
ياسمين @jasjas
عضوة جديدة
قصتي
اول مرا بحياتي اقرر اني اكتب قصتي او اني افضفض لاحد بما اني كتومه قررت اني اكتب قصتي هنا عشان محد يعرفني اكتبها وامشي اهم شي اشيل الحمل الي بصدري انا تزوجت صغيرة عمري ١٣ سنة طبعا اهلي زوجوني لقريبي الي يكبرني ١٣ سنة كنت طفلة صغيرة مجتهدة بدراستي كنت دائما قبل انام اجلس اتخيل اذا كملت دراستي ووش بكون يوميا قبل انام لازم اجلس اتخيل حياتي المستقبليه كيف بتكون كنت بنت خياليه وحالمه وحساسة كنت دائما اشوف خواتي المتزوجات يشكن ازواجهن وجبروتهم وكثثييير من الاوقات كنت اصحى على بكاء وحدة فيهم اذكر يوم ان جرس بيتنا رن وانا وقتها كان عمري ١١ سنة واذا هي اختي عينيها منتفخه من البكاء وحالتها تحزن كان زوجها ضاربها كنت اقول انا لن اتزوج ابدا كنت اقول لامي انا بجلس عندك تقدم لي قريبي وانقلب كل هالكلام وهو اني شايفه الكل موافق وبيزوجني امي كانت رافضه بس خواتي اقنعوها بحجة انه رجل دين وان وضعه المادي جيد واننا لا نريد انها تعاني مثلنا للان اتذكر اخي الكبير وهو يقولي اذا ماوافقتي مابتدرسين هذي اخر سنه لك بالمدرسة مدري شصار ما اذكر اني رفضت او وافقت اذكر بس هو بكائي المستمر كان لساني مربوط بس دموعي هي كانت تعبيري الوحيد كنت خايفه قالو لي انه بيسمح لك تكملين دراستك هو موافق تكملين اتذكر لما رحت اشتري الجهاز كانت امي واخواتي ياخذوني لمحلات ملابس النوم كنت اقف عند باب المحل ما اشاركهم باختيار اي شي كان في مقابل محل ملابس النوم محل يبيع اشياء مدرسيه وملابس مدرسيه وكانت بداية عام دراسي جديد عشان كذا كان مزدحم بالبنات الي يشترون منه كنت انظر اهم بحسرة وغصة الموقف هذا مخلد بذاكرتي ماراح انساه ماكنت متقبلته لقريبي ماحبيته لا شكل ولا شخصيه ولا اي نقطة انجذاب له ليش كملت مدري مدري تزوجني اول شي انصدمت فيه انه ماخلاني ادرس بحجة انه ليه تدرسين مابخليك تتوظفي واذا بتدرسين عشان تتثقفين اقري بالبيت جيبي كتب واقري قالها لي انتي ماتبين تدرسين عشان الدراسة انتي بس تبين تروحين وتجين من المدرسة سكني مع اهله بغرفة واحدة فوق السطح كنت اطلع وقت النوم والصباح انزل لهم تحت اشتغل امه كانت ظالمه ظلمتني واستغلت صغر سني وضعف شخصيتي كانت تهينني دايما وكنت اسكت لاني اخاف منها وماكنت اعرف ارد لاني كنت شخصية مسالمة طول حياتي كنت اشتغل كل شي ببيتهم انظف واطبخ ومع ذلك ماكان يعجبها داىما تحقرني وتحقر شغلي كانو بناتها بعمري واصغر مني بكم سنه فقط كانو مدللات يدرسون وتخاف عليهم بس عتبي ماهو عليهم طبعا بناتهم غاليات عليهم ويدللونهم ماهم مجبورين يدللوني عتبي على اهلي الي زوجوني بهالعمر هذي مهمتهم كنت دايما ابكي حتى لما حملت بحملي الاول وانا عمري ١٥ ماكانت ترحمني كنت اتوحم واستفرغ من ريحة الطبخ وارجع اكمل طبخ ماكانت تطبخ عني زوجي ااه يازوجي كان يعرف كل شي بالدين كان واقف لي عالمسطره ممنوع المكياج واني ارمي عبايتي حتى لو بس حريم حتى لو رحت لاهلي مافي مكياج حتى العطور مايسمح لي اشتري بحجه بتعلق فيك لما تطلعين مافي تلفزيون بس الشي الوحيد الي مو معترف فيه هو بيت مستقل لي هذا مو من حقي ولا من الدين عانيت كثير بحياتي عانيت وتعبت كنت عايشه عالخيال فقط اغمض عيوني قبل انام كل يوم واتخييل حياة غير حياتي كنت اسافر بعالم الخيال لين اصحى ثاني يوم على واقعي زوجي كل مازله ينفرني منه كنت اذا طلعت معه على سوق او شي بس يهاوش بس معصب اذا سولفت معه قال قصررري صوتك كنت دايما اشوف الازواج ماسكين يدين بعض كنت اغار لدرجة اني اذا سفت زوجين يتكلمون مع بعض كنت اتمنى زيهم زوج اتكلم معه ويمزح معي زوجي كانت عيونه زايغه رغم كل الدين الي يدعيه ماكان يحترمني يطالع فيهم قدامي بس ماكنت اغار عليه ولا كنت ابدي له اي شعور لاني اشوفه رجل مقزز كان مقزز باخلاقة ومقزز بوساخته كان حتى مايعرف الفرشة والمعجون الكلام يطول ووالموضوع طال لذلك ما بكمل بكتفي بهالقدر
37
4K
يلزم عليك تسجيل الدخول أولًا لكتابة تعليق.

ياسمين
•
اذكر اني جرحت يدي بالسكين ورحت قلت لام زوجي شوفي انجرحت يدي قالت لي تستاهلييين تحسبيني بقول ياحرااام؟

ياسمين
•
عمري الحين ٣٠ صار عندي ٥ اطفال ومع ذلك ماقدرت اتخطى القهر ماقدرت ابي طريقة تخليني اتخطى وانسى ماقدرت اسامح اهلي ولا زوجي ولا ام زوجي احس كلهم ظلموني ابي اسامحهم عشان ارتاح ابي انسى

صحتك22
•
ياسمين تنسين بالدعاء لهم والصبر عليهم وانك تعبري الي تمري فيه امتحان واختبار من الله لصبرك والله يأجرك انتبهي تعاملين مع الموقف معاهم انهم وانهم اصبري وتعاملي معاه انه قدرك من الله ومحتاج صبر تسامحي معاهم والله يظهر الحق

ياسمين
•
صحتك22 :
ياسمين تنسين بالدعاء لهم والصبر عليهم وانك تعبري الي تمري فيه امتحان واختبار من الله لصبرك والله يأجرك انتبهي تعاملين مع الموقف معاهم انهم وانهم اصبري وتعاملي معاه انه قدرك من الله ومحتاج صبر تسامحي معاهم والله يظهر الحقياسمين تنسين بالدعاء لهم والصبر عليهم وانك تعبري الي تمري فيه امتحان واختبار من الله لصبرك والله...
انا بحياتي ماقلت لاهلي ليش سويتو فيني كذا كاتمه بقلبي طول عمري ولا مرا تشكيت لهم انا طبيعتي كتومه بس مدري متى بنفجر الحمدلله الحين عندي عيالي هم كل دنيتي بس يتم في مرحلة من عمري ناقصة وماعشتها وباقي اتحسر عليها

الصفحة الأخيرة