قصتي باختصار

السلام عليكم خواتي يعلم الله كم انا دايم ادورمعكم لحلول بمشاكلكم بالدعا لكم
وصراحه ودي افضفض لاني امر بمشاكل كبيره وماني قادره اواجهها لاني احس كل الظروف ضدي..
وانا الله يخليكم ابي منكم تدعون بان الله يشغل اختي باللي يصدها عني تصدقووون دايم تدعي علي وتفرح اذا شافتني اصيح او مكتئبه ...
السالفه ياخواتي هي امي واختي الله يهديهم
دايم يشتموني مع اني والله اقوم فيهم بمايرضي الله كان عندنا خدم من اول ماخلصت دراسه وهم يبيعونهم يقولون انتي اثبتي وجودك وليش احد يخدمك وانتي جالسه مع ان اختي قبلي بسنتين جالسه بالبيت كذا وقلت ماعليش يابنت اخدميهم هم برضوا اهلك وكنت اول الوقت اخدمهم بعيوني لكن بعدين طفشت من كثر مايزنون عليا باني مااسوي شي واني فاشله بكل شي..وانا والله عكس كذا بس كل مافي المشكله ان شخصيتي غير عن شخصية امي واختي هم الله يهديهم فيهم برود غير طبيعي وانا ع قولة اخوي هبة ريح مثل ابوي الله يرحمه واخواني يعتمدون علي بشكل فضيع وانا اتوقع هاذا سبب كرههم لي لان ابوي وامي كانوا ع خلاف قبل وفاته..
حاولت اغير من شخصيتي واتظاهر بالبرود بكل شي بس ماقدرت واختي كل مااسوي شي ويمدحوني اخواني تزعل وتروح وتقول لخالاتي باني مغيره اخواني عليها وهينا تقوم الدنيا علي وكل شوي تجيني رساله منهم شكل قسم بالله لاقريتهن ودي احرق نفسي واخلص
اللي يهون علي ان اخواني يبينو ليا اني اسوي كل شي زين وامي اذا شافتني اسولف مع اخواني تقول خلاص تعبتينا انتي ماتعرفي تسكتي واذا سكت تقولي انتي ليش ماتهرجي انت انطرمتي وحنا ماعندنا علم ..ومره بيوم اخواني كل شوي واحد يتصل يبيني اجهز له اغراض يبي يطلع مع اصحابه وكنت منزله جوالي عند امي ويوم دخل اخوي قال وينك جهزيلي كذا وكذا ورحت وانا راجعه اسمع امي تعاتبه تقول ليش ماتتصلون عليا وقال ياامي انا ابيها تجهز اغراض مو داق سوالف ..
وتدرون يابنات امي واختي مسجلين بدار تحفيظ من سنتين لكن اول ماسجلوا شفت انهم ماتغيروا حتى تاخير الصلاه ماخلوه وقلت ليش ماتجلسوا بالبيت وتحفظوا ع مهلكم اخاف عليكم من الاثم وتدخلون في النفاق لكن فاجئوني يقولون يجون تعبانين ولازم يرتاحون ويئخرون صلاة المغرب والله يابنات ان كل الصلوات تتاخر لكن مابيدي شي مااقدر اقولهم شي اخاف يزيدون علي وهم بس فالحين قدام الناس يقولون حنا مشغولين نحفظ قرآن واذا جونا ضيوف بس يسولفون انهم يقرون قران ويسمعون محاظرات دينيه لكن انا الله ماهداني ع قولتهم مااروح لدار احفظ معهم وانا يابنات ماازكي نفسي بس الحمدلله اصلي واصوم تطوع واقرا قران بس بالبيت واختي اللي تحفظ قران قدام الناس ماتتابع الامسلسلات تركيه ودايما تحلف كذب قدام خالاتي وتسوي الشي وتحلف ان انا مسويته ..وانا احب المطبخ كثييير ودايما اشتري اغراض له واذا احد مدح اغراض من المطبخ امي ع طول تقول انه هيا اللي اشترتهم او اختي وانا ماتذكرني وتقول حنا عندنا ذوق بكل شي وتعطيني نظره..واذا جوها ضيوف لازم انا اسوي كل شي واستقبل الضيوف واختي ع راحتها متى ماصحت ومع كذا ماتسمع لغيرها وانا دايما ع خطا..
كنت اول اذا مرضت اكون بغرفتي تدرون من يطل عليا الخدامه البوذيه كل شوي تمر علي وباخر اليوم تجي تنام عندي وامي ماكلفت نفسها تسئل عني او تعطيني علاج ..والشغاله الله يوفقها وين ماراحت تمسح على راسي وانا مسدوحه بالسرير وكنت اتمنى ا ن امي هيا اللي تمسح عليا..امي الله يهديه كل ماتعبت وخاصه ايام الدوره اسئلها وش اشرب تقولي دبري نفسك انا ربيتكم وانتم صغار خلاص كافي مع اني قسم بالله توفى ابوي الله يرحمه وانا اولى ابتدائي ومن ذاك الوقت احس اني فقدتهم ثنيناتهم امي ماعدت احس بوجودها بحياتي صارت تشوفني شي ماله داعي بالحياه
اتذكر وانا بالابتدائي يمكن صف ثالث اورابع كان خالي يجيب حوايج من البقاله لنا وامي اذا جت توزع لخواني واختي تمدلهم بايديهم الا انا تطشه عليا من بعيد <<الله يخليكم ادعولي كل مااتذكر الموقف ابكي..
والحين كبرت عمري22وكل مااشتري شي تروح من وراي وتفتش باغراضي وتقيسهم وترجع تعيب ع لبسي قدام اخواني هاذا غير ان غرفتي لازم كل يومين تروح تفتش باغراضي واختي تتعبث بملابسي ويطلعون ويخلون الغرف هوانا اجي مهدود حيلي من المطبخ ابي ارتاح الا غرفتي ماهي اللي انا مرتبتها من شوي
وغير ان الشي اللي اجيبه لامي هديه ماتلبسه لو وش ماصار واختي تجيب أي شي وتقعد تمدح فيه كل ماشافتني قدامها وتدعيلها بالتوفيق..ومره كنت اسولف مع جارتنا وجت وسئلتني عن شي وجيت برد الاامي تقول ماعندها سالفه ليش تسئلينها وانا انحرج وجتها فتره تقولي تدرين صار كذا وكذا اكيد بيسئلك اخوك<تقصد الكبير موعايش معنا>وفعلا اذا جا سئل اجاوبه وشوي وتجي الا كل شي قالته لي كذب تبي تطلعني كذابه قدامه..ايه نسيت اقولكم اخوي هاذا الكبير ماتدعي علي قدامه وتسوي كنه عادي الوضع بس دايم تجيب كنها مزحه باني مااسوي شي وقتي يروح في النت وانا والله مااجلس ع النت الابالليل بعد ماتنام ومره قبل كم شهر جاني اخوي العصر وقال بنطلع نتمشى بالسياره وش رايك انا فاضي و عشان ماتطفشين وقلت طيب بستئذن من امي وكلمتها وهي بالدار وقلت لها الااخوي يقول خلاص يمه بتطلع معي وقالت طيب لكن والله ماتهنيت بالطلعه كل شوي تتصل عليا وتقول ليش مارجعتي حتى اخوي طفش قال انا بمشيك تغيرين جو وانتي كل شوي اتصال واخذ الجوال بيقفله بس انا خفت قلت لاابي ارجع بسوي العشاء بدري وفعلا رجعت وحسبت عليا طلعه مع انها كلها ساعه اذا مو اقل لكن امي بعدها تقول بروح وانتي اجلسي كفايه طلعتي ذاك اليوم..
تدرون امي طول الوقت تدعي علي بالموت قدام اخواني واختي واخواني اللي يسوونه يخرجوا ويخلوا البيت ومايرجعون الاالفجر ويمروني بالغرفه كنهم يسولفون يبون يشوفون نفسيتي
انا يابنات صابره بس احيانا اشك ا ن امي مو امي مومعقوله انا بنت بطنها وتعاملني كذا ..!!

مره الشيخ العوضي قال اذا الله رزقني بام واب صالحين هاذا مايعني ان غيري يعاني من عقوق الاباء وفعلا يابنات صرت افكر اني لوبموت هاذا اكبر خبر يفرح امي واختي للاسف بس هاذا الواقع
صراحه مره صديقتي طلبتني لاخوها وهو ماشاء الله ماينعاب لاهو ولاعيلته بس انا رفضت مابغيت افتح ع نفسي باب بحكم ان اختي اكبر مني وامي كل ماسمعت ان وحده تزوجت تقول ماشاء الله هاذي البنت مو انتي ..والحين صديقتي وحده ثانيه تلمح تبي تطلبني لاخوها وانا صراحه ودي اتزوج واهرب من بيتنا ومن امي واختي ..وش الحل ؟؟
وانا تعبت صراحه من نظرة اللوم اللي دايما موجهه ليا وان انا لازم اتعب واكسر يديني عشان اوفر لهم حياه متكامل هوانا اقل شي الراحه محرومه منها..ويكفي قبل كل شي اني 15سنه محرومه من ضمة امي وهيا عايشه وبنفس البيت اللي انا فيه
ماقول الاالله يرحم ابويا كل مااتذكره اطلب ربي اني انحط بقبره يمكن الاقي بقبره اللي مالقيته بقلوب اللي عايشين معي..
ابي منكم حل يريحني في حياتي وانكم تدعون لي من قلب ان الله يكفيني امي واختي ودعاويهم ويخللي لي اخواني ويحنون علي اكثر ويزوجني الله الرجال الصالح اللي يخاف الله فيني والله اكتب واحس اني اكتب بدم قلبي ودموعي ملت وجهي..صرت ماانام الاودموعي سابحه ع مخدتي اتذكر دفا يد ابويا وشلون لوهو عايش كان حطني جوا قلبه وماخلا احد يجرحني ولو بشي بسيط