قصتي..فقدت كل شئ بسبب العيــن..!!

بسم الله الرحمن الرحيم

أول شئ يابنات اقولكم اني أحبكم في الله
ودائما اقرأ مشاكلكم وادعوو لكم لاني ماكنت اقدر اشارك معكم لاني غير مسجله
وأن شاءالله نكون هنا عون لبعض لذلك حبيت اكتب لكم تجربتي من العين
مشان تاخذوا العظة والعبرة وتقرأو أذكاركم وتحصنوو انفسكم بالادعية
والله يابنات اللي صار لي بسبب العين مو بسيط أبدا...

- بداية العين معي منذ زمان وكأي بنت صغيرة ماتعرف الاذكار ولا الادعية
كنت اتكشخ في المناسبات ولبسي كله ماركات والله فجأه يابنات صرت أكره اللبس
الجديد ومااحب اروح للعزائم والحفلات مع أمي مع اني صغيرة واللي بمثل عمري
يحبون الطلعات والجيات وانا بس اذا لبست احس بضيقة شديدة ...
كل هذا وأمي ماتدري وش اللي صابني لانا كنا نجهل بأمور العين جدا..

أذكر لما كان عمري 12 سنة حضرت زواج لاحد أقاربي وكنت لابسه فستان غالي
وشعري كان قريب ويوصل لحد ركبتي وكثيف وطويل وجسمي حلوو
والله يابنات لازلت اتذكر نظرات الناس لي يعني سبحان الله بعض الناس تحسين
بياكلك من عيونه والحسد اللي فيه..

اللي صار اني انخطبت بالزواج هذا مع ان عمري 12 سنة وحدة جت لامي وقالت
اني حاجزة بنتك لولدي وننتظرها لحد ماتكبر شوي..أنا سمعت طرف السالفة
ورجعت للبيت حسيت بضيقة شديدة وقفلت على نفسي وبكيت..
كنت صغيرة حتى ان الخطبة ضايقتني يعني ليش أنا بالذات وكانوو بنات قرايبي
بمثل عمري كنت اسئل نفسي ليش ماانخطبوو ليش بس انا وتضايقت من الموضوع هذا..

من بعد السالفة هذي يابنات يعني قرايبنا عرفوا بالموضوع وصار يحسدوني الحريم
والله يابنات الحين صار عمري 20 وماانخطبت وبنات قرايبي كلهم انخطبوو وراح يتزوجون..

كل هذا ماهمني لاني ماني حسودة لان هذا الشئ انكتب لنا قبل نوجد على وجه الارض
بس أقولكم اضرار العين واللي مايقرأ الاذكار
يتعرض لعيون الانس والجن ...

عندي قصص كثيرة حصلت لي بسبب العين بس ابي اختصر لكم

المهم يابنات بذيك الفترة تساقط شعري وتقصف حتى وصل لحد اكتافي (حسبي الله ونعم الوكيل) بدأت تظهر علي اعراض العين الحقيقية ومن مرض في مرض
والله يابنات قبل كانت صحتي جيدة وتمر سنة كاملة مااغيب عن المدرسة
وبعد العين كله غياب ومااحضر الا قليل...

مرت السنين وصلت للثانوية أصبت بعين بعد في بشرتي وكان من وحدة من قريباتي
دائم تقولي وش تحطين على بشرتك وناشبه لي في حلقي مع اني مااحط شئ
كذا خلقه من الله كانت بشرتي صافية وبيضاء والله يابنات بعد كلامها بيوم
طلعنا في الشمس بالمدرسة واحترقت بشرتي يعني صارت سمرا شوي :icon33:


كل هذا بصوب واللي حصل لي بسبب دراستي بصوب والله ماامدح نفسي
كنت متفوقه ودخلت علمي واجيب أمتياز اللي حصل يابنات اني صرت اكره الدراسة
بس اجاهد نفسي واذا جت الاختبارات تجيني ضيقة شديدة مااقدر اذاكر
هذا الشئ حصل لي في أول جامعة لاني الوحيدة في العائلة اللي دخلت (علوم طبية)
وكانوو الناس مفتحين عيونهم علي واللي زادها قرايبي عيونهم حاره جدا

اللي حصل يابنات اني صرت ارسب وانطردت من الكلية الطبية والحين جالسة في البيت لا شغل ولا مشغله كله بسبب العين حسبي الله ونعم الوكيل..

أكيد اللي يقرأ كلامي يقول عندي فوبيا من العين بس والله يابنات هذا اللي حصل
والمخبر ليس كالمعاين حتى وجهي صار اصفر وشاحب وكل من يشوفوني يعرف اني مصابة بعين..
حتى لما رحت عند شيخ قال لي عندك عين قوية بس ما استمريت أعالج عنده بالقرآن
لان ماقدرت استمر عنده ماعندي أحد يداومي معي عند الشيخ..

الان بدأت استفيد من اللي صار لي وودي أعالج نفسي بالقرآن من العين
يعني اسوي لي برنامج أنا واللي مثل حالتي ونتساعد حتى يكتب لنا الله الشفاء
أنا مرت علي لحظات والله مثل الجحيم ضيقة صدر غير كذا
يعني وجدت نفسي فجأه فقدت كل شئ حلوو فيني بسبب العين والحسد اللي تعرضت له
وكل هذا له معكوس على نفسي..



اللي قرأ قصتي يدعوو لي بالشفاء والتوفيق في حياتي والحمدلله على كل حال..

اللي حصل لها شئ بسبب العين تشاركنا أو نصائح...

واللي ودها نتساعد على برنامج معين
للشفاء من العين تشاركني انا عندي خلفية عن كل شئ بالعين لاني صرت اقرأ
كتب وتعلمت كثير بالشأن هذا لكن سبحان الله إلى الان مابدأت بداية جادة في العلاج
وأنا راح ابدأ من اليوم ان شاء الله والتوفيق من الله

لكن لاتبخلوو علي من دعواتكم ان الله يشفيني من العين وارجع مثل ماكنت
رب دعوة صادقة من احداكن تسبب في شفاءي من هذا المرض اللي عانيت
منه خلال عشر سنوات..


أختكم \ لمــار :26: