قصتي الحزينه ادعولي انا واطفالي

السلام عليكم
بكتب لكن مشكلتي عل وعسى القى دعوه او كلمه تريحني
انا موظفه وعندي ٣ اطفال صغار يعني ٤ و٣ سنين واصغر واحد سنه ونص
انا الحين ببيت اهلي زعلانه
بخبركوا سبب الزعل
صارت مشكله بين عائلتي وعائلة زوجي هم بالاصل قرايب بس صارت مشكله مع عائله من برا وما وقفوا مع اهلي كما هو معهود في مجتمعنا
المهم انا انصبت من زوجي واهله وحسيتها غدر
لانه اهلي ولا مره تخلوا عنهم
وقبل يومين اخوي الي صارت معه المشكله رن علي وقلي زوجك ما يستاهل تقعدي عنده ومن هالكلام وفالاخر طلب مني اجي اقعد عندهم يومين عشان يعني اعاقبه واخليه يحس بقيمتي
لاني دعمت زوجي كثير ماديا ومعنويا لان اول متزوجنا كان راتبه بسيط واحيان كثيره كان يطلعوه من الشغل وانا الي اصرف عالبيت وارها قبل اسبوعين سوا مشكله بالشغل واطلعوه وكنت شايله كل المصروف وعدلت البيت وحتى ديونه الي قبل اتزوج ساعدته فيهن.
نرجع لاتصال اخوي...لما طلب اجي عندهم رنيت ع زوجي لكن تلفونه مقفل وبعثت له رسايل برضو ما رد واستنيت موعد رجوعه من الشغل لكن تأخر فركبت اولادي السياره ورحنا على اهلي
المسافه قريبه ما تاخذ عشر دقايق بالسياره
ودايما اروح عليهم واجي
وانا عند اهلي بعثلي وقال ليش رحتي قلت ودي اشوف اهلي قلي قدرتي ترني عليهم تلفون قلت له ما بينفع اهلي عندهم مشاكل وودي اشوفهم
بعد شوي بعثلي وقال اذا بتغيب الشمس وما رجعتي خليك مكانك لا تروحي تلبيو بالليل
ما رديت عليه


بعد شوي رن ع اخوي وقله خلي اختك عندك


وهيني ببيت اهلي
اخوي طيب معي ومرته طيبه
ولي اخت غير متزوجه ساكنه ببيت تمي الله يرحمها لحالها واخوي هذا ساكن جنبها والباقي كلهم متزوجين
وابوي متزوج حرمه ثانيه وتكرهنا وفرقت بينا وبين ابوي.
وللعلم ابوي جدا مادي وقبل اتزوج كان غصب ياخذ من راتبي ويعتبر انه لازم اعطيه كل ما املك له ولمرته وهي طبعا انانيه وحسوده ولو احكيلكم عن الظلم و سنين العذاب الي شفناها منها ومن ابوي لما كنا صغار بعد م امي توفت شعر روسكوا بشيب
الحين ابوي لقاها فرصه ينتقم من زوجي وزوجي الغبي معند وما سأل عنا انا واولاده لو سؤال
وبنتي الكبيره الي عمرها ٤ سنوات جدا معذبتني ودها ابوها وكل يوم تبكي .
والله تعبت وندمانه الي اخترت هذا الانسان اكمل معه حياتي لانه استفزازي ولا يفكر قبل يتكلم وشايف نفسه وكثير حاولت اخليه يحب الناس ونحط ايدينا بايدين بعض عشان تمشي الحياه بس ما تعدل. لاكن والعالم الله اني غصب قبلته ودي افتك من ظلم ابوي وزوجته.
ادعولي بهالايام الفضيله ربي يحفظكم