قصتي بخصوص ذكرى زواجنا>>خرج عن أدب الحوار

السلام عليكم..
قصتي هذه بخصوص ذكرى زواجنا..
على الساعة 9 و نص دخل زوجي البيت و معه بشت و قالي بسرعة اكوي لي ثوب من احسن ثيابي على بال ما اتروش... انا انفجعت و بديت اشك فيه وش عنده و وين بيرح له..
بالرغم من اني متاكدة مية بالمية ان الليلة ذي ليلة زواجنا يعني لازم اسوي له مفجأة او هو يسوي شي ...
المهم تروش و طلع و تعطر و كشخ كانه معرس,, و جاءني و قال البسي اوديك بيت اهلك..
و سالته وين بتروح .. قال : الليلة زواجي و باخذ عليك الثانية و لا تنقشيني انا قررت و الجماعة ينتظروني..
و انا شهقت و بكيت و سالته وش انا مقصرة فيه ...
المهم لبست عباتي و اخذ اطفالي و بالطريق مرّ بيت اخته و نزل الاطفال اعمارهم 5 سنوات و الكبير 9 سنوات...
و اخذني لمكان و وقف عند فندق و قال لي انزلي ابيك تساعديني في اغراض و ترتبين لي الغرفة لاجل تكون جاهزة لزوجتي الثانية..
قلت له.. حرام عليك تقتل القتيل و تمشي بجنازته.... رد علي و قال انزلي و لا يكثر هرجك
نزلت و طلعنا للفندق و هو كاشخ و لابس بشته
و يوم دخلنا الفندق و شفت الصالة قام زوجي سحبني من ايديني و جلنسي على الكنبة و قالي : ايه ترا الليلة زواجي ... و انتي زوجتي الاولى و الثانية و الثالثة و الرابعة و كل ما املك
انا هنا شهقت شقهة فرح و تبدل الحال من الحزن للفرح
و هو يبتسم... و قالي سكري عينيك و جاب لي خاتم ذهب و باقة و رد و ظرف فيه 1000 ريال
و قال انت قدرك عالي و هذا شي بسيط مني لك...
و بعدها قام و راح صوب الثلاجة و جاب ذيك الكيكة اللي مكتوب عليها احبك يا مروج
و بعدها جلسنا نتكلم و رقدنا و اليوم الثاني على الساعة 10 الصبح قبل صلاة الجمعة اخذنا فطور و مرينا الاطفال و اخذنهم و رجعنا بيتنا

بصراحة زوجي فجأني امس و تراه اول مرة بحياته يتذكر ليلة زواجنا و لا بالعادة انا اللي انيم الاطفال و اهيأ له الجو و بدون هدايا و لا هم يحزنون...
يا رب احفظني و احفظ لي زوجي و طول بعمره يا رب


نصحية لكل وحدة احتوي زوجك و صدقيني بيحتويك :)