قصتي ... الزوجه الثالثة ..،،

مشكلتي مشكله وأبي رأيكم
أنا يا بنات ..ياسيدات ..
مطلقه وعندي 3 أطفال وعمري 29 سنه
أسباب طلاقي من زوجي حسد عشان كنت مره سعيدة معاه
المهم صار الانفصال
وجلسة عند أهلي 5 سنوات وكل اللي يتقدموا متزوجين
وأنا شلت من راسي الزواج وكملة دراستي وتخرجت ولا وظايف ولا شي وحسيت أني عاله على أهلي لا تقولون اهلك ويشيلونك أهلي مسؤلين عني بس مو عن عيالي المهم قلت أتزوج احسن منها احد يسكني ويصرف علي عشان كان بيت أبويه صغير المهم جاني عريس الغفلة .....
متزوج من زوجتين ووضح انه الأولى قاطع علاقته فيها والثانية مو مرتاح معاها ولا تقولون ليش وافقتي على واحد متزوج ثنتين انا مدري هو عشان بنفك من بيت أهلي ولا عشان كرهت كلمة مطلقه المهم ملكة
ومشية الأمور وتزوجت في شقه جنب أهلي ... هذا طلبي وطلبه في نفس الوقت عشان ينفك من طلباتي واخواني يجيبون طلباتي... عشانه ما يحب الخروج ولا الروحه والجيه .......

طلبة الزوجة الثانية تشوفني ومن هنا الغلط من شاقتني وزادة غيرتها وصارت تحكمه ما يجيني
تقولن ليش يسمع كلامها عشان عنده منها 5 أطفال ويخاف على أولاده
لأن كل مره تهدده تروح بلدها (( هي ماهي سعوديه )فمن هذ1 المنطق يخاف منها وين يخلي عياله .. أنا ما لومه ... من حقه يخاف على عياله ....
يا بنات من يوم تزوجته والله العظيم ما يجيني إلا بعد العشاء وإلا الساعة 10 المساء وينام ويصحا الساعة 8 الصبح ويروح يقولي هناك بيتي وعيالي
ظالمني بحقي ولا يجيني إلا بالشهر مره كل مره يجي فيها نتزاعل ويجلس أسبوع ولا أسبوعين متخاصمين يعني بالشهر مره ولا مرتين يجيني رضيت بس لسانه سليط و الإهانات يا بنات والله تعبت مره
الحين هاجرني .....
وأنا خليته يصالح الأولى ورجع لها يعني الحين ماشوفه مره مدري ليش سويت كذ1 اللي في مكاني ماتصالحه تقول مالي صلاح بس أنا موكذ1 اللي مرضاه لي مرضاه على غيري أنا مدري وش أسوي الحين كل مره يجي فيها لازم تصير مشكله عجزت افهمه والله يا بنات كل الليالي الرومنسيه اللي في النت ومنتداكم سويتها وكل الدلع سويته وخليته لمن يجيني كأنه ملك بس مافاد فيه .. أناني ... مره ...
وهو معجب بذوقي ولبسي عشان شياكه واحب اهتم في نفسي
من حمام مغربي وعناية في بشرتي
حتى بيتي أنا اسوي ديكوراته من من تنصيق والستاير انا اخيطها
واهتم كثير بترتيب وهو متعجب يقول معقول فيه وحده مرتبه كذا....
بس الحين صار ما يشوف مني شيء مدري ليش وش اللي غيره علي .... وزادة مشاكلنا ...
الحين صار لي متزوجة 9 شهور وكما هو الحال وزادة الأمور تعقيد لمن توفى الوالد من 4 شهور
يعني مافي احد اعتمد عيه ...
من أول كان الاوالد يصرف على عيالي
وشايل نص المسؤليه عني
وهذا اللي مخلين مستحمله أهنات زوجي لي
لا طلعات ولا خروج ولا مصروف ولا شي بس اللهم شقه جالسه فيه وانا اصرف عليها واكل عند أهلي عشان شقتي قدام شقتهم
يعني مافتكو مني لا قبل الزواج ولا بعده
أنا محتارة يا بنات اطلب الطلاق ولا كيف...؟؟؟؟
مرتاحه انا في شقتي كل شيء لي وتعرفون الوحده ماترتاح الا في بيتها
ومابي ازيد الحمل على أخويه هو شايل مصاريف أخواتي وأمي بعد الوالد....
مره اقول اتطلق ومره أقول ليش عادي وش فيها اعيش كذ1 زوجة مع وقف التنفيذ....
و عليه إهمال مو طبيعي مره ولا شفته في أحد ابد

وقبل يومين كلمتني زوجته الثانية تصالحنا على بعض وتفأجة أنه قالها على سبب الزعل .. تخيلوا أنا مآبي أقولها عشان لا يتخاصمون
يعني مآبي أعكر عليهم ولا أبيها تدري عشانها بكره بتسويله سالفة
وتخلقله مشاكل ...
وهو ما يفهم ...وانا حذرته كثير وأقوله اللي يصير بننا لا تعلم عليه عشان أخاف تجيه مشاكل مع حرمته يعني انا أخاف عليه وعلى حياته ...
والله العظيم يا بنات اني لو أبيه ضروري أرسل كول مي ولا رسالة فاضيه عشان مشاعر زوجته
ويتصل بي بعد ساعتين أو 3 ولمن يكون عندي
أول رنه يرد عليها ....... سبحان الله ....
ليه مهمل كذ1 وكل مره يقول أنا شاريك
أنا عارفه أنه يحبها ومالي صلاح في هذ1 الشيء بس ابي العدل بس
في اول ليله ما جلس عندي يا بنات نام ومشي في الصباح
وبعد فتره وجعت زوجته الثانية مرض الله يكفيكم شره
مرض نفسي ومدري وشو جلس عندها تقريبا شهر ونص ما شفته وانا عروس
سكت وقلت لازم يوقف جنبها
مدري هي تمثل ولا من جدها وتعبانه والله مدري

الله يخليكم انا مابي إهانات ولا تجريح ولا وحده تجي تقولي تستاهلين من قالك ترضين ...
محد مر بظروفي أنا مريت بظروف ربي العالم فيها
أنا ما كتبة هنا إلا ابي مشورتكم
ورائكم
والي تبي تسب ولا تتفلسف الله يخليكم أنا مو ناقصة
اللي فيني كا فيني والله تعبانه مره استخرت ورحت الحرم ودعيت وصليت واستخرت ولازمت الاستغفار ...
سويت كل شيء والباقي على الله....
أبي مشورتكم يمكن ألاقي بصيص أما أكون غافله عنه ...
مشاء الله فيكم الناصحة والفاهمة والحكيمة لأحد يبخل علي الله يخليكم
و أدعولي أنه ربي يرجعه لي وأعيش ما بقى من عمري
مرتاحة ...
أشكركم ,, طولت عليكم والله ادري بس من حر ما فيني
سبحان الله ..... والحمد الله ....... والله أكبر .....