قصتى مع العجوز في مركز الغسل الكلى

الحمد لله الكريم الحمد لله رب العالمين الصراحة يااخواتي انا ماعندي اسلوب في الكلام بدخل في الموضوع على طول سبحان الله كانت حياتي شبة دائم اتسخط واقول ليش حياتي كذا ليش حياتي كذا واحيان اتوب واحيان اذنب وارجع المهم .............في رمضان هذا امي بدأت غسيل الكلى الله يشفيها يارب ومرضى المسلميين المهم وانا هناك كنت دائم اشوف عجوز تسلم علينا وتسألنا عن احوالنا كانت عمياء ومقعدة على كرسي وتغسل الكلى وكان معها شغالة اندنوسية والله يابنات لو هي بنتها ماتعتني فيها كذا ودائم تقول امي ماشاء على ذا الشغالة المهم جلسنا معها في رمضان بالأستراحة تبعت الوحدة وجلسنا نسولف مع الشغالة كانت الطامة ...................؟؟؟؟
تقول الشغالة ان العجوز ماعندها غير بنتيين متزوجات ولا يزورون امهم ولا يجونها وفعلا يابنات عمرنا ماشفناهم يجونها بالغسيل وكمان تقول زوجها متوفى من زمان وانا وماما بس في البيت راتب انا 800 الحمد لله انا بس ابغى ربي يرضى عليه علشان ماما المهم تقول كمان احنا ساكنيين جنب المستشفى في غرفتيين اجار قلنا من يجيبكم قالت ادق على سواق باكستاني يشتغل قي البقالة يجي يودينا ويجيبنا ويأخذ من في الشهر 100 ريال والله يابنات عمرنا ما انتبهنا لبس العجوز مرة والشغالة نفس الشئ لبسها الله لا يوريكم المهم انا ماصدقت قلت لازم اراقب العجوز اذا طلعت واول ماطلعت العجوز جلست عند الباب اراقبها وهي جالسة على الكرسي المتحرك دقت الشغالة على الباكستاني وجلسوا ينتظرون المهم جات وحدة من الممرضات وسألتها كيف ماما ردت العجوز رد يا بنات زلزلني والله
قالت الحمد لله الله كريم الله كريم يابنتي والله يابنات ترقق الدمع في عيني سبحان الله عجوز عمياء مقعدة تغسل الكلى ماعندها غير بنتببن وعاقات فيها والحالة المعيشية اكيد صعبة وفوق هذا كيف ثقتها في الله وكيف حمدها لله واحنا كل شئ عندنا من صحة وشباب ومال وفوق هذا نتسخط ونتبرم الله المستعان
المهم شوي وجاء الباكستاني ونزل ونزلها يابنات لين دخلها السيارة وعرفت من البنات كمان ان الشغالة مطلقة وعندها ولد وبنت صغار قلت سبحان الذي سخرهم لهذى العجوز سبحان الله