحيل يعطيك اسمه الصحيح ) الربع احتاروا ما يدرون وش يسوّن فيني , فكروا شوي ثم خذوني وقطّوني في درام الزبالة الكبير! , المفروض يودوني المستشفى , لا وهذول بعد اعز الناس عندي , سووا فيني كذا!! . وتكرمون الزبالة عامرة في رمضان , فتحت عيني و اشوف شي اسود وابيض و أشم تكرمون ريحة خايسة قلت أعوذ بالله لا يكون هذي اخرتي لا يكون أنا في القبر , اللي ياخذ جرعة زايدة ( اوفر دوز ) يصير فيه شلل مؤقت ما يقدر يحرك أطرافه بسرعة فأول ما قدرت أحرك يدي حطيتها في جيبي وإلا مافيه شي على طول قلت بس سرقوني! , حتى ما قلت رموني في الزبالة , يوم طلعت منها كان المؤذن يأذن لصلاة الفجر, كان بإمكاني أروح اصلي مع المسلمين لكن أنا فضلت الشياطين . رجعت لهم و طقيت عليهم الباب أول شي قلت لهم ليش سرقتوني؟ بدل ما أقول ليش رميتوني؟!! .
قالوا ما سرقناك هذي مخدراتك موجودة عندنا بس حنا كنا خايفين عليك . المهم قعدت أتعاطى معهم , الله اكبر بدون إحساس يرموني في الزبالة وارجع لهم .
كنت لما اخذ جرعة زايدة و أنجو منها أقول هذا بسبب قوتي , وإذا نجيت من كبسة أقول هذا بسبب ذكائي أنسى إن فيه رب هو اللي ينجيني برحمته ويلطف فيني .
ماذا تفعل المخدرات بصاحبها؟ّّ!
أنا من الناس اللي ما يعرف يسافر بدون حبوب لازم اقظّم قبل أسافر , وكان عندي سفرة ذاك اليوم للرياض , كنت في الدمام الساعة 12 الظهر كلّمت واحد في رحيمة قلت له ابغى حبوب أنا ابي أسافر الرياض , قال تعال ويصير خير , رحت له من الدمام إلى راس تنورة أو رحيمة, اللي ما يعرفون الشرقية المسافة تقريبا 45 كم خلونا نقول الخط اخذ معي ساعة , المهم يوم وصلت بيته قالوا الرجال عنده دوام أول ليل شغال في سابك , وأطلع له من راس تنورة إلى الجبيل الصناعية , ويوم وصلت عند بوابة الشركة , جاني وقال وينك تأخرت بعت كل اللي عندي لكن تدري شلون روح الثقبة , الثقبة تبعد عن الجبيل 120 كم تقريبا , قال تلقى واحد هناك راعي وانيت أعطاني مواصفاته قول له أنا جايّك من طرف فلان ويعطيك اللي تبي . وصلت الثقبة الساعة 6 المغرب , واقعد إلى الساعة 12 بالليل انتظر الرجال! . يمديني رحت الرياض ورجعت , لكن وين العقل المخدرات تمسح العقل , وأنا كان عندي اعتقاد اني مستحيل امسك خط بدون حبوب . الناس يقرون دعاء السفر وحنا ندف حبوب؟!! كان الواحد فينا دايم معطيها عشان ا ذا مات ما يدري عن شي .
من فيكم يبي الحياة هذي؟؟؟ نهايتها صرت أدور في الشوارع مثل المجنون علي سروال و فنيلة , وسخ وحافي لوعظني كلب يموت وامشي ما ادري وين رايح!! شافتني دورية فقاموا يلحقوني , هربت منهم عشان لا يحرموني من المخدر !! . أنا كنت لما اهرب من الدورية مو عشان خايف من السجن , أنا خايف يحرموني من حبيبي المخدر!!؟
لقيت سيارة اندسيت تحتها عشان ما يشفوني , يوم صرت تحت السيارة رفعت رأسي فطق بالشكمان , وإلا في كلب قاعد جنبي , حتى الكلب تفاجأ فيني فانقرف مني وراح بعيد , ناديته قلت له تعال يا كلب منهو المفروض يلحقونه الناس أنا أو أنت ( هذي القصة الله يكرمكم بس عشان تعرفون وش تسوي المخدرات في الإنسان ), تخيلوا حتى الكلب مو راضي يقعد معي , من فيكم وده بالحياة هذي ؟؟
عاقبة عقوق الوالدين
والله يا إخواني في مشهدين ما أنساهم طول حياتي , وأسأل الله يغفر لي.
المشهد الأول: كنت أنا متأثر بواحد اسمه بوب مارلي , والله ما ادري وش يقول بس مع الخيل , فكنت لابس فنيلة عليها صورته , ولابس شورت . كانت الوقت قبل صلاة الظهر في رمضان , وكان بيدي كولا و سندويش جبن , وأنا نازل للصالة لقيت أمي قاعدة تقراء قرأن , تركت القران و جتني تركض قالت يا ولدي ترى حنا في رمضان , قلت لها ادري حنا في رمضان خير وش المشكلة , رمضان لك و لأشكالك مو لي أنا , قالت يا ولدي اتقي الله , الله يرحم و الديك لا تطلع في الشارع بعد شوي يأذن الظهر و يشوفونك الجيران , قلت لها وخري عني و طلعت من باب الصالة إلى باب الشارع , فطارت علي مثل السوبرمان المسكينة ما تبيني اطلع في الشارع عشان الجيران ما يشوفوني , وهي جايّة تركض دفيتها , طاحت المسكينة على رأسها و لا قدرت تقوم , سمعتها تقول روح الله لا يوفقك .
تخيل أم صايمة و مظلومة وتدعي على ولدها !!, شوفوا ربي وش سوى فيني , أول ما طلعت من البيت حوالي 100 متر ما لقيت نفسي إلا رأسي تحت ورجولي فوق وناس تطقني في كل مكان , هم الصراحة 3 بس طقوني طق 100 , و حطوني في السيارة ثم ودوني مكافحة المخدرات , أنا من غبائي كنت أظن أن أمي هي اللي مبلغه عني , يقول لي الظابط والله حنا مو جايين عشانك إحنا جايين عشان واحد ثاني بس ما ادري وش اللي جابك بين أيدينا , قلت بس هذي دعوة أمي وصلت .
في قصة ثانية صارت لي بعد ما تبت بفترة بسيطة , اتصل علي ظابط من المكافحة وقال لي ترى في واحد من شللتكم القديمة مات , وأبوه مو راضي يدفنه حاولنا فيه يستلمه رفض, الجثة الحين في المستشفى فنبيك تتصرف بالموضوع , قلت إن شاء الله , كلمت واحد من الربع وعلمته السالفة , فرحت أنا معه لمسجد الشيخ عيسى في الدمام نبغى إسعاف تشيله ما لقينا إسعاف فقال الرجال اللي معي أنا بجيب الجمس حق أبوي ونشيله فيه , أخذنا الجمس ورحنا مستشفى المركزي بالدمام , دخلنا بالجمس الى الثلاجة , فتح لنا الهندي الباب فقلت له وين جثة فلان , قال هذا نفر واجد مشكل, قلت هذا ميت شلون في مشكل؟ قال روح داخل شوف دخلنا داخل سحبت الجثة من الثلاجة , طلعت منها ريحة كريهة جدا والله ما شميت مثلها في حياتي , أتوقع هذي الريحة مو من الأرض , يوم كشفت وجهه, شافه اللي معي فخاف منه , منظر أعوذ بالله منه شي يروع, قال هذا مو خاوينا قلت إلا هو اعرفه, وجهه صاير لونه غريب لا هو اسود ولا رصاصي لون غريب ! خشمه طويل وآذانه طويلة تقول أعوذ بالله كأنه شيطان ! المهم شلناه ووديناه مسجد الشيخ عيسى عشان نغسله , المغسلين في المسجد ما قدروا يتحملون ريحته و قالوا إحنا ما راح نغسله غسلوه انتو أو طلعوه بره, فغسلته أنا وصديقي , والريحة تصرع , يوم لمسنا جلده قام يتحرك مثل الورقة اللي طايحة في الماء , ويطلع من دبره ريحة شوي والله يا جماعة ريحة شوي, كفنناه ثم وديناه المقبرة , يوم جينا نحطه في القبر والله يا أخواني انه صار ثقيل مرة إحنا أربعة مو قادرين نحرك الجثة , سحبنا الجثة سحب والله انشق الكفن ولا تحركت.
يوم خلصنا منه رحت حق أبوه, يوم شافني طردني من البيت , قلت له يا عمي أنا تبت خلاص وهذي قصتي , فقال وش عندك جاي , فقلت له أنا جاي اسأل عن ولدك ليش وجهه كذا ؟؟ قال هذا في مرة من المرات تفل في وجهي!! فدعيت الله يقلب وجهه وجه شيطان . فقلت له يا عمي ليش جلده كذا ؟ قال هذا يا ولدي مرة من المرات كان يكب على نفسه خمر ( يتسبح بخمر!!) أما ريحة الشوي فكان والعياذ بالله يمارس الفاحشة..
اللهم انّا نسألك حسن الخاتمة . أسألكم بالله من فيكم وده تكون هذي نهايته ؟؟!! أخواني احمدوا الله أنكم الى الآن أحياء , اللي يسمع مثل هذي القصص ولا يتوب ولا يتأثر , هذا والعياذ بالله لا زم يخاف على نفسه , لأن قلبه ميت , اللي عاق لوالديه ترى يمديه الحين يروح ويراضيهم , والله إذا مات أحد والديك وهو عليك زعلان يا ويلك من الله , اغتنموا الفرصة طول ما انتو بصحة وعافية , والله ما يضيع هذي الفرصة إلا واحد غبي ..
المشهد الثاني اللي برضو ما أنساه طول حياتي , كنت قاعد عند بقالة أنا مع واحد من الشباب , وترى يا جماعة أنا اعترف لكم عشان ارتاح بس , المهم يوم كنّا عند البقالة مرّت علينا بنت عمرها حوالي 8 سنوات , كانت لابسة ذهب , وحنا كنّا محتاجين فلوس نشتري مخدرات , صديقي يوم شافها قال ها وش رايك قلت عليها , قام مسكها لي وأنا قمت أخذ الذهب من يدها , البنت قامت تصيح و قالت لي لا تاخذه حرام عليك أنا أبوي ميت ما عندي أحد يجب لي غيره . البنت هذي صرت اشوف صورتها في خيالي بالليل والنهار ما تغيب عن بالي . شريت المخدر , و تعاطيناه , صديقي مات وأنا رحت السجن .
كنّا نحسب هذا اللي كنّا نسويه شي عادي نسينا إن فيه شي اسمه دعوة المظلوم نسينا إن فيه رب ينتقم من الظالمين . وصلنا الى مرحلة حتى الدين استغليناه عشان نوصل للمخدر وصلنا الى مرحلة لأن مقامكم عزيز عندي ما اقدر اذكرها لكم.
بعض الموقف مع الأهل
في مرة من المرات طلعت من غرفتي وكنت مفلس نزلت الصالة ولقت أهلي كلهم مجتمعين وكانوا يضحكون مبسوطين , جيت وطلبت منهم فلوس ما أحد فيهم أعطاني وجه , طلعت من البيت معصّب , رحت حق واحد من الربع فقلت له السالفة قال تبي تنتقم منهم ؟ قلت ايه ليش يضحكون و لا يعطوني فلوس . قال بس عندي ( كان لي أخو يشتغل في الجبيل ) فصديقي كلّم أهلي في التليفون وقال لهم ولدكم فلان صار له حادث على خط الجبيل تعالوا استلموا جثته من الثلاجة.. قال الحين روح البيت , روح اضحك عليهم , رحت البيت لقيت حالتهم حالة اللي يبكي واللي مغمى عليه ..
أنا كنت ما لي شغل بأهلي ابد ولا ادري عنهم شي ابد كني عايش بفندق , المهم فيه مرة من المرات جانا واحد من حقين التعداد السكاني , أنا كنت احسبه مباحث , فقعدت اتهاوش أنا معاه عند الباب , جانا اخوي الكبير على صوت الإزعاج , قال شفيك قلت شوف هذا اللي عند الباب مدري وش يبي, الرجال طلع البطاقة حقته فأخوي دخّل الرجال المجلس وقعدت أنا معهم , فسأل أخوي قال كم عدد أفراد العائلة ( حنا كنّا 8 في البيت ) اخوي قاله حنا سبعة , أنا اأشر حق اخوي بأصابعي أقوله حنا ثمانية , فأخوي كان مطنّشني و مصر على إن حنا سبعة, يوم طلع الرجال حق التعداد قلت له ليش قلت له سبعة و حنا ثمانية , قالت أنت مو محسوب من العائلة , أنت يا في السجن يا في المستشفى يا في الشارع ويمكن في أي لحظة تودع من المخدرات خسارة نحسبك من العائلة ..
اخوي هذا كنت مشيب رأسه , يوم من الأيام مسكوني الشرطة بقظية سرقة , ونادوا اخوي عشان يجي يكفلني , ويوم جا يطلعني من التوقيف قلت للظابط هذا اللي ساعدني في السرقة , قال الظابط هذا شكله محترم , قلت لا يغرك شكله هذا هو امسكوه , فبت أنا واخوي ذيك الليلة في التوقيف ...
كان عندي ملف حق الرخصة يوم كانت قيمتها 500 ريال , كانت أمي الله يرحمها تخاف من الشرطة , وإذا ركبت معي في السيارة كنت امر من عند نقاط التفتيش متعمد عشان أخوفها زيادة , فقلت لها لازم اطلّع رخصة عشان ما يمسكوني الشرطة أعطيني 500 ريال , و كل شوي وأنا جايها ترى ظاعت الرخصة أعطيني 500 و اوريها الملف طلعت آلاف من هذا الملف ..
قصة الهداية
طبعا كانت طويلة , وكانت بعد الله سبحانه وتعالى على يد الأشخاص اللي هربت منهم في البداية , اللي هم أهل الخير (اللي كنّا نسمّيهم المطاوعة المعقدين!!) الله يجزاهم كل خير, بعد 20 سنة هداني الله على يد واحد منهم كان متطوع للعمل الدعوي , فكان يزورني في السجن و كان يزورني في المستشفى و كنت اكرهه كره العمى , ومن يدخل عندي في العنبر اقلبه فوق تحت , و من يجي المستشفى اقعد اجننه إلا أن يطلع , كان مشا الله عليه صابر علي الى أقصى حد . كان دايم يقول لي آية كانت هذي الآية تنرفزني كثير ( وما خلقت اجن والأنس إلا ليعبدون) . في الأخير مسكته قلت له أنت وش تبي قال أنت فيك خير , قلت بس مو بلك , مع المشادّات والأخذ والعطى أعطاني الرجال فرصة و الحمد لله , ما زال الرجل معي لكن ما أحب اذكر اسمه , لأنه عمل هذا العمل لوجه الله سبحانه وتعالى , وما زال يساعد مدمنين كثير . بعد 6 شهور قابلت اللواء سلطان الحارثي مدير مكافحة المخدرات , فقلت له عن مشكلتي و ماكان مصدق اني كنت مدمن لأني تغيرت , وبعدين عمل لي موعد مع الأمير فيصل بن فهد رحمة الله عليه , فرحت له و قلت له في دراسة عن علاج الإدمان في أمريكا ودي ادرس فيها , قال اثبت نفسك لمدة سنة أول شي , الحمد لله اثبت نفسي و رحت أمريكا درست هناك 4 سنوات . أنا الآن أخصائي علاج إدمان في مستشفى الأمل في الدمام, عندي شهادتين واحدة شهادة خبرة من الحياة 20 سنة والثانية من جامعة مني سوتا في أمريكا.
بعض المواقف بعد التوبة
في مرة من المرات نظّمنا رحلة للبعض المدمنين التائبين الى مكة , كان معي واحد منهم ويوم دخلنا الحرم وشاف الكعبة جاته حالة غريبة وقام يبكي قلت شفيك تبكي قال هذي أول مرة اشوف الكعبة في حياتي!!؟؟ , الرجال عمره 40 سنة , فقلت له أنت كنت تسولف لي عن زياراتك لمكة قبل وحنا في الطريق شلون أول مرة تشوف الكعبة ؟ قال أنا جيت مكة مرات كثيرة بس ما عمري دخلت الحرم كنت اجي عشان المخدرات بس وارجع ديرتي مرة ثانية!!!!.
كان في واحد يبيع مساويك عند الحرم اسمه عم صدقة , هذا عم صدقة جاه مرض خطير فقطعوا رجله ثم رجله الثانية ثم قطعوا يده , فجيته في مرة من المرات وهو باسط عند الحرم قلت له يا عم صدقة منت ناوي تتوب الحرم قدامك بينك وبينه خطوتين وجسمك قطّعوه . قال والله لو يقطّعوني حتت ما تركت المخدرات !! .
و في الختام
هذي رسالة أتمنى توصلونها الى كل من تعرفونه , اللي محتاج مساعدة يكلمني عشان ارتاح و أساعد الناس الله يرحم والديكم .
يوسف الصالح ( مستشفى الأمل في الدمام ) ....
رشــــــــــا @rsha_14
محررة
يلزم عليك تسجيل الدخول أولًا لكتابة تعليق.
دن دانه
•
جزاك الله الف حير
وإيـــــــاك يالغلا
نووووورتي موضـــوعـــــــي عـــسولــــــــــه
فدييييييييييييتك قلبووووووووووو
نووووورتي موضـــوعـــــــي عـــسولــــــــــه
فدييييييييييييتك قلبووووووووووو
الصفحة الأخيرة