قصتي

بسم الله الرحمن الرحيم

يا خواتي العزيزات قبل ست سنوات رزقني الله بطفل . وبعد سنة حملت مرة ثانية ولكن الحمل ما كمل ثلاثة اشهر واسلبت
:44: قبل لا اسلب نصحوني حريم كثير بأن اتريث ولا اذهب للمستشفى لعمل التنظيف لأن التنظيف اذا كان مو زين راح يكون له اضرار مستقبلية .. انا ما سمعت كلامهم ورحت للمستشفى بمجرد نزول الدم علي ، وعملولي تنظيف . ومن ذيك اليوم ماعاد انتظمت دورتي وصارت تجي خفيفة جدا ومتلخبطة في التواريخ بشكل ملحوظ .
رحت لدكتورة وعلطول قالت لي لازم تاخذي كلوميد وابر تفجير :( قمت علطول نفذت المطلوب وانتم عارفين الكلوميد وقرف الكلوميد صداع والم في كل الجسم وعصبية . تحملت وصبرت وبعد ثلاث دورات متتالية طلع مافي فايدة . قالت لي الدكتورة لازم ترتاحي فترة بعدين ترجعي مرة ثانية . المهم تركتها ورحت لدكتور وصفوه لي بعض قريباتي وقالي لازم تاخذي هرمونات :44: قلت مافي مشكلة وبدينا معاه العلاج بالهرمونات وطلع ايضا مافي فايدة ... بعدها رحت لدكتورة ثالثة وقالت لي عندك قرحة في الرحم ولازم تسوي عملية كي . قلت يالللله وش عاد الواحد بيخسر اكثر مما خسر . برضوا مافي فايدة . رحت بعدها لدكتورة رابعة قالت لي لازم تروحين لدكتورة باطنة :mad: قلتلها وش دخل الباطنة في الحمل ؟؟؟ قالت علشان نتأكد من البطن انه سليم المهم ونروح لها وهاتك يا تحاليل شاملة كاملة والنتايج سليمة ومافي فايدة . المهم زوجي قرف من فتاوى الدكاترة وقال خلينا نروح للشيوخ يمكن علينا شي واتجهنا للشيخ الاول و الشيخ الثاني والشيخ الثالث وكل واحد منهم يقول كلام . واحد يقول عليكم سحر . والثاني يقول عليكم رصد . والثالث يقول عين شيطانية .... المشكلة كلهم يوم يقرون علينا ما تظهر اي علامة ظاهرة لدرجة ان واحد منهم قال والله ما ادري وش اقول . لكن خذو هالدوا وكل شيخ يصرف رشته ادوية وحنا ما نقول غير حاضر مرحبا . المهم يوم عجزنا قلت لزوجي خلنا نروح للدايات ونرجع للطب الشعبي . صراحة زوجي كان متخوف من الدايات وكلامهم . وبعد جهد جهيد وافق وبدينا مشوارنا مع الدايات . اول وحدة قالت لي رحمك مقلوب ومستحيل تحملي قلت لها طيب عدليه قالت لازم تتعالجي لمدة 3 شهور وهاتك يا تمريخ ودعك وكل جلسة بفلوس . ومافي فايدة
الممرخة الثانية قالت لي عندك التصاقات والرحم نازل قلت لها ارفعيه ... صراحة انا كنت خلاص قرفانة حتى من حياتي ولو قالت لي الممرخة اي شي بقلها صادقة . ومافي فايدة
الممرخة الثالثة هي الي ضحكتني . حرمة كبيرة في السن من جنسية عربية اذا جت الوحدة عندها قالت لها اسجدي للصلاة وتمسح ايدها بس على الظهر ( تقولين سونار ماشالله ) وبعدين تعطيك نتيجة الكشف . قالت لي رحمك مايل . قلت طيب والمطلوب ؟ قالت لازم تداومين عندي كل شهر 10 ايام وبعدين لازم تاكلين الخلطة الفلانية وزوجك لازم له خلطة . قلتلها طيب اعطيناها وحنا نسويها قالت لا انتو جيبو المواد وانا اسويها وقيمة العلبة الوحدة 300 ريال لك و300 لزوجك . وبعد هذا كله طلع مافي فايدة . الي محيرني ان الحريم عندها طوابير ويوم اسألهم يقولون ما شفنا منها فايدة !!! لكن كلنا معلقين بقشة الأمل وكله على الله
اخر شي وصفولي دكتور رحت عنده وقالي لازم تسوين تحاليل قيمتها 2500 وسويناها انا وزوجي وطلع مافي شي !!!
قال لازم تسوين اشعة صبغة . سويتها ويوم شافها قال الحين بان السبب :29: خير يا دكتور (( قال عندك القناة اليمنى فيها انتفاخ والقناة اليسرى طالعة فوق شوي )):44: والمنشطات ما راح تنفع معك ماينفع الا عملية منظار :44: مع العلم بأنك لن تستفيدى من القناة اليمنى بعد اليوم وعملية المنظار فقط للقناة اليسرى ...

والله والله والله رحلة ست سنوات مليانة تعب وهموم ما يعلم بها الا الله وخساير عالية وما ادري الحين اش اسوي . تمنيت منكم يا خواتي الدعوة يمكن الله سبحانه وتعالى يستجيب لدعوة وحدة منكن . والي عندها حل لحالتي تفيدني .

اسفة على الاطالة